《台語kah魔術》

 | | | 轉寄

1221~22冬節魚冬節圓

作者 蘇晏德 2023.12.17

＊Tang-tseh-hî tang-tseh-îⁿ
＊冬節魚冬節圓
Sió-seh kòe liáu sī tōa-seh
小雪過了是大雪
Tōa-seh koh kòe sī tang-tseh
大雪閣過是冬節
Tang-pak kùi-hong hu-hu-tshue
東北季風hu-hu吹
Mê siōng tn̂g o͘-hî lâi tsò-kheh
暝上長烏魚來做客
Hî-bîn nî-bóe ê hō-lé
漁民年尾ê賀禮
Ta̍k-ke lâi so îⁿ-á-tshè
逐家來挲圓仔粞
Huaⁿ-hí tsia̍h îⁿ ke tsi̍t-hòe
歡喜食圓加一歲
Kiâm-îⁿ bí-ko môa-iû-ke
鹹圓米糕麻油雞
Tang-tseh tīm-pó͘ kò͘ sin-thé
冬節燉補顧身體
Siàu-liām tsó͘-sian lâi hiàn-tsè
數念祖先來獻祭
Tsoân-ke tōa-sè thoân-îⁿ tsē
全家大細團圓坐
Pêng-an hí-lo̍k kòe tsi̍t-mê
平安喜樂過一暝