《台語kah魔術》

 | | | 轉寄

1225聖誕節~啟應文

作者 蘇晏德 2023.12.24

路竹教會聖誕節感恩禮拜~啟應文
啟：十二月份過聖誕，聖誕鐘聲當咧霆
Khé：Tsa̍p-jī gue̍h-hūn kòe Sèng-tàn，Sèng-tàn tsing-siaⁿ tng teh tân
應：耶穌降生拯救咱，賜咱福氣佮平安
Èng：Iâ-so͘ tàn-sing tsín-kiù lán，Sù lán hok-khì kah pêng-an
啟：二十四暗平安暝，等待耶穌來出世
Khé：Jī-tsa̍p-sì àm pêng-an-mî，Tán-thāi Iâ-so͘ lâi tshut-sì
應：生佇馬槽真卑微，博士揣人靠天星
Èng：Seⁿ tī bé-tsô tsin pi-bî，Phok-sū tshōe-lâng khò thiⁿ-tshiⁿ
啟：二十四暗報佳音，人人祈禱備辦心
Khé：Jī-tsa̍p-sì àm pò ka-im，Lâng-lâng kî-tó pī-pān sim
應：信徒彈瑟閣彈琴，迎接救主來降臨
Èng：Sìn-tô͘ tôaⁿ-sik koh tôaⁿ-khîm，Ngiâ-tsih Kiù-tsú lâi kàng-lîm
啟：12月二五聖誕節，救主耶穌來降世
Khé：12 gue̍h jī-gō͘ Sèng-tàn-tseh，Kiù-tsú Iâ-so͘ lâi kàng-sè
應：伯利恆城真美麗，歡喜歌聲滿四界
Èng：Pik-lī-hêng-siâⁿ tsin bí-lē，Huaⁿ-hí kua-siaⁿ móa-sì-kè
啟：曠野周圍真恬靜，天星閃熠現光明
Khé：Khòng-iá tsiu-ûi tsin tiām-tsēng，Thiⁿ-tshiⁿ siám-sih hiàn kng-bêng
應：獨生聖囝佇天頂，為救萬民來降生
Èng：To̍k-seⁿ Sèng Kiáⁿ tī thiⁿ-téng，Ūi kiù bān-bîn lâi kàng-sing
啟：上帝恩典佮疼痛，救贖萬民用苦工
Khé：Siōng-tè un-tián kah thiàⁿ-thàng，Kiù-sio̍k bān-bîn ēng khó͘-kang
應：耶穌降臨拯救人，普天同慶對天降
Èng：Iâ-so͘ kàng-lîm tsín-kiù lâng，Phó͘-thian tông-khèng tùi thiⁿ kàng
啟：獨生聖囝主耶穌，為著人類來受苦
Khé：To̍k-seⁿ Sèng Kiáⁿ Tsú Iâ-so͘，Ūi-tio̍h jîn-lūi lâi siū-khó͘
應：阮欲大聲來歡呼，感謝救主引tshōa路
Èng：Goán beh tōa-siaⁿ lâi huan-ho͘，Kám-siā Kiù Tsú ín-tshōa lō͘
啟：耶穌出世馬槽內，聖誕歌聲報人知
Khé：Iâ-so͘ tshut-sì bé-tsô lāi，Sèng-tàn kua-siaⁿ pò lâng tsai
應：毋管古今佮未來，耶穌佮咱永同在
Èng：M̄-koán kó͘-kim kah bī-lâi，Iâ-so͘ kah lán éng tông-tsāi