《台灣人e5先覺─黃彰輝傳》

 | | | 轉寄

青山學院ê少年留學生

作者 張瑞雄 2009.03.22

　　少年ê黃彰輝讀3年ê中學，就感受tio̍h生做台灣人ê悲哀。雖然長老教中學（簡稱長中）是台灣siōng早、siōng優秀ê中學，tī殖民地政策之下，無法度直接報考高等學校，ia̍h-sī專門學校，mā無升學ê機會。 文章內容 　　少年黃彰輝讀3年ê中學，就感受到生做台灣人ê悲哀。雖然長老教中學（簡稱長中）是台灣siōng早、siōng優秀ê中學，tī殖民地政策之下，無法度直接報考高等學校，ia̍h-sī專門學校，mā無升學ê機會。父親黃俟命牧師本身就tī長老教會中學做教師，有真身ê無奈，因此不得已，tī 1930年 3月，hō͘ 15歲ê kiáⁿ到青山學院中等學部，留學一年。黃彰輝為tio̍h求上進，不得以離開siōng愛ê母校，往青山學院中學插班第四年。Tuì án-ne辭別siōng愛ê長中，到東京去求學。

　　青山學院是美國北部ê衛理宣教師tī 1874年創設，比台南長老教中學早 8年。開始ê時tsūn是中學，到1920年後期就設有：1、本部；2、神學部；3、高等學部；4、中學部；5、高等女學部，等 5部。所以當1930年，青山學院已經是有56年久長歷史ê學園lah。

　　當黃俟命為tio̍h kiáⁿ黃彰輝，考慮去日本ê基督教學校爭取中學畢業ê資格ê時tsūn，tī青山學院中學部做部長ê是阿部義宗牧師。Tú好，tī 1929年ê熱天，阿部部長kàu台灣做北部長老教會青年夏令營ê講師。伊mā安排行程，kàu南部訪問台南長中。Tī青山校刊『高潮』內底，伊用『台灣紀行』為題，記述tī台灣ê視察旅程，其中有關台南，伊講：

『tī台南，有青山學院中學部ê學生10 guā名。這tsi̍t工（8月6日），kap李穆逸、吳天註、吳來成、方逸川、楊贊勳、林新振、黃顯章、黃彰輝等人會談。這tsi̍t陣青年tuà tī南國，受健康ê恩惠kap家庭ê疼愛，tī故鄉ê山河內底休睏娛樂，歡頭喜面，帶hō͘我無限ê感懷。』

　　頂面tī記事頂頭，吳來成kap黃彰輝已經hō͘阿部牧師列做青山學院中學部ê學生。因為阿部牧師ê『台灣紀行』是1930年刊載，可能伊想應該kā nn̄g-ê新生包括tī內面。按照黃彰輝ê回憶，黃氏父子lóng受tio̍h阿部牧師親身答應，ài免試接納siōng優秀ê台南學生插入青山中學部4年á。原來是受tio̍h阿部牧師ê允准kap歡迎，長中就決定派黃彰輝kap吳來成去東京ê青山學院中學部求學。

　　黃、吳，nn̄g-ê學生離開長中（1930）hit年，阿部義宗iáu是中學部ê校長。隔tńg年ê 1931年，伊轉任青山學院神學部做部長。Koh tī nn̄g年後ê 1933年，接任青山學院院長。後來，tī 1939年，受tio̍h tī美國ê衛理海外宣教處任命，做日本衛理教會ê第6任會督。伊就ná-ne tī jī次世界大戰以前，mā tī所有日本基督教教派受政府ê壓力，組成日本基督教團以前，做日本衛理教會ê siōng高ê領導者－『會督』。

　　1930年，天氣寒冷ê 3月初，黃彰輝kap吳來成tuì基隆坐輪船，向日本出發。當時往返神戶kap基隆ê主要輪船公司，有近海郵便船株式會社kap大阪商船株式會社，單程ài 3工guā tsiah ē-tàng到目的地。到神戶就beh坐火車，向東上東京，差不tō ài tsi̍t工。對iáu-sī少年ê彰輝，這是頭tsi̍t pái『過鹽水』，離開故鄉台灣。後來伊講，伊會記ti̍t坐船，m̄-koh記無清楚án-tsuáⁿ tuì神戶坐火車到東京。心內連tsi̍t點點ài觀光日本ê想法lóng無。佳哉趙天慈老師（黃彰輝叫伊『同年爸』）tú好tī東京，就去接in nn̄g-ê學生。（請看本冊p.18，註五，趙天慈為趙爵祥ê kiáⁿ）

　　青山學院中學部kap高等部ê新教室tú好是tī 1929年落成，黃彰輝算是看tio̍h鋼筋水泥建造..e、新koh氣派ê校舍。戰後，tuì 1949年青山學院設立大學部以後，以前ê中學部kap高等部ê nn̄g棟校舍就改為大學部ê校舍。

下圖是1930年代後期建設ê青山學院中學部kap高等部ê nn̄g棟建築物，戰後改為大學部ê校舍。(青山學院史料館提供)

　　tú到日本，有趙老師照顧，心肝感覺lóng bē kiaⁿ。M̄-koh就tī暗時，黃、吳兩ê少年接tio̍h通知講，10天了後ài受插班考試。Koh聽講，想beh插班ê有25名，中學部kan-tāⁿ預定錄取4、5名niā-tiā。Nn̄g-ê學生根本無準備，mā m̄知ài tuì siáⁿ-mih所在準備，所以受tio̍h tsiok大ê挫折。當然，tsit場考試ê結果是慘敗，受真大ê打擊。黃彰輝大失自信kap體面，感覺見笑kap失望。Tī伊ê《回憶錄》內底描述當時ê心情講：『我甚至想beh自殺。』佳哉，經過趙老師ê交涉，校方hō͘伊恩典，試讀tsi̍t學期。In特別交代講：『kan-tāⁿ hō͘ in tsi̍t學期，若讀bē來，就ài強迫退學，送tńg去厝nih。』按照《回憶錄》，hit學期，伊『空前絕後』ê打拚讀冊，因為這是唯一為家己，為『吾校』（長中），mā為『阮台灣』（咱ê台灣），回復榮譽ê機會。結果，第一學期，伊kap吳來成lóng進入 200 ê同年級ê 30名以內。In ê piàⁿ-sì，真無簡單達成願望。第jī學期就tī分四班ê各班內底，黃，吳lóng進入5名內。黃彰輝感覺台灣ê學生，ē-tàng tī日本人ê本土競爭，得tio̍h勝利。台灣人tī殖民政策之下，是真正有差別待遇，hō͘台灣人看起來，無日本人hiah-ni̍h優秀。因為第jī學期ê成績，伊kap趙老師tsham-siông以後，就大膽向教務主任安井正男請示，kám ē-tàng跳級，直接考高等學校。教務主任贊成伊ê志向，講：『ē-sái試看māi，若無考tiâu，mā為明年ê考試加tsi̍t-pái經驗。』結果，hit年tuì修4年課程ê學生內底，全校kan-tāⁿ有黃彰輝tsi̍t-ê人考tiâu公立ê高等學校（台灣高等學校）。安井tī校刊『高潮』內底講：『tuì私立學校考進公立學校外困難！總共有40名青山中學學生（iáu未畢業者）報考，若有十分之一考tiâu就bē-bái lah。』
tī青山中學部，黃彰輝kap其他30-ê同學同齊tuà『學寮』內底。Tī伊ê寮內，有nn̄g-saⁿ-ê年長ê神學生，受學校派遣，來照顧in。有tsi̍t-ê同寮同學叫『鈴木敏道』，kap伊成做好朋友。鈴木就是 5年guā以後，無phah算、奇蹟..e，當伊往tī英國ê時tsūn，tī所坐ê輪船『鹿島丸』頂頭，做客務人員ê幹部。Tī青山hit年ê生活，hō͘伊開了新眼界，因為伊uì像鈴木hit種ê同學kap教師內底看見，日本人tī in家己ê鄉土，展現出來ê人性ê tsi̍t面。有tsi̍t-pái，教歷史ê老師田中先生（tī黃彰輝ê《回憶錄》內底，伊講是『田中』，不過，教師ê名錄內所列ê歷史老師是朱牟田轍），tī教冊當中忽然改變論題，講：『新聞上所報導..e，tiāⁿ-tiāⁿ lóng kap事實無符合。某某事件，滿州事變，lóng是編造出來..e。』伊bat tuà tī滿州，tú tńg來無juā久，tī hia目睭金金看tio̍h日本對鄰國犯侵略ê行為，kap tī本國內官方所報導ê新聞有出入。Tī軍國主義ê統治之下，敢án-ne ê發言、教學，就是因為教師照聖經ê，尊重上帝ê統治，kah自由、公義、先知ê傳統，tsiah ē-tàng發揮tsit種大無畏ê風氣。


　　青山學院中學部tī 1929年所公告ê招生簡章內底，註明中學ê設校要點是：


『1、本中學部是依照基督教主義施行kap中學校仝程度ê教育。2、享有tī升學kap兵役方面ê特典，kap官立中學校無任何無仝。』（昭和 5年度tī招生簡報）


學院院方對tī國家主義，特別tī政府ê『軍事教官』ê介入tī基督教主義學校ê信念方面，發表聲明講：


『m̄-nā無衝突，iáu ē-tàng評價做是互相有補助。』（石阪正信院長昭和五年、六年報告。）


真可能，tī日本ê基督教育界內底，án-ne『合調』ê意圖，漸漸tī意念內底調和、合理化。Tuì tsit-ê時期開始，kui-ê日本ê基督教會，無分教派，lóng已經列入軍國主義射程目標之內。阿部義宗經歷青山學院中學部、神學部等部長，koh tī 1933年接掌全學院。6年後ê 1939年做日本衛理教會ê siōng高領導者－『會督』。當時，基督教會受政府ê壓力，tú-teh作『合一』ê工作，thang講得tio̍h tsi̍t-ē有tsâi-tiāu ê指導者阿部義宗。所以tī進行『合一』事工ê期間，伊做『日本基督教連合會會長』，引進到成立日本基督教團ê時tsūn，伊就做創立ê議長。1941年受政府ê輔導（斡旋）當『日本宗教大同連盟理事長』，替日本國做基督教『外交官』，tī日本占領下ê中國活動，it直到大戰ê終局。Tī軍國主義ê壓力之下，伊算是tuì家己ê良心會tit過，對tī國際之間、人際關係有幫赞ê tāi-tsì，mā thang講是為上帝國ê來臨盡tsi̍t分職責。


下圖是自1930年初建，留到tsit-má ê青山學院中學部ê校舍。(張瑞雄攝影)



　　tī青山學院短短ê tsi̍t年內，黃彰輝tsi̍t方面盡tsi̍t-ê學生ê本分，phah-piáⁿ用功，認真研讀學業，無管別ê tāi-tsì。另外tsi̍t方面伊mā確實浸身tī啟蒙性..e、自由主義ê環境內底，撥開目睭，清醒腦筋，體驗到尊重正義、kah意和平ê日本人，尤其是基督徒做ê『見證』。Tī伊考進台灣高等學校以後，tī高等學校ê表格頂面，註明伊ê出身學校是青山學院。青山學院就是日本政府唯一hō͘伊認同ê中學學籍ê學校，伊確實bat以出身青山為榮。M̄-koh，真實si̍k-sāi黃彰輝ê人lóng知影，伊本身kap後輩lóng以伊是『台南長榮中學』出身為siōng大ê光榮。因為tī學府內底，伊ê家庭、伊ê教會，融合作伙，成做伊ê為人，培育伊ê智慧kap知識ê栽培kap薰陶ê根源。M̄-koh，kan-tāⁿ tsi̍t年ê學籍，就不得不公開聲稱，黃彰輝ê出身學校是青山學院，m̄是長中。這是軍國日本對台灣人施壓迫ê結果，mā是殖民主義下台灣人ê悲哀。感謝上帝，tī看起來無出路ê時，hō͘伊預備tsi̍t間學院，thang hō͘黃彰輝有tsi̍t-ê跳板，thang得有效ê上進升學ê途徑。


　　tī tsia值ti̍t提出來講ê是，黃彰輝tuì 1922年到1931年ê 9年內，經歷台南師範附屬公學校、台南長老教中學校kap東京青山學院中學部三所學校。M̄-koh，伊lóng無享受畢業ê榮光，mā無領到畢業証冊。所承受e是崎嶇歹行ê途徑，艱苦ê道路。M̄-koh，值得大大慶幸ē，就是苦難hō͘伊成做神所beh重用，為台灣kap世界造益ê器具。


下圖是tsit-má ê青山學院大學部ê校門，tsit-ê學府tī 80年以前己經是包含小學到專科部ê綜合學院。(張瑞雄攝)



下圖是青山學院總院－本部校門。(青山學院史料館提供)



台灣高等學校


１考驗kap獻身 根據黃彰輝ê《回憶錄》，伊一生所受ê考驗當中，siōng重要koh對伊以後ê教育方針有決定性質，就是hit tsi̍t-pái台北高等學校ê考試。當時，若beh進入大學，就it定ài通過高等學校。因為高等學校是saⁿ年制，修了中學4年就ē-sái考入去。無，iáu有高等專門學校ê途徑。M̄管是師範、商、工、農，專門高等學校畢業以後，就ē-tàng得tio̍h教中學ê資格，kan-tāⁿ是無授予學士ê學位。


　　當時ê台灣人tī教育ê機會頂頭，受tio̍h真大ê限制。Tuì下腳ê統計，tuì創設hit間學校到第7屆，黃彰輝畢業hit年，就ē-sái看tio̍h，雖然學校是設tī台灣，是唯it ê『高等學校』，m̄-koh，殖民政策大大ê阻礙，tuì án-ne受錄取ê台灣人，kan-tāⁿ占tsió數，逐年ê總數kan-tāⁿ是30 guā人niā-tiā。


歷年　文日人、文台人、文科計　　理日人、理台人、理科計 1927 26 0 26 44 4 48 1928 55 10 65 44 11 55 1929 52 13 65 48 12 60 1930 57 14 71 56 15 71 1931 51 13* 64 49 12 61 1932 49 15 64 48 23 71 1933 54 16 70 34 21 55 歷屆計 344 81 425 323 98 421 （*1931年是黃彰輝考tiâu台灣高等學校ê hit年）


當時，tī台灣進入大學ê唯it ê預備途徑，就是考取高等學校。其實，『台灣』高等學校，完全m̄是為tio̍h統治ê台灣人，suah是為殖民主義者ê日本人。黃彰輝是第7屆ê文科甲類畢業，伊班上ê學生總數是35人，按照伊ê記憶，班上kan-tāⁿ有 6名是台灣人。In hit屆ê文科學生總數是70人，其中台灣人tsia 16人。理科ê台灣人khah tsē，m̄-koh mā無日本人數ê 3分之2。平均歷屆ê畢業生，台灣人ê總數siōng tsē mā kan-tāⁿ有日本人ê 3分之1 niā-tiā。按照老tsi̍t-puè ê前輩講in ê經驗，台灣人往往lóng是tuì 1、20位報考ê人內底，tsiah錄取tsi̍t-ê。接受高等教育ê台灣人，thang講是人口2萬人內底tsiah kan-tāⁿ tsi̍t-ê人。所以，若有人認為台灣人ê素質kap教育程度kē， m̄是因為台灣人差，顛倒是因為執政者，故意為台灣人計劃劣等ê機會所造出來ê。


　　tī《回憶錄》內底，黃彰輝講，考試總共是四科目。伊認為三科考得bē-bái。M̄-koh，『國文』一科，伊抱tio̍h疑問，因為伊ê作文寫得真bē-bái，m̄-koh，ài看是siáng讀ē，koh做bái ê判斷。作文ê要求是寫1,500到2,000字，題目是：『變動ê社會內底，學生應該有ê態度。』日本tī tsit-ê時tsūn，正面對政治上kap國策上ê緊張，每tsi̍t-ê考生lóng知影，校方引發tsit方面ê觀念kap態度，顯然是有檢舉『危險思想』ê用意。對寫..落..來ê文章，考生tī後來ê口試，應有防禦ê準備。『我kā作文ê題目讀完ā』，黃彰輝án-ne述講，『目tsiu kheh起來作一個心內ê祈禱。忽然保羅tī羅馬冊 5章3-5節閃顯上我念頭來lah，『hō͘咱mā tī患難中歡喜，因為由患難生出忍耐，忍耐生出練達，練達生出希望，希望bē hō͘人感到見笑；因為上帝ê愛，通過聖神khiā-tī咱心裡....。』我馬上開始以真緊ê速度寫落去，mā決心引用hit段ê經文做我ê結束。當鐘響ê時tsūn，我如願ê完成。我連koh-tsài讀我所寫ê內容ê時間lóng無，家己心肝內想寫kah bē-bái。』（《回憶錄》p.43）


　　大概是因為前三科ê成績高，所以考日本文（國文）hit工ê下晡，伊hō͘叫入去口試。教室內總共有5位考官，其中ê一位身穿軍服ê，坐tī檯燈後面一排。無tsi̍t-ê笑面。


我入..去，坐..落..來。Tú坐..落..來，hit位坐tī中央ê，少年斯文ê考官突然問起第tsi̍t-ê問題：『你是基督徒，是m̄是？』我小khuá驚tsi̍t-tiô，但是用真響ê聲音講：『是。』『什麼是基督教ê基本教義？』我放鬆..落..來答應講：『上帝是愛，咱應該愛神，也tio̍h愛鄰人。』『án-ne，』伊停了一下，顯出微微ê笑容koh講：『你kám想過，基督徒是假冒偽善，像耶穌所責備ê法利賽人仝款？in m̄ kan-tāⁿ tī教會抬舉，mā四界擺佈十字架。』我ê思考一點點á hō͘擾亂進而驚惶，同時mā掀起我ê『基督徒ê奮鬥精神』，我講：『我m̄知你ê意思。我認為抬舉十字架，he是基督教siōng重要ê象徵，kap假冒偽善無任何關係。你有可能是錯lah，若無是誤解lah。』『無，我無錯，mā無誤解。就kā我講，你怎樣去調和你ê主張講基督教是愛ê宗教，suah四界去抬舉十字架，提醒kā ta̍k-ke講，是近二千年以前，猶太人釘死去耶穌，到今á日，甚至是二千年以後，iáu teh見笑tio̍h in？』我感覺m̄知如何是好，因為我m̄ bat遇到人，以án-ne ê角度議論十字架。我實在無法度koh忍受，差不多bē記得伊是考官，我是受考..ê，大聲kā講：『你m̄-tio̍h lah。十字架是上帝愛ê象徵，伊為tio̍h beh愛人類，甚至kā家己ê kiáⁿ放leh無顧tio̍h來犧牲。He mā是耶穌愛ê象徵，因為伊服從到死，…』我開始發覺hiah-ê其他ê考官，連hit位軍事教官面頂頭lóng有khí笑ê款，我就隨時停止。


Tī斯文ê主考官面頂頭mā顯示tio̍h奇妙ê笑容，對我講：『少年人，看起來你真會曉你ê聖經。M̄-koh你應該好好去思考我hō͘你ê問題。我tú tuì德國tńg來，tī-hia反猶太人ê情緒tú-teh升高，我想，四界抬舉十字架，可能kap tsit-ê tāi-tsì有關。德國hō͘認為是基督教國家，是m̄是？』伊seh過正pîng kap tò-pîng，看同僚koh問，是m̄是beh向我發問。當in lóng搖頭答：『無，』我感覺大吐一嘴氣。考官就向我講：『你可以..落..去lah。』我khiā起來，喙內底開始講：『先生，我，…』m̄-koh我iah-buē講完，轉身就逃..出..來。心肝內想，考官tsin-má一定對於我leh khí笑..我。


我真悲觀、憂鬱。因為我知影我失敗lah。隔日暗時，當我總算來到台南ê厝，因為我是hiah-ni̍h靜koh無活氣，無人敢問我啥，想無疑，我一定考kah真慘。M̄-koh hit暗，我beh睏以前，父親帶領我到伊ê冊房，溫和ê問我，是發生啥tāi-tsì。我見笑koh後悔ê ná哭ná kā一切所發生ê tāi-tsì kā伊講。伊因為我家己ê評估驚tsi̍t-ê，伊牽我起來koh kap我相攬（伊以前m̄ bat án-ne做過）講：『我ê kiáⁿ，你做得真好。你講了第一pái ê道，koh講得不止á好。你假使因此考敗lah，我mā以你為榮。』我tuì父親ê話感到真tio̍h驚，mā得tio̍h安慰。但是，隔工早起，he見笑kap失敗ê情緒koh來附身。過了一兩工以後，父親送我到旗後，我合意ê姑母hia，一直到發表錄取者hit工tsiah tńg來。


Hit工，我到beh暗ê時 tsiah tńg去厝，心內充滿tio̍h失敗、破碎，惦念tio̍h he口試ê酸味，驚惶面對厝內ê人。我輕輕á開門入..去。我ê父親、繼母、小妹lóng tī-hia，同齊跳起來，以笑顏歡迎我：『你考tiâu lah。』父親差不多大聲叫講。Hit工早起，阿嬸到學校去看，看tio̍h我ê名字上榜，就馬上khà電話hō͘父親。我非常感激，並m̄是因為喜樂，是因為真pháiⁿ相信ê消息kap放下重擔ê輕鬆。我當時16歲，前途當向tio̍h我展開。


　　hit工暗時，父親kap我講到嚴肅ê我ê生涯問題。『我 ê kiáⁿ，』伊講：『到今á日我保留tsit項tāi-tsì，無kā你講，但是因為今á日ê好消息，tsit-má應該kā你講。當你阿公改信ê時tsūn，伊ê生涯有了根本ê改變。Hit時，伊咒tsuā，ài做傳道者，m̄ kan-tāⁿ伊本身，也tio̍h伊厝內ê長子mā ài án-ne做。我m̄知有這咒tsuā，到我考tiâu新設tī台北ê醫專，koh得tio̍h獎學金，tsiah知影。我請求你阿公准我，但是伊講：『bē-sái，你tio̍h ài到台南神學校，將來做一個牧師。』我要求伊，但是伊堅決反對。我當時非常無歡喜，想beh逃走；但是tsin-má，過了30年以後，我thang誠實講，我ê傳道生涯是真快樂..ê。Tsit一生是真受祝福..ê。我無任何後悔，koh tsit-má終於感覺，佳哉我決心順你阿公ê意，願跟隨伊ê腳跡。你是伊ê長孫，是下一代『頭tsi̍t-ê生ê』。伊tī過身以前提起了 kuí-nā-pái，ài我kā 你講伊ê誓願，我 mā kap伊約好一定會照做。時代無仝lah。一方面我kap你阿公ê約一定要kā 你講，另外一方面我立誓beh你知影兩件tāi-tsì，我認為非常寶貴，he就是『自由』kap『教育』。上帝hō͘咱自由，koh咱應該寶重伊ná親像家己ê生命仝款，koh tī上主面前盡責任使用伊。對於教育，koh下一代，必需tī教育kap造就方面，比頂一代求進一步。今á日上主賜hō͘你非常良好而且稀有ê機會，所以tī你所選擇ê方向，去為你家己追求siōng高ê成就。』（《回憶錄》p.43-46）


　　黃彰輝kā伊講父親，伊bat深思過跟隨阿公kap父親ê腳蹤，追求教職ê路程，因此雖然伊kah意數理科，mā學了真好，伊suah選擇了文科ê哲學報考。Án-ne，父á-kiáⁿ ê心思相會合，伊ê生涯ê方向就tī hit工定局lah。

下圖是台灣高等學校時代，穿上制服ê黃彰輝，約1932年。(黃懷義提供)



下圖：高等學校歇熱期間kap仝年輩ê親tsiâ放鬆..一..下ê鏡頭。圖ê中間是黃彰輝，圖ê正pîng是舅父ê kiáⁿ林瑞雲，tò-pîng是姑母洪黃依利ê次男洪思榮。 (黃懷義提供)




２高等學校ê學生生活 黃彰輝深深感覺考取台灣高等學校是tsi̍t-ê『奧妙』ê經驗，到開學時ê『莫明神妙』iáu繼續存在。Tī學校ê告示板，有邀請高校學生參加YMCA（基督教青年會）ê公告，tuì án-ne新生黃彰輝照告示ê時間往開會ê場所。Tī-hia，遇tio̍h he hō͘伊口試難題ê教授。大概是教授先看到學生，因為黃生發覺ê時tsūn，教授已經朝向學生過來，hō͘伊無法度逃避。教授名叫石本岩根，是tú tuì留學ê德國tńg來，tī高等學校教德語。伊對彰輝自我紹介講，伊mā是基督徒，tī德國留學三、四年，koh tú tńg來。


　　後來，黃彰輝tuì伊嘴中聽tio̍h一kuá消息kap解釋，原來考官預先tsham-siông好hit件口試由伊主持，因為in知影伊是基督徒，koh抱好奇ê心，ài-beh看伊怎樣對付如黃ê考生，tī國家主義tú-teh抬頭、緊張ê情勢下，敢公然宣稱是基督徒ê學生。口試中提出來ê『十字架』ê問題，對tī伊是tsi̍t-ê切實ê問題，因為tī德國，納粹ê政權公開使用基督教ê『十字架』，來煽動人民仇視猶太人ê感情。石本感覺黃生hō͘伊滿意ê回答，但是伊本身mā無對這問題有ē-tàng滿足伊ê解答。所有在場ê考官kap石本，lóng對黃彰輝ê勇氣kap真摯ê心有所感動。石本講：「你ê口試，答了非常好。koh另外三ê科目，你mā考得不止á好，尤其是代數kap幾何。」


　　黃彰輝回憶報考高等學校ê kui-ê過程，koh想：「kám是好運？ia̍h-sī是tī背後有看bē-tio̍h ê『聖手ê引tshuā』？」


　　滿16歲，iáu未達17歲ê黃彰輝，入學高等學校，就是進入完全無仝ê環境，ia̍h-sī ē-sái講是『tshìng-tshái』ê生活樣式。如tī前章已經講過，當時tī台灣，ē-tàng得高等學校經驗ê人，是一萬ê人內底ê一ê精英。青年人一旦hō͘高等學校錄取，就百分之九十九thang期待進入大學。Koh大學畢業以後ê就職mā受tio̍h保障。現今，tuì嚴格受管制ê生活，kap tī學業競爭取得上峰ê驅動ê中學生活受解放。所以高等學校學生行為自豪浪蕩ê表態，koh-tsái來日本ê社會mā容忍in ê偏激脫離常規。譬如，kā in ê新制帽tàn入去路邊ê泥水溝內底kuí-nā-pái，一直到有夠lah-sap koh爛有夠滿足伊，tsiah載上頭頂；穿插各人真隨便，無規無舉；無真kheh ê大型學寮內底hit種無私人ê空間，suah是兩三人同齊thang suè厝，家己煮飯ia̍h-sī去外口食lóng 隨家己歡喜；學習ê課目有變化，真趣味；暗時隨家己ê時間，家己選一ê壁角tī Tatami(榻榻米)頂高睏。一切lóng是由家己去選擇作管制。課餘ê時間in所選ê所在m̄是tī學校ê園地，是有人出入ê街路上。黃彰輝透露那三年期間ê自己講：


『高等學校ê生活對我來講，是第一pài感受到自由滋味ê時期。我tī he時期，頭一pái pok薰，mā頭一pái kap警察對抗。He mā顯出我體力高峰ê時期。無久我就接受腳球隊ê徵招，後來tī球隊內成做有名ê選手。』


　　既然án-ne，黃彰輝離開了教會嗎？m̄是！伊通過學生基督教青年會，參加研修、討論kap展開種種ê活動。參加教會ê禮拜是一定ê，koh教主日學校成做伊ê第一要事。進一步，伊mā開始試一kuá『教會政治』ê滋味。因為tú好hit段時間，北部長老教會受加拿大母會當leh面對分裂ê危機。原來加拿大ê長老教會議決kap其他ê教派合一，m̄-koh有一部分ê長老教會決定無beh跟隨合一ê決定，另組tsi̍t-ê長老教派。派tī台灣工作ê宣教師會，hō͘裁定歸屬長老教會。支持合一ê宣教師就離開，唯獨明有德牧師ang-á-bó͘支持合一，m̄-koh表明ài留tī台灣工作，in ê工作是tī青年kap學生方面。當in受大攻擊ê時tsūn，台灣ê學生展開運動，發動申請冊hō͘加拿大ê教會，要求hō͘ in留tī台灣。M̄知申請冊是m̄是生效，明牧師ang-á-bó͘留任lah。


　　1932年是tsi̍t-ê難忘ê年，賀川豐彥訪問台灣。全島ê大部份長老教會教牧同齊召開主日學校大會，koh組織全台灣基督青年聯合會，黃彰輝兩個lóng參與。


下圖為黃彰輝高等學校ê畢業證冊，1934年3月10日。(黃澄輝提供)