《台灣人e5先覺─黃彰輝傳》

 | | | 轉寄

戰後專程tńg來國內

作者 張瑞雄 2009.04.19

二次大戰tī 1945年結束，黃彰輝繼續留tī英格蘭兩年。英國雖然phah敗德國，但是伊所受ê損傷非常大，尤其是首都倫敦，受tio̍h德國kui-nā-nî不斷ê空襲kap無駕駛人ê飛機轟炸，差不多lóng化做焦土。M̄-taⁿ án-ne，實際上是為tio̍h tik-tio̍h勝利，英國人tio̍h付出tsi̍t-ê大帝國。戰爭kā帝國ê一切 Infra Structure凍結，終戰了後mā bē-sái kā帝國本土kap殖民地依存流通ê機器重新phah開。其實，各殖民地lóng leh tshuē機會，tī戰爭ê時tsūn kap戰後ê大英帝國tú-teh放鬆ê時，加緊in ê獨立主張kap運動。親像印度、巴基斯坦、孟加拉、馬來西亞、新加坡、緬甸、錫籣等，受統治地區，lóng tsi̍t-ê tsi̍t-ê向大英帝國要求獨立。當時ài做跨國ê旅行一定ài靠越洋航海，所以tī大戰期間，大部分ê船隻kap船員lóng因為海上戰爭，沉..落去海底來死..去。連siōng基本ê軍事人馬ê復員，殖民官員ê重整，lóng開兩三年hiah-nih長ê時間，koh-khah免講是一家三口ê外國人，想beh討tio̍h船ê空位轉去地球腳tsiah-phiaⁿ hit-pîng去。

1945年9月25日（日本向同盟諸國投降了後四十工），英格蘭長老教會海外宣道會開會ê時，黃彰輝向該會表示伊想beh tńg來台灣，幫贊台灣ê教會事工。伊請示該會，是m̄是tī伊轉去台tsìng前，先tī英格蘭長老教會封牧。宣道會tsiaⁿ贊同tsit-ê提議，但是認為必須等待台灣長老教會對tsit-ê提議ê意見tsiah-koh決定。

Tī 1945年10月23日宣道會會議內底，黃彰輝為tio̍h台灣陳述伊家己ê觀察，請該會轉去台灣重新出發，koh tī台灣工作，因為tī戰後ê台灣，日本ê制度已經廢除，日本神道ê信仰mā烏有khì，tsit-má tú-teh考慮用siaⁿh-mí來替換。因此tsit-ê時機，對宣揚基督教ê信仰是siōng好..ê，lī-tshiaⁿ mā是重建台灣教會基督徒生活siōng好機會。所有ê教會mā應該有責任保持kap中國大陸教會密切tsì-tsiap kap關係。

1945年11月20日，黃彰輝向宣道會建議，應該為Rev. T.W. Dooglas James建立tsi̍t-ê記念獎學金，hō͘海外教會所kìng..出來ê學子ē-tàng kàu西敏斯特神學院讀冊。宣道會議決由幹事kap黃彰輝協調，tī āu-pái會中提出koh-tsài討論。

1946年1月22日，黃彰輝表示伊beh tńg去台灣，tī伊ê故鄉台灣ê教會服務。宣道會議決盡量趕緊hō͘伊tńg去台灣，koh替伊付bó͘-kiáⁿ ê旅費，另外加上100英磅，支付伊tī台灣iáu-buē有收入tsìn前ê生活費。

1946年2月27日，黃彰輝kap萬榮華（長榮中學前校長）見kuè面了後，寫批hō͘海外宣道會幹事Mr. Short，替黃寫紹介批hō͘當時留駐倫敦ê中華民國總領事，名叫P.S. Tan，請求kā該國ê護照發hō͘伊。Mr. Short tio̍h tī 3月初6照伊ê要求寫批，雖然無留記錄，一年了後，黃tī回程ê時tsūn，伊所持用ê護照tio̍h是中華民國ê護照。

　　kàu 1947年為止，黃彰輝tī英格蘭lóng總tuà十年，tng準備tńg來台灣工作ê時tsūn，世界主日學協會（總部tī美國紐約ê 156-5th Ave.）致Mr. Short幹事批函邀請，派黃彰輝做台灣長老教會代表，去Oslo參加7月22日到8月初1 ê第二pái世界基督教青年大會ê會議。海宣委員會議決，提供經濟kap旅費方面ê幫贊：『台灣長老教會tsaⁿ希望有人代表台灣參會。Tī英國tńg來台灣ê路途中，派伊參會，是省錢koh siōng適當ê舉動。』

黃彰輝參加伊第二pái世界性基督教青年ê會議，tio̍h是tī挪威首都ê Oslo舉辦ê盛會。這會kap 1939年所參加ê會議有tsiaⁿ-tsē仝款ê所在。Tsit-pái mā是有1500人參會。這兩pái會議lóng hō͘伊有tsiaⁿ深ê印象。黃彰輝tī Oslo參加會議ê時tsūn，tú-tio̍h 一kuá bat參加第一pái世界基督教青年大會ê人，mā kap伊仝款，tī tsit-pái ê會議中，扮演領導ê角色。

會後像頂kuân講ê仝款，tī黃彰輝tńg來台灣前，英格蘭長老教會海外宣道會幹事ê Mr. Short為黃彰輝向中華民國申請護照，仝時tsūn向駐倫敦大使館紹介慰禰是黃彰輝ê太太。黃師母kap in ê kiáⁿ大衛是使用英國護照去台灣ē。雖然hit時，國民黨政權已經tī台灣導演出空前絕後ê 228大屠殺，tī英格蘭ê黃彰輝kap長老教會海外宣道會，lóng無一sut-á ê戒心。恐驚hiah-ê派去tī台南ê宣教師mā lóng iáu tī五里霧內底，因為tī台灣kap南京ê政府，kā二二八屠殺ê新聞封鎖，口傳ê消息，上加mā kan-tāⁿ是一ê人ê觀點niā-tiā。除了導演ê國民黨政權當局以外，tī島內外根本tio̍h無人知影歸ê悲劇ê真相。

Án-ne ê情形下，黃彰輝ê家族tio̍h tī 1947年6月，kap蘭大弼醫師ang-á-bó͘（妻：高仁愛Jean）仝船，離開英格蘭（蘭醫師tī英國休假ê一年期間做了一kuá國內訪問），tī新婚儀式了後beh tńg去福建服務ê航行路途，ài kap黃彰輝ang-á-bó͘同齊kàu香港。In所坐ê船，名叫：S/S Empress of Scotland，因為beh滿載需要旅行ê乘客，所有ê乘客lóng男女分兩pîng。對tú新婚ê蘭大弼、高仁愛醫生ang-á-bó͘，算是tsiaⁿ大ê委屈kap犧牲。tuì黃彰輝ang-á-bó͘ kap小大衛mā是大大ê不便。佳哉，in兩戶會tit thang互相扶持kuè kò guā月。8月15日，黃彰輝使用印有船名ê批紙，寫批hō͘ Mr. Short，報告伊參加第二pái世界基督教青年大會ê情形，kap伊ê感受。

船到新加坡ê時，有kuí-nā-ê學員軍人熱情招待黃彰輝歸家，去各處旅遊。暗時in回船頂時，tsah tńg來眾學生所贈送ê真tsē禮物，蘭醫師親目看，非常欣羨。

下圖是黃彰輝tī回國ê輪船S.S. Empress Of Scotland上寫hō͘ Rev. W. Short ê書信,書寫ê日期是1947年8月15日,批內包含報告Oslo主日學教育kap青年大會ê情形.(其一)

下圖是黃彰輝tī回國ê 輪船S.S. Empress Of Scotland上寫hō͘ Rev. W. Short ê書信(其二).

下圖是黃彰輝tī回國ê輪船S.S.Empress of Scotland上寫hō͘ Rev. W.Short ê書信,書寫ê日期是1947年9月5日,信中提起tī新加坡停泊時ê經驗kap觀感(其一)
. 下圖是黃彰輝tī回國ê 輪船S.S.Empress of Scotland上寫hō͘ Rev. W.Short ê書信,書寫ê日期是1947年9月初5(其二).
. 下圖是黃彰輝tī到香港了後寫hō͘ Rev. W.Short ê書信,書寫ê日期是1947年9月初10,批內提起蔡愛智專工來看伊(其一).

下圖是黃彰輝tī到香港了後寫hō͘ Rev. W.Short ê書信,書寫ê日期是1947年9月初10(其二).

Tī香港伊遇tio̍h長榮中學時代ê同學蔡愛智（後來tī美國西雅圖做日本教會牧師，伊ê夫人是日系二世ê美國人），beh tńg去美國ê路途專工來香港tshuē黃彰輝。伊tī台灣看tio̍h二二八屠殺慘劇kap延續ê恐怖。受害人內底包括前長榮中學ê老師，董事長林茂生博士。伊是hō͘騙有tāi-tsì ài伊列席，hō͘ tshuā走了後tio̍h無消無息，聽講隔tńg工tio̍h hō͘匪類政權偷偷á thâi死，koh消滅屍體，遺物，証據。雖然黃彰輝誠相信蔡愛智牧師ê消息kap苦勸，照常是tsiaⁿ想beh tńg去厝內，而且心肝底iáu相信大戰期間，英美同盟國所講..ê，蔣介石kap宋美齡基督徒ang-á-bó͘ ê『信仰kap虔誠風度』ê印像，上尾決心結束十年tsiah tńg來台灣故鄉ê第一pái歸程。其實，比遙遠ê倫敦，tuì香港kàu台灣是tsiaⁿ短ê旅程，koh-khah免講二次大戰結束已經兩年，除了台灣以外，in一家口koh無別ê所在thang去。

1947年9月，當伊tńg去台灣ê時tsūn，kàu基隆碼頭迎接ê人，有身長高、體格瘦瘦ê妹婿鐘啟安。鐘啟安是駐tī台北ê基督教青年會(YMCA)ê組織者，有國際組織ê見識，mā有經營kuè地區單位經驗ê 才子。以後台灣ê YMCA有健全ê成長，是因為有伊ê專業智識kap有促進國際交往ê能力所帶來..ê。二次大戰期間，因為台灣殖民地ê男子照法律無徵兵ê義務，鐘啟安tio̍h tī日本接受tsiaⁿ tsē基督教青年會ê委託，擔任實質上做管理ê幹事。一直kàu戰爭suah以後，完善辦理移交受託ê單位koh hō͘日本人管理ê事宜，然後tńg來國內，受tio̍h tsin tsē日本YMCA同仁ê好評kap懷念。

黃俟命牧師等待大kiáⁿ彰輝ê回國，等十年ê時日，ē-sái講是siōng歡喜ê一位。黃彰輝mā是tsiaⁿ希望ē-tàng khah早看tio̍h父親，但是tī碼頭頂無伊ê身影，因為伊tit-tio̍h腦溢血，雖然ē-sái行動，但是講話iáu bē-sái家己控制，留tī台南。對黃俟命全家來講，tuā-kiáⁿ ê回國是解救經濟上困境ê希望，因為當時黃家無tsi̍t-ê人，tī-leh奉職，無錢養育全家。

黃彰輝全家tio̍h kap妹sài鍾啟安kàu台北，tī基督教青年會（當時koh保存日本人留..落來ê會堂、教室kap宿舍）tuà kui nā工。等kàu隨船運來ê行李過關、領kàu手以後，tsiah坐火車忍受tsiaⁿ長ê旅程kàu故鄉，目的地ê台南。無簡單結束兩koh guā月ê旅行，tuì英格蘭回kàu台灣ê台南。

1948年台灣基督教青年大會

黃彰輝全家tńg回台灣，tī基隆碼頭tsiūⁿ huāⁿ，tio̍h kàu台北ê鍾啟安傳道師家歇睏，治療hin船ê身軀。M̄-koh，兩位傳道師ê頭殼內lóng teh想，beh án-tsuáⁿ去起台灣青年ê事工。所以，馬上tio̍h同齊，開始討論ài án-tsuáⁿ召集台灣教會ê青年，來舉辦一pái盛大ê營會。kàu 1948年8月（回台後整整一年），確實tī台灣淡水成功舉辦大會，有1500人參加。

戰後，因為台灣換殖民者，一日之間停止日本制度，koh換來kui-ê中國ê一套。其實，中國tī台灣接kah亂七八糟，青少年根本tio̍h無人生方向ê讀冊，冊局提供ê冊mā無夠滿足求知ê需要，無外來ê刺激，無承受繼往開來ê理念，mā無靈感ê來源。M̄知án-tsuáⁿ做宣傳ê，每tsi̍t-ê教會lóng kah-ná聽tio̍h有án-ne tsi̍t-ê青年營。對tsiaⁿ tsē青少年來講，坐火車kàu台北，lóng是一生中ê頭一pái。看tio̍h 1,500個青年聚集作伙聽講，作伙食飯，koh包kā kui-ê淡水線ê火車包..起來來回kàu台北，特別tī新公園聚集做禮拜，hit種心理ê衝擊，tsiaⁿ有力mā tsiaⁿ深刻。

Hit千五百位青年，tio̍h是後來ê教會ê領導者。筆者ê豐原教會『青年會YMCA』，tio̍h鼓吹苦勸所有20-guā ê青年lóng去參加。差不多所有初三kap高中生lóng hō͘吸引去參加lah。M̄知會方是怎樣去抓來，阮中學生lóng有大學kap神學ê學兄、學姊照顧。當時黃彰輝tī長榮中學教冊，促成tsiaⁿ-tsē同學去參加，tī長榮女中有伊ê小妹黃淑惠（升高三），全力鼓勵所有同學去參加。當年，筆者tú tuì初中畢業，mā己經考取高中，心內tsiaⁿ輕鬆。Tī新ê地平線頂所看所聽，lóng感覺真新鮮，kah-ná是透kuè tsi̍t-ê窗á，看tio̍h世界ê青年kap展現tio̍h ê上帝國，mā看tio̍h充滿希望ê台灣。

其實，國民黨tng-leh中國各地喪失國土kap國民，無閒守衛寸寸遺留ê領土、失去ê人心。國民黨軍無戰tio̍h逃走，一直phah輸，續續逃走。撤退逃走ê速度趕bē赴進攻ê共產敵黨，人民心傳心，傳達『失望』、『無信任』、『恐怖』ê ià-siān，像電訊仝款tsiaⁿ緊傳遍中國。

Kan-tāⁿ有台灣，m̄知國民黨政權過去ê剝削、腐敗、自私、無能，人心iáu無受敗類黨團製造ê污染滲透。雖然tī經濟、行政方面己經顯示出臭味，台灣人，尤其青少年iáu相信基督ê信息，ē-tàng tit-tio̍h為政者ê贊同kap維護。雖然經kuè二二八屠殺慘劇，hit時iáu無喪失kui-ê中國koh招致戒嚴令ê施行，禁止大型ê集會，lī-tshiaⁿ參會者lóng自然用台語（臺灣基督長老教會用語）做大會用語。

hō͘大會聘請做會長，是黃武東牧師，當時是台灣長老教會南部大會ê副議長，但是tī 1948年，因為議長楊士養牧師健康無好，tsiông án-ne由副議長代行。為siaⁿh-mi̍h聘請南部大會人士，koh m̄是北部大會ê首長做會長neh？解答，可能就是因為tī初步夢想ê階段，黃彰輝kap鐘啟安ê前瞻、企圖lóng tit-tio̍h南部教會（少年）領首ê贊同kap熱誠所致。其實代表台灣長老教會ê人物lóng iáu tsiaⁿ少年，黃武東tsiah 39歲，黃彰輝34歲，鐘啟安mā tsiah 30歲左右niā-tiā。

tuì 1947年9月27日，黃彰輝tī基隆登陸回國以來，iáu無kàu一年，伊kap受伊激勵ê青年同工，kā黃彰輝ê夢兌現，koh hō͘ in tī二二八暴力事件了後，差不多siōng kē-tiau ê台灣青年一sut-á ê希望。

Tī大會內，主題演講ê講員有三位，兩位是鐘啟安tuì上海YMCA請來..ê，另guā有一位就是土產，tú tuì歐洲tuà 10年tńg來台灣ê黃彰輝。伊tī演講ê主題內底，講台灣教會應該團結合一。因為伊講ê是標準ê台灣話，所苦勸ê教會ê實情koh是真切實、要緊，伊ê演講引起一tsūn ká螺á風。親像kui-koh月前，tī斗六所召開ê第九屆南部大會，伊講台灣ê南北教會應該ài合一，神學院mā ài繼續合辨，以求實質ê合一。伊koh重新講hit句有名ê『United we stand. Divided we fall.』一句話。M̄-koh這一pái，伊hō͘ tsi̍t-ê tsiaⁿ趣味koh實際ê例，講：『阮應該ài做Omelet （攪蛋煎），mài煎出兩粒目tsiuê卵仁。指南北教會各一，bē-sái溶做一體。作Omelet，你tio̍h ài phah破外殼，然後phah碎koh 溶合ê一片，無簡單成做tsi̍t-ê美好ê Omelet。』

黃彰輝tuì外國tshuā tńg來ê『信息』，大大ê開啟少年人ê眼光，tuo̍h án-ne在場ê青年決定以大會ê名義起稿，koh決定送交一封公開批，促進南北教會（大會）ê合一。青年ê呼籲，引發了教界為政者ê注意，進一步koh去考慮合一ê tāi-hci3。青年m̄是kan-tāⁿ作án-ne ê呼籲，koh進一步進行合一ê行動。1948年7月初2開始，青年家己進行合一籌備，隔tńg年tī 1949年5月初3，正式成立無分南北ê『台灣(T)教會(K)青年(C)團契』ê總會，簡稱做T.K.C.。

親像頂面己經提起，從事青年事工kap學生工作ê鐘啟安，伊是有非常出色ê組織能力者，koh是教會ê支持者。雖然tī YMCA組織內底服務，伊無buē記tit kā青年會ê活動、組織，kap各地區ê教會繼續取tio̍h連絡。黃彰輝回國後tsiah第一pái kap鐘啟安tī基隆見面，後來ê三工，in隨開始夢想án-tsuáⁿ去建構青年ê大集會。10個月了後ê大會ê講師內底，hit兩位tuì上海YMCA來ê講師，是鐘啟安交涉聘請過來..ê。按照黃彰輝ê《回憶錄》，鐘啟安tsit種ê人bē受教會政治ê束pa̍h，koh ē-sái喚醒少年人ê良知，去為南北教會ê合一籌謀計劃。信徒內底貢獻tī青年ê大盛會，kap南北合一ê呼籲ê『青年領導者』，有一位律師，名叫陳朝景，是東港教會ê長老，黃彰輝《回憶錄》內底起到伊tuì組織T.K.C.ê貢獻。（《回憶錄》p.123）tuì北部大會mā出現tsin-tsē合一『青年勇士』，親像：鄭連坤、張逢昌，kap長老董大成(台大醫學院教授)。

(下圖是tī 1948年熱天，空前盛大ê台灣基督教青年大會tī淡水開催ê記念留影，黃彰輝是三位主講者之一)

台南神學院第三任院長 １少年任重 1948年11月26日，台灣南部ê英長老教會宣教師會作了以下ê議決: 『（因為黃彰輝已經tńg來台灣，南部大會議決台南神學院復校，英長老教會宣教師，南神院長滿雄才牧師推薦黃彰輝接任院長一職），本會議決逐年補助黃彰輝300英磅，作為伊tī台南神學院院長ê年薪。其中200英磅，由台南宣教師會ê預算內底提出支付，tshun-ê 100英磅tuì本會hō͘台南神學院ê補助內底提供』。Án-ne ê決策，對宣教師會ê去向kap影響，台灣ê本土人士取代歐美人士負起自主、自育、自傳責任ê歷史性意義非常大。Tī人事頂面，台灣有黃彰輝tsit位唯一ê人才，ē-sái慶幸。M̄-koh，tī財政方面，台灣長老教會iáu有tsiaⁿ長ê路tsiah tuè-ē-tio̍h財經上完全ê自立。

1949年8月22日，黃彰輝受封立牧師，koh就任台南神學院ê院長。以家族來講，伊是第三代做牧師。老父年歲高，腦溢血中風tsē年，非常kà意聽tio̍h kiáⁿ做牧師，koh成做神學院院長。黃彰輝感覺讀長老教會中學（長榮中學，1927年kàu 1930年）kam-nā iáu是昨hng ê tāi-tsì，tsit-má tio̍h已經是身負重任ê院長。tuì台南神學院來講，伊是第三任ê院長，但是mā kan-tāⁿ是35歲ê少年人，自忖這是m̄是妥當？當時ê神學院院長理所當然ê認為應該完全參與教會各事工，伊就tī tsit種ê眾人ǹg望之下，tī各地區kap各階層ê教會活動內底，開始扮演參謀指導ê角色。以當時ê台灣教育程度來講，伊是受tio̍h tsiaⁿ高而且正規ê學術訓練。Tī教學方面，伊bat有tī英國ê SOAS教語言ê經驗，tńg來台灣了後mā bat tī長榮中學教英語。Tī牧會ê經驗方面，勉強ē-sái講是承接阿公kap父親tī教會內牧會ê經驗，thang做參考niā-tiā。比伊少年2歲ê安慕理做了副院長，tú tuì福建tńg來赴任，in倆人tio̍h tī án-ne經驗欠缺，差不多是一無所知ê情況之下，突然間ê扮演各教會中領導ê角色。

下圖是tsit-má ê台南神學院校門，其小巧靜觀情景是tuì 1948年，戰後復校以來無變。(張瑞雄提供)

下圖是台南神學院ê禮拜堂，tī黃彰輝院長任內所建築。(張瑞雄提供)

佳哉，神學院內底有2位資深老師：一位是楊士養牧師；另外一位是黃主義牧師。楊牧師bat有牧會經驗，mā做過南部大會ê議長，tī戰爭非常困難ê期間，伊用議長身份，協調台灣長老教會kap日本基督教團ê隸屬問題。1948年1月初9，第9屆南部大會ê通常議會，是tī黃主義牧師所駐堂牧會ê斗六教會召開，此議會是黃彰輝tńg來台了後，第一pái參與ê議會，會中議決beh為台南神學院復校。黃主義牧師kap伊bat同時tī東京分別讀東京帝國大學kap東京神學院時就si̍k-sāi。雖然黃主義牧師tuì台南神學院ê復校是siōng有力ê擁護者kap發言人，mā tī神學院專任教學年guā，但是當黃彰輝tú就任院長，伊就赴美讀協合神學院（Union Theological Seminary）lah。佳哉有黃李秀賢（黃主義）師母留tī神學院，tī總務kap會計方面做黃彰輝siōng大ê幫手。

２財政ê挑戰 黃彰輝承接ê有悠久歷史ê神學院，suah因為戰爭關..起來，無財源、欠人管理，受tio̍h tsin tsē滄桑，是koh破koh舊ê校舍，七修八調ê門窗，內底phàng-kìⁿ ia̍h-sī殘破ê家具。tsin tsē棟『新樓』建築物，mā欠缺修理tio̍h提供hō͘宣教師kap教授tuà。下底ê相片是1952年所hip ê眾老師ê留影，圖面ê背景是主棟校舍ê面目。伊受風雨kap日頭，年久失修，呈現出舊舊ā，壁頂hō͘染做kui-ê lah-sap ê灰烏顏色。

黃彰輝接任ê時，台灣ê經濟社會tú tī tsiaⁿ驚hiâⁿ ê時期。1947年228事件，蔣政權ê軍隊大量ê移suá台灣，施行殺戮，koh招致中國

下圖是1952年南神一部分ê老師，Tuì tò-pîng：白勵志宗教教育主任，黃彰輝院長，安慕理副院長，梁德慧牧師，楊士養教授。(張瑞雄提供)

下圖是1950年3月黃彰輝院長接任後第一pái ê畢業留念留影,前座中央是南大議長黃武東kap黃彰輝院長,後排是上年九月入學ê學生(張德香提供)

共產黨ê軍隊四界游擊成功。kàu 1949年ê兩年之間，蔣政權失去所有大陸ê領土，kan-ta tshun uá百萬ê軍隊kap統治官僚佔領台灣，一時tio̍h-ài強逼所有ê小學生停止上課，提供軍隊進駐使用。

台灣ê人民tī經濟方面受逼迫，tī非常短ê時間內底，tuì 1945年飼600萬人口ê島內資源生產量，增加了戰後ê新住民kàu 1949年ê 750萬人口，台灣民生ê大課題，tio̍h是四名舊台灣人tio̍h beh飼tsi̍t-ê新台灣人。煩惱ê源頭，tio̍h是新ê台灣人m̄是beh來同甘受苦，suah是tī政權操縱之下享受『特權』。雖然in ê權益無像夢想ê局長、專員、主任ê富裕，但是tī基層ê台灣人民就受了挨餓kap苦慘ê年日。

1945年末期，當時ê日圓（日本投降了後變成台幣）對美元ê匯率是1：1，到1950年發行新台票，舊台票對新台票ê匯率飛漲為40,000：1。Bat有tsi̍t-ê米商，建議黃彰輝先付八禮拜ê米錢，米商答應會tī八週內，無停止一直運送米來學校。但是米商送五禮拜ê米了後，就停止送米。伊無法度koh運米來，是因為米商破產倒擔。Tī貨起tsiaⁿ hiông ê情況下，預付金tuì付款人是有利ē。

1950年，tī高雄新興教會召開台灣長老教會第十屆南部大會通常議會，議會中有台南神學院ê年度報告，黃彰輝以身為院長，第一pái創新向大會報告院務。當伊提起南神ê財政ê時tsūn，因為伊tuì會計無熟，tī伊報告做壞tsi̍t-ê買賣ê時tsūn，感覺pháiⁿ勢。有一位長老是吳天錫，提問kám有督察做學校ê鑑查工作。黃彰輝tsiaⁿ pháiⁿ-sè回答，學校ê帳目全tī伊口袋內底ê一本小冊子內底，tuì án-ne要求大會協助伊設立tsi̍t-ê健全ê學校財務會計制度。Tī議會中，伊報告講，教務方面kan-tāⁿ有三位專任ê教授，kap四、五位兼職kap義務ê講師。Tī án-ne師資欠缺ê情況下繼續kàu 1952年，伊寫批hō͘英格蘭海宣會ê幹事Mr. Feⁿ ，報告講伊kap安慕理，逐禮拜lóng必須教學20小時以上，同時iáu-beh做學校行政工作，kap向教會募捐ê工作。伊向Mr. Feⁿ 求助如何加強學校ê師資陣容kap擴大招生ê tāi-tsì。

Tī通貨膨漲下，伊逐工lóng ài用hiah-ê人所奉獻ê金錢，馬上買米來屯積置產，用來支付院內ê老師kap行政員工ê薪水，kap學生ê獎學金kap食住ê費用。（當時來就學ê學生，校方lóng是免費提供食住。）所以，tsit種ê費用tsiaⁿ大，tī當時台灣ê社會經濟tsiaⁿ驚hiâⁿ ê時期，黃彰輝接任神學院院長，無論對神學院ia̍h-sī伊家己，lóng是非常大ê挑戰。

1951年3月7日，第一屆台灣基督長老教會總會，tī台北雙連教會舉行，此屆總會是南、北部大會ê總合。南、北部大會各派出20位牧師，20位長老，3位宣教師、一位幹事，kap一位神學院院長出席。Tī總會會中，議決ài台灣基督長老教會參加『世界長老教會聯盟』kap『普世教協議會（W.C.C.）』。參會者對前項無異議，但是對參加『普世教協議會』，就有tsiaⁿ tsē意見，無法度百分之百ê認同。因為共產黨篡國，國民黨退守台灣，隨蔣政權來台灣ê新台灣人，帶來uá 一百ê各種無仝ê基督教教派，基督教kap天主教會合..起來，至少有2,000 guā位歐美籍宣教師轉移來台，致使本來差不多是長老教會獨佔地ê台灣基督教ê社會tāu-tāu-á複雜，面tuì須要考慮ê問題變成tsiaⁿ tsē。黃彰輝提議總會原則上參加，但是交由總會所組織ê委員會23人繼續研究，koh照會兩ê母會後進行。

　　1951年，tuì外國尤其是美國來ê kuí位特別ê人物，來訪問台南神學院，第一位是Dr. Stanley Smith，當時伊是南京神學基金會ê代表，因為中國大陸ê竹幕已經關..起來，所有tī大陸ê宣教師lóng hō͘趕..出來，無任何傳道人thang..入去，基督教若無講是受tio̍h阻斷，mā ē-sái講是受tio̍h非常大ê限制，kap外界已經完全隔離。Dr. Stanley Smith bat tī英國劍橋Westminster神學院讀冊，án-ne算..起來是kap黃彰輝、安慕理同是校友，mā bat tī南京ê金陵神學院教kuè冊，tī中日戰爭ê時，mā bat hō͘日本liah去，伊tsin-tsiàⁿ ē-sái代表南京金陵神學基金ê重要人物。伊tiām-tiām聽黃彰輝說明台南神學院ê現況，mā kàu學校內四界參內底ê建築kap環境，伊tuì華人ê神學院ê教育非常認真kap關心。伊參觀ê時，tuì黃彰輝講：『我iáu無看tio̍h你ê圖書館。』黃彰輝感覺有tām-pô-á pháiⁿ勢，因為神學院根本無圖書館，tuì大門入去後ê tò-pîng有一間房間，大概是三米乘五米大，thang tī房間內讀冊，但是根本bē-sái算是圖書館，黃彰輝tuì Dr. Stanley Smith ê說明無完全ê理由是，因為台南神學院已經關7年ā，其間無人管理所以流失書kap資料。Dr. Smith對黃彰輝講，圖書館ê設立是非常重要ê tāi-tsì，應該khah緊籌設。

Dr. Stanley Smith結束訪問ài離開ê時，kā黃彰輝講有關伊ê希望，是請黃彰輝將所談ê tāi-tsì列出提議書寄hō͘伊，伊會為伊籌款，果然kàu 1952年，tsit筆籌備ê款項就來lah，mā因為án-ne成立tsi̍t-ê『在職傳教師進修班』。

另外一位重要人物是Dr. Pit Van Dusen，伊當時是美國紐約協合神學院院長，mā是南京金陵神學基金會ê董事長。當時作者讀一年級，一年級學生坐tī禮拜堂內底ê前第一排座椅，我當時tio̍h坐tī第一排ê siōng中央ê座位，黃彰輝請所有tī tsia ê師生唱一首歌來歡迎Dr. Pit Van Dusen，黃彰輝問ta̍k-ke ài唱to一首歌，guá因為知影有一首歌是所有學生lóng會唱，mā唱kah tsiaⁿ好，guā大聲講：『第333首』。黃彰輝tsiaⁿ清楚聽tio̍h guā講ê話，就ài ta̍k-ke同齊唱tsit首詩『咱tio̍h來吟詩，吟詩讚美耶和華』。當ta̍k-ke齊聲合唱非常有力有精神ê時，響亮ê歌聲充滿 kui-ê會堂，ta̍k-ke感覺有聖靈ê充滿。我kàu tsin-má iáu相信，hit-pái透kuè全體師生ê歌聲，感動Dr. Van Dusen ê心，hō͘伊感覺m̄-nā tī台灣教會ia̍h-sī亞洲教會，將來世界傳道ê希望，就tī tsit群少年ê神學生ê身上。我m̄敢講是m̄是阮所唱ê歌hō͘伊tsit種ê靈感，ia̍h-sī伊早有ê想法，伊講ài tī少年新興ê教會開tsi̍t-ê『少年新興教會領導者ê研習班』（非歐美ê教會），而且請黃彰輝做研習班ê主席。Tsit-ê研習班是等黃彰輝ē-tàng撥時間ê 1959年kàu 1960年間tsiah開辦..ê，除了有黃彰輝參加之外，tuì台南來ê iáu有劉華義牧師hō͘邀請參加。

筆者ē記tit tī Dr. Van Dusen來訪ê前後期間，有一工，黃彰輝院長騎鐵馬經kuè通往長中ê長女南pîng牆圍á piⁿ ê巷á，hō͘茂盛ê竹叢中ê荊莿huê tio̍h目珠受傷，有二禮拜hiah久，伊一直感覺目睭無爽快。從來m̄-bat因為破病請假ê黃院長，suah為tio̍h tsit-pái ê眼疾，有二禮拜無授課，hō͘我印象tsiaⁿ深。

1951年，金陵神學基金會ê執行幹事Dr. Frank Cartwright mā來訪問台南神學院。筆者tuì伊無印象，可能伊是tī我iáu無入學ê九月以前來訪，mā可能伊來訪ê時tsūn，無kap學生交往ê機會。M̄-koh hit年以後，伊ê名字成做神學院大筆財源ê代名詞。因為ta̍k-ke用台灣話稱伊為『卡到來(Kha-to-lai)』。

下圖是tī 1952得tio̍h金稜神學基金會資助後第一pái招開ê進修科結業紀念留影(張瑞雄提供).

３戶口登記制度ê刁難 日本政權tī台灣設置戶口制度是tī 1900年。對台灣ê統治來講，戶口制度算是殖民政策執行上siōng有力ê工具。M̄-koh，tī國民黨政權ê統治下，kàu 1947年ê二二八事件，kap 1949年國民黨hō͘徹底趕出中國大陸，全然佔領殖民地台灣為僅有ê『領土』為止，所做ê戶口政治，thang講是馬馬虎虎。後來，逃kàu台灣ê『中央政府』，看tio̍h日本政府所留..落來ê是tsiah-nih好，免拍拼tio̍h tit-tio̍h siōng有效果ê控制人口行動ê武器：『戶口登記』制度，就開始koh-khah嚴厲ê使用。

1947年，當黃彰輝tńg去台灣ê時tsūn，伊遵守做tsi̍t-ê國民ê規矩，去登記戶口（註一）。但是，伊隨時受國際結婚者ê問題。會記tit he是二二八大屠殺發生ê當年。伊tī 9月tńg去台灣ê時tsūn，iáu是恐怖漫延全島，因公務執行ê愚昧，民心非常無安定，尤其是受高等教育，mā就是受了日本教育ê人，tú-teh隱藏身份，向地下避難ê時期。因為án-ne，英籍ê朋友hō͘彰輝tsi̍t-ê提議，koh安慰mā希望án-ne做，就是kā伊kap細漢kiáⁿ大衛ê英國國籍守tiâu。

黃彰輝tshuā厝內底ê人tńg來，而且全家tī台南ê新樓時常作伙生活。但是國民黨政權就用『戶口登記』制度ê『武器』來牽制伊。tsiaⁿ-tsió數ê人知影伊tī國民黨政權下是tsi̍t-ê孤星。因為筆者tī台南神學院求學期間，bat kā戶口suá kàu南神地址，當時ê戶長是黃彰輝院長。筆者mā由黃明輝醫師tit-tio̍h in兩兄弟記載作伙ê戶口謄本，其中關於黃彰輝ê記載，確實有非常奇怪ê所在。以下將兩節記載抄錄koh紹介hō͘讀者做參考。

『民國肆拾年（1951年）拾月拾参日遷出（改編）台南市東區東北里伍鄰参肆戶，東門路貳貳捌號。民國肆貳年（1953年）拾壹月貳肆日遷徒地遷移台南市東區泉北里伍鄰四一戶，東門二二八號，戶長黃彰輝ê戶內為遷徒人口。……』 （請看下面『戶口謄本』圖片）

下圖(1)是黃彰輝1956年以後ê戶口抄本ê一欄。Tī這戶籍記載，ia̍h-sī講『無記載』事項值tit特別ê注意。看伊ê配偶欄是空白，伊當時ê戶長是伊ê繼母黃吳櫻桃女士，所以ē-sái講是『家屬』。黃氏出國拿『中華民國』護照，Tī護照頂面記載『iah buē結婚』，tī這戶口謄本thang看tio̍h國民黨政權ê『作祟根據』。

圖(2)是筆者ê『廢戶』（『現住所』kā資料寄kàu籍貫後存留..落來ê戶籍記錄）戶籍謄本ê一欄。Tī這戶籍記載內底，tuì 1951年10月13日起，遷徙戶口入tī台南神學院地址，1953年當時ê戶長就是黃彰輝院長。

奇怪! ia̍h-sī講是上帝特別ê恩典kap安排，tuì伊當了院長ê時tsūn開始，伊就是神學院戶口上ê家長，所有留宿tī台南神學院ê眾學生，lóng是加入以院長黃彰輝為戶長（tuà tī東門路228號）ê 大家庭（註一）。這是juā-ni̍h-á親切，做學生ê人是juā-ni̍h-á榮幸，歷史上ê稀奇ê tāi-tsì。

依照頂面ê圖，黃彰輝ê戶籍有雙重ê記載，一方面，伊是神學院戶ê戶長，另外一方面，tuì 1957年，伊mā tī伊ê繼母黃吳櫻桃做戶長ê東區圍下里博愛一巷22號ê戶內，tuì伊ê『家屬』，黃俟命kap林金ê長男（註二）。記載配偶姓名hit欄，留tio̍h空白。Án-ne ê戶籍，就是表示tio̍h伊ê身分等於是未婚，mā無任何關於伊兒女ê記載。筆者bat有機會kap辦理戶籍ê人談論起黃彰輝所受ê戶籍待遇，伊一直講，án-ne抹消配偶ê名字，是bē符合戶籍規定ē。筆者ê歸納，是認為tī台南市政府ê背後，有『中央』ê意圖，要冷待ia̍h-sī貶低黃彰輝ê人格kap信譽。

固然，當黃彰輝申請護照出國ê時tsūn（第一pái是1951年），伊ê婚事記欄內底，就明明ê標示為『未婚』。Tī伊ê回憶錄內底，記述伊bat向官方指正tsit-ê嚴重ê ting-tâⁿ，但是伊所得tio̍h ê回答是：『因為你ê配偶是外籍人士。』『若伊歸化，而當伊歸化了後，就ē-sái設置戶口，mā就ē-sái承認伊ê配偶稱謂。』中央級ê官員刻意ài『迫求』án-ne tsi̍t-ê kap外國籍人士有深密交往，koh有外國ê勢力ia̍h-sī保護ê人，無法度tī伊ê身上加害ê情況之下，想盡辦法tī人格上侮辱伊。真正是án-ne mah？

黃彰輝感覺siōng震怒ê是，因為政府人員向有關教育kap宗教圈ê社會人士告稱：『黃彰輝tsit-ê人做什麼基督教牧師，什麼神學院院長！伊kap外國婆（女子）同居，而且生育四個gín-á！』（請看『回憶錄』p.237）伊向筆者講，伊所處ê境遇是，『中國官員』tiâu-kang ài醜化台灣ê領導者，ài hō͘ in失去道德kap領導ê魄力，koh呈現出台灣人ê次等卑賤ê『劣根性』，低陋ê『氣質』。Tsit種ê中央政府政策，mā正是反應tio̍h二二八屠殺事件ê懼民心態，kap抹殺台灣領導人才kap『台灣意識』ê意圖。（請參考『回憶錄』 p.236）

４回國後第一pái koh再出國 1951年7月，是回國後第一pái出國，短時間受Stephen Neil會督kap Dr. Rajah Manikam邀請，到瑞士ê日內瓦。主要ê目的是參加亞洲宣教策略會，kap關於台灣基督長老教會參加為普世教會協會W.C.C.會員ê事工。雖然是真短ê旅行kap會談，tsit-ê行程，thang講是伊踏上世界舞台ê第一pái。

除了 Bishop Neill kap Dr. Rajah Manikam之外，mā kap Dr. Pradervand會面。（因為日內瓦方面ê總幹事Visser t-Hooft kap神學家正無閒討論神學問題，kap 1954年第二pái總會ê總題，無法度會見黃彰輝。）加拿大聯合教會派駐台灣ê明有德宣教師(台灣基督長老教會英文幹事)，己經寫批通知普世教會協會有關台灣長老教會，tsit-má己經成立tsi̍t-ê南北合一ê總會，而且有參加W.C.C.意向ê議決。日內瓦ê W.C.C.當局就kap黃彰輝作深入ê討論，關於台灣教會ê往來kap現況。Neil會督bat tī 1949年訪問kuè台灣，mā提議台灣長老教會參加W.C.C.。這一pái kap Neill會督kap Dr. Pradervand交談，探知in tuì台灣ê總會m̄是以全議會裁決，suah是留hō͘總委會kap英格蘭母會tsham-siông後處理ê tāi-tsì，有質疑ê所在。In ài知影tī準備W.C.C.總會ê委員會處理該案kám妥當，ē-sái進行接納ia̍h-sī等kàu後pài ê總會tsiah受理。Neill會督是án-ne細膩，Dr. Pradervand khah無掛慮hit點程序ê問題，伊beh聽看māi台灣總會議決ê討論過程，kap交代總委處理ê理由。黃彰輝為in說明全議程ê結果kap理由了後，in兩人tio̍h感覺tsiaⁿ放心。

tsit-pái ê日內瓦會議上，tú-tio̍h Pit Van Dusen（紐約市拹和神學院院長），tuì黃彰輝個人kap tuì南神來講，是tsi̍t-ê轉捩點。因為tī無久ê將來，台南神學院ê發展得tio̍h伊tsin大幫贊。台灣長老教會mā tuì英格蘭母會ê扶持成熟了後，得tio̍h『外交』上ê自由因而得tio̍h以 Van Dusen院長為首ê美國基督教會各教派ê協助，行入普世化、國際化ê路途。（節錄自《回憶錄》p.153）

５ tuì安慕理牧師ê談話講起 1947年Shoki tńg來台灣，先tuà入兩連宿舍。1948年9月，安慕理tuì泉州來台灣，就搬入兩連宿舍ê tò-pîng。（起先，1948年2月，安慕理來台灣，tī傳教師會ê大會講『今á日ê新約神學動向』，根據安牧師所講，是『beh試我是m̄是ē-sái（有資格）教神學院』）。黃彰輝kap安慕理兩戶之間有門ē-sái相通往，有tāi-tsì ài參商，ia̍h-sī ài互相通知時，to̍h ē-sài使用。這門親像是故意留tio̍h ē-sài隨意通往，mā ē-sài講是無安置隔戶ia̍h-sī分家ê，án-ne，有kuí-nā-pái，安牧師ang-á-bó͘醒來，看見小大衛（黃牧師ê大kiáⁿ兒）khiā-tī in ê門外向內底探視tio̍h。

　　tuì 1948年到1963年，這兩戶tī校務上、家務上，甚至tī生活上ê親近合作，kap支持上ê密切，thang窺見一斑。這期間，tuì安牧師全家搬入，後來koh搬出回英國，前後共有15年。親像頭前所講ê，1959年，Winifred帶四個gín-á回到英國，以此計算，就是11年，兩個家庭和睦相處，親近生活。

　　tio̍h者會記tit tī 1951年7月考台南神學院ê時tsūn，安牧師在場主持口試，tsit入學，伊tio̍h tńg去英國做一年ê休假。安牧師全家回英國ê時tsūn，仝船有黃武東牧師，預定tī英國學習一年，吳基福醫師tī英國學習三個月。ē記tit安牧師kuí-nā-pái提過hit時ê經驗講：『黃武東牧師tsiaⁿ熱心講道。』安牧師tī 1952年度開始ê時，就己經tńg來教筆者hit班，進入第二年ê新約課目。

下圖是黃彰輝任南神院長時所tuà ê宿舍外觀。正pîng ê一半是黃彰輝院長kap家族ê居處，tò-pîng ê一半是安慕理副院長kap家族ê居處。（張千惠提供）

　　關於國民黨（KMT）政府ê恐怖影響tio̍h台南神學院，特別有兩件tāi-tsì，ē-sái tī tsia提起。大約tī 1950年後半，ia̍h-sī 1951年前半，那時沈毅敦iáu tī leh，伊大約是tī 53年上半年離開台灣回英國ê。當時KMT政府己經搬káu台灣，KMT除了台灣以外，tio̍h無領土ah。有tsi̍t-ê暗時，己經過了半暝以後，有一隊講北京話ê秘密警察人員，來黃彰輝牧師ê厝頭前phah門，講：『黃院長！』ài伊開門，黃牧師就開相通ê門，到安牧師hit-pîng來，短短ê商量以後，決定以安牧師為應門者，伊就khiā-tī涼台頂，向樓腳五、六個人問：『beh什麼？』in講：『有人beh邀請黃院長去，beh招待伊。』安牧師用北京話講：『lín若beh邀請伊，為什麼半暝以後來neh？伊無tī-teh！睏ê時tsūn，án-ne大聲，會影響四周圍ê人睏眠！』in講kah jú大聲，安牧師mā無細jī講：『阮tsia是外國人tuà ê所在，lín án-ne阮必須向英領事館報告，請in向政府當局取締！』in tī-hia huah大概有30分鐘，就離去。隔暝，沈毅敦kā通往宣教師樓ê鐵門鎖起來，但是到半暝以後，聽tio̍h大聲kiāu鐵門ê聲音，無人去tshap in。連連kui夜繼續án-ne搞門，日時黃牧師出去，一定有安牧師同齊行路。

　　當時有侯全成醫師kap陳朝景律師，黃彰輝牧師kap安慕理牧師就向in參商，侯全成醫師因為有國民黨籍，得tio̍h效果，要求特務機構tī抓人以前，一定beh向教會ê國民黨人士通知，了後，tio̍h無án-ne ê攪擾發生。

　　另外一pái，大概是1952年10月，特務人員tī禮拜日透早來到神學院，我就向黃彰輝牧師kap安慕理牧師報告，黃牧師ài我叫楊士養、梁德慧lóng來tsia，特務ài學校交出四年級學生卓榮祥。Tī院內庭園上臨時形成ê教授會，kap特務人員ê會談內特別有趣味而且有意義ê，就是神學院方用英語，由梁牧師翻成北京語，特務用北京語，梁牧師就以北京語翻hō͘對方。我感覺tsin稀奇，tī台灣有án-ne tsi̍t-ê神學院，伊ê教授只ē-tàng講英語kap台灣語niā-tiā ê情景！
　　hit工，卓榮祥是tī北港事奉，特務特別等候，kàu卓榮祥講道結束了後，tsiah下手lia̍h伊。後來koh kā神學院kap院長卓君講關tī什麼所在，mā答允無體罰卓榮祥，ia̍h-sī phah伊，12月tsiong近ài放伊ê時，學校有大餐，就因為校方知影卓榮祥ê監獄，所以ē-tàng送一份去hō͘伊食。

　　án-ne，mā ē-sái看出1950年到1951年，KMT tī台灣iáu是懷tio̍h新佔領，『勦共產黨』ê恐怖心態，特別是驚台灣ê精英，無惜總勦滅。到1952年秋天，國民黨『亂政團』己經鎮壓了台灣各地，對真正ê『共匪』kap『kap外國有連繫』ê『世界級人士』可能會有辨別，就khah tsió黑白來lah。

　　筆者tī 1954年9月kap鄭連明牧師、陳滄發牧師仝團，kap孫鴻沂牧師仝連，hō͘徵召去受訓6個月ê通信兵。Hit時tī營舍內ê長排木板床頂，睡tī我邊á ê人，有一工the̍h出伊ê『特務証』hō͘我看，mā說明了伊ê任務：一是，伊出示該証時，坐公共交通施設m̄免付錢；二是，伊ē-sái向特務組織密告任何人，hit人就隨時會hō͘ lia̍h去；三是，in特務人員ē-sái領普通工作單位ê薪水，加上特務機構ê薪水。
　　可能就是有人誣告黃彰輝牧師，藉此the̍h真好ê獎金，而且誣告伊ê人，大概mā是tī神學院近處ia̍h-sī校園內生活，ē-sái用任何紙片，批信『投書』作密告ê根據。講到卓榮祥後來透露，是tī嘉義農業學校讀冊ê時tsūn，有一位老師疼惜伊，hit位老師hō͘認為是共產分子，就因此伊mā hō͘連坐誣告。假使伊hit時無tī南神，得tio̍h侯全成醫師、陳明清、陳朝景律師等ê保護、參謀，可能in就無管張三李四，就先kā卓榮祥牧師殲除掉lah。

　　1947年，二二八事件ê時tsūn，里港ê陳朝景長老幫贊了一位戰後來台灣ê人，bē致使hō͘憤怒ê台灣人無理無法度ê害死。但是害--a，國民黨政府kap軍人平靜了台灣人『叛徒』以後，陳朝景長老失蹤lah，連一點訊息lóng無。佳哉hit位受陳長老保謢、救活ê朋友拼命去tshuē伊。兩個月後，tuì秘密、烏暗ê監獄救伊出來，免冤枉死。

６彌迪理牧師關於Shoki 彌迪理(Daniel Beeby)牧師到台灣是1950年，一開始受派tī長榮中學教學。當時伊iáu teh適應台灣ê生活，mā tī南神思考伊來kàu台灣ê使命。伊寫批去設tī美國紐約ê Buard of Higher Education and Ministry (基督教高等教育機構)，因為伊聽講美國基督教協議會有1,300,000美金，是歸屬tī中國教會ê高等教育基金，等待beh開支hō͘適當ê基督教教育院校。伊發現tī台灣koh無隸屬於教會ê高等教育施設，tuì án-ne伊寫批hō͘設tī紐約ê高等教育機構。

　　基金會hō͘伊tio̍h驚，因為批講beh伊去探究到底什麼款ê教育方式ē-tàng象徵新時代ê教育理想。伊就向宣教師會請假三個月，遍訪美國ê基督教大學教育施設，然後提出報告，建議設置手腦並用ê教學，勞學並重ê學府，he就是tsin-má ê東海大學設校siōng原先ê起點。

　　彌迪理對Shoki ê判斷kap領導是tsiaⁿ威服..ê，因為tuì伊ê遊覽探討tńg來時，伊發現Shoki己經tī伊出差期間，向董事會kap總會稟請派任Beeby做南神ê舊約學教授。當時伊感覺黃院長kan-tāⁿ以單方ê需要為優先，實在有點á受強制ê感覺，但是mā感覺ē-sái順南神ê需要接受落來，這影響tio̍h後來伊tio̍h-ài到紐約接受2年ê神學博士ê課程。伊回想當時ê『委屈』是上帝ê恩典，因為1972年伊突然hō͘蔣政權ê KMT踼出伊所愛ê『故鄉』台灣，tī無親無戚、無路、無望ê時tsūn，來了 Selly Uak College hō͘伊舊約學教授ê職位。以西理屋為據點，伊tio̍h-ài繼續伸手，幫贊栽培台灣kap台灣長老教會ê愛鄉土、愛自由民主ê學者kap鬥士。

彌迪理起先做宣教師派去廈門ê時tsūn，起薪hit年俸200英磅，實在是sàn kah可憐，但是後來到台灣ê時tsūn，發覺到tī台灣ê眾牧師ê薪俸kan-taⁿ是伊所領收入ê十分之一。伊當時所受tio̍h，關於台灣ê生活kap文化衝激是bē tsió..ê。

彌迪理tī台灣體驗了第二pái ê金元貶值，是四萬元舊台票兌換一元新台票。伊講第一pái ê體驗是tī福建，伊所看tio̍h ê，中國政府ê撤底腐敗、無能、自私是無法度thang形容ê。Tī伊離開廈門以前，伊經驗了 1比1,000,000 ê金元貶值。Tī台灣，社會、教會kap家庭ē-tàng tī財難ê幽谷下繼續成長，追究根底，就是有現代化ê經濟基礎kap教育ê普及。黃彰輝kap台灣教會ê領導者，得引tshuā台南神學院，行過曠野荒地，進入新koh光明ê境地，mā嘉惠了台灣島國民ê心靈建設，實在應得精神史上bē貶值ê中心格位。

註一：黃彰輝留英期間，伊ê戶籍隨父由員林遷回台南青年一橫巷7號，1951年改為博愛路一巷22號。講到怎樣分設新戶做住寮神學生ê戶長ê經過kap理由，則不詳。 註二：根據黃澄輝（黃俟命ê五男）講：『當年由員林遷戶口到台南ê時，bat發生遷移上ê ting-tâⁿ。因為澄輝tī員林ê戶籍無取消，hō͘彰化縣控告為「逃兵」受通緝，koh遭遇台中地方法院受審之難。』