《台灣人e5先覺─黃彰輝傳》

 | | | 轉寄

1954年普世教會協會總會

作者 張瑞雄 2009.04.26

１參與普世總會籌備 1953年春天，tī日內瓦ê W.C.C.傳道委員會幹事Dr. Hans H. Harms邀請黃彰輝tī 8月中到日內瓦，參與籌備1954年W.C.C.總會內關於世界宣教ê討議內容、方式、時間分配等等ê tāi-tsì。黃彰輝先到日內瓦報到，然後就到Bossey（tī日內瓦ê市郊）赴會。為tio̍h黃彰輝，普世教會協會擠出$800美元，但是伊ê旅費ài $1,200美元，所以Dr. Harms就向Dr. R. E. Feⁿ寫批要求英格蘭長老教會海外宣道會援助不足ê金額$400美元。這一pái ê參會，就是黃彰輝kap W.C.C.實際上ê關係ê開始，而且kap Dr. Pit Van Dusen作伙共事。Dr. Van Dusen紹介黃彰輝si̍k-sāi世界ê教會領袖，伊講：『Shoki若m̄是亞洲第一位，mā算是正向上提昇ê神學院ê院長。』伊kā黃彰輝講：『我tuì Dr. Stanley Smith kap Dr. Frank Cartwright聽講你ê tāi-tsì，又koh tuì你寄hō͘ in ê批，我感覺kap你有親像故交。』in tī日內瓦ê時，Dr. Van Dusen定意ài黃彰輝kap世界基督教高等教育基金會建立密切ê關係，in mā討論ài tī台灣開辦基督教大學ê tāi-tsì。（到1954年開始籌備事宜，到1955年決定開設東海大學。）Dr. Van Dusen ê建議是，神學院應該成做大學ê一部份，但是伊kap黃彰輝無仝意見ê所在，是黃彰輝認為tī日本統治台灣ê殖民時代，就m̄准台灣人有家己ê學校來決定台灣人家己ê將來，tsin-má國民黨tī台灣ê殖民政策下，mā無願意hō͘台灣人家己有啟蒙教育kap統治管理ê學校，進而允准台灣人家己對未來有自決ê意識。

黃彰輝tī日內瓦ê時，mā si̍k-sāi 當時ê Bossey W.C.C.學院ê院長Canon Wendel，後來ê主教Canon Wickham，kap後來ê同事Philippe Maury ê父親Reverend Maury，又koh遇tio̍h同齊參加1939年青年大會ê Robert Bilheimer、Daisuke Kitagawa、Paul Abretst kap Victor Hayward。Iáu有一位重要人物，就是tī錫蘭出生ê神學家Dr. D.T. Niles，伊tī 1939年青年大會ê時，是一位講師，大概tī Oslo mā扮演領導角色，伊是亞洲教會ê領袖，了後kap黃彰輝保持來往，同齊共事。

Dr. Pradervand mā kā黃彰輝講，tī開1954年第二屆W.C.C.總會tsìn前，tī Princeton神學院召開第十七屆世界長老會聯盟ê總會，所以當然tī台灣ê長老教會mā應該參加兩個重要ê世界性會議。黃彰輝心肝想這1954年對台灣ê教會是tsin重要ê一年，因為台灣長老教會申請參與W.C.C.為會員了後ê第一pái，以前台灣長老教會mā lóng無明確正式ê派員參加世界長老會聯盟ê會議。

　　這一pái ê旅行，hō͘黃彰輝tsi̍t-ê好機會，利用暑假ê期間到英國去訪問。tuì 1947年離開英國，到1953年koh再訪英，黃彰輝直覺ài koh一pái tam tio̍h自由空氣ê滋味。1937年以前，主要是台灣tī日本統治下ê教育系統下受教育，所以受教tī日本帝國主義ê殖民地ê人民，根本無自由thang講。1947年，tī台灣蔣介石ê恐怖戒嚴令政治下ê台灣，mā無行動、言論kap集會ê自由，所以黃彰輝一到英國，伊感覺有ná得tio̍h精神解放，非常自由。當伊回到英格蘭海宣會會所，但是hit-ê會所tī二次大戰hō͘德國空襲時e5V2火箭所毀了後，iáu無重建。Tuì戰後到tsin-má，英國人民雖然iáu是困苦，但是自由氣息照常，溫馨和睦ê社會iû-uân tī leh，但是大英帝國己經頹廢，政府有心重整國家社會，而且前瞻未來kap關懷福利。英國ê社會m̄是共產主義ê社會，mā m̄是資本主義ê社會，政治方面mā改變lah（黃彰輝離開英國前後ê改變），戰爭中，邱吉爾前首相bat tī大英帝國時是位政治領袖偉人，如今戰後，伊連候選資格mā無hō͘列入。但是英國ê根基（有可能是英國人ê氣魄）無變。

　　起先是Mr. Feⁿ（海宣幹事）安排tī London ê Mary Lebone Tsurts舉行tsi̍t-ê討論會，伊召集一kuá人來參加，前半部是有關英長老會hiah-ê人關心台灣ê現況kap教會，kap bat tī台灣宣教工作ê hiah-ê人以後所需要做ê tāi-tsì，而且提起長榮中學kap長榮女中ê校況；Mr. Healey為前海宣幹事，tsin-má為英格蘭長老會ê總幹事，Mr. Band（萬校長為前長榮中學校長）kap蘭醫生…等等。後半部是Mr. Ken Slack kap Alan Price（黃彰輝tī西敏斯特學院時ê同學）tī會中mā kap黃彰輝講tio̍h學校ê一般教育，特別是神學院ê問題，親像：辦理學校kap增強校務kap教務ê。

　　會後，黃彰輝到劍橋ê西敏斯特學院訪問，特別拜會當時ê神學院校長Mr. Elmslie，kap前校長Whitehorn教授。黃彰輝tī 1942年離校，tsit-pái是第一pái離校了後tńg來訪問母校，主要kap in討論beh如何hō͘一位tī 1953年tú畢業ê台南神學院學生張德香來留學兩年。

訪問了後，黃彰輝到蘇格蘭ê愛登堡ê New College，想beh kap院長Bailie會晤，伊無tī leh，但是kap教授Porteoos（舊約學教授）見面時ê話題講tio̍h一位bat tī台灣教會有輝煌成就，hō͘人非常思念ê梅甘霧宣教師(Dr. Campbell Moody)。伊是tuì New College畢業ê校友。伊tī台灣彰化縣海邊一帶ê村莊四界行，一面吹小喇叭，一面喚『上帝tshuē失落ê gín-á』，以吸引hiah-ê人來聽道koh信基督。後來梅甘霧牧師得tio̍h肺結核，tī台灣過身。這一pái siōng重要ê成果，是講tio̍h如何hō͘宋泉盛先生（台灣大學哲學系teh-beh tī 1954年畢業ê學生）來New College留學。

　　黃彰輝tī愛登堡探訪MacDonald家庭，因為二次大戰日本宣戰ê時，黃彰輝本有tsi̍t-ê禮拜ê青年聚會，但是身份突然變做『敵國外籍』，就以MacDonald ê姓買火車票，kín-kông tńg去蘭醫生in tau ê插曲。

　　了後，黃彰輝去Glasgow ê三一神學院訪問教教會歷史ê John Foster教授，伊特別會記得伊，是因為in同時進入Selly Uak College ê。當時黃彰輝是學生，John Foster是去教學。伊ê 著作有《往昔kap現今》一本冊。台南神學院ê創設者，而且第一任院長巴克禮宣教師，是Glasgow ê三一神學院ê校友。當時黃彰輝雖無學生thang tuì台南神學院送去留學，但是伊照常想bueh建立好台南神學院kap三一神學院之間ê橋樑。（後來，1964年，黃彰輝擔任世界神學教育基金會ê主任時，就請John Foster教授撰寫，關於早期教會ê歷史，作基金會ê教材。）
　　訪過Glasgow了後，黃彰輝馬上回London ê Marylebone Tsurts，因為英格蘭長老會安排伊tī tsia有tsi̍t-ê專題演講，特別有Elmslie校長專程tuì劍橋來為伊司會。但是黃彰輝tuì tú tńg來英國到tsin-má ê全程旅途，一直teh傷風感冒，用阿司匹靈支持到tsit時，因為無歇睏，己經體力透支昏倒，致使無演講。當伊tsing-sîn過來ê時，會眾己經四散，伊感覺這是伊一生中siōng懊悔ê tāi-tsì。

因為台南神學院kap南京京陵神學基金ê關係，1953年mā是黃彰輝kap美國衛理會si̍k-sāi，開始往來ê一年。起初是二位tī台灣服務ê衛理會宣教師，帶美國紐約衛理會 ê Ralph Ward會督（bat到中國宣教，又koh廣受尊敬） ，來訪問台南神學院因而開始ê。但是黃彰輝對衛理會 ê印象無啥好，因為Ward會督kap Dr. Frank Cartwright是完全無仝ê兩種人。Ward會督hō͘人一種siūⁿ-kuè貴族形式化ê感覺，無像Cartwright平民化，開朗，khò-sio̍k。Ward會督hō͘黃彰輝ê印象，有ná蔣介石kap宋美齡hit批人對台灣施行統治ê氣派。佳哉，後來Tracy Jones（伊當時是衛理會掌管亞洲事務ê幹事，也bat到中國宣教）kap Dr. Eugene Smith（衛理會海內外宣教會ê總幹事）來台南神學院訪問，hō͘黃彰輝對衛理會有kuá改觀。其實，衛理會對南京金陵基金有真大ê參與kap影響力。

　　1953年，hit年mā是黃彰輝就任台南神學院院長滿四年ê一年，mā是伊初任院長時第一批入學ê 12位學生tī這年畢業ê一年。這12位學生中，有四位有史以來第一批女性學生。學生中mā有高俊明，伊後來成做玉山神學院院長，（專門訓練原住民為宣教牧師ê神學生），續落來做台灣基督長老教會ê總幹事。Tī任中，伊領導教會代表台灣人民做三pái宣言，關於台灣現況kap未來ê運命。為tio̍h忠於伊所信仰ê基督，tī 1980年4月，伊hō͘國民黨政府以『藏匿叛徒』ê理由下獄，坐監4年3個月koh 21工。黃彰輝認為高俊明是伊所有學生中『siōng出色ê一位傳道人kap教會領袖』。

黃彰輝回台了後，馬上tshuē長老教會ê總幹事黃武東（伊當時iáu是南部大會總幹事，mā tú tuì國外學習tńg來），談論明年將tī美國召開兩個重要ê世界會議，應該提出台灣教會世界性宣教會議ê報告。In ê宿舍lóng tī新樓kap神學院校境內，所以方便作伙討論。黃武東kā in討論ê內容發展，著作了90 guā頁ê宣教計劃，而且訂了1954年2月22日到27日，tī台南神學院召開台灣長老教會會前Evanston會議（註一），tsit-ê計劃與會議ê結果，就是成做後來ê台灣長老教會倍加運動（P.K.U. Pue Ka Un-tong, the Doobling Movement）ê起源。倍加運動ê前瞻kap動力，就是為tio̍h beh慶祝福音來台100週年（1865年到1965年），ài kā長老會ê會員kap教會ê數目增長為二倍，並且期望每tsi̍t-ê鄉鎮lóng至少ài開設tsi̍t-ê教會。

下面ê圖是台灣長老教會會前Evanston會議1954年2月tī南神舉行ê時留影(張德香提供).


２第一pái訪問北美大陸 Tuì無閒ê南神院務，黃彰輝趕緊前往美國。這頭一pái ê訪美，tī到達最後ê目的地—芝加哥近郊ê伊范斯敦以前，有繁多事務kap使命ài完成。伊所抱ê備忘項目，lóng是關於普世教會ê、神學教育ê、亞洲kap台灣ê宣教ê，但是無隨心tsah一絲á私人ê利益kap案件。

伊這頭一pái ê訪美，大概是tuì英格蘭坐飛機到紐約。1954年，當時ê空運是依靠螺旋槳式ê飛機，tī大西洋頂大概至少ài降落兩pái作加油ê作業。Tsit-ê旅途hō͘伊tsū-kó͘-bô ê感概。 一、 伊第一pái體驗tio̍h大陸ê含義，雖然40年ê一生受了大日本帝國kap大英帝國ê管轄，教育kap生活體驗，所tuà過ê所在包括出生ê台灣lóng是海島。當伊坐船往英格蘭，koh tuì英格蘭tńg來台灣，所經過ê海港，lóng kan-tāⁿ是歐亞大陸ê邊沿niā-tiā。現今，到北美大陸tam到了，開歸工ia̍h-sī幾工ê車，tsiah看到一kuá城市，火車mā ài hō͘旅客tuà宿餐食ê設備。啟示錄21章ê『海mā無閣有』，tsit種ê經驗是真有『安寧』、『固定』ê感受。 二、 伊體會tio̍h美國人是真普遍ê高大。伊所遇tio̍h ê歐洲人不時lóng比亞洲人kut-tè高，伊遇tio̍h Pit Van Dusen ê時tsūn，想tio̍h伊是例外，但是一到美國，tsiah看到hia ê人，m̄ kan-tāⁿ kut-tè高，體型mā大。黃彰輝ê推想是：『因為美國人消耗絕大量ê牛排、牛肉。』其實美國thang有無限tsē ê番麥、大米、黃豆、菜蔬、果子，恐驚過剩，政府kā伊制止生產。美國式ê BBQ，一定hō͘ 了黃彰輝深刻ê豐富ê印象。伊去ê時tsūn是熱天，美國人siōng歡喜tī公寓ê後院，ia̍h-sī院校內ê小公園內一角，設ē-sái烘肉ê所在，排起『宴席』來，是非常豪華ê。這顯然是kā英國式：厝內ê、精細ê、『幼路（秀氣）』ê無仝，設計出氣氛滿滿ê餐食。美國式ê，是一塊塊半磅ê牛排、四分ê一塊大ê鷄肉、歸條ê馬鈴薯包tī鍚箔紙內燒好ê…等等，是你ê胃口thang容納ê兩倍以上，每pái lóng是向你腹肚ê容量挑戰，一直hō͘你食到超滿意為止。因為án-ne，美國人真是消費糧食過tsē，身軀趨重，欠缺運動，講tio̍h in ê行動帶有欠缺柔軟、彈性ê、但是充滿過胖、超重ê壓力。 三、 美國ê文化是kah-ì『龐大』，這到1954年，甚至往前ê 30年，美國lóng是擁有siōng高ê大厦kap摩天樓、siōng大siōng長ê橋kap吊橋、廣大ê農場、超大ê汽車工場、鋼鐵工廠、飛機工廠；tī大學教育、人才養成方面mā是仝款，tuì世界各地招集了知識份子，從事學術研究。黃彰輝mā tī美國看到了大規模ê，ē-sái講是居世界性頭前ê多所神學院。Tuì一間小而且簡陋ê台南神學院看到美國ê大神學院，真有hō͘所觀摩ê眾多事物壓倒ê感覺。

黃彰輝看了北美大陸以後，心裡抱tio̍h beh向超大者提供『小是美』ê感想kap意念。雖然當時iáu無『環保』ê風氣，伊己經感觸到譀大（註：大到hō͘人感覺荒唐）ê消費、慾望、興趣，對kui-ê世界，人頪是有負面ê作用。基督教ê愛，應該帶hō͘世界節制、謙遜、關懷kap分享。

３訪問美國教會kap神學院 對少年而且清新ê神學院院長黃彰輝來講，這一pái ê美國之行，thang講是世上siōng優等ê『在職訓練』。伊ê特徵：是tī真短ê時間內底看tio̍h siōng tsē ê施設，見tio̍h可能是siōng tsē位ê大名鼎鼎ê神學教授，並且ē-tàng kap教會首長、神學教育家、世界宣道基金會ê幹部相會、對談kap學習。Siōng重要ê學習重點，tio̍h是hō͘伊提煉出家己ê人生目標。伊tī五年奮鬥ê過程中，已經明顯ê看tio̍h基督教會ê生命是傳揚基督ê信息。Tī傳揚信息事工ê核心，問題是人kap in對信息ê使命。黃彰輝tī心內，需要經過一段角力，並且tī這角力當中，發現家己、台灣ê教會、kui-ê台灣ê社會，而且看出台灣tī世界上ê地位，kap台灣人kap世界人頪ê互動。黃彰輝ê職責焦點，是啟蒙傳道人tī台灣實況內生活出有效ê互動。

黃彰輝對筆者一再強調講：『我m̄是神學家。雖然我知影朝向神學ê方位kap理論，發揚ê呼召。我明確發現我ê使命是做tsi̍t-ê神學教育家。神學教育家是傾向於活動ê，所以我無斷kap外地、kap世界對談，koh kap內地台灣紹介kap呼籲。我所關心ê，主若是現職中kap學習中ê傳道人；我所關切ê，就是beh傳道人知影in ê實況。台灣人對in ê實況忠實盡力，就是等於in對世界kap對基督ê事奉忠實kap盡力。』

1950年代ê紐約協和神學院，tī Pit Van Dusen院長ê領導之下，建立成做美國『siōng大』ê神學研究中心。因此mā ē-sái稱謂世界『siōng大』ê神學院。這神學院就座立tī紐約siōng精彩ê教育kap學術ê厝邊，像：哥倫比亞大學、猶太人神學院、巴爾拿教育學院、朱利亞音樂學院、…等等學苑。加上河邊（Riverside）基督教會tshiok-khiā tī協和神學院邊á，而且河邊街475號ê美國教會中心，mā tú-teh建設，實在是好kah無話講ê普世性教會ê教育、活動kap世界互動ê中心。

雖然協和神學院ê環境hō͘黃彰輝真深刻ê印象，伊所得tio̍h ê siōng大、siōng難忘ê感銘，是thang kap世界上盛名ê神學家見面ê一kuá安排：伊thang kap Reinhold Niebuhr（尼布爾），John Bennett，D. D. Williams James Muilenburg見面kap詳談。（《回憶錄》p.198）

這m̄是第一pái，但是kap尼布爾教授ê晤談，算是siōng難得而且歡喜ê。黃彰輝家己提起，tsit一位神學大師深深ê影響了伊ê倫理kap政治ê神學思想。當時尼布爾對東亞ê局勢非常關心，而且真理解。M̄-koh，這是真好ê機會講tio̍h台灣ê情勢。黃彰輝講hō͘伊聽tī台灣所遭遇ê白色恐怖。Tī台灣ê『中國（國民）黨』政府逮捕、酷刑、鎗殺異己ê台灣菁英，koh諉罪in是『共匪』。

尼布爾提起『仝款』ê tāi-tsì mā tī美國發生，就是McCarthyism。因為當時tī美國若有人hō͘懷疑有共產主義ê思想kap關聯，就會hō͘美國政府當局抓去迫害。伊ê政治、倫理要點，就是講無tsi̍t-ê完全合理民主ê政體，但是至少tī民主ê理想內底，基督徒kap教會應該扮演負起國家kap社會ê良心ê使命。

當時tī協和神學院當教授ê『少壯』Bennett、Williams kap Muilenburg三位，tuì 1954年ê訪問開始，kap黃彰輝建立了繼續真久ê友誼。Kap in ê談論，tuì一般ê話題進而進入神學教育ê求精，特別著重『少年』kap『新獨立國家』內ê教會ê傳教人員ê養成kap進修再教育ê分域。黃彰輝向in請求助長台南ê教授陣容。In lóng表示siōng大ê關心，尤其是D.D. Williams是kap尼布爾kap另外一位受托組成北美地區ê神學院協會內ê考量神學課程kap重審神學教育ê目的委員會，hō͘黃彰輝真專門而且周到ê探討。Tuì 1954年hit一pái ê會合以後，黃彰輝一再tī無仝ê場面tī北美，甚至tī新加坡、歐洲，kap in相聚，論題延伸到倫理、政治kap國際情勢。（參看《回憶錄》p.201）

Tī協和神學院，Van Dusen特別安排黃彰輝去看圖書館kap Dr. Beets館長。伊開了bē少時間，說明圖書館員所須要具備ê廣泛kap精細ê辦事能力。當然，台南無法度tī短短ê幾年，甚至無法度以黃彰輝ê一世人，來jiok-tio̍h紐約ê廣泛kap精密，Dr. Beets館長hō͘了黃彰輝tsi̍t-ê允諾，beh將盈餘、重複ê書本贈送hō͘台南神學院。伊往後ê幾年果真án-ne做。Tī Dr. Beets以外，Van Dusen mā安排黃彰輝去探訪耶魯神學院kap hia ê圖書館長Dr. Morris。Dr. Morris是一位教育ê圖書館學者，本身mā是一位廣學ê教授，對南神建設圖書舘，提議了真重要ê方針。後來tī東南亞神學院協會開辦神學院圖書館行政者研習會ê時tsūn，委員會就同心合意，聘請Dr. Morris教授擔任指導。黃彰輝mā tī普世教協神學基金會任中，聘請伊到其他ê地區（南美、非洲等所在）去指導神學院辦理圖書館ê學問。

Tī耶魯神學院，tī圖書館見習以外，黃彰輝遇tio̍h教務主任Liston Pope博士、宗教教育學ê Paul Vieth博士，kap另外一位教授Tsarles Forman博士。Tī耶魯，黃彰輝向in請求接受台灣ê學生到該院校學習，因為耶魯神學院是耶魯大學ê一學院，做教務長ê就是神學院ê首長。Liston Pope博士就是做院務決策ê人。伊kap協和 ê Van Dusen博士仝款有遠瞻，mā參與教會ê策劃，進一步支持普世教協ê關懷、運行kap合作。伊tī兩年後ê 1956年，往曼谷赴普世教會協會主辦ê會議路途上，專程到台灣訪問台南神學院。

Tī普林斯敦神學院，黃彰輝kap John Mackay博士院長頭一pái見面，因為世界歸正教會聯盟總會tī兩工後，就beh tī普林斯敦召開，而且John Mackay博士就是聯盟ê主席，而且是會場ê主人，大名鼎鼎ê教會領導者、學者，tuì擁有W.C.C.大家庭ê四分之一教勢而分散到世界各角落來聚集tī tsia。會後koh接連tī伊凡斯敦開第二屆ê普世教會協會（W.C.C.）總會，tī he場面，Mackay博士mā擔任要職。所以黃彰輝得tio̍h伊撥時間見面，實在難得。tī普林斯敦真短ê時間，見tio̍h Homrighausen博士，koh由伊ê紹介，si̍k-sāi John Baille博士院長、T.F. Torrance博士（愛登堡ê新神學院ê兩位，一年前到蘇格蘭無見tio̍h面ê），koh有捷克斯拉夫出身ê J. Hromadka教授。M̄-koh，tī普林斯敦初次見面，但是以後對台灣教會傳道人才做真大貢獻ê人，就是tuì德洲歐士珍（Austin）來，無久以後接管普林斯敦神學院教務，koh幾年後當任院長ê James McCord博士。因為tī伊當院長ê任期內，真tsē南神kap台灣教會ê眾牧師hō͘接受到普林斯敦學習。

４代表台灣（基督長老教會）參加普世教協總會 普世教會協會是1948年tī荷蘭ê阿姆斯特丹成立。Tsit世界性ê基督教組織有ná聯合國ê構想，將世界上所有ê基督教教派lóng會集tī tsi̍t-ê組織內底，共同追求合一、更新、論談、祈禱，而且互相圖謀容忍kap理解ê合作聯盟。主要ê基督教教派己經tī第二pái世界大戰以前，己經有過共識。戰後kā關於『教會kap職制』方面ê運動聯合，成做tsi̍t-ê協議性ê組織。雖然是普世性ê教會組織，天主教、美南浸信會、『獨立教派』、『純福音派』kap『聖靈派』各教會lóng 無參與tī tsit-ê協會內。

台灣基督長老教會親像頭前講ê，tī 1951年ê第一屆總會議決申請參加普世教會協會為會員，所以這第二屆總會是台灣教會ê第一pái。台灣基督長老教會是台灣唯一ê教派中，有夠額ê會員有資格參加為正會員。1954年ê台灣長老教會ê總會，就派黃彰輝為該教會ê代表，另外三位，to̍h是：陳溪圳牧師、吳永華牧師，kap楊士養牧師，為觀察員參加。Tī普世教協總會前所召開ê第17屆世界長老宗聯誼會，tuì台灣有四名代表席位，to̍h是頂面提tio̍h ê四位牧師參加，而且第一pái有正式ê代表參加。

黃彰輝記述tsit-ê會，真是普世性ê無分邦國、無分宗派，教會ê領袖聚集tī tsi̍t-ê地方相交誼、敬拜，m̄-koh人數非常tsē，無法度廣泛ê互相si̍k-sāi，就靠小組ê聚集kap小委員會ê討論作深度ê參與。Án-ne大而且普世性ê聚會，hō͘人挑戰kap感動。但是真正ê教會ê合作為一，ài仰賴tī各人ê地域、故鄉、大學、教會、國ia̍h-sī州ê活動實行，tsiah有實質kap意義。就án-ne，tuì台灣來到Evanston ê代表，tsah來台灣kap教會ê貢獻，kap普世ê教會組成一團。M̄-koh，tī超大ê集會，分hō͘各代表普世教會團結同化ê感受，到各人ê邦國地域、社會、教會去發揚基督所托付，各盡各ê多元ê光彩。

５黃彰輝認同台灣ê演變 1954年tī美國Evanston, Illinois開W.C.C.總會ê時tsūn，tī宣教研究大會ê場面內底，中國ê共產化成做討論ê主題。因為tuì 1949年以後中華人民共和國kā外來宣教人員趕出去，而且禁止國內一切ê傳教活動，中國ē-sái講是tuì世界宣教ê策劃內底喪失。關予中國宣教ê tsit場討論變成焦觀，與會者ê論調呈現悲觀，場內ê khí-mo͘充滿沉重ê氣氛。主持研討會ê Dr. D. T. Nile（錫蘭出身ê教會領袖）就請黃彰輝，tuì tsi̍t-ê『中國人』ê立場講有關伊ê宣教觀點。

以下是黃彰輝ê演講ê概要：

我tī 6年guā前（1947年10月），tuì英國回到台灣ê理由之一，就是因為我自認為（ia̍h-sī認為）我是中國人，但是tńg去了後，tī蔣政權ê戒嚴令下，我開始問家己，我是中國人mah？有可能kan-tāⁿ是tsi̍t-ê台灣人。因為受日本ia̍h-sī中國ê統治，差別真tsió，因為台灣人猶原是受tio̍h二等國民ê對待。『中國人（華人）』是tsi̍t-ê真模糊ê名詞，叫tsi̍t-ê人『華人』，ná親像是叫tsi̍t-ê人為歐洲人ia̍h-sī安格魯撒克遜人。我其實無訪問過中國，所以無資格像D.T.所講叫我代表中國人發言。當然，tī台灣有中國人，咱叫hiah-ê二次大戰後來台灣ê中國人為『阿山仔』（大陸人ê意思），koh叫家己為『蕃薯仔』（取自台灣地圖像tsi̍t-ê蕃薯ê島嶼）。

我充份知影『宣教衝激』，因為戰爭時，我人iáu teh英格蘭，tiāⁿ-tiāⁿ tī講演中家己認同家己是『中國人』，koh活活ê描述中國軍隊tī英明ê基督徒將軍ê領導kap世界有名ê基督徒『蔣夫人』ê靈感ê影響之下，在膽ê抵抗日本軍。像真tsē ê人，我畫出色彩燦爛ê畫像！但是，當我過去六年guā ê年月，親目tsiu金金看tio̍h中國ê軍隊根本無規矩，高低ê官員食錢臭爛，就bē拍理解為什麼國民黨tī共產黨ê手下完全ê phah敗仗。我講：『我mā bē-sái理解，為什麼基督教ê宣教會遇tio̍h tsiah-nih大ê阻礙，m̄-koh，我相信，這mā是上帝ê宣教上ê攝理。我贊成tī tsit場辯論上tson tsē人tiāⁿ-tiāⁿ反復講，上帝ê審判應該tuì上帝ê厝內ê人民開始。做tsi̍t-ê台灣人基督徒，我想起有一pái赤岡ê牧師講ê道，提醒世人講：『伊（上帝）tī tò-pîng(以tò-tshiú)做tāi-tsì，我suah bē-sái看見。（約伯記廿三9 ）』

當黃彰輝看tio̍h真tsē教會領袖為中國宣教ê終結悲嘆，親像踏入絕路，深深感覺這是喚起ta̍k-ke對台灣應該有特別ê si̍k-sāi，進而抱起新ê希望ê機會。伊突然受了靈感講出: 『阮應該分明tī世界上有tsi̍t-ê中國，mā有tsi̍t-ê台灣。雖然tī中國ê宣教hō͘基督教會喪志、失望，上帝suah用伊ê tò-tshiú，tī台灣開宣教ê大好機會』。伊講了以上ê話了後，家己感覺受了感動tī tsit種ê講法是有突破性、而且有新鮮氣味，tī tsit-ê場合向世界宣稱故鄉台灣是有獨立位格ê宣言。後來伊tī D. T. Nile寫ê報告kap 著作內底看tio̍h伊提起『tsi̍t-ê中國，tsi̍t-ê台灣』ê論調，而且mā用了赤岡教會牧師所作ê約伯記ê註釋kā伊解說。

６困難達成ê基督教會普世化 Tuì 1954年tī美國ê Evanston ê普世教會協會總會，到1961年tī印度ê新德里ê總會，大約七年期間，tī台灣mā掀起了普世教會運動。除了台灣基督長老教會以外，iáu有真tsē有普世關聯ê教會，親像：聖公會、信義會、衛理公會、美北浸信會等等。經過了教派領導者tiāⁿ-tiāⁿ ê努力，終於達成兩項教會合作ê大事業。其一就是慶祝基督教在台一百週年ê紀念慶祝，kap中華民國基督教聯合會ê成立。雖然兩項成就無機會tī國際上大吹號角ê宣傳，m̄-koh tī內底工作ê人，真正費了心血去『抗爭』出合作ê見證。對作普世教會協會ê成員ê台灣基督長老教會，he是一件真孤單，又koh坎坷ê路程。因為，除了台灣基督長老教會以外，無任何其他ê教派參與tsit-ê普世性ê組織。綜合其原因，ē-sái列舉以下kui項： 一、 做為正規ê會員，教會至少ài有數以萬計ê信徒人數； 二、 中國國民黨政權tú tī leh外交ê烏暗時代，恐驚政權權利者以外，有國際性ê交往kap互利ê機會； 三、 因為tī普世教會協會ê成員教會內底，有kuá教會是歸屬tī共產國家集團。允准台灣代表tī án-ne ê情況之下，恐驚『反共』ê防線難保。 四、 tī台灣ê『反共護教』ê基督教份子，向中國民民黨奏出誹謗，講普世教會協會是親共ê組織。 五、 tī聖公會、衛理會、長老會等教派（lóng是講北京語言）ê有力信徒，lóng是國民黨政權內ê政要。Tī台灣其實m̄是教會（派）內ê信徒，tuì án-ne是國民黨ê基督徒，位居外交界kap內政界ê決策寶座上。

Tī『官話化』ê內政kap外交官吏，根本就無法度去探測ia̍h-sī體驗tio̍h英格蘭、加拿大，kap日本教會ê互動所體會出來ê根底是juā-ni̍h-á ê堅固，而且kap國際基督教會ê連帶是怎樣廣而且強靱。雖然bē-sái操中國官話，但是台灣基督長老教會ē-tàng操作tsin tsē種ê語言，koh-khah重要ê是符合時代ê神，信仰告白語言，hō͘ in有對世界教會kap國際社會ê『見證』。所以，雖然處tī艱難ê環境中，mā ē-tàng得tio̍h無數ê有骨氣、有良知ê『華語』牧師，其中特別kap黃彰輝、黃武東有交往ê，就是周聯華牧師。

因為黃彰輝bē曉操華語，tī台灣基督長老教會中，mā無一位ē-tàng kap中國國民黨政權ê中央kap siōng高峰ê人士來往。周聯華就是tī kah-ná是疏通ê絕路時所得tio̍h ê難友。周聯華是中國共產黨the̍h下全中國（1949年）以前，就到美國留學，攻讀神學大約6年，然後tī 1954年到台灣來。黃彰輝kap周聯華交談時，使用ê語言lóng是英語。兩人同是從事神學教育，mā對基督教信仰ê『本土化』有深切ê意念kap理解，而且有熱情kap見識。

就tī 1950年代後期，周聯華tī伊家己ê回憶錄內底，述講伊是án-tsuáⁿ kap台灣基督長老教會人士相si̍k-sāi，並且合作：

Tú好是長老會在台一百週年紀念，in預備大大慶祝一下。有人認為中國人從來無家己做生日ê，一定ài會齊所有ê人來開慶生會。Tuì án-ne，tī台灣ê長老會以外ê教會組織了慶祝籌備會，推我做主席。Hit段時tsūn，長老會非常積極推行『倍加運動』，南部有真tsē教會，增加一倍以上ê教友。In一點mā lóng無『政治』，純粹是宣教ê，腳踏實地做教會擴展ê工作。（《周聯華回憶錄》p.270）

周聯華繼續提起伊kap黃彰輝kap黃武東怎樣合作建立神學kap教會ê探討kap瞻望：

In有兩位同工，台南神學院ê院長黃彰輝kap台灣長老會ê總會總幹事黃武東，kap我tiāⁿ-tiāⁿ通宵講話，商討教會宣教策略，tuì晚飯以後談到凌晨二、三點鐘。彰輝是tsi̍t-ê熱情奔放ê理想主義者，伊有一大堆ê理想、策略，伊是動口無動手ê人；武東suah是什麼話lóng m̄講，靜靜聽ê人。Mā可能有人會問，我lóng teh做什麼，我是問問題ê人。我常問：為什麼要án-ne做？kám行得通？然後有時tsūn tī一邊加油，有時tī一邊潑冷水。第二天早起，武東kap我起了早，mā m̄去kap彰輝講再見，坐了『平等號』火車tńg去北部。武東是無講話kan-tāⁿ做事ê人，伊ē-tàng kā暗時討論ê物件，一件件成做行動。彰輝ê頭腦、武東ê行動，in二位是絕配，mā成做hit階段長老會ê全盛時代。（《周聯華回憶錄》p.271）

到1963年11月22日（註二），聖公會ê吉爾生主教kap周聯華邀請了長老會、信義會、衛理會等教會人士，tī東海大學成立基督教會聯合會。這聯合會共同圖謀教派間kap宣教ê合作，漸漸進展到1971年，意圖起草制作『國是宣言』為止，有了相當好ê成就，可惜，因為各教派ê政治背景，kan-tāⁿ遺留台灣基督長老教會修練了以後單獨教派去發表he歷史性ê台灣基督長老教會ê第tsi̍t-ê聲明。

７印度新德里ê普世教會協會總會 繼1954年ê熱天tī Evanston、1961年ê冬季tī新德里，召開W.C.C.ê總會，黃彰輝hō͘邀請出席，但是，害--a！伊己經hō͘中國國民黨政權點名，bē-sái the̍h tio̍h『出入境證』，因為蔣政權實行『拖』ê政策，開會ê日期tio̍h tī眼前，hō͘人焦急。佳哉有了『總統牧師』周聯華kā伊幫助。周聯華先去要求見內政部長連震東，因為tī辦公室有tsi̍t-tiám-á 不方便，就tī連震東厝內接見。連部長kā周牧師講，因為對黃彰輝ê秘密報告有一大疊，伊m̄敢批准。周聯華向連震東訽問，hiah-ê密報是m̄是來自tsi̍t-ê來源？是m̄是ē-tàng派人去台南查看hiah-ê人kám有出軌行動？密報有權威性kap準確性？因為看起來，kan-tāⁿ連震東無夠移動權勢ê『山崙』，tuì án-ne伊向總統府祕書長張群求助，伊tú好是tī中國國民黨黨部負責siōng高決策機構，其委員除張群以外，有曾虛白、陶希聖，kap謝然之。就吩咐叫黃武東kap黃彰輝總共7 ê人，聚集tī周聯華牧會ê懷恩堂。黃武東kap黃彰輝就準備kā關於台灣基督長老教會ê一切，lóng報告hō͘委員會。第二天透早，黨部副祕書長謝然之就khà電話hō͘入出境管理局，ài黃彰輝十點鐘去領取出入境證（註三）。Án-ne伊tio̍h鬆一氣，黃彰輝就代表台灣基督長老教會，到印度赴了第二pái W.C.C.總會。

註一：tī Evanston開普世教會協會總會tsín前，先tī台灣開預備會之意。 註二：to̍h是美國總統甘乃迺hō͘暗殺身亡ê hit一工。 註三：參看《周聯華回憶錄》p.279-280。