《老人kah海》

 | | | 轉寄

《老人kah海》_1 Pehtsa̍ptshit kang lia̍h bô hî/八十七工掠無魚

作者 台譯：Manlajo, 校訂：宋麗瓊 2019.02.17

1. Pehtsa̍ptshit kang lia̍h bô hî
I sī tsi̍tê ko͘tuaⁿ ê lāu lâng, kakī tsi̍tê ēng tsi̍t tsiah sè tsiah tsûn’á tī Mexico uanlâu ni̍h teh lia̍hhî; íking pehtsa̍p sìkang ā, i lóng bô lia̍h tio̍h hî. Thâutsêng ê sìtsa̍p kang, ū tsi̍tê tsapo͘ gín’á tòe i tshut hái, m̄ koh, kingkòe sìtsa̍p kang lia̍h bô hî liáuāu, gín’á ê pēbú kā i kóng, tsitê lāu lâng tso̍attùi sī suebóe tōjîn, bô lâng ē pí i kohkhah sue ā. Gín’á thiaⁿ in ê ōe, tsiū khì tòe pa̍t tsiah tsûn, thâu tsi̍tê lépài to̍h lia̍h tio̍h saⁿ bóe tōabóe hî. Ta̍k kang khòaⁿ lāu lâng khang tsûn tńg.lâi, gín’á thè i simsng, só͘í tiāⁿtiāⁿ lo̍hkhì kā i tàu the̍h soh’ákhún, ásī hîkau, hîtshe, kah kńg tī tsûnûi ê phângpò͘. Hit tè phângpò͘ ēng mīhún tē’á pó͘ kòe, kńg khílâi liáuāu, khòaⁿ khí.lâi ná tshintshiūⁿ sī tsi̍t bīn siōngting thiatté sitpāi ê kî’á.

Tsitê lāu lâng seⁿtsò o͘ tasán koh suelám, i ê āmkún āu ū tshimtshim ê jiâuhûn, siang pêng tshùiphóe ū jia̍ttài háitsúi hóansiā ê ji̍tthâu kng só͘ ínkhí ê o͘pan. I ê siang tshiú koh ū ēng soh’á khiú tāng hî só͘ lâu lo̍h.lâi ê tsin tshim ê pahûn, tsiahê pa lóng m̄ sī sin ê, lóng íking nîkú go̍ehtshim, ná tshintshiūⁿ bô hî ê suabô͘ siū tio̍h tshimsi̍t ê khóan.

I kui singkhu ta̍k ūi lóng lāu ā, kanta hit tùi ba̍ktsiu iáu siàuliân; in ê siktshái ná hái, jîtshiáⁿ tsin khailóng, koh m̄ jīn su.

"Santiago," in tùi thua tsûn tsiūⁿ hōaⁿ ê só͘tsāi peh khí.lâi ê sî, hitê gín’á kā i kóng,"Góa ētàng koh tòe lí tshut hái à, góan ū thàn tsi̍t kóa tsîⁿ ā."

Lāu lâng bat kà tsitê gín’á lia̍hhî, só͘í gín’á kah i tsin tshin.

Lāu lâng kóng,"M̄ thang, hit tsiah tsûn tng hó ūn, lí tio̍h kèsio̍k khì tòe in."
"M̄ koh, ài ē kìtit, lí bat pehtsa̍ptshit kang lia̍h bô hî, āulâi liânsòa saⁿ lépài, lán ta̍k kang lóng ū lia̍h tio̍h tōabóe hî."

1, 八十七工掠無魚
伊是一个孤單 ê 老人，家己一个用一隻細隻船á tī 墨西哥灣流裡teh掠魚；已經八十四工ā，伊攏無掠tio̍h 魚。頭前 ê 四十工，有一个 tsapo͘ gín’á tòe 伊出海，m̄ koh，經過四十工掠無魚了後，gín’á ê 父母 kā 伊講，tsitê 老人絕對是衰尾道人，無人 ē 比伊 kohkhah 衰ā。Gín’á 聽 in ê 話，就去 tòe 別隻船，頭一个禮拜 to̍h 掠tio̍h 三尾大尾魚。Ta̍k工看老人空船 tńg來，gín’á 替伊心酸，所以 tiāⁿtiāⁿ 落去 kā 伊 tàu the̍h 索á綑，á是魚鉤、魚叉，kah 捲 tī 船桅 ê 帆布。Hit塊帆布用麵粉袋á補過，捲起來了後，看起來 ná親像是一面象徵徹底失敗 ê 旗á。

Tsitê老人生做烏ta瘦 koh 衰lám，伊 ê 頷頸後有深深 ê 皺痕，雙pêng 嘴phóe 有熱帶海水反射 ê 日頭光所引起 ê 烏斑。伊 ê 雙手 koh 有用索á khiú 重魚所留落來 ê 真深 ê 疤痕，tsiahê 疤攏 m̄是新 ê，lóng 已經年久月深，ná親像無魚 ê 沙漠受tio̍h 侵蝕 ê 款。 伊 kui身軀 ta̍k位 lóng 老ā，kanta hit 對目tsiu iáu 少年；in ê 色彩 ná 海，而且真開朗，koh m̄認輸。

「Santiago，」in tùi 拖船上岸 ê 所在 peh起來 ê 時，hitê gín’á kā 伊講：「我 ētàng koh tòe 你出海 à，阮有 thàn 一kóa 錢 ā。」

老人 bat 教tsitê gín’á 掠魚，所以 gín’á kah 伊真親。

老人講：「M̄ thang，hit 隻船當好運，你 tio̍h 繼續去 tòe in。」
「M̄ koh，ài ē記得，你 bat 八十七工掠無魚，後來連續三禮拜，咱 ta̍k工 lóng 有掠tio̍h 大尾魚。」
**請參考原譯本：https://laulangkaphai.blogspot.com/