《老人kah海》

 | | | 轉寄

《老人kah海》_24 Ι khaisí kîtó/伊開始祈禱

作者 Ernest Hemingway, 台譯：宋麗瓊 林俊育 2019.09.29

I sùsī sùsī khò tī tsûnpang, kankhó͘ ê sî to̍h lún leh; hî ûnûná teh siû, tsûn bānbān'á kiâⁿkòe o͘àm ê tsúibīn. Tang pêng lâi ê hong tshue khí tsi̍t tsūn bîsè ê háiéng; tiongtàu ê sî, lāulâng ê tò tshiú bô koh kiùkin ā.

I kóng,"hî ah, tse tùi lí lâi kóng sī pháiⁿ siausit neh."i koh sóa tāng teh tī kingkahthâu môa tē'á téng ê hîsòaⁿ.

I kámkak ū khah khòaⁿua̍h, m̄ koh iáusī kankhó͘, tsóng ·sī i tsi̍t tiám'á to m̄ sêngjīn he sī kankhó͘.

I kóng,"góa m̄ sī khiânsêng ê kàutô͘, m̄ koh, ūi tio̍h beh lia̍h c hit bóe hî, góa ē liām tsa̍p piàn"Tsú ê kîtó bûn"kah tsa̍p piàn"Sèngbó king"; jîtshiáⁿ nā lia̍h tio̍h i, góa pótsèng ē khì tiâupài Cobre Sèngbó; tse sī góa ê sênglo̍k." I khaisí ná kikhì teh kîtó. Ū sî i siuⁿ thiám, suah bē kìtit kingbûn ê sî, i to̍h ē liām tsin kín, hō͘ kîtó bûn tsūtōng liām tshutlâi. I jīnûi"Sèngbó king"pí"Tsú ê kîtó bûn"khah kántan.

"bān hok Maria, lí tshiongmóa sèng ài. Tsú kah lí tôngtsāi. Lí tī hūlí tiong siū oló, lí ê tshinkiáⁿ Iésu mā tângsiū oló. Thiⁿ Tsú Sèngbó Maria, kiû lí tī tsitmá kah tī goán sí ê sî, ūi goán tsōejîn kîkiû thiⁿ Tsú. Amen."liáuāu, i koh ke tsi̍t kù, kóng,"siū oló ê Sèngbó ah, kiû lí ūi c hit bóe hî ê sí kîtó, suijiân i si̍ttsāi sī tsin liáuputkhí."

Kîtó liáuāu, i ū kámkak khah hó, m̄ koh iáusī ē kankhó͘, jîtshiáⁿ hoānsè koh khah kankhó͘. I khò tī tsûnthâu pang, koh ná kikhì leh, khaisí ua̍htāng i tò tshiú ê tséngthâu'á. Suijiân ū bîhong khinkhiná tshue khí, m̄ koh ji̍tthâu tsitmá tsin iāmjua̍h ā.

I kóng,"góa siōng hó kā tī tsûnbóe ê hit tiâu hîsòaⁿ kohtsài pa̍k jī. Hit bé hî nā beh koh bih tsi̍t àm, góa tio̍h ài koh tsia̍h mi̍hkiāⁿ, jîtshiáⁿ koàná lāi ê tsúi mā tshun bô gōa tsē ā. Tsia tûliáu lia̍h háitiá ígōa, siáⁿmi̍h lóng bô. M̄ koh, góa nā thàn tshiⁿ tsia̍h i, mā sī bē bái. Ǹgbāng ingàm ū puehî ē thiàu khí lâi tsûnténg, m̄ koh, khósioh góa bô tinghóe thang siâⁿ in lâi. Puehî tsheⁿtsia̍h siōng hó, jîtshiáⁿ m̄ bián kā i tshiat tsò sè tè. Taⁿ góa ittēng tio̍h ài pótshî théla̍t. Thiⁿ ah, góa m̄ tsai iáⁿ i ē hiah tōabóe."

I kóng,"M̄ koán i gōa tōabóe, gōa liáuputkhí, hoâiⁿti̍t góa ē kā i thâi sí."

I siūⁿ, suijiân ánne sī ·bô kongpêⁿ, m̄ koh, góa ài ho͘ tsai, lâng ū gōa gâu, gōa nāi tshau.

I kóng,"góa bat kā gín'á kóng, góa sī tsi̍tê koài Lótsú, tsitmá to̍h sī góa ài lâi tsèngbêng ê sîtsūn ā."

I kòikhì tshing gōa pái ê tsèngbêng lóng bô sǹg, tsitmá i beh kohtsài tsèngbêng tsi̍t pái. Ta̍k pái lóng sī sin ê tsi̍t pái; ta̍k pái tsèngbêng ê sî, i lóng bô khì hôesióng kòikhì.


伊sùsī sùsī靠tī船枋，艱苦ê時to̍h忍leh；魚勻勻á teh泅，船慢慢á行過烏暗ê水面。東pêng來ê風吹起一tsūn微細ê海湧；中晝ê時，老人ê倒手無koh kiù筋ā。

伊講：「魚ah，這對你來講是 pháiⁿ消息neh。」伊koh徙動teh tī 肩胛頭麻袋á頂ê魚線。

伊感覺有khah khòaⁿ活，m̄ koh iáu是艱苦，總是伊一點á to m̄承認he是艱苦。

伊講：「我m̄是虔誠ê教徒，m̄ koh，為tio̍h beh掠tsit尾魚，我ē念十遍「主ê祈禱文」kah十遍「聖母經」；而且若掠tio̍h牠，我保證ē去朝拜Cobre聖母；這是我ê承諾。」 伊開始ná機器teh祈禱。有時伊siuⁿ thiám，suah bē記得經文ê時，伊to̍h ē念真緊，hō͘祈禱文自動唸出來。伊認為「聖母經」比「主ê祈禱文」khah簡單。

「萬福Maria，妳充滿聖愛。主kah妳同在。妳tī婦女中受oló，妳的親kiáⁿ耶穌mā同受oló。天主聖母Maria，求妳tī tsitmá kah tī阮死ê時，為阮罪人祈求天主。Amen。」了後，伊koh加一句，講：「受oló ê聖母ah，求你為tsit尾魚ê死祈禱，雖然牠實在是真了不起。」

祈禱了後，伊有感覺khah好，m̄ koh iáu是ē艱苦，而且hoānsè koh khah艱苦。伊靠tī船頭枋，koh ná機器leh，開始活動伊倒手ê指頭á。 雖然有微風輕輕á吹起，m̄ koh日頭tsitmá真炎熱ā。

伊講：「我siōng好kā tī船尾ê hit條魚線koh再縛餌。Hit尾魚若beh koh bih 一暗，我tio̍h ài koh食物件，而且罐á內ê水mā tshun無gōa tsē ā。Tsia除了掠海豬á以外，啥物lóng無。M̄ koh，我若趁tshiⁿ食牠，mā是bē bái。Ǹg望ing暗有飛魚ē跳起來船頂，m̄ koh，可惜我無燈火thang siâⁿ in來。飛魚生食siōng好，而且m̄免kā牠切做細塊。Taⁿ我一定tio̍h ài保持體力。天ah，我m̄知影牠ē hiah大尾。」

伊講：「M̄管牠gōa大尾，gōa了不起，橫直我ē kā牠thâi死。」

伊想：雖然ánne是無公平，m̄ koh，我ài ho͘知，人有gōa gâu，gōa耐操。

伊講：「我bat kā gín’á講，我是一个怪老子，tsitmá to̍h是我ài來證明ê時tsūn ā。」

伊過去千gōa pái ê證明lóng無算，tsitmá伊beh koh再證明一pái。Ta̍k pái lóng是新ê一pái；ta̍k pái證明ê時，伊lóng無去回想過去。