《老人kah海》

 | | | 轉寄

《老人kah海》_25, Siūⁿkhí i kah o͘lâng at tshiú pà/想起伊 kah烏人at手pà

作者 Ernest Hemingway, 台譯：宋麗瓊 林俊育 2019.10.06

I siūⁿ, i nā khéng khùn tsi̍tē to̍h hó à, góa mā tsiah thang bîn tsi̍tē, thang koh khì bāngkìⁿ saiá. Sī ántsóaⁿ góa khah bāng mā sī saiá leh? I kā kakī kóng, Mài siūⁿ ā lah, lāu hòe á. Tsitmá khinkhiná phak tī tsûnpang hiohkhùn, siáⁿmi̍h lóng mài siūⁿ; tsitmá i tng teh phahpiàⁿ, lí tio̍h tsīnliōng hóhó’á hiohkhùn.

Sîkan íking kòetàu, tsûn iáusī bānbān'á, únún á teh kiâⁿ, m̄ koh ū tsingka bîbî'á tanghong ê tsó͘la̍t. Lāulâng tòe bîsè ê háiéng khinkhiná teh phiauliû, khatsiahphiaⁿ phua̍h hîsòaⁿ ê só͘tsāi koh khaisí tsin bênghián teh thiu thiàⁿ.

Hit ēpo͘ ū tsi̍t pái, hîsòaⁿ koh sing khílâi, m̄ koh, hî kantaⁿ tī siókhóa khah tshián ê só͘tsāi kèsio̍k teh siû. Ji̍tthâu tsiò tio̍h lāulâng ê tò tshiú, tò king kah khatsiahāu, só͘í i tsai, hî íking kái hiòng, siû ǹg tangpak pêng khì.

Kìjiân i bat khòaⁿkòe i tsi̍t pái, i ētàng sióngsiōng hit bóe hî tī tsúi ·nih teh siû ê khoán, kiô á sik ê hî 拽 tiánkhui ná si̍t, thánkhiā ê tōa bóeliu póe khui o͘àm ê háitsúi. Lāulâng siūⁿ, góa m̄ tsai, tī hitê tshimtō͘, i tàuté sī khòaⁿ ū á bô. I ê ba̍ktsiu tsin tōa lúi, bé á ê ba̍ktsiu ke tsin sèlúi, m̄ koh bé á tī o͘àm tiong mā khòaⁿ ē tio̍h. Ítsêng góa tī o͘àm tiong ētàng khòaⁿ tsin tshingtshó; tongjiân m̄ sī tī tsua̍ttùi ê o͘àm tiong, m̄ koh, tshaputto ētàng tshintshiūⁿ niauá khòaⁿ hiah tshingtshó. Kingkòe ji̍tthâu pha̍k, kah i itti̍t teh ua̍h tāng tséngthâu'á, i ê tò tshiú tsitmá oântsoân bô kiùkin ā, só͘í i khaisí pàng tsi̍tkóa la̍t hō͘ i, koh gia̍h kingkah, tíntāng khatsiahphiaⁿ ê kin bah, hō͘ hîsòaⁿ siókhóa sóa līkhui teh thiu thiàⁿ ê ūi.

I tōa siaⁿ kóng,"hî ah, lí nā bē thiám, lí si̍ttsāi sī ū kàu kîkoài."

Taⁿ i kámkak huisiông thiám, jîtshiáⁿ i tsaiiáⁿ liâmpiⁿ to̍h ē thiⁿ àm, só͘í i tshì beh khì siūⁿ pa̍t hāng tāitsì. I siūⁿ tio̍h tōa liânbêng ê písài, Sepangâ gí kiòtsò Gran Ligas, i tsaiiáⁿ New York ê Yankees tng teh kah Detroit ê Tigers teh písài.

I siūⁿ, tse sī písài ê tē jī kang ā, góa khiok m̄ tsai písài ê kiatkó, m̄ koh, góa ài ū sìnsim, ài tùi tit khí DiMaggio láutōa; suijiân i ê kha āuteⁿ seⁿ kuttshì teh thiàⁿ, i iáusī ū oânbí ê piáuhiān. I mn̄g kakī, kuttshì sī siáⁿ leh? To̍h sī Sepangâ gí ê"un espuela de hueso"lah. Goán lóng bô seⁿ kuttshì. Kha āuteⁿ seⁿ kuttshì kám ē tshintshiūⁿ tī siophahkeá ê kha tsng khato hiah thiàⁿ? góa siūⁿ góa bô huattō͘ jímsiū he, mā bô huattō͘ jímsiū íking tak kah tsi̍t lúi sīmtsì nn̄g lúi ba̍ktsiu tsheⁿmê, khiok iáu koh tshintshiūⁿ siophahkeá kèsio̍k tak lo̍hkhì. Lâng pēng bô pí ióngkám ê pue khîm tsáusiù kiông gōa tse, góa iáusī lêngkhó tsiâⁿtsò tī o͘àm tōa hái ·ni̍h ê hit tsiah tōngbu̍t.

I tōa siaⁿ kóng,"tûhui suahî lâi. Suahî nā lâi, Siōngtè ah, kiû lí liânbín i kah góa."

I siūⁿ, lí kám siongsìn DiMaggio láutōa ē kah tsi̍t bóe hî tsòhóe, tshintshiūⁿ góa kah c hit bóe tsòhóe tsiah kú? góa siongsìn i ē, koh ē pí góa khah kú, inūi i siàuliân koh ióngkiāⁿ, jîtshiáⁿ in lāupē tsátsêng mā sī thóhái lâng. M̄ koh, i ê kuttshì sī m̄ sī ē hō͘ i tsin thiàⁿ? I tōa siaⁿ kóng,"góa m̄ tsai, góa m̄ bat seⁿ kòe kuttshì."

Ji̍t lo̍h ê sî, ūi tio̍h beh tsingka sìnsim, i siūⁿkhí tī Casablanca ê tsi̍t king sió tsiúkoán ni̍h, i kah tsi̍tê tùi Cienfuegos lâi ê o͘lâng láutōa attshiúpà ê tāitsì; hitê lâng sī béthâu siōng ióng ê tsapo͘ lâng. In ê tshiú āukhiau teh tī tohténg ê hún pit sòaⁿ, tshiú ētsat khiā ti̍t, nn̄g lâng ê tshiú ânân sio ak, piàⁿ tsi̍t ji̍t koh tsi̍t mê; nn̄g lâng lóng siūⁿ beh kā tùihong ê tshiú at tó tī toh bīn. Tsin tsē lâng teh tó͘ in siáⁿ su siáⁿ iâⁿ, lâng tī tiám iû kia̍h’á ê pângking tshuttshut ji̍pji̍p. I itti̍t tsùsī o͘lâng ê tshiúkó͘ kah tshiú, íki̍p i ê bīn. Piàⁿ peh tiámtsing liáuāu, in múi sì tiámtsing ōaⁿ tsi̍tê tshâiphòaⁿ, hō͘ tshâiphòaⁿ thang khì hiohkhùn. Hueh tùi i kah o͘lâng ê tséngkah hē lâu ·tshutlâi, nn̄g lâng hō͘siong tsùsī tùihong ê ba̍ktsiu, tshiú kah tshiúkó͘; tehtù ê lâng tī pângking tshuttshut ji̍pji̍p, tsē tī piah piⁿ ê koân í'á téng kuankhòaⁿ. Piah sī tshâ pang, tshat tshián nâsik, tinghóe kā in nn̄g lâng ê iáⁿ tsiò tī piahténg. O͘lâng ê iáⁿ tsin tōa, bîhong tshue tíntāng tinghóe ê sî, lângiáⁿ mā tòe leh iôtāng.

伊想：牠若肯睏一下to̍h好à，我mā tsiah thang眠一下，thang koh去夢見獅á。是án怎我khah夢mā是獅á leh？伊kā kakī講：Mài想ā lah，老歲á。Tsitmá輕輕á仆tī船枋歇睏，啥物lóng mài想；tsitmá牠當teh phah拚，你tio̍h盡量好好á歇睏。

時間已經過晝，船iáu是慢慢á，穩穩á teh行，m̄ koh有增加微微á東風ê阻力。老人tòe微細ê海湧輕輕á teh漂流，kha脊phiaⁿ phua̍h魚線ê所在koh開始真明顯teh抽痛。

Hit下晡有一pái，魚線koh升起來，m̄ koh，魚kantaⁿ tī小khóa khah淺ê所在繼續teh泅。日頭照tio̍h老人ê倒手、倒肩kah kha脊後，所以伊知，魚已經改向，泅ǹg東北pêng去。

既然伊bat看過牠一pái，伊ētàng想像hit尾魚tī水裡teh泅ê款：茄á色ê魚拽展開ná翼，坦khiā ê大尾溜póe開烏暗ê海水。老人想：我m̄知，tī hitê深度，牠到底是看有á無。牠ê目tsiu真大蕊，馬á ê目tsiu加真細蕊，m̄ koh馬á tī烏暗中mā看ē tio̍h。以前我tī烏暗中ētàng看真清楚；當然m̄是tī絕對ê烏暗中，m̄ koh，差不多ētàng親像貓á看hiah清楚。 經過日頭pha̍k，kah伊一直teh活動指頭á，伊ê倒手tsitmá完全無kiù筋ā，所以伊開始放一kóa力hō͘ 它，koh gia̍h肩胛，振動kha脊phiaⁿ ê筋肉，hō͘ 魚線小khóa徙離開teh抽痛ê位。

伊大聲講：「魚ah，你若bē thiám，你實在是有夠奇怪。」

Taⁿ伊感覺非常thiám，而且伊知影liâmpiⁿ to̍h ē天暗，所以伊試beh去想別項tāitsì。伊想tio̍h大聯盟ê比賽，西班牙語叫做Gran Ligas，伊知影New York ê Yankees當teh kah Detroit ê Tigers teh比賽。

伊想：這是比賽ê第二工ā，我卻m̄知比賽ê結果，m̄ koh，我ài有信心，ài對得起DiMaggio老大；雖然伊ê腳後蹬生骨刺teh痛，伊iáu是有完美ê表現。伊問kakī：骨刺是啥leh？To̍h是西班牙語ê「un espuela de hueso」lah。阮lóng無生骨刺。腳後蹬生骨刺kám ē親像tī相phah雞á ê腳裝腳刀hiah痛？我想我無法度忍受he，mā無法度忍受已經觸kah一蕊甚至兩蕊目tsiu tsheⁿmê，卻iáu koh親像相phah雞á繼續觸落去。人並無比勇敢ê飛禽走獸強gōa tse，我iáu是寧可成做tī烏暗大海裡ê hit隻動物。

伊大聲講：「除非鯊魚來。鯊魚若來，上帝ah，求你憐憫牠kah我。」

伊想：你kám相信DiMaggio老大會kah一尾魚做伙，親像我kah tsit尾做伙tsiah久？我相信伊ē，koh ē比我khah久，因為伊少年koh勇健，而且in老父早前mā是討海人。M̄ koh，伊ê骨刺是m̄是ē hō͘ 伊真痛？ 伊大聲講：「我m̄知，我m̄ bat生過骨刺。」

日落ê時，為tio̍h beh增加信心，伊想起tī Casablanca ê一間小酒館裡，伊kah一个tùi Cienfuegos來ê烏人老大at手霸ê tāitsì；hitê人是碼頭siōng勇ê tsapo͘人。In ê手後khiau teh tī桌頂ê粉筆線，手下節khiā直，兩人ê手ânân相ak，拚一日koh一暝；兩人lóng想beh kā對方ê手at倒tī桌面。真tsē人teh賭in啥輸啥贏，人tī點油kia̍h’á ê房間出出入入。伊一直注視烏人ê手股kah手，以及伊ê面。拚八點鐘了後，in每四點鐘換一个裁判，hō͘ 裁判thang去歇睏。血tùi伊kah烏人ê指甲下流出來，兩人互相注視對方ê目tsiu、手kah手股；tehtù ê人tī房間出出入入，坐tī壁邊ê koân椅á頂觀看。壁是柴枋，漆淺藍色，燈火kā in兩人ê影照tī壁頂。烏人ê影真大，微風吹振動燈火ê時，人影mā tòe leh搖動。