《老人kah海》

 | | | 轉寄

《老人kah海》_26, Lim tsiú lah, o͘lâng tshut tōa la̍t/ Lim酒lah，烏人出大力

作者 Ernest Hemingway, 台譯：宋麗瓊 林俊育 2019.10.13

Su’iâⁿ ê khólêng sèng kui mê piàn lâi piàn khì. In hō͘ o͘lâng lim lamù tsiú （rum）, koh thè i tiám hun.

Lim tsiú liáuāu, o͘lâng tshut tōala̍t, kā lāulâng ahlo̍h 8 konghun; hit sî i iáu m̄ sī lāulâng, khiok sī iusèngtsiá Santiago. M̄ koh, lāulâng sûi kā i ê tshiú pan tńglâi, koh ta̍tkàu pêⁿ tshiú ê kio̍kbīn. Hit sî, i khaktēng i ē iâⁿ tsitê o͘lâng; tsi̍tê iusiù koh tsho͘ ióng ê ūntōnggoân. Thiⁿkng ê sî, tng ū tehtù ê lâng iaukiû tshâiphòaⁿ tshâitēng pêⁿkio̍k, tshâiphòaⁿ khiok iô thâu ê sî, i piàⁿkhang i ê tsoânle̍k, kā o͘lâng ê tshiú itti̍t ah, ti̍tkàu ahlo̍h kàu toh bīn. Tsit tiûⁿ písài sī tùi lépàiji̍t tsákhí khaisí, kàu pài it tsákhí tsiah suah. Tsin tsē ū tehtù ê lâng iaukiû sǹg pêⁿ tshiú, inūi in tio̍h ài khì béthâu tsò kang, kā thn̂g pautsong tsiūⁿ tsûn, á sī khì Havana môethòaⁿ kongsi siōngpan, nā bô, múi tsi̍tê lâng lóng ài kèsio̍k pí kàu tsòeāu. Tsóng ·sī, m̄kóan jûhô, i ū tī ta̍k lâng ài khì tsòkang tsìntsêng, kā písài kiatsok à.

Písài liáuāu, tsin kú ê tsi̍t tōaⁿ sîkan, lâng lóng kiò i iusèngtsiá. Tshunthiⁿ ê sî, in kohtsài písài tsi̍t pái, m̄ koh tsitpái ê tó͘ kim bô tsē, jîtshiáⁿ i iâⁿ kah tsin khinsang, inūi tī téngpái ê písài tiong, i íking phahpāi hitê tùi Cienfuegos lâi ê o͘lâng ê sìnsim. He íāu, i koh ū kúi pái’á písài, liáuāu to̍h bô koh pí à. I jīnûi, tsíiàu ū sim beh iâⁿ, i ētàng phahpāi jīmhô lâng, m̄ koh i tsai, tse ē sionghāi i ēng lâi lia̍h hî ê tsiàⁿ tshiú. I bat tshì ēng tò tshiú kah lâng tsò liānsi̍p písài, m̄ koh tò tshiú sîsiông hoánpoān, m̄ thiaⁿ ōe, tsò bē kàu i ê iaukiû, só͘í i bô sìnjīm c hit ki tshiú.

I siūⁿ, Taⁿ i hō͘ ji̍tthâu pha̍k hósè à. I ingkai bē koh kiùkin ā, tûhui àmsî siuⁿ léng. Ingàm m̄ tsai ē huatsing siáⁿmi̍h tāitsì. Tsi̍t tâi huiki tùi i ê thâu téng pue ǹg Miami, i khòaⁿ tio̍h huiki ê o͘ iáⁿ hō͘ tsi̍t tīn puehî kiaⁿ kah phi̍hpho̍k thiàu.

I kóng,"puehî tsiah tsē, ingkai ē ū puehî hó͘."i tò hiàⁿ, kingân hîsòaⁿ, khòaⁿ sī m̄ sī ētàng kā hî thua khah óa.Leh. M̄ koh, bô huattō͘; hîsòaⁿ ânân, tsúitsu teh tsùn, íking kiōngbeh tn̄g ā. Tsûn bānbān'á hiòng tsêng, i tsùbo̍k khòaⁿ huiki, itti̍t kàu khòaⁿ bē tio̍h ūi tsí.

I siūⁿ, tsē tī huiki lāi ittēng tsin kîbiāu. Tī hiah koân khòaⁿ, hái m̄ tsai seⁿ tsò siáⁿ khoán? In nā mài pue hiah koân, tiāⁿtio̍h ētàng tsin tshingtshó khòaⁿ tio̍h hî. Nāsī góa, góa beh tī iok 370 kongtshioh koân ê só͘tsāi bānbān'á pue, thang tùi téngbīn khòaⁿ hî. Tī lia̍h ku tsûnténg, góa khiā tī tsûnûi siōng koân ê hoâiⁿkuaiⁿ ê sî, sīmtsì tī hitê koântō͘, góa ētàng khòaⁿ ·tio̍h ê mā tsin tsē. Tī hia, puehî hó͘ khòaⁿ khí·lâi khah le̍k, lí mā ētàng khòaⁿ tio̍h in ê tiâubûn kah kiôsik ê pantiám, mā ētàng khòaⁿ tio̍h in kui tīn teh siû. Sī ántsóaⁿ tī o͘sik ê háilâu tiong, só͘ū siû tsin kín ê hî lóng ū kiôsik ê hî lêng, jîtshiáⁿ thongsiông sī kiôsik ê tiâubûn á sī pantiám leh? puehî hó͘ tongjiân khòaⁿ khí·lâi sī le̍ksik, inūi i púnlâi sī kim’n̂g sik. Tng i tsintsiàⁿ iau, beh tsia̍h mi̍hkiāⁿ ê sî, singkhu nn̄g pêng to̍h ē hiántshut kiôsik ê tiâubûn, kah málînhî kângkhoán. He kám sī inūi siūkhì, á sī inūi soktō͘ siuⁿ kín tsiah ē ánne?



輸贏ê可能性kui暝變來變去。In hō͘ 烏人lim lamù酒（rum），koh替伊點薰。

Lim酒了後，烏人出大力，kā老人押落8公分；hit時伊iáu m̄是老人，卻是優勝者Santiago。M̄ koh，老人隨kā伊ê手pan轉來，koh達到平手ê局面。Hit時，伊確定伊ē贏tsitê烏人；一个優秀koh粗勇ê運動員。天光ê時，當有tehtù ê人要求裁判裁定平局，裁判卻搖頭ê時，伊piàⁿ空伊ê全力，kā烏人ê手一直押，直到押落到桌面。Tsit場比賽是tùi禮拜日早起開始，到拜一早起tsiah suah。真tsē有tehtù ê人要求算平手，因為in tio̍h ài去碼頭做工，kā糖包裝上船，á是去Havana煤炭公司上班，若無，每一个人lóng ài繼續比到最後。總是，m̄管如何，伊有tī ta̍k人ài去做工tsìn前，kā比賽結束à。

比賽了後，真久ê一段時間，人lóng叫伊優勝者。春天ê時，in koh再比賽一pái，m̄ koh tsitpái ê賭金無tsē，而且伊贏kah真輕鬆，因為tī頂pái ê比賽中，伊已經phah敗hitê tùi Cienfuegos來ê烏人ê信心。He以後，伊koh有幾pái’á比賽，了後to̍h無koh比à。伊認為，只要有心beh贏，伊ētàng phah敗任何人，m̄ koh伊知，這ē傷害伊用來掠魚ê正手。伊bat試用倒手kah人做練習比賽，m̄ koh倒手時常反叛，m̄聽話，做bē到伊ê要求，所以伊無信任tsit支手。

伊想：Taⁿ它hō͘ 日頭pha̍k好勢à。它應該bē koh kiù筋ā，除非暗時siuⁿ冷。Ing暗m̄知ē發生啥物tāitsì。 一台飛機tùi伊ê頭頂飛ǹg Miami，伊看tio̍h飛機ê烏影hō͘ 一陣飛魚驚kah phi̍hpho̍k跳。

伊講：「飛魚tsiah tsē，應該ē有飛魚虎。」伊倒hiàⁿ，弓ân魚線，看是m̄是ētàng kā魚拖khah óa.leh。M̄ koh，無法度；魚線ânân，水珠teh顫，已經kiōngbeh斷ā。船慢慢á向前，伊注目看飛機，一直到看bē tio̍h為止。

伊想：坐tī飛機內一定真奇妙。Tī hiah koân看，海m̄知生做啥款？In若mài飛hiah koân，定tio̍h ētàng真清楚看tio̍h魚。若是我，我beh tī約370公尺koân ê所在慢慢á飛，thang tùi頂面看魚。Tī掠龜船頂，我khiā tī船桅siōng koân ê橫杆ê時，甚至tī hitê koân度，我ētàng看tio̍h ê mā 真tsē。Tī hia，飛魚虎看起來khah綠，你mā ētàng看tio̍h in ê條紋kah茄色ê斑點，mā ētàng看tio̍h in kui陣teh泅。是án怎tī烏色ê海流中，所有泅真緊ê魚lóng有茄色ê魚陵，而且通常是茄色ê條紋á是斑點leh？飛魚虎當然看起來是綠色，因為牠本來是金黃色。當牠真正iau，beh食物件ê時，身軀兩pêng to̍h ē顯出茄色ê條紋，kah馬林魚仝款。He kám是因為受氣，á是因為速度siuⁿ緊tsiah ē ánne？