《老人kah海》

 | | | 轉寄

《老人kah海》_34, I to̍h sī hiah tōa /伊to̍h是hiah大

作者 Ernest Hemingway, 台譯：宋麗瓊 林俊育 2019.12.08

I kóng,"bô khólêng, i bô khólêng hiah tōa bóe."

M̄ koh, i to̍h sī hiah tōa bóe. Se̍h tsi̍t liàn liáuāu, i phû kàu tsúibīn, lī tsûn kantaⁿ 30 bā hn̄g. Lāulâng khòaⁿ tio̍h i ê bóeliu phû tshut tsúibīn, pí tōa liâmto ê to bah khah tn̂g, sī tshián kiôsik ê, tshun tshut tī tshim nâsik ê tsúibīn. Hî tī tsúibīn hē teh siû, bóeliu khi ǹg āubīn, lāulâng ē tàng khòaⁿ tio̍h i ke̍ktōa ê hî sin kah kui singkhu ê kiôsik tiâubûn, i khatsiah ê hî kî siu lo̍h lâi, tōatōa ê hî si̍t tián kah khuikhui khui.

Tī tsit liàn, lāulâng ē tàng khòaⁿ tio̍h hî ê ba̍ktsiu kah nn̄g bóe tòe i teh siû ê phúsik tshitsaimôa （sucking fish）; in ū sî ē khip tī i ê singkhu, ū sî ē tsin kín siû khui, ū sî koh ē tī i ê ìmńg ē bīn siû kah tsin tsūtsāi. In ta̍k bóe lóng tshiaukòe 3 Ingtshioh tn̂g, siû kín ê sî, in kiklia̍t ngiútāng in kui ê singkhu, ná tshintshiūⁿ môa kângkhoán.

Lāulâng tsitmá kui singkhu kōaⁿ, m̄ koh m̄ sī kantaⁿ inūi pha̍k ji̍t. Múi tsi̍t pái hî léngtsēng koh unhô se̍h tńglâi ê sî, lāulâng lóng ū siuhôe hîsòaⁿ; i khaksìn koh se̍h nn̄g liàn liáuāu, i to̍h ū kihōe ēng hîtshe tsha̍k hî.

I siūⁿ, M̄ koh, góa ài kā i giú khah óa.Leh, khah óa.Leh, koh khah óa.Leh. Góa ittēng bē sái tsha̍k i ê thâu, ài tsha̍k i ê sim.
I kóng,"lāulâng ah, ài léngtsēng, ài kiankiông.".

Κoh lâi ê hit liàn, hî ê khatsiah phû tshut tsúibīn, m̄ koh, i lī tsûn ū siókhóa khah hn̄g. Koh hē tsi̍t liàn, i iáusī siuⁿ hn̄g, m̄ koh ū koh khah phû, só͘í lāulâng khaksìn, i nā koh siu tsi̍tkóa hîsòaⁿ, i to̍h ē tàng kā i giú lâi tsûnpiⁿ. I tsá to̍h kā hîtshe tsúnpī hósè à; hîtshe ê iù sohákhún khǹg tī îⁿ nâ'á lāité, soh'á thâu pa̍k tī tsûnthâu ê thiāuá.

Hî tng teh se̍h kho͘á tńglâi, khòaⁿ khí·lâi léngtsēng koh bílē, tsíū i ê tōa bóeliu teh tíntāng. Lāulâng tsīn tsoânle̍k kā i giú óa lâi. Ū tsi̍tsî'á kú, hî ê singkhu ū siókhóa thán khi, liáuāu i sûi koh lia̍h tsiàⁿ, jîtshiáⁿ khaisí se̍h sin ê tsi̍t liàn.

Lāulâng kóng,"góa kā i giú tíntāng ā, tútsiah góa ū kā i giú tíntāng ā." Tsit tsūn, i koh kámkak thâu hîn, m̄ koh, i iáusī tsīn tsoânle̍k kā tōa hî giú ân. I siūⁿ, góa ū kā i giú tíntāng, hoānsè tsit pái góa ē tàng kā i giú oá lâi. Tshiú ah, tōala̍t giú. Kha ah, khiā ho͘ tsāi. Thâu ah, ūi góa kiantshî lo̍hkhì, ūi góa kiantshî lo̍hkhì; lí lóng m̄ bat hūntó kòe, m̄ bat làukhùi. Tsit pái, góa ē kā i giú kòelâi. I tī hî iáubōe oá lâi tsìntsêng, to̍h tshut tsoânle̍k kā i giú, m̄ koh, kantaⁿ giú kàu pòaⁿlō͘, hî to̍h koh kā i ê singkhu lia̍h tsiàⁿ, siû līkhui.

Lāulâng kóng,"hî ah, hî ah, hoâiⁿti̍t lí tsóng sī ài sí, kám kóng lí mā ittēng beh hō͘ góa sí mah?"

I siūⁿ, Ánne lo̍hkhì, tāitsì bē sêngkong. I ê tshùi ta kah bô huattō͘ kóngōe, m̄ koh, i tsitmá bô huattō͘ tshun tshiú khì the̍h tsúi. I siūⁿ, Tsit pái góa ittēng ài kā i thua óa lâi. Góa koh tòng bô kúi liàn à. Tsóng sī, i kā kakī kó͘lē kóng, Bē lah, lí tòng ē tiâu lah, lí éngoán lóng tòng ē tiâu lah.

伊講：「無可能，牠無可能hiah大尾。」

M̄ koh，牠to̍h是hiah大尾。Se̍h一liàn了後，牠浮到水面，離船kantaⁿ 30碼遠。老人看tio̍h伊ê尾溜浮出水面，比大鐮刀ê刀肉khah長，是淺茄色ê，伸出tī深藍色ê水面。魚tī水面下teh泅，尾溜khi ǹg後面，老人ē tàng看tio̍h牠極大ê魚身kah kui身軀ê茄色條紋，牠kha脊ê魚鰭收落來，大大ê魚翼展kah開開開。

Tī tsit liàn，老人ē tàng看tio̍h魚ê目tsiu kah兩尾tòe牠teh泅ê phú色七鰓鰻（sucking fish）；in有時ē吸tī牠ê身軀，有時ē真緊泅開，有時koh ē tī牠ê蔭影下面泅kah真自在。In ta̍k尾lóng超過3呎長，泅緊ê時，in激烈扭動in kui ê身軀，ná親像鰻仝款。

老人tsitmá kui身軀汗，m̄ koh m̄是kantaⁿ因為pha̍k日。每一pái魚冷靜koh溫和se̍h tńg來ê時，老人lóng有收回魚線；伊確信koh se̍h兩liàn了後，伊to̍h有機會用魚叉鑿魚。

伊想：M̄ koh，我ài kā牠giú khah óa.leh，khah óa.leh，koh khah óa.leh。我一定bē sái鑿牠ê頭，ài鑿牠ê心。
伊講：「老人ah，ài冷靜，ài堅強。」。

Κoh來ê hit liàn，魚ê kha脊浮出水面，m̄ koh，牠離船有小khóa khah遠。koh下一liàn，牠iáu是siuⁿ遠，m̄ koh有koh khah浮，所以老人確信，伊若koh收一kóa魚線，伊to̍h ē tàng kā牠giú來船邊。 伊早to̍h kā魚叉準備好勢à；魚叉ê幼索á綑khǹg tī圓籃á內底，索á頭縛tī船頭ê柱á。

魚當teh se̍h箍á tńg來，看起來冷靜koh美麗，只有伊ê大尾溜teh振動。老人盡全力kā牠giú óa來。有一時á久，魚ê身軀有小khóa thán khi，了後牠隨koh掠正，而且開始se̍h新ê一liàn。

老人講：「我kā牠giú振動ā，tútsiah我有kā牠giú振動ā。」 Tsit tsūn，伊koh感覺頭眩，m̄ koh，伊iáu是盡全力kā大魚giú ân。伊想：我有kā牠giú振動，hoānsè tsit pái我ē tàng kā牠giú oá來。手ah，大力giú。腳ah，khiā ho͘ 在。頭ah，為我堅持落去，為我堅持落去；你lóng m̄ bat昏倒過，m̄ bat漏氣。Tsit pái，我ē kā牠giú過來。 伊tī魚iáu未oá來tsìn前，to̍h出全力kā牠giú，m̄ koh，kantaⁿ giú到半路，魚to̍h koh kā牠ê身軀掠正，泅離開。

老人講：「魚ah，魚ah，橫直你總是ài死，kám講你mā一定beh hō͘ 我死mah？」

伊想：Ánne落去，tāitsì bē成功。伊ê嘴ta kah無法度講話，m̄ koh，伊tsitmá無法度伸手去the̍h水。伊想：Tsit pái我一定ài kā牠拖óa來。我koh擋無幾liàn à。總是，伊 kā kakī鼓勵講：Bē lah，你擋ē tiâu lah，你永遠lóng擋ē tiâu lah。