《老人kah海》

 | | | 轉寄

《老人kah海》_33, Hî ah, mài thiàu lah/魚ah，mài跳lah

作者 Ernest Hemingway, 台譯：宋麗瓊 林俊育 2019.12.01

I siūⁿ, i tng teh ēng i nā mâu ê tsiamtshùi teh lòng thih si kha, he sī pitjiân ê, i tiāⁿtio̍h ài ánne tsò. He kiámtshái ē hō͘ i thiàutshut tsúibīn, m̄ koh, góa lêngkhó i kèsio̍k se̍h kho͘á. Suijiân thiàutshut tsúibīn ē hō͘ i koànji̍p khongkhì, m̄ koh, sòa lo̍hlâi, i múi thiàu tsi̍t pái, to̍h ē koh khah giú li̍h tiòkau ê khangtshùi, i to̍h ū khólêng thuatkhui hîkau. I kóng,"hî ah, mài thiàu lah, mài thiàu."

Hî koh kúinā pái khì lòng thih si kha, múipái i hàiⁿ thâu lâi lòng ê sî, lāulâng to̍h pàng tsi̍tkóa hîsòaⁿ.

I siūⁿ, góa bēsái tsingka i ê thiàⁿ. Góa ê thiàⁿ bô iàukín, inūi góa ētàng khòngtsè kakī, m̄ koh i ê thiàⁿ ē hō͘ i khíkông.

Kòe tsi̍t khùn á, hî bô kohtsài lòng thih si kha, i koh khaisí bānbān'á se̍h kho͘á. Lāulâng tsitmá koh únún á siu hîsòaⁿ ji̍plâi, m̄ koh, i koh kámkak thâu hîn ā. I ēng tò tshiú iúⁿ tsi̍tkóa tsúi lâm thâukhak, liáuāu koh ke lâm tsi̍tkóa, jîtshiáⁿ kā āmkún āubīn lia̍h lia̍h leh. I kóng,"góa bô kiùkin. I sûi beh siû khí·lâi à, góa tòng ētiâu; m̄ bián kóng mā tsai, lí ittēng ài tòng ētiâu."

I khò tī tsûnthâu kūi leh, kòe tsi̍tsî'á, koh kā hîsòaⁿ phāiⁿ tī khatsiahāu. Thàn i tshutkhì teh se̍h kho͘á sî, tsitmá góa beh sió hioh leh, tán i koh se̍h ji̍plâi ê sî, góa tsiah khiā khí·lâi kah i piàⁿ; i ánne kuattēng.

I tsin siūⁿ beh tī tsûnthâu hiohkhùn, hō͘ hî kakī khì se̍h, m̄ bián siuhôe jīmhô hîsòaⁿ. M̄ koh, tng hîsòaⁿ ê giú la̍t hiánsī hî se̍h ǹg tsûn siû lâi ê sî, lāulâng khiā khí·lâi, khaisí siang tshiú kauthè iôtāng, kā ētàng siu ê hîsòaⁿ lóng giú tńglâi.

I siūⁿ, góa m̄ bat tsiah thiám kòe. Tsitmá koh teh khí bō͘e̍k hong （trade wind）ā. M̄ kok ánne tsin hó, hong ē kā i tòa lâi góa tsia, tse tsintsiàⁿ sī góa suiàu ê. I kóng,"āupái i koh se̍h tshut·khì ê sî, góa ē hioh tsi̍tē. Góa kámkak hó tsin tsē ā, koh nn̄g saⁿ liàn liáuāu, góa to̍h ētàng kā i lia̍h tio̍h."

Tng i tùi hîsòaⁿ ê giú la̍t kámkak hî teh se̍h tshut·khì ê sî, i to̍h kā i ê tsháu bōá tì tī thâukhak āu, koh sûi tsē tī tsûnthâu.

I siūⁿ, hî ah, tsò lí khì phah piàⁿ. Lí koh se̍h tńglâi ê sî, góa to̍h beh kā lí lia̍h khílâi.

Háiéng ke tsin tōa, m̄ koh, hong sī hó thiⁿkhì tsiah ū ê bîbî'á hong, i tńgkhì tshù ·ni̍h suiàu khò i.

I kóng,"góa tsíiàu kā tsûn sái ǹg sailâm 方to̍h ēsái; lâmtsúhàn éngoán bē tī hái nih bêlō͘, hôhòng he sī tsi̍tê tn̂gtn̂g ê tósū."

Se̍h kàu tē saⁿ liàn ê sî, i tsiah thâu tsi̍t pái khòaⁿ tio̍h hî.

Tsi̍t khaisí, i khòaⁿ ·tio̍h ê sī tsi̍tê tn̂gtn̂g ê o͘ iáⁿ, ēng tsin tn̂g ê sîkan tsiah nǹg kòe tsûnté; i m̄ káⁿ siongsìn i ū hiah tn̂g.


伊想：牠當teh用牠若矛ê尖嘴teh lòng鐵絲腳，he是必然ê，牠定tio̍h ài ánne做。He kiámtshái ē hō͘ 牠跳出水面，m̄ koh，我寧可牠繼續se̍h箍á。雖然跳出水面ē hō͘ 牠灌入空氣，m̄ koh，續落來，牠每跳一pái，to̍h ē koh khah giú裂釣鉤ê孔嘴，牠to̍h有可能脫開魚鉤。 伊講：「魚ah，mài跳lah，mài跳。」

魚koh幾nā pái去lòng鐵絲腳，每pái牠hàiⁿ頭來lòng ê時，老人to̍h放一kóa魚線。

伊想：我bēsái增加牠ê痛。我ê痛無要緊，因為我ētàng控制kakī，m̄ koh牠ê痛ē hō͘ 牠起狂。

過一睏á，魚無koh再lòng鐵絲腳，牠koh開始慢慢á se̍h箍á。老人tsitmá koh穩穩á收魚線入來，m̄ koh，伊koh感覺頭眩ā。伊用倒手iúⁿ一kóa水lâm頭殼，了後koh加lâm一kóa，而且kā頷頸後面掠掠leh。 伊講：「我無kiù筋。牠隨beh泅起來à，我擋ētiâu；m̄免講mā知，你一定ài擋ētiâu。」

伊靠tī船頭跪leh，過一時á，koh kā魚線phāiⁿ tī kha脊後。趁牠出去teh se̍h箍á 時，tsitmá我beh小歇leh，等牠koh se̍h入來ê時，我tsiah khiā起來kah牠拚；伊ánne決定。

伊真想beh tī船頭歇睏，hō͘ 魚kakī去se̍h，m̄免收回任何魚線。M̄ koh，當魚線ê giú力顯示魚se̍h ǹg船泅來ê時，老人khiā起來，開始雙手交替搖動，kā ētàng收ê魚線lóng giú tńg來。

伊想：我m̄ bat tsiah thiám過。Tsitmá koh teh起貿易風（trade wind）ā。M̄ kok ánne真好，風ē kā牠帶來我tsia，這真正是我需要ê。 伊講：「後pái牠koh se̍h出去ê時，我ē歇一下。我感覺好真tsē ā，koh兩三liàn了後，我to̍h ētàng kā牠掠tio̍h。」

當伊tùi魚線ê giú力感覺魚teh se̍h出去ê時，伊to̍h kā伊ê草帽á戴tī頭殼後，koh隨坐tī船頭。

伊想：魚ah，做你去打拚。你koh se̍h tńg來ê時，我to̍h beh kā你掠起來。

海湧加真大，m̄ koh，風是好天氣tsiah有ê微微á風，伊tńg去厝裡需要靠它。

伊講：「我只要kā船駛ǹg西南方to̍h ēsái；男子漢永遠bē tī海裡迷路，何況he是一个長長ê島嶼。」

Se̍h到第三liàn ê時，伊tsiah頭一pái看tio̍h魚。

一開始，伊看tio̍h ê是一个長長ê烏影，用真長ê時間tsiah nǹg過船底；伊m̄敢相信牠有hiah長。