《老人kah海》

 | | | 轉寄

《老人kah海》_5 Lāu lâng tsē tī í'á khùn khì/老人坐tī椅á睏去

作者 Ernest Hemingway, 台譯：Manlajo, 修訂：宋麗瓊 2019.03.24

“Ài tùi Yankees ū sìnsim, kuai gín’á. Siūⁿ khòaⁿ māi leh, in ū DiMaggio neh.”
“Góa kiaⁿ Detroit ê Tigers kah Cleveland ê Indians tsit nn̄g tūi.”
“Ài tsimtsiok, nā bô, liân Cincinnati ê Reds kah Tsicago ê White Sox lí mā tio̍hkiaⁿ.”
“Lí hóhó á giánkiù tsi̍tē, tán góa tńglâi ê sî tsiah kā góa kóng.”
“Lí siūⁿ, lán sī m̄ sī ài khì bé tsi̍t tiuⁿ bóe nn̄g jī sī 85 ê tsháikoàn? bîn’átsài sī tē 85 kang ā.”
“Ēsái ô͘,”gín’á kóng.”M̄ koh, tsiàu lí ê hó kìlio̍k, lán lâi bé 87 hō ê, ántsóaⁿ?”
“Hó ūn bô khólêng ē huatsing nn̄g pái. Lí siūⁿ lí kám tshōe ē tio̍h tsi̍t tiuⁿ 85 hō ê?”
“Góa ēsái kā in tēng tsi̍t tiuⁿ.”
“Tsi̍t tiuⁿ nn̄g kho͘ pòaⁿ, lán beh khì kā siáng tsiohtsîⁿ?”
“He kántan lah. Góa ētàng tsioh tio̍h nn̄g kho͘ pòaⁿ.”
“Góa siūⁿ góa kiámtshái mā ēsái, m̄ koh góa tsīnliōng bô beh khì tsiohtsîⁿ; inūi tú khaisí sī ēng tsioh ê, āulâi suah tio̍h ēng thó ê.”
“Lāutōalâng, lí ài tshēng hō͘ sio ô͘,”gín’á kóng,”m̄ thang bē kìtit, lán tsitmá íking sī káugo̍eh à.”
“Κáu.go̍eh sī tōahî óa lâi ê go̍ehhūn,”lāu lâng kóng,”tī gō͘.go̍eh, putkóan siáⁿ lâng lóng lia̍h ē tio̍h hî.”
“Taⁿ góa lâikhì lia̍h un’á.”gín’á kóng.

Gín’á tńglâi ê sî, lāu lâng tsē tī í’á khùnkhì, ji̍tthâu íking lo̍h ā. Gín’á tùi bîntshn̂g the̍h hit niá kū kun thán, kā i khàm tī í’á āu, koh mua tī lāu lâng ê kingkahthâu. I ê kingkahthâu tsin te̍kpia̍t, sûijiân ū hòe à, m̄ koh iáu sī tsin ū la̍t; i ê āmkún mā iáu tsin tsho͘ióng, tng lāu lâng khùnkhì ê sî, thâu tàmtàm, āmkún ê jiâuhûn to̍h bô tsin bênghián. Tú tshintshiūⁿ i ê tsûn phâng kāngkhóan, i tshēng ê siátsuh mā sī pó͘ liáu koh pó͘, pó͘ kòe ê só͘tsāi hō͘ ji̍tthâu pha̍k kah thèsik, ū tshim ū tshián. Lāu lâng ê bīn íking tsin lāu ā, ba̍ktsiu nāsī khehkheh, i ê bīn liân tsi̍ttiám’á o̍ahkhì to bô. Hit tiuⁿ pòtsóa khǹg tī i ê khathâuu, i ê tshiú teh tī téngbīn, só͘í bô hō͘ àmsî ê hong tshue tsáu. I thǹg tshiahkha.

Gín’á tiāmtiām līkhui; i koh tńglâi ê sî, lāu lâng iáu teh khùn.
“Lāutōalâng, khílâi loh,”Gín’á kā i kiò, koh kā i ê tshiú tah tī lāu lâng ê khathâuu. Lāu lâng ba̍ktsiu peh kim, kòe tsi̍t sî á tsiah tùi hn̄ghn̄g ê bāng nih tshéⁿ khí lâi. Liáuāu, i lō͘tshut tshiòiông.
“Lí the̍h siáⁿ lâi?”i mn̄g.
“Àmtǹg,”gín’á kóng,”lán lâi tsia̍h àmtǹg.”


「Ài對Yankees有信心，乖gín’á。想看māi leh，in有DiMaggio neh。」
「我驚Detroit ê Tigers kah Cleveland ê Indians tsit兩隊。」
「Ài斟酌，若無，連Cincinnati ê Reds kah Tsicago ê White Sox你mā tio̍h驚。」
「你好好á研究一下，等我tńg來ê時tsiah kā我講。」
「你想，咱是m̄是ài去買一張尾二字是85 ê彩券？明á載是第85工ā。」
「Ēsái ô͘，」gín’á講：「M̄ koh，照你ê好記錄，咱來買87號ê，án怎？」
「好運無可能ē發生兩pái。你想你kám tshōe ē tio̍h一張85號ê？」
「我ēsái kā in定一張。」
「一張兩箍半，咱beh去kā siáng借錢？」
「He簡單lah。我ētàng借tio̍h兩箍半。」
「我想我kiámtshái mā ēsái，m̄ koh我盡量無beh去借錢；因為tú開始是用借ê，後來suah tio̍h用討ê。」
「老大人，你ài穿hō͘ 燒ô͘，」gín’á講：「m̄ thang bē記得，咱tsitmá已經是九月à。」
「九月是大魚óa來ê月份，」老人講：「tī五月，不管啥人lóng掠ē tio̍h魚。」
「Taⁿ我來去掠鰮á。」gín’á講。

Gín’á tńg來ê時，老人坐tī椅á睏去，日頭已經落ā。Gín’á tùi眠床the̍h hit領舊軍毯，kā它khàm tī椅á後，koh mua tī老人ê肩胛頭。伊ê肩胛頭真特別，雖然有歲à，m̄ koh iáu是真有力；伊ê頷頸mā iáu真粗勇，當老人睏去ê時，頭tàmtàm，頷頸ê皺痕to̍h無真明顯。Tú親像伊ê船帆仝款，伊穿ê siátsuh mā是補了koh補，補過ê所在hō͘ 日頭pha̍k kah退色，有深有淺。老人ê面已經真老ā，目tsiu若是khehkheh，伊ê面連一點á活氣to無。Hit張報紙khǹg tī伊ê腳頭u，伊ê手teh tī頂面，所以無hō͘ 暗時ê風吹走。伊thǹg赤腳。

Gín’á恬恬離開；伊koh tńg來ê時，老人iáu teh睏。
「老大人，起來loh，」Gín’á kā伊叫，koh kā伊ê手搭tī老人ê腳頭u。 老人目tsiu peh金，過一時á tsiah tùi遠遠ê夢裡醒起來。了後，伊露出笑容。
「你the̍h啥來？」伊問。
「暗頓，」gín’á講：「咱來食暗頓。」