《胡文池牧師kap布農族》

 | | | 轉寄

毒蛇之患

作者 胡文池 2009.03.29

觀音山教會右鄰是警察派出所，左鄰是醫生診所，頂面有耶和華，所以tsit所在m̄免驚tsha̍t-á、強盜侵犯，mā m̄免驚病魔傷害，koh-khah m̄免驚鬼怪出現。惟獨驚由地面偷襲ê蛇類。

山是蛇族ê樂園，但是m̄知何故，不時有一kuá毒蛇ài離開in ê樂園，偷偷á溜落山來，造訪山腳下ê觀音山教會。

1939年到1941年，我tī觀音山教會牧會。記憶中，常常看tio̍h毒蛇爬行tī宿舍門外，也bat進入厝內三pái。

有一pái，天才tú亮，我開門bueh上廁所，猛然看見一條龜角花蛇捲成圓形甜睏tī門前，ah!好佳哉ah!三十年前tsit所在iah無電火，如果早一點，天末亮時我就起床bueh上廁所，一腳tā下，án-ne就慘了。

Iáu有一pái，禮拜日早起，我前往禮拜堂，phah開大門時，嚇了一跳!竟然看tio̍h一條大蛇，約有五、六尺長，睏tī長椅下底，當然對付tsiah-ê無受歡迎ê動物，阮是趕盡殺絕ê。第一個原因，因為in是魔鬼ê象徵，in ê老祖先「古蛇」(啟示錄二十：2)bat引誘咱ê始祖犯罪。第二個原因是古蛇ê子孫iáu-kú原性不改，時常bueh傷害咱人類，tsit種仇恨世代相傳，永遠bē消失。何況聖經上mā明記載講：「我bueh叫你(蛇)kap女人彼此為仇，你ê了後裔kap女人ê了後裔mā彼此為仇，女人ê了後裔bueh傷害你ê頭，你beh傷伊ê腳跟。」(創世記三：15 )

咱不時聽講某家有蛇侵入睡房咬死人，咱卻一直受tio̍h上帝保護，免受傷害。夜間，當阮輪流到庄腳會友家做家庭禮拜時，途中mā常遇tio̍h蛇，tān-sī每pái lóng ē-tàng平安無事，真是感謝o-ló恩主ê看顧。