《胡文池牧師kap布農族》

 | | | 轉寄

現代ê mah nah-我tī大甲教會時

作者 胡文池 2009.04.05

戰時各項物資缺乏，尤其食物是由政府配給，實在無夠用。人人lóng tio̍h買烏市米或地瓜來補貼。上帝卻賜我夠額食品，渡過難關。

主後1941年5月，我到大甲教會牧會，tsit時因第二pái世界大戰tú開始，物質漸漸缺乏，後來政府不得不改為配給制度。

布料mā lóng是按人數配給，是木質纖維製成(Fiber)，tsit句英文唸起來ná親像中文ê「快破」，真正，洗不了幾pái就破了。但是因我妹婿服務tī大布商行，阮一家人m̄-nā無穿過破爛ê衫褲，反tńg穿插真好ê布料。

戰時ê食品特別缺乏，配給 ê米不juā久就食完了，所以人人lóng買烏市米或地瓜來補貼。有ê人為tio̍h beh到南部買蕃薯籤，竟被飛機炸死，實在可憐。阮kā小妹the̍h來ê高級絲緞來kap農民交換米，一套女裝料thang換三斗米。大甲ê會友真tsē是農民，in mā會送阮種種食物。有一戶會友是做豆腐干ê，當時豆腐干mā是配給，這會友就時常the̍h破碎ê豆腐干來送hō͘阮食，雖然是破碎ê，營養煞仝款，橫直煮ê時tsūn，mā ài kā完整ê切細，食ê時tsūn koh-khah tio̍h嚼碎，所以雖然是破碎ê豆腐千，阮iáu是以十二萬分ê感謝心來接受伊。

大甲附近有一片真大ê山坡地，為教會會友所有，伊向我建議，bueh免費將土地借我種土豆。Hō͘阮感謝不盡，我、婦人人kap四個gín-á馬上動員，每工上山種土豆。到收冬時，總共收了三大麻袋ê土豆(大約二百台斤)。阮每頓不致缺乏佐餐，有時食煮土豆、有時食炒土豆，人人愛食，土豆內充滿脂肪kap卵清質，hō͘阮buē營養不良á破病。

當時戰爭連綿不斷，飛機時常來轟炸，所以政府命令台北市民疏散去田庄所在。因此大兄mā避難到大甲街外khiā起，伊看tio̍h我收成三大包土豆，就借用我所種土豆ê土地，mā開始種土豆，仝款ê勞力，同量ê土豆種子，播種tī同一面積ê土地上，結果所收成ê，煞只有我ê十分之一，hō͘伊大失所望。

原因何在?所無仝ê，是我信靠上帝，á伊煞信靠家己。

「tī beh暗á，in有肉食，tī清早，in有夠額ê餅食。Án-ne，in就知影我是上主，是in ê上帝。」(出埃及記十六：12)