《胡文池牧師kap布農族》

 | | | 轉寄

日皇kap基督爭光

作者 胡文池 2009.04.26

昔時，日本皇家ê御用學者，bat創寫一本神話「古事記」，描寫太古時代，皇帝ê祖神創造日本國土。當然伊ê後裔，代代皇帝mā是神，稱做「現人神」(Alahitokami)，萬世一系thang繼承帝位，永遠無變。所以日本政治是政教一體，以「神道」ê宗教力量來堅固政體。人民有宗教情操，因此以「為皇帝犧牲」為光榮。

台灣ê土地並m̄是日本神所創造，人民屬中華民族。自從日本侵佔台灣以了後，日本政府就極力推銷日本神道beh來同化島民。第二pái世界大戰時，為加強戰力，積極推行「皇民化運動」來控制島民ê思想kap宗教。因此(一)tī生活上強制島民講日本話，禁止發行漢字報紙。(二)tī宗教上要求家庭kap各項集會崇拜天照大神，遙拜日本皇室。並且燒燬真tsē寺廟ê偶像。

對崇拜偶像ê一般人民來講，多拜日本神無什麼問題，但是對于敬拜獨一真神ê基督徒來講，to̍h是buē-sái妥協ê。所以日本政府就宣言，對神社kap皇室遙拜是國民應盡ê「儀禮」，並m̄是宗教儀式。Án-ne曲解是非來欺騙國民，無視憲法所保障ê宗教自由。外國差會因此「神社問題」，無願意hō͘學生去拜假神，tuì án-ne斷然放棄所創辦ê幾所中學。

第二次大戰末期，有一工一位管理人民思想ê「高等刑事」光臨大甲教會，向我提出三個問題，故意設計陷阱，想beh整我。
伊講：「天皇陛下kap基督何者為大?」
「天照大神kap上帝何者為大?」
「教育敕語kap聖經何者重要?」

這lóng是十分為難ê問題。我若無依信仰回答就是犯了不敬之罪。但是伊問我，我buē-sái無回答。Beh安怎neh?

主耶穌bat講：「lín ài靈巧像蛇，馴良像鴿子。」(馬太福音十：16)

我回答：「您所提出ê問題屬無仝範疇，我bē-tàng解答。這是屬肉體kap靈魂，物質kap精神ê問題。物質kap精神怎樣ē-tàng相比neh?ná準講：「父母之恩比山koh-khah高，比海koh-khah深」。án-ne到底比山高幾丈?比海深幾尺?您講得出來mah?

Tī聖經裡耶穌講：「我ê國不屬tsit世界」約翰福音(十八：36)基督教屬靈魂，或謂精神世界，怎樣ē-tàng kap物質世界相比?(註)。Tī日本帝國：天皇陛下siōng偉大，這是無人敢否定ê。但是我提醒您，憲法第一條講：『天皇是神聖bē-tàng侵犯』。所以咱無應該該隨便提伊ê事來講，若無會犯不敬之罪阿」

伊聽完tsiah-ê話啞口無言，無言thang對。過一下á，伊起身講：「失禮! 攪擾你了。再見!」像喪家之犬失意ê離去。Tuì hit-pái了後m̄-bat koh來tshuē我麻煩。「感謝主!」禁bē-tiâu大大ê鬆了口氣。


註：作者將天皇kap基督以「屬體kap屬靈」來比喻，是為tio̍h巧妙應對á用。