《胡文池牧師kap布農族》

 | | | 轉寄

信徒開賭場

作者 胡文池 2009.04.19

1947年，風和日麗ê春天，大約下晡二點鐘ê時tsūn我到大甲街外探訪信徒tńg來時，發生了一件驚天動地ê事-

信徒房屋瓦斯桶大爆炸，樓房倒塌，死傷十guā人。當時大樓頂聚賭ê五名賭徒mā變成烏面死屍墜下‥‥無一僥倖。

靠近禮拜堂ê路邊，有一間腳踏車店，是信徒開設ê。

第二pái世界大戰了後，人民生活困難，工業iáu未發達，所以真少有人騎o-to-bái，連新ê腳踏車mā看bē-tio̍h。Tī大馬路上駛ê大部分是破舊ê鐵馬(腳踏車)，因此腳踏車ê sing-lí鼎盛，修車、補胎、充氣‥‥，店主一工無閒到晚，因此真少來禮拜，lóng是tshuē藉口講：
「sing-lí太無閒!工作buē-sái無做。」
「太太去做禮拜mā是仝款!」
「我mā有叫gín-á去上主日學ah! 」
「橫直我mā出了年捐、奉獻錢了ah!」
藉口一大堆，m̄來聚會就有理由。

有一工下晡二點guā，我出去探訪會友，回程ê時tsūn，經過這一間信徒開設ê腳踏車店，看tio̍h有七、八位農業學校ê學生tī店內，the̍h-tio̍h自來水鐵管bueh hō͘店主熔接。Tsiah-ê學生是我ê學生，我因此真熟。

我是牧師，kap學校有什麼關係?

因為戰後大家生活lóng真艱苦，信徒奉獻金額mā無tsē，牧師ê薪水微薄。佳哉，農業學校日人老師tńg來到日本，請bē-tio̍h英語教師，因此tsit份職務真自然tik落tī我身上，我感覺這是一項難得ê機會，m̄-nā thang幫助家計，而且thang接觸學生，傳福音ê機會就koh-khah tsē了。一舉兩得，非常歡喜!

我進入店內，問in來tsia做什麼，吩咐in tāi-tsì辦完了後， mài koh去街á遊蕩， tio̍h快快tńg去‥‥等二三句話。講完我就離開，tńg來到教會去了。

未到一分鐘，我tú tńg來到教會門口，忽然，轍隆大聲一響，像二年前美軍飛機空襲時投下ê大炸彈爆炸巨聲!

奇怪!這是什麼聲音，轉身行到大馬路上，我看tio̍h tú-tsiah離開ê腳踏車店樓房已經全部倒塌，塵土煙霧濛濛。我快步行過去，有真tsē人uá過來，警員mā來了。

頓時人群聚集，有人搬開落落來ê木塊，有人挖開瓦片‥‥現場一片零亂。屍體一個一個uí厝內搬出來，排tī馬路上。有ê腳手支離、血肉霧霧無清，有ê頭腦開花、雜亂一堆‥‥慘狀hō͘人不忍目睹。無一下á，排tī大馬路上ê血屍已經有七、八個了。重傷iáu未死ê mā有七、八位，lóng隨時送到大甲唯一ê「上野外科」了。

現場四週，人山人海，圍滿了旁觀者，議論紛紛。

了後，死裡逃生ê學生講：「因為店主要熔接鐵管時，瓦斯放bē出來，伊the̍h燭火來檢查電石桶，不慎引火爆炸，當然頭一個死者是店主。死者大多數是農業學校ê學生。Iáu有一陣，大約五六位當teh樓頂聚賭ê人。Tsiah-ê賭徒，日時不務正業，不時聚賭。Tī這樓頂，警察雖然看bē-tio̍h，thang算安全地帶，in偷偷做不法ê tāi-tsì，想未到竟遭遇tio̍h比監牢koh-khah慘ê死刑。

想tio̍h我本身，若m̄是主ê帶領，真緊離開該車店，後果就不堪設想了!人ê生死常常發生tī一分鐘之差。因我iáu有主ê工作，所以主就保留我ê生命。感謝主，o-ló主!