《胡文池牧師kap布農族》

 | | | 轉寄

魔鬼三pái試探我

作者 胡文池 2009.05.10

主耶穌tī曠野四十晝夜，iau餓時bat三pái被魔鬼試探。魔鬼無一定會以醜怪驚人ê面孔出現來試探人，反tńg常常通過親愛ê人，以麵包、地位、權力來引誘你離開上帝或上帝所支託ê使命。

微小ê我，也bat tī生涯中tú-tio̍h三pái重大ê誘惑。第一pái是beh進人神學院時，第二pái是tú tú踏入傳道生涯時，第三pái是beh登上高山傳道時。

一九三一年三月中旬，tú放落五年沉重ê中學課業，身心隨輕鬆落來，並享受tī溫和春暖ê氣息中，當時ê我感覺非常舒暢愉快。

中學畢業典禮次日，我馬上到神學院辦理入學手續。當時志願讀神學ê人無tsē，所以m̄免入學考試，m̄免繳報名費，mā m̄免繳學費kap宿舍費。顛倒轉，每月iáu thang領tio̍h八元ê伙食補助金。雖然án-ne優待，報名ê人並無tsē，阮hit屆只有三個人報名，全部入選。

一、第一pái試探
神學院入學時間是tī四月，利用這二禮拜閒閒，我就tńg到厝鄉新莊，探訪家人。當時大兄tī役場(鎮公所)當會計，在地方上thang算是有地位ê人物。伊對我講：「你已中學畢業，thang入來街役場做事，我已經為你ê工作安排好了。Tī這役場中，中學畢業生無幾個，所以你ê前途必然光明無量。」

伊這一下好意kap所講ê話mā有道理，但是我已經m̄是自由ê人。五年前，tī前途烏暗時，向上帝所做ê祈禱，tī馬偕校長面前所講出ê諾言，哪ē-tàng未記tit。我buē-sái違背良心，koh-khah buē-sái為tio̍h麵包出賣靈魂hō͘魔鬼ah!

我將實情完全講出來hō͘伊聽，要求伊原諒時，伊真受氣地講：「你已長大成人，kám講永遠beh將扶養父母ê責任khǹg tī我身上mah?」

我像啞巴食黃蓮，有口難言，只有流目屎滿面，甘苦tī心中。
Tú親像主耶穌所講：「人ê仇敵，就是家己厝裡ê人。」(馬太福音十：36)

佳哉，父親是信主ê人，伊m̄-nā鼓勵我bueh進入神學院為主作工，iáu講：「人是buē-sái忘恩背義ê」並叫我母親慢慢á講服大兄，hō͘我順利通過難關。

神學院第一年ê暑假，我被派到樹林教會實習傳道工作，父親hiông-hiông因為中風病倒tī眠床。我時常tńg去厝裡探視，伊無願意我多tuà幾工陪伴伊，反tńg敦促我緊回工地，多作主ê工。上主恩待伊，不hō͘伊久長被病魔折騰，無久就召伊tńg來到天家安息。

二、第二pái試探
神學院畢業，我被派往苑裡教會，傳道無久，小妹文里就結婚了。新郎tī台北有名ê大布商松本商行做事。老板松本先生真器重伊，所以結婚hit工，陪tio̍h新郎來我家娶親。我以主人身份接待伊，kap伊聊了真久。

松本先生不失大商行老板ê資格，風度斯文有禮，談話mā文雅不凡。伊問我什麼學校畢業，什麼職業，以了後就講：「你kám-ē-tàng來我ê商行做事?我正需要一位像你án-ne，受過高等教育、bat英文ê人。」

伊tsit句話，如tân雷公一般，震撼我ê心，hō͘我驚喜萬分，將家己迷失tī大商人ê夢想中。但是tsit種慾念，真緊hō͘我ê良知phah消，koh清醒過來。

「to̍h bē-sái得，我m̄是自由ê人。我是主ê僕人。」

想起以前，主耶穌mā被魔鬼帶上了一座siōng高ê山，魔鬼以世上ê萬國kap萬國ê榮華富貴來引誘伊，to̍h是hō͘伊拒絕了。(馬太福音四：8－10)

我m̄敢違背上帝ê旨意，只好多謝松本先生ê好意，謝絕了伊bueh hō͘我ê高薪重要職務。

我ê妹婿林進來，雖然只是小學畢業，因多年忠實服務tī松本商行。台灣光復了後，日本人歸國，伊繼承主人ê事業，成做大貿易商，家財上億。講到詳細數目，我就m̄知了。

三、第三pái試探
第二pái世界大戰了後，台灣ê經濟陷入空前ê困境。青年人大部份從軍去，欠缺工人之下suah致使減產。戰了後tńg去厝裡時無閒整修家屋、重整事業，suah致使貨幣貶值。教會mā全部遭遇tio̍h經濟困難影響，傳教者ê生活陷入困頓ê中間。

戰爭時期，食品lóng以低價配kip，我tuì教會領tio̍h ê三百元薪金，加上會友額外ê贈送，生活iáu ē-tàng維持。但是戰後，物價自由飛漲，人人自身難保，我mā差不多無法度渡過難關。

真tú好當時ê大甲家政女學校kap農業學校ê英語教師缺員，我to̍h受聘到兩校兼任教員，the̍h所得ê薪俸來補貼家用。每工早起到學校教課，雖然增加了一點精神上ê負擔，但教會ê任何事工，lóng m̄敢疏忽，bē致使kah停頓落來。感謝主為我安排了教會和家庭lóng ē-tàng兼顧ê工作。

無久以了後，學校因學生人數增加，而且學校本身制度mā將改為初級中學。依照政府規定，英文課數tio̍h增加。所以學校當局ài我辭去教會工作，成做hit間學校ê英文專任教員。並且將分配一幢日式宿舍hō͘我，hō͘我khiā起to̍h bē ū問題。

Tsit項交涉對我來講，真是天大ê問題。我既然受上帝選召，成做天國兵丁，豈thang半途逃行，成做逃兵?但是生活mā是現實ê問題。何況一家七口，每日食量mā bē少，這切實ê問題，教會並無hō͘我保障，該怎樣辦?

阮夫妻遭受tio̍h m̄-bat有過ê困擾，日夜煩心，m̄知該作何決定，只好無停ê祈禱，懇求上主指示。

「mài憂慮講：『咱bueh食什麼?lim什麼?穿什麼?』lín ê天父原知影lín需要這一切，lín tio̍h先求伊ê國kap伊ê義，這一切lóng必加hō͘ lín。」(馬太福音六：31－33)

經過數天kap惡魔ê戰爭了後，我決心順服上天ê旨意，繼續為主工作。

戰了後無久，外國母會ê援助koh一pái來到台灣，教會當局要求全部牧師lóng tio̍h辭去兼職事務，我mā就順服命令，完全離開教育職務。專心致力tī傳道事工。