《胡文池牧師kap布農族》

 | | | 轉寄

險入死陰場地

作者 胡文池 2009.05.17

天有不測風雲，人有旦夕禍福。Tī一生將近百年長遠ê年歲中，每一個人lóng會tú-tio̍h意外危險ê tāi-tsì。

第二pái世界大戰末期，m̄知是誰ê鬼主意，日本政府竟然bueh征召我做勞工，去建設飛機場。Tsit項事對瘦弱ê我，無異等於被宣判死刑。

戰爭末期，有一工早起，我接tio̍h大甲街役場(鎮公所)發出ê一張命令通知單，ài我三日內到高雄當勞工，建設飛機場，為期三個月。

當時美國空軍B二九飛機時常空襲台灣，日間火車m̄敢行駛，每工只有二班夜車。所以日時頭tī機場工作ê危險性真高，真tsē人被炸死。

三十年前無推土機kap怪手ê操作，因此án-ne笨重ê工程，只好uá靠人工，用鋤頭挖掘砂土，用畚箕來搬運。

我ê體質瘦弱，皮包骨ê雙肩m̄-bat用過扁担挑起物件。所以m̄-nā三個月ê長期勞動無法度承受，甚至只是一工粗重ê工作mā會hō͘我一病不起。家己ê身軀我siōng了解了，因此tsit張簡簡單單ê征召令，重重ê打擊了我，ná親像對我宣告死刑，hō͘我絕望非常。

大甲地方，身強力壯ê人至少有數萬，為何偏偏選中我這文弱ê人作勞工，實在百思bē了解，我kap婦人人lóng陷入悲愁ê痛苦中。阮只有求告上帝ê幫助。

果然聖靈指示我ài向熊谷小姐求助。

熊谷小姐tsit工本人，bat tī基督教女學校就讀時信主。伊是台北日本基督教會ê會友。伊心地善良、溫柔虔誠，父親是位工程師，tuì政府機關退休了後，就自台北搬到大甲，經營煙酒批發。伊因學識高，勢力大，所以tī大甲任職防衛團團長。

熊谷小姐因其母早逝，決心不嫁ài tī厝孝養父親。年齡已經四十guā歲了。伊每禮拜lóng坐個半鐘頭ê火車遠途趕到台北教會禮拜。

當日下晡我造訪熊谷小姐，講出拜訪原因時，伊ê父親無tī厝，靜聽了我ê話，koh看tio̍h我瘦弱ê身材了後，深表同情，並講馬上beh到街役場為我辦事。

伊對辦事員講：「國家總動員ê意思是beh適材適用，並m̄是講要求全國ê人做同一ê工作。像教會ê牧師，伊從事教化事業，buē習慣勞動，而且伊ê身軀koh真衰弱，假使征召伊去建造飛機場，一定會病倒，反tńg造成國家ê損失。我bueh伊留tī tsit所在，教導防衛團唱歌，鼓舞士氣，增口團員精神力量。」

辦事員隨時講：「是!是!團長，我馬上照您所講ê來辦理。」伊果然tī hit工下班以前，就來教會tshuē我，the̍h回命令單，然後離去。

頓時，像放下了重擔，內心烏暗愁雲立時消散，重見光明，感謝上帝奇妙ê安排。

「伊tuì烏暗中和死蔭內底，領in出來。」(詩篇一0七：14)
了後，我果然被派到防衛團教導團員們唱歌。