《胡文池牧師kap布農族》

 | | | 轉寄

王家動人ê故事

作者 胡文池 2009.06.14

這「王家」並m̄是指深居王宮，過tio̍h富貴奢侈生活ê王室，卻是指khiā起tī偏僻山地ê王姓兄弟。但是in tī sàn-tshiah中所顯出ê虔誠、恩愛ê親情，比皇族koh-khah高貴，koh-khah hō͘人敬佩。 王清好雖然是山地青年，伊ê情義不輸任何人。伊聽道了後，為tio̍h感謝上帝ê恩愛，就向本村ê人傳揚福音，建設教會。 伊對雙親ê慈愛念念不忘。十四歲前，父母相繼亡故，伊負起了養育弟妹ê重任。二弟王上春長大了後成做國小教員，為報答兄哥之大愛，犧牲家己ê青春，金錢kap健康，培育兄哥ê兒女。傳為族人o-ló ê美談。

一、初次入山傳道
我到關山，siōng早tī神應病院內每週ê聚會講道外，自一九四八年二月起，我就帶木下先生入山傳播福音，tī人地兩疏，加上語言無通ê山地，耍開拓傳道，談何容易!感謝主，bat當過警員ê木下確實幫助我真tsē，伊m̄-nā thang為我翻譯，也thang為我帶路。難能可貴ê，因伊bat做警員，m̄-nā無受各地派出所ê為難，相反地，為各地原住民所尊敬，所以所到ê所在，無無順利。

Siōng早阮到延平鄉中野村。第一夜，中野派出所ê警員真細jī地接待阮，並敲鐘召集民眾來派出所辦公室聽道。Tī二十guā名聽眾中，有一位青年真認真專心ê聽講。伊就是王清好，年約二十，身材矮小結實，目光煥發，有真聰明ê容貌。

第二工阮轉移陣地，到靠近村社ê鄉長家聚會，暗時有三十guā名前來聽道。王清好mā來參加。

聽眾雖然歡喜聽講道、唱短歌，koh-khah歡喜看彩色ê聖經掛圖。Tī布農語內底，圖畫kap相片是同一句話(Haningo)，因為tī in單純ê眼光中，兩者lóng是真實事物ê寫照。

雖然in真有興趣ê來聚會，但對信仰ê決志卻保持距離，採取觀望態度。惟獨王清好表示決心信主，因伊父母雙亡，家境窮困，忽然發現了慈愛ê上帝á心懷寬慰。了後，每主日，伊獨自到鹿野參加阿美族ê禮拜。後來伊禁不住內心ê喜樂，熱心向村民傳道，建設禮拜堂，成做延平鄉第一位傳道人。

二、手足情深
當雙親相繼往生時，王清好ê年齡tsiah十四歲。Tī悲傷、孤單、窮困ê原住民家庭，面對tio̍h父母留落來ê五歲小妹(上妹)，二歲ê大弟，(上春)，以及tú tú出生二個月ê二弟(上弟)，生活實在是一個大問題。

Tī-tsia危機中，親友紛紛表示同情，要求收養三個幼小弟妹，但是年輕ê清好無願意koh再嘗到親情ê分離，謝絕了人家ê同情，並講：「自家ê事thang自理」。In一間四人以了後ê悲慘生活thang想á知。

十四歲就beh代理父職負起生活上ê重擔耕種勞動外，iáu-beh兼任母職，照料幼小ê三弟妹，尤其iáu tī襁褓中ê二弟，其身心ê辛苦實在oh得用語言來表達。

經過漫長窮困kap難熬ê歲月，tī王清好ê毅力kap耐心，愛心kap親情之下，皇天不負苦心人，in終其尾突破一切艱難，弟妹lóng長大了。大妹已出嫁。上春由師專畢業了後任教員，上弟mā成家立業了。因此王清好一間ê奮鬥事蹟傳揚tī全布農族之間。

三。弟報兄恩感動天
大弟王上春自細漢就是一個優秀乖巧ê gín-á。自任國小教員以了後就想beh回報大兄養育之大恩。因為伊二歲就失去雙親，對雙親ê恩情一點lóng m̄知，反tńg對大兄ê慈愛、辛苦銘刻tī幼小ê心靈。所以當大兄為傳道獻身心，生活十分清苦ê時，伊就kā大兄ê三個gín-á，接tio̍h身邊做家己ê gín-á來養育。

國小教員ê工作mā不輕鬆，伊又koh是一位負責ê老師，日時頭教冊，暗時準備教材kap批改學生作業簿。伊mā是一個美術家，有空就練習繪畫，伊ê作品bat入選tī全國美術展。加上盡心照顧教導大兄ê gín-á，suah致使疲勞過度á病倒，tuà入去了病院三個月。

想tio̍h gín-á ê生活，心煩意亂，伊待未到痊癒，竟抱病回校教冊。勉強教了半年，病情惡化koh tuà院了。無tuà一個月，醫生宣佈救治乏術，命令退院。Tī病院昏迷多日，大兄tsiah趕到病院領tńg去厝裡。

「人ê絕望就是神ê開始」

大兄王清好為小弟ê病迫切祈求全能ê主醫治。中野教會眾信徒mā同心為tio̍h這事代禱哀求主。王清好聽講彪馬族中有一位信徒有祈禱、醫病ê恩賜，就專程敦請伊來為小弟祈禱。

山胞心靈單純，相信上帝ê話講：「坦然無驚惶ê來到施恩ê寶座前，為tio̍h beh得憐恤，蒙恩惠作隨時ê幫助。」(希伯來書四：16)

過了幾工，病況果然好轉，經過休養，雖然iáu未根治，無久就ē-tàng回校教冊，照顧gín-á。

王老師所患ê是驚人難治ê腰子病，因生活上、物質上ê需要，kap扶養大兄三個gín-á，不得不抱病koh再教冊，所以病況時好時壞，án-ne繼續十年之久，伊求治全省十一間大病院，最後到榮民總病院tsiah得tio̍h痊癒根治。

此間我數次tī路上遇tio̍h伊，伊ê面色，包括全身皮膚lóng是像非洲人ê烏色，身軀mā衰弱不堪。王老師講：「據我所知，凡是患過像我tsit種腰子病ê人lóng 無 tī了。尤其家境困難ê病患，往往維持不了二、三年就結束loh生命。」我mā為伊真擔心，只祈望有神蹟tī伊身上出現。

不料，三年前，我koh一pái tī關山看tio̍h伊時，伊ê面色kap行動已經kap以前大無相仝，變成健康神采奕奕ê青年了。伊真歡喜地對我講：「感謝上帝tuì病魔中kā我救出來。以前凡是我tuà過ê病院，醫生看我ê病情無m̄是搖頭。現在，有kuá醫生iáu m̄相信患過絕症ê我iáu teh人間neh!，人人聽了，lóng講這是一件奇蹟。」

王上春老師m̄-nā戰勝了病魔，koh-khah歡喜ê是伊ē-tàng完成了報答大兄恩情ê願望。

現在大兄ê三個兒女lóng有所成就，姪女已嫁師大畢業ê優秀青年，長姪子已成家立業，次姪子mā進入了大學ê窄門。 自從進入小學教冊就開始培育三個姪子，koh疾病纏身，精神財力一掃á空，因此王老師ê終身大事一直拖到舊年，伊四十七歲時tsiah結婚成家。

伊講:「我雖然犧牲了寶貴ê青春，但ná準球賽中ê隊員，為hō͘人進分，不得不做犧牲phah mā為tio̍h這á感欣慰。我bueh對認bat我ê人講:「這完全是上帝所做ê奇蹟」。