《胡文池牧師kap布農族》

 | | | 轉寄

酒鬼變牧師

作者 胡文池 2009.06.21

劉傳牧師是布農族siōng早ê傳道人，第一位布農族教會ê創設者，mā是第一間禮拜堂ê建設者。雖然伊ê傳道生涯只是十四年無算長，但是伊所留落來ê影響kap美好ê腳蹤卻hō͘真tsē族人到taⁿ iáu念念無buē記得。

劉傳牧師ê祖先原來tuà-tī中央山脈ê深山內底。日本人統治台灣無久就因政治上ê需要，強迫in遷往山下。那時tsūn in父親家族總共有三十guā個人，但一到平地來只tshun三個人。Hit時劉傳只是三個月ê嬰孩，而且未到一年伊ê母親就往生，因此伊被一位瞎眼ê阿姊用番薯養大。

伊生落來身軀矮小、衰弱，就被命名「Ta li bang」意思是晚熟過時ê果子，mā因只食地瓜營養不良，常患病倒床，家人kap村民lóng輕視冷待伊。

伊無享受過父母ê慈愛、家庭ê溫暖，只tī衰敗ê家庭中過tio̍h貧困、悲慘、冷落ê日子，suah致使自小就鄙視家己ê運命，成長以了後對每一個人lóng起反感、怨恨。因此，自暴自棄，目中無人，mā m̄驚死，常常kap人相phah，連人人驚惶ê日本警察伊mā敢罵in。Tī伊記憶中伊三pái the̍h起蕃刀bueh殺人，koh一pái其堂兄hō͘人殺死，tī其心內激起了怨恨，報仇之火。

到了青年時期，身軀轉弱為強。伊聰明、勇敢、雄辯，伊ê能力被日本人重視，á被提拔為青年團長。得tio̍h權力了後，藉故任意phah別人，以洩其對人類ê恨氣。雖然án-ne，光復了後被選做第一任古風村長。但是生活目的只為酒色，每工酒醉倒地，suah致使家貧如洗，一無所有。Ē-sái講是一位標準pháiⁿ人。

伊bat kap三位女人結過婚，非正式ê結婚有外tsē次誰mā m̄知影。第一任太太因受其虐待，suah致使厭世自殺。第二任太太為伊生了一個tsa-bó͘-kiáⁿ。伊tī外醉酒tńg來時，常常phah罵太太，所以伊驚惶幼兒受災，常常看伊tńg去厝裡醉酒時就帶幼兒走到山頂過夜，tī樹林內睏。山頂蚊á多koh兇，母子所受ê痛苦thang想á知。Siōng可憐ê是，tsit位母親，因長期受tio̍h身心ê折磨了後忽然病倒，m̄知影流了juā-tsē目屎了後飲恨離開心愛ê tsa-bó͘-kiáⁿ死去了。

一、酒鬼傷害tsa-bó͘-kiáⁿ
有一工下晡，劉傳kap酒伴飲酒，大醉了後搖搖擺擺地tńg來到自家寢室睏。無juā久以後，四歲ê tsa-bó͘-kiáⁿ由外面tńg來，看tio̍h親愛ê爸爸睏，beh向伊sai-nai，大聲叫tio̍h「爸爸!爸爸!」並用手搖醒伊。Tsit時，正享甜眠ê tsit位酪酊酒漢，一時失去理智，震怒如雷，竟然the̍h起一支木棍，對準tsa-bó͘-kiáⁿ ê背部大phah幾下講：「可惡，你敢吵我。」馬上koh睏去。可憐ê tsa-bó͘-kiáⁿ大叫一聲「Aih喲」了後即時倒地。佳哉，伊ê tsa-bó͘-kiáⁿ命大無死，ē-sái講是mā倒床一年了後tsiah ē-tàng起來行，但已變成ún痀。

雖然以了後經過kuí-nā pái治療mā無復原，年歲增加mā無大漢，身高一直teh四尺以下。

二、向tsa-bó͘-kiáⁿ謝罪
一九四九年，劉傳信主以後對kā tsa-bó͘-kiáⁿ phah成廢人ê事深感痛悔。有一pái看tio̍h附近一位小姐，kap伊ê tsa-bó͘-kiáⁿ「春花」仝款年紀卻生做亭亭玉立bueh出嫁，一時感概萬千真激動地對家己ê tsa-bó͘-kiáⁿ講：「春花，爸爸真失禮妳，kā妳phah成這副可憐ê款。假使我早就信主，妳就不致án-ne了。」話iáu未講完，伊因傷心，目屎tsho̍p-tsho̍p滴，大聲啼哭無停。

一旁ê人，見此情景，無m̄是流出同情ê目屎!

三、向村民熱心傳道
一九四九年一月，阮為玉里附近布農族，開了一個講習會tī玉里教會。目的為教授布農白話字kap教理。鄉長贊成阮ê建議，叫各村派人來參加。劉傳認為布農人應該學習布農ê字，所以親自來參加。

對人間ê恩愛饑渴ê劉傳，一聽tio̍h神ê慈愛，歡喜kah bē講得，猶如久旱tú-tio̍h甘霖，即時接受了。Bē-sái等到五日間開會完畢，到第三工ê暗時，趕tńg去古風村，傳報福音hō͘村民聽了。閉會了後to̍h是tshuā我到清水、古風、崙天佈道。到禮拜日mā一定到富里台灣人教會參加禮拜。

伊入信以了後不斷向村民見證，無久就有三十個人入信，到同年十月kap信徒蓋一個木造教堂開始集會。這是布農第一個教堂。

四、四界傳道
劉傳，不負其名「傳」，m̄-nā tī本地傳，mā時常到各地傳福音。有一pái到延平鄉傳道時被警察扣留。因為當時ê縣長tsit工本佛教大學出身ê佛教徒，聽見有人入山傳道，就下令押送伊去台東警察局拘留十工。但是伊被釋放了後，日時頭繼續tī田園向工作ê人傳福音，夜間聚集慕道友到甘蔗園內底研究聖經，講道，伊ê熱情感動了真tsē人。

伊講道真有力量，因為信主以了後伊本人徹底禁酒、禁煙、禁偷、禁淫，並且kap伊ê仇人和解，因此無koh怨恨別人。聽道ê人mā lóng相信伊ê話確實ē-tàng救人。

伊益發熱心傳道，了後iáu召集了幾個青年到高雄縣，南投縣兩地同族中佈道，鼓勵各地初信ê信徒koh-khah熱心事主。

伊雖然只受過日人四年蕃章傳習所ê教育，但是天資高，竟ē-tàng理解日語文言文ê聖經，koh熱心佈道，因此我就推薦伊到玉山神學書院受造就二年，以了後參加教師訓練班，tī一九五八年二月，應家己培植ê古風教會之聘為牧師。

可惜tsit一位上主之忠僕，有布農族保羅之美稱ê劉傳tī一九六三年五月廿五日早起tī牧師館讀經中，tī八點左右因心臟麻痺á瞌然急逝，享壽kan-ta四十八歲而已。

五月廿六日禮拜日下晡二時，tī古風教會為伊舉行隆重嚴肅ê布農區會葬，列席者有平、山地牧師、長老執事、信徒總共三百guā人，tī偏僻山村，交通連絡lóng不便中竟有tsiah-ni̍h-tsē人參加喪禮，thang知思念伊ê人實在bē少。

伊tī家人ê心目中為晚熟無像樣ê果子，卻tī神ê恩典下，成做布農族初熟美好ê果子，為人所喜樂，神所重用ê僕人。