《胡文池牧師kap布農族》

 | | | 轉寄

愛心ê感召力

作者 胡文池 2009.07.26

布農族教會發展ê原因，主要歸功tī平信徒ê見證。Koh講，由信仰生活所發出ê愛心，mā感動了bē少族人進入教會。

布農族因迷信關係，m̄敢幫助別人，缺乏愛心，生活tī自私中。

依照聖經ê教示，信徒之間應該hō͘稱做兄弟(Tai-sio-an)信徒互相關懷、互相幫助ná親像兄弟，tsit種愛心是來證明上帝ê父性愛，以及福音ê真實性。主耶穌講，，：「lín若有彼此相愛ê心，眾人因此就認出lín是我ê門徒了。」 (約翰福音十三：35)

一、布農族ê自私
布農族ê主食是小米。舊時，in貧富ê標準無tī-teh算金銀財寶或田地有juā-tsē，tuì án-ne是看穀倉內底ê小米有juā-tsē。

Tī小米收割了後，tio̍h收藏入倉時，家長ài tī谷倉頭前唸唸數句咒語講：「小米ah!全村ê小米beh聽我ê話，全部tio̍h進入我ê穀倉來!」伊不管別人有無米thang食，只希望家己ê倉庫內有豐富ê食糧。這m̄-nā表示in ê迷信是buē-sái實現ê迷信，mā暴露了in ê無知kap自私。

若有人死亡時，in-tau ê人buē-sái進入喪家祭拜或幫忙了後事，這是族人ê禁忌(samo)。所以昔時in只好將死人埋葬tī家己ê厝內。

日人領台以後，日本政府禁止tsit種惡習，tsiah將死人埋葬tī墓地。

布農族第一位牧師劉傳iáu未信主時，伊ê前妻死去，因厝內別無他人幫助，無奈，伊只好家己背tio̍h太太ê冰冷屍體到山頂，家己the̍h鋤頭挖掘墓穴，tsiah將其埋葬。

二、信徒ê愛心
Tī一位天父之下，信徒lóng是一家人。初代教會信徒bat實行tsit種大理想ê教示。「信ê人lóng tī一處，凡物公用，並且賣了田產家業，照各人所需用ê分hō͘各人。In ta̍k工同心合意恆切ê tī殿內底，koh tī厝內擘餅，存tio̍h歡喜誠實ê心用飯，o-ló上帝，得眾民ê喜愛。主將得救ê人ta̍k工加hō͘ in。」(使徒行傳二：44－47)

Tī東部玉里鎮附近ê中平村，這是布農族ê村落。Tī這村內底有一位太太tī短短一年之間死去了三位查某gín-á，in lóng死tī肺結核病。

In有一種迷信叫衰運(dolos)，相信若到病家或喪家會hō͘污染tsit種衰運，suah致使家己家族mā會受tio̍h災難。因這迷信，別人lóng m̄敢探訪或幫助這一間受苦ê人。

當時中平村已經有bē少信主ê人，in看tio̍h tsit-ê悲慘ê家庭就生起憐憫ê心，勇敢向前相助，m̄-nā the̍h食品、金錢去慰問，甚至幫忙人人siōng驚ê埋葬事宜。所以這家人受基督徒ê愛心感召á信主，加入教會。

三、馬兄弟ê見證
東部馬遠山地教會，siōng早ê禮拜堂全部是用竹造ê。這座禮拜堂所用ê竹是初代姓馬ê信徒奉獻出來，伊mā是第一批我tī馬遠施洗ê信徒之一。伊不因奉獻多suah致使經濟受損，反tńg生活比以前koh-khah好，koh-khah豐富。

但是有錢了後變kah hia-pai，開始輕視教會，m̄去參加禮拜，無koh讀經、祈禱。雖然教會長老kap牧師以善言相勸，mā無看tio̍h效，一味放縱私慾酗酒，m̄知悔改。因此教會正式宣佈「禁聖餐」來警告伊。不料，伊聽tio̍h這消息了後，koh-khah怨恨教會，就轉往天主教去了。Tī天主教四年，並當起in ê「長老」。

無想tio̍h四年了後，mā竟然koh tńg來到長老會。為什麼neh?請你聽聽伊家己ê見證：
(一)當我ê太太破病時，關心我ê人大部份是長老會教友!
(二)我太太往生時，因病久，金錢花光了，無喪事費，經教友ê關懷、愛心，捐出金錢、白米、菜等等，我不出juā-tsē錢就完成了喪事。Tsit時tsūn我受感動!反省家己，心中有ná刀刺裂，我四年來ê過錯，全家人lóng tī長老會，只我一人迷途不tńg去，我開始想tio̍h四年前被禁餐ê用意，tuì án-ne是教育中ê愛，如父親對家己ê gín-á勸告kuí-nā pái，gín-á不領受時，父親必嚴格地教示伊!感謝主!我iáu有機會tńg來。各位兄弟眾姊妹mài學像我!過去ê固執，願上帝原諒我，牧師長老kap各位全教友們!請原諒我!我tuì現在起悔改!