《胡文池牧師kap布農族》

 | | | 轉寄

競爭入天國

作者 胡文池 2009.07.19

「律法kap先知到約翰為止，tuì-án-ni上帝國ê福音傳開了，人人努力bueh入去。」(路加福音十六:16)猶太ê民族主義將上帝國限定于律法下ê以色列人，但是上帝愛全世界ê人，將主耶穌賜hō͘全人類，hō͘一切信伊ê人ē-tàng得tio̍h上帝ê恩典。不過tsit種福氣只有「虛心ê人」tsiah ē-tàng得tio̍h。

一、信義鄉民熱心求道
一九五0年我奉救主ê命令派造二位布農族人，張旺、田光明到中部布農村落傳道。In並無經過正式神學教育，只是由東部ê信徒中選拔出來ê優秀青年，為囑託宣道師。九月六日，in攜帶二幅彩色新舊約聖經掛圖，一張布農羅馬字母，kap一點糧食，經由中央山脈羊腸小路步行三天才達到西部。In被聖靈充滿，心中喜樂，所以一絲á to無感覺厭倦。

In tī信義鄉東埔開始佈道大會。In身上帶有傳道證明冊，所以警察m̄敢阻擋，村長mā協助，召集大約三百名村民前來聽道。根據舊約大幅掛圖，in開始講論上帝如何創造萬物kap始祖亞當、夏娃ê故事。布農話內底，圖畫kap相片是同一句話(aningo)。這幅外國印製ê掛圖，彩色非常美麗逼真，映tī in目睭內底，像看實物仝款ê真。

自黃昏時tsūn開始集合，in唱布農奮興短歌，看圖、聽道並學習羅馬字。Tī tsia所聽，所看ê lóng是族人自古以來m̄-bat聽過。Mā是新奇、美好、切真正知識，suah致使全村民一時lóng如被新酒迷醉。的確，in是被聖靈充滿，猶如舊時門徒tī五旬節時被聖靈充滿仝款ê興奮。

In m̄知時間過得這快，聽tio̍h雞啼時tsiah知影天將亮。Tsit時講道ê田光明講：
「該歇睏了，恐驚明á載lín ê工作會受影響。 」 「buài，buài，koh再教阮。明á載ê事不要緊。」村民lóng m̄願散會，一直大聲án-ne講。
「我iáu有一工tī tsia，等明á載koh再講pah!」田光明講。
「明á載siuⁿ久了。」有幾個人大聲án-ne講。
田光明講：「請原諒阮，阮行三工路到tsia來，實在真thiám loh，hō͘阮歇睏歇睏，明á載koh再講pah。」大家tsiah無可奈何，依依不捨地散會了。

翌日清早，天tú亮，bē少ê人koh來了。連續兩工，in lóng是án-ne熱心求道。

二、愛大，赦免mā大
Tī村中有一位女人，年齡大約半百，名叫烏利。伊會講一嘴流利ê台灣話，原因是伊少年貌美ê時tsūn，時常出入平地做不正經ê事。伊聽tio̍h人lóng有罪，上帝獨生kiáⁿ耶穌降世為人死tī十字架，bueh除去信徒ê罪過等等道理時非常感激，家己知影罪重決心信靠救主，所以比其他村民koh-khah熱心聽道，並且誠懇地招待二位講道人到伊ê厝khiā起，並奉待in如天使仝款。

三、決心燒公媽牌
Kap東埔村相離三小時路程ê望鄉村，有一位開明ê村長名叫全日昇(Lobis)。Tī山地雖然無報紙thang看，但是來往ê人真緊將tī東埔村發生ê新事報告tsit位村長。于是伊就即時派人到東埔迎接二位傳道人。

Beh暗á時村長就phah鐘召集村民來聽道，大約有二百guā人tuì開會就感覺傳道人所講ê句句有理而且新奇，大有趣味，時間過得真緊，聽tio̍h雞啼時兩人想beh閉會歇睏，大家卻無肯tńg去。不得已之情況下二人繼續講道，直到天亮。

次日，村長對傳道人講:「昨夜聽lín ê講話，tsiah知影不拜上帝，á拜公媽板是m̄-tio̍h。你看，公媽ê板子tī tsia，請lín為我the̍h掉。」因此張旺就為伊除掉公媽牌。Tī邊á觀看ê一位老人講：「án-ne放肆，tsit位先生ê腹肚一定會痛。」但是等了真久mā無發生腹肚痛ê tāi-tsì，最後in就講：「tsit位先生身上，一定有真神保護tsiah會平安無事。」因此tī工作三工了後就有真tsē人決心信，當然村長mā是其中之一。M̄-nā án-ne，以後村長本人繼續領導村民信主，聚會，最後變成一位牧師，工作到老年。

四、競爭入天國
久美村ê人聽了這消息，就派人去迎接上帝ê僕人。奈因望鄉村人m̄肯hō͘二位先生行，koh藏in ê行李，án-ne延宕多日。了後來in傳道人所到ê所在，無m̄是án-ne。In到久美、羅娜、新鄉、豐丘、新開、人倫、雙龍、青雲、潭南等地廣傳主ê福音。每夜未到天光buē-sái歇睏，而且被各地ê人歡迎尊敬，猶如天使仝款。

有一pái tī豐丘講完福音了後，一位布農族ê警察khiā起來講：「阮ê祖先講，阮是由微小ê ka蚤變成ê，lín卻講是上帝所創造，是上帝ê子女，hō͘阮ê心充滿自豪kap喜樂。但是lín所講ê，究竟是家己想出來ê neh?或是根據冊本歷史ê記載?」hit時宣道師就the̍h出舊約聖經，hō͘伊看創世記ê記事。伊就真歡喜，篤信二位所講ê全部信息。

是夜，in iáu注意聽道理，直到天亮。散會時村長講：「tuì-án-ni咱決定服事上帝，明á載開始建造禮拜堂。」果然in就開工，興建了木造禮拜堂，成做中部布農族頭一個教堂。

因為二十guā天來不眠不休ê傳道工作，到了新開村ê時tsūn田光明終其尾病倒，遍身疼痛，頭燒手熱。族人走去請醫生，恰巧醫生無tī-teh，tio̍h四、五天才ē-tàng tńg來。In想beh請巫師來念咒，被田光明拒絕，講：「我bueh祈禱真神上帝。」講完就大聲祈禱。祈禱了後就koh再躺下睏，到黃昏時tsūn，燒果然退了。暗時伊koh khiā-tī會眾面前講道，眾人驚奇á講：「真有神來幫助伊!」

由羅娜村tuè in來ê一位女信徒名叫(Ovao)看tio̍h這神蹟，就走tńg去到各村報告tsit項事，hō͘各地信徒ê信心愈為堅強。