《胡文池牧師kap布農族》

 | | | 轉寄

救濟品kap病院

作者 胡文池 2009.08.23

救主耶穌tī世時，m̄-nā宣揚天國ê福音hō͘世人，伊看tio̍h病人就醫治，看tio̍h iau餓ê，就變出餅hō͘ in得tio̍h飽足，因此各時代ê教會，lóng學習耶穌ê愛心，重視社會救濟事業。

第二pái世界大戰了後，台灣各地物資非常缺乏，尤其山地，所以政府tsiah將原住民全部列為一級貧民。

一、麵粉、奶油kap衫褲
一九五五年起原住民得tio̍h基督教福利會援助，每月領受美國剩餘ê農產品，約有十年ê時間，受益不淺。配給 ê食品以麵粉siōng tsē。偶爾mā有番麥粉、奶油或綿子油。

Siōng早有ê人食脫脂奶粉會瀉腹肚，習慣以了後就bē了。有ê人驚食奶油，suah致使將高價ê奶油作車油，khǹg入牛車ê輪軸內。

為什麼戰前山胞thang自hō͘自足，á戰了後卻物資缺乏?

Siōng大ê原因是，自從in信主以了後，以前結婚ê人，五對有三對bē-sái生育，奇怪!信主了後，差不多全部會生產。對布農族來講，戰爭中，信主前總人口是一直保持一萬八千，到一九七O年時，信主了後十多年，竟增加到二萬四千人了。

第二原因是，戰時有真tsē青年人tuì軍，農地癈耕，減少生產，加上人手不足，鳥類飛到耕地食in所種ê稻穀。

除了食品之外，阮也bat二次配給棉被，每戶山胞一條棉被，舊衫褲ê配給就難計其數了。

二、產院是苦樂齊進ê場所
孫雅各牧師娘－孫理蓮女士，看tio̍h山地婦女m̄-bat衛生，suah致使所生ê嬰兒多數夭折。這是in ê不幸，mā是教會ê損失。

伊看tio̍h婦人人是老練ê助產士，就籌設產院tī關山，請婦人人當院長。這是山地婦女ê大福音，án-ne一來生產ê孕婦m̄-nā母子thang保安全，全部免費接生，而且thang得tio̍h一大包母親kap嬰兒所需要ê衫褲kap用品。因此，產院開設以了後，每工lóng有一大群孕婦來接受診察或生產。

孕婦平常會問ê一句話就是：「院長，我tang時會生?」
「你ê最後月經是叨一工?」助產士問。
「m̄知影」tsit句話是每一個山地孕婦ê回答。
「你m̄知影，我就算不出你什麼時tsūn會生。」助產士án-ne講。

雖然án-ne，老練ê助產士看看伊ê腹肚大小，就kā伊講大約生產ê預定日。並且教導伊以後ài會記得最後一pái ê月經日。

產院開設十年間，經過婦人人接生ê嬰兒有五千guā人，由此可見，產院tī東部ê山地婦女中造福bē少。

一個新生兒誕生，產婦彼此分享快樂。但生產ê痛楚、哀叫聲，又ài彼此安慰kap擔待。

有一pái一位產婦tī嬰兒出生了後抱頭大哭。周圍ê人認為發生了什麼大事，問產婦：「母子平安，理當快樂，為何大哭?」

伊講：「數日前，我先生買了一部新ê機車，預定tī我腹肚痛bueh生產時，無論半暝，mā thang送我來tsia。Ē-sái講是，機車買了無久，伊到外teh lim酒，tńg來時，lòng-tio̍h路邊樹á死去‥‥。」講tio̍h tsia，伊忍不住koh一pái大哭，邊á ê人無無仝情感傷。

Iáu有一pái，一位產婦tī gín-á出生以了後，m̄-nā無為安產快樂，反tńg大哭一場。護士問伊什麼bueh哭?伊tsiah講原因：以前伊被一位台灣人雇用到山坡地開墾種柑á。伊看tsit位山地姑娘有幾分姿色，就特別對伊好，並甜言蜜語騙伊bueh娶伊，並tī山頂一pái工作ê機會，奪去伊ê貞操。

腹肚大起來，tsiah知影已經有伊ê gín-á。伊到伊ê厝逼婚時，tsiah發現伊是有bó͘ ê人，並hō͘伊ê太太大罵一頓，講是誘拐伊ê丈夫，bueh告伊!現在，gín-á已出世了，該怎樣辦?講完koh大哭起來!

三、浪子tńg去厝裡
婦人人除了負責產院ê接生工作外，關山鎮內kap附近小村莊mā真tsē人lóng tshuē上門來請伊去助產。Tī關山鎮中年以下ê人差不多一半是經伊接生出來ê。所以伊每一個月ê收入mā bē少，幫助阮家計真tsē。

有一工，一位tuà-tī瑞豐村ê一位農民蔡天文先生，帶tio̍h teh-beh臨盆ê太太來我家生產。Gín-á出生了後，ài我為伊命名。這是額外服務，不另收費。因為真tsē人迷信姓名學，每pái tio̍h花二、三百元央請看命先生為gín-á命名。來我家生gín-á ê，我thang幫助伊節省命名費，藉此機會向in傳道。

蔡先生講伊家境無好，希望為伊ê gín-á取一個好名字，hō͘伊家境好轉。

我講：「生死禍福天註定，咱ē-tàng為gín-á號一個siōng好ê名字，ē-sái講是咱卻buē-sái改變天意。Tī中國，真tsē人lóng請算命先生取siōng好ê名字，ē-sái講是家己不敬拜上帝，違背天理得罪上帝，suah致使比基督教國家sàn-tshiah、落伍‥‥。你若beh家境好轉，請來研究基督教真理，相信一定會得tio̍h上帝ê祝福。」

我並將舊約聖經以賽亞冊四十四章9－17節讀hō͘伊聽，tsit段經文主要講tio̍h虛無ê偶像：「‥‥鑄造金屬偶像來崇拜是無意義ê。人thang kā樹ê一部份當燃料，另外一部份造偶像，供人膜拜，然後向tsit塊木頭叩頭跪拜，祈禱講：「你是我ê神明，救救我pah!」，in án-ne做是juā-ni̍h-á愚戇!只要造偶像ê人動點腦筋、思想一下，就會講：「我用同一棵樹ê木頭，一部份當柴燒、烤餅、烤肉；另外一部份用來造偶像，á我竟對看一塊木頭膜拜!」 我以前mā常將這淺易道理向產家傳道，卻效果不彰。想未到，蔡先生對我ê勸導有所了悟，決心bueh信主。伊講:「我雖然認真工作，卻因行為不檢，嫖、賭、煙酒、檳榔‥‥樣樣lóng來，開了我bē少錢，hō͘我負債累累。我認為以前所拜ê神lóng bô靈，所以前幾工到台北，特別koh再花二千元買一座金身媽祖tńg來拜，希望ē-tàng幫助阮。現在我聽了你ê話，決心bueh悔改，歸向上帝。

果然，伊禮拜日就駕駛半小時機車，來到關山教會禮拜，甚至禮拜三、五ê夜間聚會，mā不因路途遙遠á停止，風雨不阻ê來。

伊ê太太siōng歡喜了，看tio̍h丈夫生活有所改變，伊mā夫唱婦tuè到教會來，gín-á們mā lóng來參加聚會，一間五、六人熱心敬拜主。

無久，in ê經濟改善了，一家過tio̍h快樂ê生活。

但是一件事hō͘伊傷透腦筋，就是ài如何處理二千元買來ê金身媽祖。若beh轉賣別人，卻失禮良心，只好將伊堆khǹg tī後倉庫內ê角落內底，hō͘伊永遠靜坐tī hia。伊講：「如果早知影上帝是真神，就不致白費這二千元冤枉錢買來一座假神了。」

四、病院是病痛逃避所
「花無百日紅，人無千日好」，山胞koh-khah是容易破病。Sàn-tshiah ê山胞常常負擔不起真貴ê醫療費，in m̄知任何藥草，所以只有uá靠詐騙ê巫師作法趕鬼，生死由天，忍苦待斃。因此，孫師母tī台灣底為山胞開設真tsē所在病院，免費醫治in ê疾病。

我到關山傳道無久，孫師母就tī關山鎮中山路60號開設一間免費診所，特聘請關山新生病院院長兼任，專為山胞服務。

這診所每工大約有四十guā人來診斷治療。因為是免費，有時tsūn全家五、六人總動員來求醫，無病呻吟，hō͘醫生啼笑lóng非。因此阮只好改變方法，每人tio̍h繳納五元ê藥費，án-ne tsiah防止藥品ê浪費。

當時，關山因地勢真低，濕氣khah重，瘧疾流行。有一pái，一位山胞來the̍h三工份瘧疾ê藥，tńg去以了後伊無耐心分三工食用。認為藥量重，痊癒快，就將三工份ê藥一pái服完。

糟糕!伊發狂、亂講、亂叫，驚動全家人，koh再來求醫，醫生隨時hō͘伊治療，tsiah免除了大災禍。由此thang知當時山胞ê智識何等落後。

未信主時，山胞約有百分之七十患tio̍h肺病。芥菜種會mā tī關山開設一間「山胞肺病療養所」免費為in服務。我mā兼任tsit-ê病院ê院牧十多年，直到一九八0年因in信主，衛生改善，患者減少了後tsiah停辦。開辦期間bat救治了無數患者，á隔離病人ê措施，mā hō͘病人家屬免除受感染之虞。Tsit間病院造福山胞bē少。