《胡文池牧師kap布農族》

 | | | 轉寄

寡婦ê獨子死去

作者 胡文池 2009.08.30

潘姓青年出世tī富裕家庭，身軀強壯，腦筋靈活，小學成績相當bē-bái，初中畢業了後，以優良成績考tiâu師範學校，成做小學教員。父親是牙醫師，當教會長老，母親是助產士，mā熱心信主。 Tsit種ê身世，伊若按照基督教信仰來生活，安份守己，前途一定是光明燦爛。可惜，伊變成一個酒徒，自毀前途，buē-sái成家立業， Tī三十歲ê英年就早逝了，這是何等悲慘ê事!原因何在?

一、小學不上主日學
伊ê性情外向á好動，自細漢ài sńg，加上家境富有，口袋不時有夠額ê金錢，suah致使吸引真tsē朋友，常常kap小鬼們tsiah-ê猿群犬黨tī外遊sńg食樂。家庭信基督教，按照教規，兒童tī禮拜日tio̍h上主日學敬拜上帝，領受主ê教示。但是伊煞無聽話，時常缺課，後來乾脆m̄來主日學了。

伊ê父母溺愛獨生kiáⁿ，in認為gín-á每日在學校讀冊辛苦，禮拜日hō͘伊輕鬆一下，sńg sńg，mā無算什麼壞事，所以不勉強伊上主日學，任由伊kap一kuá非基督徒gín-á同齊sńg樂。

主日學是宗教教育ê門路，建立個人信仰ê基礎，養成禮拜日歇下一切ê工，到教會敬拜主ê好習慣，mā是交往善良小朋友ê好地方，所以關係一生ê成功失敗真大。

二、中學時代ê放蕩
因伊既然tī小學時代無上教堂ê習慣，到了初中時代離開父母tī外求學時koh-khah自由放蕩。Kap一kuá太保結交，siōng早學習pok薰、食檳榔，了後koh-khah會飲酒了。

因家庭富有，又koh是獨子，有求必應，bueh juā-tsē錢就寄juā-tsē錢hō͘伊，任用不完。對伊來講，教會是嚴肅、無聊ê地力，雖然父母是基督徒，伊煞無願踏入教會一步，成做有名無實ê信徒。

三、酗酒ê教員
雖然中小學時代放蕩sńg樂，因天生聰穎，猶原以優良成績考tiâu師範學校。畢業了後回鄉當教員。

Tī小學任教，伊ê薪水全部交iáu公賣局，買酒取樂。每工，伊ê辦公桌頂必備米酒，下課時，以酒當茶飲。小學裡有一位工友kap伊同有酗酒習慣，成做同趣之交，時常同飲歡樂。

雖然án-ne，因伊頭腦好，教學認真mā獨具風格，學校當局iáu是認為伊是一位好教員。

教了幾年冊，到了結婚年齡，卻tshuē bē-tio̍h對象。因為基督教女子看tio̍h伊是酒鬼就退避三舍。無想beh koh進一步kap伊交往。

世界上女子雖多，伊煞tshuē bē-tio̍h配偶。

四、寡婦ê獨子死去
伊ê父親死去以了後，母子二人相依為命。但是母親對tsit-ê酗酒ê kiáⁿ兒大為失望。Tiāⁿ-tiāⁿ勸伊禁酒不聽，不得不loh唆地，反覆地責罵伊，suah致使伊對母親產生反感。

有一工，伊感覺四肢無力teh要倒地。去看醫生時，病症已相當嚴重。醫生偷偷á對伊母親講，伊患tio̍h肝硬化，tio̍h絕對禁酒。

母親tńg去厝裡看gín-á時，伊竟然iáu teh飲酒。因此真受氣地罵伊buài命。伊m̄-nā不聽話，反tńg惡言相對，回罵其母講：「妳太loh唆了，別人ê老母會死，你怎樣iáu不死‥‥」等等話語，其母聽了，大哭一場，傷心不堪。

無久，這寡婦ê獨生kiáⁿ因肝硬化á死去，年齡只有三十歲，這是何等悽慘ê事，老實講伊ê父母該負起大部分責任。

「教養孩童，hō͘伊行當行ê道，就是到老伊mā不偏離。」(箴言二十二：6)

五、伊ê小學同學成功了
胡姓gín-á kap伊同年齡，tī小學時mā是同班。因為母親是主日學教員，gín-á每禮拜日早起必乖乖á來上主日學。

有一個禮拜日早起，胡媽媽煞無看tio̍h家己ê gín-á tī課堂裡，等中晝gín-á tńg來食中餐時，tsiah知影伊kap同學釣魚去了。母親非常受氣，the̍h起竹鞭就將伊phah一頓。Kiáⁿ兒皮肉痛，母親卻痛tī心中，mā禁bē-tiâu流目屎。Tsit-pái ê教示真有效，tuì-án-ni了後，gín-á死mā m̄敢tī主日學缺課了。養成每一個禮拜日參加主日禮拜ê好習慣，一生不改其樂。

胡姓gín-á到台東中學讀冊時，mā kap潘家獨子tuà作伙一室，禮拜日招呼伊同到教會，伊煞無願，因為伊認為一禮拜中禮拜日to̍h是遊sńg ê好日子。

胡姓gín-á遵守安息日，mā規規矩矩認真讀冊，成績bē-bái，由小學、中學、大學，致使留學美國，得tio̍h化學博士，電腦碩士學位。成功地當大學教授。

潘姓、胡姓二個gín-á ê失敗kap成功，在tī人生開始ê第一步---主日學時代已經決定了。

「不忍用杖phah kiáⁿ兒ê，是恨惡伊。疼愛kiáⁿ兒ê，隨時管教。」(箴言十三：24)