《胡文池牧師kap布農族》

 | | | 轉寄

偉大ê山地人－亞伯蘭

作者 胡文池 2009.11.01

講tī一九八六年玉山神學院畢業典禮
創世記十二章１－9節
今á日早起ê題目就是「偉大ê山地人亞伯蘭。」亞伯蘭是離開咱現在大約有兩千多年時代ê人物，但是上帝特別愛伊，因為伊是一個非常有信仰並且真善良ê人。所以上帝就有了藉tio̍h伊beh來拯救全世界人ê計畫，因此上帝就kā伊ê姓名tuì亞伯蘭改為亞伯拉罕。亞伯蘭tsit-ê姓名原來ê意思是「高大」，但是亞伯拉罕tsit-ê姓名ê意思就是「萬民之父」;上帝beh將伊以前hit種高大、高傲ê心情除去，hō͘伊成做萬民之父。不管是tuì回教、猶太教或基督教ê觀點來看，每一個宗教lóng稱亞伯拉罕為in ê信仰之父，伊mā是以色列人ê父。以色列民族被全世界ê人尊敬為非常富有，並且是siōng有知識ê一個民族。伊是一個非常偉大ê人。但是伊雖然tsiah-ni̍h偉大，真tsē ê人lóng m̄-bat伊為一位山地人，因為伊離開自已ê故鄉哈蘭到所khiā起ê地－山地並tī he個地方khiā起一百年之久。人家雖然自稱家己為山地人，但是我相信無一個人tī山地tuà過一百年pah!但是亞伯拉罕tuà-tī山地超過一百年，所以伊比大家koh-khah山地人。

到底伊ê偉大tī叨?
第一，伊相信上帝ê話。亞伯拉罕本來tuà-tī迦勒底ê吾珥，tsit-ê所在tī古代是貿易ê中心點。Tuì醫學、藝術、商業來講lóng比其他地方iáu-beh發達，所以tuà-tī tsit-ê地區ê人，lóng充滿了一種歡樂kap高度物質享受ê生活。但是非常可惜ê就是tsit-ê地區mā就是偶像崇拜ê中心地。上帝為tio̍h beh賜hō͘亞伯拉罕重大ê使命，所以就託付了一個艱鉅ê工作，伊kā亞伯拉罕講:「你tio̍h離開你ê本地」。對tī一個人來講，tio̍h離開本地是一件非常痛苦ê tāi-tsì，咱tuà慣了ê所在就是siōng好ê所在。Ē-tàng kap家己ê親戚眾朋友tuà作伙是siōng自然siōng快樂ê事。要離開家己ê本地本鄉，離開tsiah-ê人tio̍h往伊所m̄-bat ê所在去，是一件非常艱苦ê tāi-tsì。這是一件犧牲，mā是冒險。但是亞伯拉罕突破了tsiah-ê困難，伊前往上帝所指定ê所在，這是伊偉大ê信心。M̄-koh無論伊到什麼地方去，甚至進入來了迦南之地ê山區，伊絕無bē記得建立祭壇來敬拜上帝，並且mā獻上伊十分之一hō͘上帝。

第二、咱來看亞伯拉罕ê愛心。咱知影伊帶tio̍h伊家己ê姪兒羅得kap伊同行，羅得是已經失去了父親ê孤兒，所以亞伯拉罕疼愛羅得kah-ná家己ê gín-á一般。In兩個lóng是牧人。

為tio̍h beh爭取餵羊ê草地，in ê僕人bat起爭論，亞伯拉罕無因為伊是一位長者，所以認為有權利先選擇好ê七地。伊反tńg hō͘家己ê姪兒羅得優先去選擇好ê土地，卻寧願家己選擇比較無好ê山區。但是亞伯拉罕無因此á怨恨家己ê姪兒。

咱知影有一pái敵人來攻phah平地羅得所khiā起ê所在，攻佔了所多瑪城並且kā羅得kap in所有ê人俘擄了。亞伯拉罕無記恨以前所發生ê hit件事情，煞帶了一二百十八位屬tī伊家己ê人來解救羅得。咱mā知影亞伯拉罕是一位真會善待人客ê人，所以咱看tio̍h伊bat接待過大使。當亞伯拉罕知影上帝bueh毀滅所多瑪kap俄摩拉城ê時tsūn，伊bat為tsit-ê城祈禱六次。

第三、咱知影亞伯拉罕疼愛上帝所賜hō͘伊ê山地。當伊進入來迦南ê時tsūn，tāi先入去ê所在就是示劍，其次就是伯特利，最後tsiah到希伯崙。伊一面到死lóng tuà-tī希伯崙tsit-ê所在。Tsiah-ê地區lóng是屬tī山地，m̄-nā是伊自已，連伊自已ê kiáⁿ兒、孫á mā lóng tuà-tī tsit-ê地方。

為什麼講山地真好neh?有真tsē人看bē起山地，但是真聰明ê詩人bat講過tsit種ê話，「上帝創造了山，魔鬼卻創造了都市。」我相信tsit句話是對ê。tāi先tī山地內面咱看tio̍h真tsē美好ê事，但tī平地裡卻充滿了真tsē ê罪惡。咱知影聖經裡面，咱所看tio̍h ê第一個都市是「巴別」，in lóng是高傲ê人民，現在tuà-tī都市ê人lóng是屬tī tsit種類ê人。

咱山地ê交通無啥好，所以大家lóng認為山地跟不上平地文明ê流行。In lóng認為山地人lóng無學問，但是我認為人無論到什麼地方去，只要有上帝ê恩惠，伊就是好人，巴別tsit-ê地方ê人有技術、有知識，所以in ē-tàng建築真高ê塔。我相信巴別塔無論起ê多高，mā不比現在紐約ê摩天樓koh-khah高。但是如果紐約ê摩天樓bueh kap上帝所創造ê喜瑪拉雅山脈比較，根本就比bē起。大自然tuì án-ne是上帝所創造ê偉大ê傑作，咱一到山地就ē-tàng看tio̍h。咱若到都市去，所看tio̍h ê椅子mā好、桌á mā好或是水泥房lóng是人所造ê。看起來mā可能真suí。但是上帝所創造ê山、野地ê花，lóng tio̍h比人所造ê物件iáu卡好。人造花雖然是非常好、非常貴， 但是比bē起hiah-ê自然ê花。Hiah-ê敬畏上帝ê人，會tuì上帝得tio̍h知識(箴言一：7)。現在ê以色列人bueh比世界其他ê人有koh-khah高ê知識，tuì亞伯拉罕崇拜耶和華上帝以來，這是上帝所賜hō͘ in ê。

其次咱看tio̍h都市是真tsē人聚集ê所在，因此都市ê生存競爭非常利害，為tio̍h生活、為tio̍h生存會發生真tsē無好ê事。當tshuē們看tio̍h所多瑪、俄摩拉ê記事時，咱就會知影tsiah-ê罪惡。我相信上帝將亞伯拉罕tuì平地移居到山地ê一個目的，就是beh hō͘伊離開平地ê罪惡，á不被平地ê罪惡所污染。所認為了宗教kap道德上ê理由，上帝hō͘亞伯拉罕tuì平地移居到山地。Tī加拉太冊三：7有tsit種ê一句話:「有了信ê人就亞伯拉罕ê真子孫」。所以，咱每一個人lóng ē-tàng kā伊稱做亞伯拉罕ê真子孫。因此咱lóng tio̍h向tsit一位偉大ê信仰前輩學習，學習伊非常熱心敬拜上帝ê信仰。只有有信仰ê人才ē-tàng蒙上帝ê祝福。

今á日臺灣ê原住民到底tuì什麼地方來到臺灣，iáu有真tsē無仝ê學說。M̄-koh tī使徒行傳十七章26節講:「上帝創造人並且hō͘ in散居tī kui-ê地球上。」因此咱ē-tàng講所有ê歷史lóng tī上帝ê手中。我相信上帝是為tio̍h beh祝福真tsē ê人，所以bueh hō͘各位tuà-tī山地，然後bueh藉tio̍h lín來祝福別人。Lín iáu無信基督教tsìn前，lín ê祖先lóng知影上帝。Lín tī食飯前iáu是會謝飯ê，雖然lín m̄知影耶和華上帝ê名稱，但是tī lín ê心內面lóng知影有一位上帝，上帝賞賜tsiah-ê美好ê食物hō͘咱。

我mā看tio̍h tī山地裡面tī信仰上有真tsē美好ê事蹟。我發現在山地內底無pua̍h-kiáu tsit-ê現象是siōng大ê特色，tī道德上是一個非常優良ê所在。如果咱tī平地和平地人tuà作伙，mā可能咱mā學會曉pua̍h-kiáu、殺人等屬tī都市裡面ê罪惡。

當然tī山地mā有真tsē ê問題，有ê人講山地真sàn-tshiah，ē-sái講是三十幾年前我tī山地傳道ê時tsūn，無一個人對我講in是sàn-tshiah ê，因為in lóng過tio̍h仝款ê生活。In tī仝款ê田地裡工作，in食仝款ê小米或玉蜀黍。所以我無聽過in講，阮是sàn-tshiah ê。In bat對hiah-ê比較有財富ê人講:「lín真富有，因為lín ê小米真tsē。」

雖然現在真tsē人講山地sàn-tshiah，但是現在山地人ê生活比以前ê生活bueh好十倍。儘管咱已經比以前富有了，但是tī心理上咱煞認為家己是sàn-tshiah ê，這是因為互相比較tsiah會有tsit種ê心理。因為咱kap平地人比較，咱認為咱比in無錢，所以造成自卑ê心理。平地人蓋了水泥房，咱就感覺山地ê茅屋無好。但是你聽聽hiah-ê tuà-tī臺北水泥房裡面ê人講:「Ah!tsit-ê水泥房無好，太燒熱了！ 」因此in m̄-nā是用電扇，iáu用冷氣機iáu感覺無夠涼爽neh!如果咱bueh學習平地tsit種ê生活，咱就需要koh-khah tsē ê金錢。

但山地有真tsē ê樹木，所以氣候真涼快。為什麼咱又ài特別去蓋hit種水泥房neh？這是m̄是為tio̍h咱家己ê面子á蓋án-ne好ê厝?咱看tio̍h邊á ê人己經蓋了水泥房，á咱iáu無水泥房，所以就賣tsa-bó͘-kiáⁿ來蓋水泥房。因此tī山地內底咱看tio̍h有真tsē美麗ê厝，但是hit-ê代價是一個koh一個美麗ê小姐流落到都市裡面去。我常常感覺山地ê小姐bueh比平地ê小姐美麗多了，m̄-nā小姐，連男人也tio̍h比平地ê男人iân-tâu。Siōng大ê特點就是tī lín ê鼻á，鼻á高ê，tī日本人ê觀點是非常優秀ê，伊m̄-nā是美麗，mā表示聰明。

為什麼有人會認為山地tio̍h比平地落伍neh?因為山地人tuì古就一直teh lim酒，lim了以後就倒tī路邊。咱從來無好好á用過咱ê頭腦，若咱一直m̄用咱ê頭腦，tsit-ê頭腦就會一直退化落去。我tī中學時代常常歡喜phah網球，因此我ê正手bueh比倒手ióng，當你使用伊ê時tsūn就會生khah ióng。Lim酒hō͘山地人ê頭腦成做愚笨ê頭腦，為tio̍h lim酒mā用了真tsē ê金錢，因此無錢koh再hō͘ in ê眾細kiáⁿ教育。In一有錢就買酒來lim，一lim酒就顛顛倒倒。伊mā m̄知影字是怎樣寫ê，寫什麼款ê內容，就隨便the̍h家己ê印á蓋了，結果連伊家己ê gín-á、厝lóng賣出去了。因此就發生了真tsē ê問題。

但是我相信，咱ē-tàng藉tio̍h信仰來解決tsiah-ê問題。咱如果像亞伯拉罕仝款完全服從上帝，來遵守上帝ê命令，有tsit種信心，咱ê生活就得tio̍h上帝ê祝福，mā得tio̍h改善。但如果bueh以現在ê潮流大家kā家己ê tsa-bó͘-kiáⁿ賣出去ê話，山地ê男青年就tshuē bē-tio̍h家己ê太太，將來山地mā buē koh再有子孫留tī山地，án-ne山地就會消失了。聽講現在約有八萬名ê山地同胞tī都市內底，雖然tsiah-ê人是為tio̍h beh thàn錢tsiah到都市，但是我知影in所過ê生活lóng非常辛苦。真tsē人成立一個團體到都市包工從事建築，in做完了工，老板煞已經走了。像tsit種ê情形發生真tsē。

我相信上帝hō͘ lín ê山地，就是上帝賜hō͘ lín ê迦南地。Lín必須tio̍h真重視，好好á ê愛惜上帝所hō͘ lín ê山地。tio̍h知影tuà-tī臺北ê人只有hiah-ê真有錢ê人才ē-tàng kā in ê厝建tī山頂。有真tsē ê人無錢ē-tàng買厝，所以只ē-tàng suè厝，每一個月付房租只為tio̍h bueh tuà-tī臺北。但是lín每一個人lóng有家己ê厝，如果咱好好á發展上帝所hō͘咱ê知識， án-ne咱ē-tàng改進山地，以後有真tsē ê人ē-tàng tuà-tī山地。

比如來講，以前ê人in無知識使用肥料來務農，因tsit-ê田地ê收成bueh比一般人差一半。Tī tsia ê學生除了研究神學以外，mā學會曉了農業知識。如果咱ē-tàng kā tī tsia所學習ê知識運用到山地，我相信必定ē-tàng提高山地內底ê生活。咱知影梨山出產真tsē好ê果子，我相信tī臺灣ê山地有真tsē所在ē-tàng種án-ne好ê果子。我mā知影南投信義鄉有真tsē山地種高山菜蔬，然了後賣到臺北市。有人tī山地飼養山羊，in賣山羊ê奶，來改進健康。我iáu知影台東利稻hit-ê地區種了bē少高山菜蔬。總來講之，咱必須善用上帝所賜hō͘咱ê山地。咱mā beh為ē-tàng tuà-tī山地á感謝上帝!

願上帝koh-khah賜福每一位畢業生，好好á學習偉大ê山地人亞伯拉罕，有信心、有愛心ê為山地ê一切獻上心力!