《胡文池牧師kap布農族》

 | | | 轉寄

Uì「 山胞 」 ê名稱講起

作者 胡文池 2009.11.08

年歲超過古稀ê老僕人，bat tī山地傳教三十多年ê我，對山地同胞有深切ê關懷kap膚淺ê理解。因此我現在以基督徒ê良心，而且以平地人眼光來表示對山地人名稱ê看法。

一、「山地同胞」名稱ê由來
Hia-pai ê大漢民族，以中原為世界ê中心，自古以來歧視全部ê異族，泛稱in為「夷狄」，to̍h是蕃ê意思mā。自十七世紀開始，漢人漸多tuì中國大陸移民到地廣人稀ê台灣美麗島來。但是tī-tsia以前己有bē少ê「馬來民族」tī-tsia khiā起。In是tuì南洋一帶飄流來ê。其中分佈tī平地ê稱平埔族，分佈tī山地kap山麓地帶ê則稱高山族。當漢人達到台灣，看見真tsē ê原住民時，照樣叫in為「蕃á」。

日本人佔領台灣五十年期間，全部ê平埔族已被多數而且優勢ê漢人文化所同化，失去in家己ê語言及生活方式，分散tī台灣人中間。唯獨遠離平地ê高山族，因無容易同化iáu-koh保持in ê種語言及特殊ê生活。因為in勇猛不馴服，所以被日本人限制khiā起地，禁止自由來往，以特別ê「理蕃政策」管轄in，任其自生自滅。

國父孫中山先生是開明ê基督徒。伊根據聖經教示，提倡各民族平等，尊嚴ê民族主義。建設中華民國。主後一九四九年台灣光復了後就廢止歧視山胞ê不雅名稱，改稱in為「山地同胞」。了後來一般人簡稱in為山胞或山地人。多年來in對tsiah-ê名稱感覺滿意，無人提出異議。

二、「原住民」名稱ê由來
近年來由于教育普及，真tsē山地青年接受高等教育，甚至留學國外。Tsiah-ê知識青年tī平地看tio̍h同族受tio̍h歧視、欺騙、剝削或者傷害á感覺不平。因此勇敢出來主張in ê祖先就是昔日台灣ê主人，應該受tio̍h尊重，享有應得ê人權。自此以來咱就常tī報紙上看見「原住民」ê文字出現。

最近山地少女有kuá被騙或者被其父母出賣tī色情場所受摧殘，青年勞工被壓迫，山胞祖墳被鄉公所挖掘曝屍等不人道行為koh-khah激起山胞ê憤怒。因此in向政府抗議，並要求kā「山地人」tsit-ê名稱更改為「原住民」，以hō͘漢人記tiâu in是原來台灣ê主人，來達到提高人權ê目的。

三、siōng重要ê問題
我想，名稱改kap不改並m̄是重要ê問題。因為山地kap平地只不過是地勢ê高、低，是空間ê差別，只是地理上ê問題而已。原住民kap現tuà人mā不過是時間上ê前、後差別，是歷史上ê問題而已。想爭取人權。這是政治問題。政治是由人操作，好人辦好政治，pháiⁿ人施暴政。人民有權選出好ê公務員，罷免不正ê官員。

依照聖經ê教示，人性是軟弱、自私、有罪。世上「無義人，連一個mā無。」(羅馬冊三章10節)所以tī民主國家有政黨監督政府，提出好ê政策hō͘政府去做。因此咱tio̍h選出有能力，有正義感ê議員代表咱爭取人權。

上帝是聖，絕對公義，愛ê主宰。伊ê kiáⁿ兒耶穌基督降臨世界上，是beh拯救罪人。施行公義，照光tī烏暗ê人心。教會是基督ê身軀。社會ê良心。因此教會不但beh報傳救世福音hō͘罪人悔改去邪歸正，mā時常關懷困苦、受屈ê人。光復以來長老教會tī山地各村建設教會，救濟病苦，協助山胞解決真tsē問題。可惜教會只像施洗約翰曠野之聲而已，無政冶實權。

原住民絕多數已經信主。但是kap三十年前初代ê信徒比較，理tī in ê信仰熱誠卻衰退真tsē。所以我bueh奉勸每一個原住民:希望lín會koh-khah熱心事主，追求真理，奮發自強來享受屬靈喜樂。mài貪戀物質ê享樂，運背上主ê命令，像亞當夏娃仝款被逐出樂園。tio̍h團結為一體，看守上主所賜寶貴ê山地kap兒女。土地是食不完ê母乳，外出ê青年應該tio̍h回鄉開發山地來牧趕牛羊，種植果菜，或者發展工業等等，因為台灣將來ê土地是寸土寸金。Tī家己ê迦南地食土產贏過tī埃及平地受壓迫。

Tsa-bó͘-kiáⁿ是將來民族ê母親。Mā是上帝所愛ê寶貝，bē-tàng貪圖目tsiu前之物慾將in賣出換取房屋或家庭電器用品á獲罪tī天。若án-ne落去，將來誰來替lín傳宗接代。這是全族人ê問題， buē-sái hō͘個人去出賣民族ê寶貝。Lín tio̍h全族出來想辦法阻止罪惡ê發生。

酒會hō͘人敗壞肉體kap品性、智能，mā是山地人生存上ê毒品，應該tio̍h靠祈禱ê力量來禁絕，kā用于飲酒ê金錢kap時間來追求智識kap技能，保證lín會koh-khah進步、幸福。