《胡文池牧師kap布農族》

 | | | 轉寄

仙人樂園

作者 胡文池 2009.11.15

古時，中國大陸時常發生戰亂或賊馬搶劫，suah致使災民離散，一kuá有識人士就逃往深山密林，半耕半讀，享受安靜清幽ê生活。Tī tsiah-ê人中，有ê精通醫術，採藥煉丹，有tang時á落山行行，救濟病苦，生活有淡薄á為愜意。後代ê小說家將in理想化，稱in為「仙」或「仙人」，進一步竟將in戲劇化，描寫in有仙術，ē-tàng騰雲駕霧，並有hō͘人起死回生ê妙藥「仙丹」。其實「仙」字就是「山」kap「人」 合併而成ê字，mā就是山地人ê意思。

台灣光復時，布農族人口有一萬八千，khiā起tī玉山為中心ê四週森林地帶。

六十年前，布農族干卓萬支派頭目烏蘭(Ulan)iáu ē-tàng唸出in前十代祖先ê名字。可見布農族tī台灣ê歷史siōng少mā有一千年時間，當時人口稀少，平地廣大，in ê祖先為什麼選擇高山地帶定居，一定有相當ê理由。

聽講，in是因為洪水氾濫，tsiah往高山逃避á定居。但是，一般族人lóng講，tī山坡地掘土播種，m̄免彎腰過度suah致使腰酸背痛，所以歡喜khiā起山地，講來的確mā有理。

原住民身強體強、勇猛無比，單純、好酒，智識未開。雖然日本人bat tī各村設立教育所，可惜無正式教員，由警察兼任教導，教育khah馬虎，效果不彰。

光復前，族人ê生活非常簡單，全部uá靠上帝所造ê大自然免費供給。

居留ê土地是祖先傳落來ê m̄免納稅。

衫褲是獸皮或女人所編織ê粗麻布，既耐穿koh m̄免常洗。

食品是家己種植ê番麥、小米、地瓜，除非久旱，土地thang充分供hō͘糧食。

肉類是上帝所飼養ê樹林中ê野獸kap家畜。若獵到山鹿，m̄-nā有肉食，iáu thang高價出售鹿茸、鹿鞭。所得之款thang買烏布做裙kap其他雜品。

In無桌椅、衣櫃等家具。枕頭kap小椅是用木頭造ê。餐具只須各人一支木刻ê湯匙，m̄免碗。食飯時，大家kho͘-á蹲tī大鍋旁，每人用湯匙舀飯直接送入口。

睡床是自製ê大木板床。但因無棉被，寒天就蹲tī火堆周圍取暖。

Tsit種生活，樣樣lóng m̄免開錢，無像平地人，每工起床就beh為生活傷腦筋。In既無為職業煩惱，mā無為上班緊張，koh-khah m̄免辛苦地擠公車。生活悠哉快樂。

Tī山地無車禍，mā無空氣污染，koh-khah無噪音干擾安眠。日據時代，in tio̍h用ê鹽、煤油、少量粗布lóng是tī交換所以物易物交換á來ê。光復當時mā是the̍h蕃薯、鹿皮、薪木等山產來kap平地商人交換。

Tī in厝內，無金銀財寶等價值貴重ê物品，自然就無tsha̍t-á光顧，koh-khah無搶劫殺人ê事發生。因此原住民ê厝屋無裝鐵窗、鐵門，外出時mā無鎖門ê必要。

In無時鐘或手錶á，煞有眾人lóng看得tio̍h ê自然大時鐘－日頭。「日出而作，日入á息」，時間永恆，何必án-ne小氣kā一工分做二十四小時。只看日頭ê位，kā時間分做日出時，日向上(上午九點)，日頭siōng高上(中晝)，日向下(下晡三點)，日落山kap雞鳴時，án-ne就夠做出工作計劃。

In mā無日thiap-á，只有看月娘算日子，看天氣溫度來做事。
In ê音樂真有特色，像大山穩固，以do、mi、so三音同時發聲合唱，唱出ê kap音hō͘人沈重莊嚴ê感受。

日間有小鳥美妙ê歌唱，夜間有各種蟲類ê旋律大合唱，加上溪水，風吹ê伴奏，已夠hō͘原住民心曠神怡了。Tsit種安祥並有情趣ê生活，是無閒、奢華宴樂ê城市人所buē-sái享受tio̍h ê。 「一日無事小神仙」，何況每日、長年ē-tàng過得án-ne安寧平靜，悠閒自在ê山胞koh-khah thang稱做「仙人」了。

In視生活tī-tsia樂園為siōng好享受，希望子孫萬代久長tuà落去。但tsit工人統治ê中期，為tio̍h管轄ê方便，強制將in移到靠近平地ê山腳地帶來了。

搬徒以了後，因受瘧病之害，病痛死失齊到，koh受平地人剝削生活窮困，加上酗酒，無知一般ê生活koh-khah悲慘了。