《胡文池牧師kap布農族》

 | | | 轉寄

萬軍之主徵召兵(上)

作者 胡文池 2009.02.01


先父bat是淡水理學堂大書院ê神學生，因為伊bat參加抗日戰爭，日本兵beh掠伊，tuì án-ne離校成做天國逃兵。了後伊感覺對主有所虧欠，tsiah將我獻hō͘主．代替伊做天國兵。

我自認是一個基督小兵卒。父親mā是兵。父親ê父親仝款mā是兵。雖然兵種有別。役期無仝，職位却是仝款低。Tī象棋盤上，或tī戰場實地，兵卒是khiā-tī siōng前線：m̄驚燒熱、m̄驚冷、m̄驚任何生命危險，前進為天國交戰。我就是án-ne一生tī siōng前線服役ê天國小卒，像tī百夫長管理之下ê兵，順服命令，往各所在kap魔鬼交戰。(馬太福音八：9)我做兵這故事kap三代前ê祖先有什麼關聯neh?

一、阿公是勇敢ê抗日義勇兵
先阿公姓名胡丙丁，tuà板寮(現為中和市)。「丙丁」，聽來像凡夫俗子ê名字：koh如丙等丁級，lóng無價值感，事實並m̄是án-ne。伊是一位可恭可敬、勇敢ê民族英雄，伊有一段感動人ê故事。 阿公tī板寮庄腳開設獨一無二ê鐵店，phah製農具(鋤頭、柴刀)，家庭用器(菜刀、剪刀)，以及武館ê各種刀劍武器。因為這職業關係，阿公認bat士農工商各界人物，三教九流各層，加上雅量廣交，伊mā有bē少結拜兄弟。

伊m̄-nā有舉起鐵鎚phah鐵ê力量，mā有為正義，為國家民族無惜生命ê膽量。當一八九四年，日本侵華ê甲午戰爭結束，滿清政府割台灣hō͘日本。聽tio̍h tsit-ê消息，台灣各地出現了真tsē愛國人士，組織抗日義勇軍，抵抗日本軍入侵。

當時阿公愛國熱血澎湃，四界講服鄉民士紳，真緊to̍h招集一陣青年kap義兄弟，以及家己ê二個gín-á(其中一個就是先父)，帶tio̍h自製ê刀劍kap少數鎗枝，徹夜趕到澳底(現為福隆)，就是日軍登陸地點，想beh擊退敵人。

奈何這批義勇軍是臨時組成ê烏合之眾，無經過正規戰鬪訓練，那有能力phah敗戰爭專家而且有強烈軍火ê敵人?對陣無久就死傷慘重，不得不抱恨敗退了。不幸，阿公mā中彈倒地。二個gín-á看tio̍h tsit款情形無好，衝到父親身邊，beh救其父。無想tio̍h，阿公却大聲講：「Lín快走!Mài管我，lín若行uá來，你爸就用鎗phah死lín」。真正!伊舉起小鎗了。無thang奈何，二個gín-á只好流目屎啼哭無停，傷心地放棄親愛ê父親逃走了。

二、先父是天國逃兵
先父原名胡阿臀，因出生時身軀強壯，腳tshng特大á乎人án-ne命名。伊戰敗回鄉了後無久就信主，板寮ê傳道師看伊年青有為，就鼓勵伊到淡水理學堂大書院進修，以備當傳道師。

當時，日軍佔領台灣了後，到各所在搜捕抗日分子，先父認為故鄉非安居之地，不如逃往淡水英國人辦ê學校，可能khah安全，也thang成做傳道師，這求之不得ê好機會，何樂á無為。因此伊就換改名姓為姚清溪，真緊成做牛津堂ê大學生了。因為當時ê人稱tsit間首創ê洋式學堂為「大學」。

但是好景不常，日軍探知伊tī牛津堂，就來淡水學校捕掠伊。佳哉當時英國人有勢力，偕叡理牧師出面說明：「tsit個人是好人，名叫姚清溪，m̄是lín所beh掠ê胡阿臀。」日軍無話thang答，只好放伊行。

先父感覺淡水mā是危險地帶，即時離開學校，成做天國逃兵，無久了後tī新莊kap家母結婚，並靠tio̍h以前由偕牧師學習來ê醫藥常識，賣藥挽嘴齒度生。

Tī新莊，因為伊是抗日分子，因此m̄敢tī街頭店面公然開業，只ē-tàng tī隱密ê厝屋中為人看病，sing-lí清淡，生活不如意，但是日子一久，街上ê人lóng知影伊ē-tàng看病，稱伊為「清溪仙」，tī無西醫ê時代，mā有其地位。

我家後面有水溝，平時乾涸，風颱大水時tsiah有水流。先父tī頂面起一大片石板，作為避難所。伊siōng早數年間時時提高警覺，準備一看tio̍h日本兵入來beh掠伊時thang逃入這避難所躲閃。但是實際上，伊從來m̄-bat用過tsit-ê小避難所。