《胡文池牧師kap布農族》

 | | | 轉寄

萬軍之主徵召兵(下)

作者 胡文池 2009.02.08

三、天國徵兵，上帝呼召我

●文池非文海
由母腹出生時，我ê身軀瘦長，一看就知影tsit-ê gín-á m̄是強壯ê將才，mā m̄是肥胖ê經理型人物。Ē-sái講是「天下父母心」lóng是仝款，無父母無希望in ê子女成器ê。 家父想：「án-ne瘦弱ê gín-á，不可能tī『武』ê方面有所成就，只好希望伊tī『文』ê方面有點á出息。」因此就將我命名為「文池」，m̄敢奢望我成做「文洋」或「學海」。 我究竟會成做什麼款neh?當然上帝早有伊ê安排。

當我二歲時，患tio̍h肺部積膿症，生命十分危急。先父迫切祈禱，對主下願講：
「主阿!嬰兒若得tio̍h祢ê醫治，我願將伊奉獻hō͘祢，來償還家己逃兵ê罪債，阿們!」
果然，我由死裡逃生了。

●神學院ê異象
十二年了後，我teh要小學畢業。但時間沖淡了先父向主立誓ê記憶。實際上，當時家父因本業賣藥以外，koh開採煤礦失敗，家境十分困難，那內底有財力hō͘我讀中學，koh再進神學院neh?! 小學六年ê同學，家境比較寬裕ê，大家lóng tī無閒升學補習。Á我neh?升學ê事，我想mā m̄敢去想伊!

「人是辦未到ê，但tī上帝，萬事lóng可能。」(馬太福音十九：26)

十三歲時，我患tio̍h慢性大腸炎。六十年前，無抗生素、消炎劑等良藥時代，我雖然去過台北市各大病院kap私設中西名醫處求診，卻無收tio̍h效果。後來聖神指示我：ài到淡水身軀tsiah會好。所以小學畢業三年了後，tsiah以轉地療養兼升學ê理由要求家父hō͘我投考淡水中學。

伊因愛子心切，一嘴就答應了。我mā歡喜kah bē講得，即時開始惡性補習，準備應考，等待考試ê大日子。

入學考試hit一工早起，tī往淡水中學ê紅磚路上，無意中檢到了一張台北神學校(現為台灣神學院)相片。這張相片是新建tī双連ê二層紅磚建物，巍然宏大，上方兩pîng印有偕叡理博士kap吳威廉牧師ê遺照。我看了十分欣羨，夢想tio̍h：「假使我以後ē-tàng進入tsit間學校該有juā好ah!」

了後來tsiah明白，這是tuì天起來ê異象
這是上主為我安排，將來beh去ê學校。
(使徒行傅二十六：19)


●主為我開門
身軀已經康復了，一年ê功課mā讀完了。Ē-sái講是清寒ê家境無容允我繼續學業，這是我家己siōng明白ê事。
但是我對讀冊真有興趣，成績mā bē-bái，因此無願意半途á廢。全校同學期考完了以了後，每個人lóng收拾家己ê行李，歡歡喜喜地趕tńg去家己ê家鄉去了。只有我一個人，內心悶悶不樂，獨自在校園慢步，或tī樹蔭下胡思亂想，無願意kap大家同行，mā m̄知影如何是好?

忽然，聖經一句話，浮現在我腦海中。主耶穌m̄是明明白白對我講過mah：
「lín祈求，就得tio̍h；
Tshuē，就tshuē-tio̍h；
敲門，就hō͘ lín開門。
因為凡祈求ê，就得tio̍h；
Tshuē ê，就tshuē-tio̍h；
敲門ê，門就開了。」(馬太福音七：7-8)

我koh掀開聖經來看，一句lóng 無錯。
我就馬上向上主祈禱，熱切ê祈求。鼓起內心全部ê勇氣，身上一切ê膽量，快步直向偕叡廉校長ê厝，是我以前m̄-bat，mā m̄敢入去ê洋樓，照主ê話：
大膽地：却輕輕á，敲門!
Tsit時，厝內外真惦靜，顛倒是我ê心臟怦怦ê跳。我驚見校長，m̄是因為伊有英國紳士型ê嚴肅態度，卻是初次面對高高在上ê校長講話，難免產生「敬á遠之」ê心理。Koh驚萬一校長無tī-teh家，我就buē-sái向伊講苦、求援，那就慘loh。

經過幾分了後，門內kah-ná有腳步聲響起。門果然為我開了，出來ê m̄是傭人，卻是校長本人。伊面容慈祥，聲音溫柔ê問我：「你有什麼tāi-tsì mah?」

「將來我想beh為主工作。您kám-ē-tàng hō͘我做工讀生，hō͘我繼續學業。因為我ê家庭經濟實在困難：父母無法度koh再hō͘我錢讀冊。」我講完了話，m̄知影什麼原因，目屎一直流個無停。校長問我ê姓名kap年級了後，就tńg來到厝內，the̍h出一張一年級全部學生ê成績表出來，tī門外tshuē出我ê名字來。

校長講「你ê分數bē-bái，全班名列第二，真好。」停一下，伊koh再問：「你ê爸爸叫什麼名字?」

我ê爸爸叫姚清溪，我回答。

校長感覺驚奇，就講：「伊是m̄是真久tsìn前bat來過淡水理學堂讀神學?」

「無m̄-tio̍h。校長」我講。三十年前ê事。校長iáu ē-tàng記得清清楚楚，伊ê記憶力實在驚人!

校長繼續講:「你ê爸爸是以前阮爸爸ê學生，我會記得，我會記得。請伊明á載來，我bueh看看伊。你也thang安心，我會設法，hō͘你繼續讀下 去。」

果然學校hō͘我一份工作，而且學費kap伙食費全免，直到我完成中學課程。就是án-ne。全能、信實ê主，聽我ê祈福，hō͘一個貧童kap當 時富有ê子弟仝款ē-tàng讀完中學。你講奇妙不奇妙!

作者為最後一排中間無戴帽者，淡水中學畢業合影