《胡文池牧師kap布農族》

 | | | 轉寄

忠心ê老僕人─胡牧師夫婦

作者 林 秋 雄 2010.02.14

原載一九九五年四月三十日紐奧良台福基督教會獻堂感恩特刊
林 秋 雄

一九九一年胡文池牧師夫婦來美探親。預定目nih-á khiā起停留，無想tio̍h tsia空氣新鮮、安靜，一tuà就四年。這四年，卻大大改變了阮紐奧良台福教會。

胡牧師一生奉獻hō͘主，伊深入台灣siōng高ê山地傳福音，m̄驚食苦kap艱難。第一步得先bueh學習in(布農族)ê語言。伊所學習ê m̄是普通ê會話，卻是翻譯語文ê研究。因伊甘願立志奉獻為山地。就必需了解in ê文化背景、生活習慣，然後翻譯聖經kap聖詩，教in ē-tàng看ē-tàng唱、ē-tàng了解。Án-ne tsiah ē-tàng將福音傳hō͘ in，默默耕耘三十年ê歲月，將青春奉獻hō͘山地ê原住民，拯救了數不盡ê靈魂。神重用伊、使用伊，並且伊樂意跟tuè、忠心服事、盡心盡力，不驚惶山地ê艱難，有時行路、爬山路七天才ē-tàng達到目的地，koh-khah m̄驚山蛇kap蚊á，食ê是山薯kap煮不熟ê山豬肉，常常鬧腹肚，tuà ê是硬竹板，好佳哉伊lóng ē-tàng tuè遇á安，屬ê恩惠tī伊身上。

牧師娘mā仝款奉獻伊ê一生tī山地。孫雅各牧師娘創辦瑪利亞產院免費為原住民服務，伊被聘為產院院長兼助產士，十年中為原住民接生了五千guā位âng-eⁿ-á。因此聖經講:「傳福音報喜信，其腳蹤何其美。」in夫婦完完全全奉獻hō͘原住民。胡牧師看tio̍h有人重生受洗，就報喜信hō͘天頂ê主，牧師娘看tio̍h嬰孩出生就報喜信hō͘地上ê人。In ta̍k工喜樂，怪不得老僕人身軀健壯，如今八四歲耳目清醒，講道有序。真是感謝神。

八十歲來美國，認為ē-tàng真正退休，但是看tio̍h咱ê教會像tú斷奶ê嬰兒，如任伊自由生活，真怪可憐。Tuì án-ne常常關心照顧，為阮祈禱，無論tī查經、講壇，伊lóng m̄推辭，慢慢將伊扶養長大茁壯。阮教會幾年來lóng是借用美國教會ê一間幼稚級教室，當崇拜聚會場所。常常tī阮主日崇拜了後，英國教會就khà電話來埋怨，m̄是阮教室整理無好，就是教室紙屑一大堆，án-ne hit種。老牧師娘聽了心裡真甘苦，kā阮講:「如果自已有一間屬家己ê教會m̄知juā好!」tī伊ê祈禱裡常常為tsit件事關心，並且對主傾訴，tī祈禱會mā常常提出建堂ê事工。建堂ê tāi-tsì對阮來講是m̄敢想。但是老牧師講:「上帝是從來to無創造有，只要有信心，事就必成。」老牧師娘講:「咱牧會數十年，從來m̄-bat見過一間禮拜堂蓋不起來ê，憑信心去求去做上帝就會賜hō͘咱一間自已ê禮拜堂。」因此in he有信心ê意志力，不斷懇求ê心終其尾感動了神、感動了同工。有一工郭顯達兄kap胡牧師夫婦暗暗á推進tsit件艱難ê建堂事工，tuì án-ne同工會就成立了建堂委員會，積極tshuē合適ê教堂，最後神ê旨意，hō͘阮看tio̍h一間空房，四、000坪方，位置適當，對阮非常理想，以美金十萬元買下。雖然設計，估價一波三折，神一再歷練造就阮ài有信心，內部裝潢十五萬，設備三萬元，kap其他共計需花費美金三十萬之譜。Tsiah-ê數字m̄是阮能力kap原來計畫ê數字。數來數去lóng是差了一大筆。Ē-sái講是神ê恩典，超過阮所ē-tàng，老牧師kap牧師娘為tsit件事koh再祈禱，in tāi先奉獻。

並且有信心，向臺灣ê親人朋友khà電話，結果是超過伊所想像ê。建堂事工終其尾tī in kap郭顯達兄弟夫婦盡心盡力下並同工、兄姐努力奉獻下聽講無舉債，真是哈利路亞，感謝主。In來tsia本以退休念頭享年，無想tio̍h煞hō͘ in有tsiah-ê負擔。看tio̍h禮拜堂完成in心裡感謝、滿足，將榮耀歸hō͘主。In無參加獻堂感恩禮拜就回臺灣了，獻堂ê喜樂就留hō͘咱大家。In一生操勞為主忠心，真無愧為老僕人。