《胡文池牧師kap布農族》

 | | | 轉寄

難忘ê克難斗室-tī苑裡教會

作者 胡文池 2009.02.22

苑裡是我tī平地教會牧會四所ê第一站，mā是我受訓為天國兵丁ê第一課。Tī-tsia上帝hō͘我經驗非常簡單ê人生基本生活。

一、難忘ê大地震
一九三四年ê四月，我tú tuì神學院畢業，北部傳道局派遣我到猫 盂教會牧會，開始傳道生活。這猫盂教會就是苑裡教會ê前身，是一個農村教會。信徒三十guā戶，分散tī苑裡、猫盂、山腳。禮拜堂是以土塊建造，建坪三十guā坪，牧師館mā是以土塊蓋成，却是二層樓房。樓腳是客廳kap灶腳，樓頂是臥室kap書房。當時我iáu未結婚。

我到任無幾工，一個清早，天iáu未光，忽然發生大地動。我iáu teh享受安靜、溫暖ê春眠，忽然被房屋破裂ê響聲kap大地ê搖動驚醒。發覺是大地動，馬上衝出屋外，心臟怦怦大跳，佳哉無被lak落來ê瓦片擊傷。耳邊不時傳來附近村民喧嘩ê聲音。Hit工下晡就聽講相距未到數里ê墩á腳村，房屋全部倒塌。死者超過三百guā人。

二、難忘ê避難小屋
因牧師館成做危險tuà屋，我變成無家可歸ê人。了後十數天，只好寄居tī附近民家。地震了後無久，我就迎娶新娘來tsia非新娘房ê小斗室，mā kap別人仝款享受了甜蜜ê新婚生活。

有一工馬偕病院戴院長來到災區視察，tī苑裡現在禮拜堂建地為阮起了一個二坪大ê木板屋。雖然房屋無大，to̍h是像乞丐tuà土地公廟仝款感覺滿意。麻雀雖小，五臟俱全，小厝內有臥床兼坐椅，灶腳兼浴室，餐桌兼冊桌，簡單ê基本生活iáu thang維持。唯一ê缺點就是無廁所感覺無方便，每工ài借用別人家ê廁所實在pháiⁿ勢。到了五月梅雨連續無停，厝內潮濕，suah致使影響健康，不幸感染了瘧疾，時常發燒臥病tī牀，長日服藥tsiah痊癒。傳道局同情我ê處境，到了調動時期就轉派我到頭城教會。因此我只tī苑裡牧會一年就離開了。

三、教會換新地
因大地動，猫盂禮拜堂半倒buē-sái使用，經長執會議決，暫時借用苑裡幼稚園禮拜，並決定遷建新教堂到苑裡街。雖然禮拜堂因地動損壞，福音ê種子反tńg tī苑裡萌芽生長；並新蓋了koh-khah堅固ê磚造禮拜堂，直到現在iáu ē-tàng使用。塞翁失馬，焉知非福，凡事有上帝好ê安排。

感謝主!o-ló主!

十年了後我進入山地傳教，(山胞ê tuà屋雖然比苑裡ê斗室寬大，內面ê傢俱卻是仝款ê簡單)突然間我tsiah恍然大悟以前種種刻苦ê生活是神ê安排，好叫我ē-tàng適應將來ê山地貧苦生活。