《白話字文獻e5文明觀》

 | | | 轉寄

第三章 《台灣府城教會報中ê現代醫療衛生書寫》(十)

作者 陳慕真 2008.07.06

雖然當時病院lāi-té開始推sak看護婦ê教學kap訓練，總是，早期台灣人對看護婦ê認知，kā歸類tī比較khah低下階層ê工作，認為tsit ê職業是teh做人ê奴僕。因為án-ne，教會報開始陸續報導「看護婦」kap「助產婦」ê消息，宣揚看護婦ê利益，以及tī台灣建立「看護學」ê必要。1918年2月教會報刊出＜看護婦＞，tsit篇文章先以字面意思解說「看護婦」ê意義是「好人著照顧病人，勇健ê人著保護有病ê人」，所以是有意義koh利益人ê工作。koh以英國出名ê看護婦「Nai-ting-kik-ní」 作例，鼓勵人做看護婦：

Tī英國五十外年前，有一個出名ê看護婦，名叫「Nai-ting-kik-ní」姑娘。英國政府tuì-tiōng伊ê工，送伊五十萬kho͘。伊用tsit tsân錢來設立看護婦ê學校。到今á日tī西國做看護婦ê人，khah tsē是有學問、聰明ê人。皇帝以及國王ê親人亦bat做看護婦。

這篇文章一方面hō͘讀者了解西方看護婦「Nai-ting-kik-ní」ê故事，一方面亦強調看護婦職業ê尊貴。Suà--落-來，ti71918年6、7、8月刊載ê＜王ê看護婦＞是連載性質ê短篇故事，作者「文姑娘」描述英國看護婦kap tsit ê細漢tsa-po͘ gin-na患者ê故事，kuí篇故事以「你是王所奉差來ê看護婦」做為中心，表達看護婦ê職業是受著王（神）所歡喜、祝福 ê涵義。Tsiah ê文章一方面宣傳看護婦職業ê利益、高尚，phah破傳統社會認知ni̍h對看護婦ê既定看法，進一步鼓舞婦女擔任看護婦。
Tī「助產學」方面，台南新樓醫院mā開設「產婆講習所」，tī每年三月kap九月募集產婆講習生。有關「新樓醫院附屬產婆講習所」ê消息亦不時tī教會報ê廣告頁中刊載宣傳。當時ê台灣，婦女因為生產ê艱苦，民間時常有請佛、叫司公作sai ê情形。另外，台灣嬰á ê出生死亡率亦真kôan，所以教會報tiāⁿ-tiāⁿ鼓勵婦女來讀，成作婦人對家庭衛生ê認bat。另外，新樓醫院針對生活艱苦ê婦女來醫院生產，不論是平常ê生產á-sī難產，醫院lóng做免費ê施療、助產， 對貧困ê產婦來講，是tsiâⁿ大ê幫贊。綜合頂面所討論ê，「看護婦」ê訓練kap「產婆講習所」ê醫學教育，一方面訓練出初代ê女性醫療人員，一方面亦將護理、助產ê知識帶入民間，對早期台灣女性接觸西式醫療有tsiâⁿ大ê影響，ē-sái講是台灣護理教育ê開始。
除了具體ê「看護學」kap「產婦講習所」之外，bē-sái忽略ê是，早期有kuí位女性宣教士對台灣婦女ê醫療、助產亦產生真大ê影響kap貢獻。親像「朱約安」（Miss Juan Stuart）kap「文安」姑娘（Miss Annie E. Butler）是長榮女學校ê教育者，真重視本島女子ê教育，in看出「本島婦人生產真艱苦，koh畏tsa-p醫生，甘願死，m̄肯hō͘人táⁿ-tiap」ê情形，所以決心從事助產ê工作，對當時地方難產ê婦女形成真大ê幫贊，ē-sái講是台灣初代ê產婆。 Koh像講「台灣初代女醫」ê「宋牧師娘」 ，伊用婦產科kap小兒科方面ê專業，幫助過tsē tsē台灣ê婦女，因為當時「台灣ê婦人m̄-ài tsiū近男子醫生，有女醫對女性來講是真好親近」。 另外，宋牧師娘mā bat出外行醫、佈道，伊koh將行醫ê經過用白話字書寫tī教會報kap讀者分享。 當時不論tī市鎮á-sī鄉村，伊lóng積極推展婦女醫療ê工作，hō͘人稱做「婦女界ê救星」。 1899年，台南新樓醫院建築完成，宋牧師娘有phah算tī舊底ê「舊樓醫院」創辦「女醫院」ê計畫，亦已經得著英國母會ê支持。可惜伊tī 1901年過身，原本台灣第一間由女醫生主持ê女子病院，suah無機會thang完成。