《白話字文獻e5文明觀》

 | | | 轉寄

第三章 《台灣府城教會報中ê現代醫療衛生書寫》(十一)

作者 陳慕真 2008.07.13

第三節 衛生知識ê傳播 台灣醫療現代化ê初期，雖然有西式醫院ê設置，以及醫學／護理教育ê建立。總是，一般民間beh接觸現代醫療、衛生知識ê資訊並無普遍，加上台灣因為特殊ê氣候、地理環境，產生真tsē熱帶性ê病症，雖然造成台灣人身體ê艱苦，m̄-koh大多數ê民眾真tsió有了解醫療訊息ê機會。《台灣府城教會報》為著增加信徒／讀者ê醫學常識kap衛生觀念，開始tī報紙刊載tsē tsē有關病症、衛生ê文章，因為是使用白話字來書寫、報導，所以一般ê信徒kap讀者ē-tàng藉著閱讀報紙，直接來jīn-bat tsiah-ê知識，教會報亦成做早期台灣人吸收衛生知識ê重要管道。教會報lāi-té有關現代衛生知識報導ê主要文章，整理tī下面ê表3-1-1，下面tō針對報導文章ê內容來進行討論。

表3-1-1 《台灣府城教會報》中有關「衛生知識」文章一覽表（1885-1942） 卷數 出版年月 篇名（白話字原文） 漢羅台文 作者 頁數 134 1896.5 Lūn Thái-ko 論Thái-ko 無具名 40 147 1897.6 Lūn un-i̍k ê sū 論瘟疫ê事 Ko Thian-sù （高天賜） 46-47 211 1902.10 Báng-á to̍k ê pēⁿ 蚊子毒ê病 無具名 75 216 1903.3 Niáu-tshú-pēⁿ 老鼠病 H.Tsiu 21 219 1903.6 Siáu-káu 痟狗（病） Tsiu Iāu-tshái 47-48 232 1904.7 Un-i̍k ê tsai-ē 瘟疫ê災厄 無具名 7 305 1910.8 Kuâⁿ-jia̍t Lūn 寒熱論 馬醫生 65-66 306 1910.9 Kuâⁿ-jia̍t Lūn 寒熱論 馬醫生 72-73 307 1910.10 Kuâⁿ-jia̍t Lūn 寒熱論 馬醫生 80-82 309 1910.12 Tî-hông Lô-siang-pēⁿ ê huat 治防痨傷病ê法 馬醫生 97 356 1914.11 Su-bûn kap Uē-sing 斯文kap衛生 Keh Tsuí-lîng （郭水龍） 8-9 402 1918.9 Hō͘-sîn ē hō͘ lâng sí 胡繩會h³人死 Tân Sù-ta̍t 6-8 403 1918.10 Uē-sing kap Tshù 衛生kap厝 Lô Khiân-ik （羅虔益） 7 413 1919.8 Ti̍k-tsíng Tsing-sîn-pēⁿ Tçk-tséng精神病 N̂g Sìn-kok （黃信國） 3-4 493 1926.4 Thái-ko Kiù-tī-huē Thái-ko救治會 Tè Jîn-siū （戴仁壽） 11-12 498 1926.9 Lūn Thái-ko ê Thuân-jiám-sìng 論Thái-ko ê傳染性 Gô͘ A-gik （吳阿玉） 4 598 1935.1 Kiat-hu̍t-pēⁿ 結核病 Tân Khiu-suí 11-12 600 1935.3 Kiat-hu̍t-pēⁿ 結核病 Tân Khiu-suí 9-11 601 1935.4 Kiat-hu̍t-pēⁿ 結核病 Tân Khiu-suí 6-7 602 1935.5 Kiat-hu̍t-pēⁿ 結核病 Tân Khiu-suí 8-9 603 1935.6 Kiat-hu̍t-pēⁿ 結核病 Tân Khiu-suí 5-6 604 1935.7 Kiat-hu̍t-pēⁿ 結核病 Tân Khiu-suí- 11-12 605 1935.8 Kiat-hu̍t-pēⁿ 結核病 Tân Khiu-suí 8-9 606 1935.9 Kiat-hu̍t-pēⁿ 結核病 Tân Khiu-suí 9-10 641 1938.8 Tsuâ-siong tī-liâu-huat 蛇傷治療法 Tân Ting-jiân講，柯設偕記 30 643 1938.10 Tsuâ-siong tī-liâu-huat Pó͘-uî 蛇傷治療法補遺 Tân Ting-jiân講，柯設偕記 25 資料來源：《台灣府城教會報》，1885-1942。

Uì教會報中有關衛生知識ê報導來看，以「病症性質」ê文章佔siōng大多數。包括：「Thái-ko病」、「瘟疫」、「蚊子毒ê病」（指「to̍k-lia̍t-pēⁿ」：「毒熱病」）、「老鼠病」、「寒熱症」（指「瘧疾」）、「結核病」、「痨傷病」kap「蛇傷」，可見tsiah-ê病症是當時台灣普遍流行ê症頭。另外亦有針對「衛生」所談論ê文章，分別是「斯文kap衛生」、「衛生kap厝」兩篇。文章ê作者有醫生，亦有一般信徒，或者是教會報ê主筆所寫。Tsiah-ê文章內容豐富多元，有ê針對病症ê症頭、傳染性kap預防方法來書寫，有ê亦談論著衛生環境、生活習慣，或者是延伸到基督教義等內容。總是，主要lóng透過文章teh表達醫學觀念kap衛生知識。

先看1897年6月ê＜論瘟疫ê事＞tsit篇，作者高天賜講著當時ê台灣有瘟疫，若beh避免瘟疫，有五點防治ê方法。分別是「著清氣siúⁿ、著用改毒ê藥、著食飽、穿燒，做工m̄-thang過頭，睏m̄-thang無足眠、若瘟疫傷重，著走去無瘟疫ê所在、祈禱。」其中，作者用真tsē篇幅teh講ài án-tsuáⁿ「清氣siúⁿ」，實踐ê方法是án-ne：

Ta̍k日殷勤piàⁿ掃，khah m̄-bat用ê物著常常the̍h出來曝日，門腳、眠床、椅桌著常常jiû-洗，灶腳著常常piàⁿ，m̄-thang柴á-是蔗-pho,tiāⁿ-tiāⁿ hē tsi̍t-位，lóng無搬suá。身軀著常常洗，m̄-thang十外日tsiah洗一kái。煮食ê人著責督,m̄-thang菜蔬無清氣就落去煮。桌布汁m̄-thang滴落去ue-á，tshit-碗ê桌布著不止清氣。厝內若無通風，著請土水師父來隔開kuí nā ê窗-á，tsiah會通氣；若厝siûⁿ濕，lâ-sâm有毒氣，著税別間，雖罔khah加錢，亦著hō͘伊。

Uì頂面ê描述，雖然是teh教人tī生活中清氣ê方法，tī現在看起來已經是一般ê常識。總是，咱亦ē-sái uì tsia看著早期台灣人khiā-家ê環境、生活ê慣-sì，kap常民ê生活樣態。另外，作者亦講著瘟疫tsit種病ê來源是「有一種毒蟲，ba̍k-tsiu看buē著，著用hián-bî-kiàⁿ tsiah有看見。蟲若是入人身軀，人liâm-pīⁿ發熱、發liap—á，無juā久就死。」ē-tàng解決這種病ê藥是「Kuí-nā（奎寧）」，使用ê方法有真tsē種，而且lóng真有效果，因為「若用這號藥hiú tī土腳，就厝內khah無毒。若用這號藥洗身軀，就身軀無毒；若用這號藥洗衫，就衫無毒；若用這號藥piàⁿ tī窗-á-內就窗-á-內無毒。」kuí篇文章用真口白ê語氣來論說瘟疫ê症狀、預防方法kap藥品ê使用，hō͘人真緊tō對瘟疫tsit款病產生了解。