《白話字文獻e5文明觀》

 | | | 轉寄

第四章《台灣府城教會報》中新知識ê吸收(四)

作者 陳慕真 2008.08.24

第四節 台灣ê生活知識 教會報對新知識ê吸收，m̄-nā注重世界性ê報導，mā對台灣當地ê生活知識有真tsē詳細ê紹介。其中siöng主要ê tō是＜台島ê消息＞這ê專欄。＜台島ê消息＞uì 1908年5月（278卷）到1917年2月（383卷）為止，總共維持將近十冬ê時間，是一ê真固定性iû-koh久長 ê專欄。Tī 1908年2月到5月期間，教會報tö有＜消息＞這ê中篇ê專欄，kap後來＜台島ê消息＞ê類型真kāng款，所以，＜消息＞ē-tàng講tō是＜台島ê消息＞ê前身。

Tsit ê專欄每一期lóng分做kuí nā ê主題，每一ê主題lóng是短篇ê報導。內容包括全台各地ê消息，uì國家大事到細項消息lóng有記載。其中，有社會新聞，親像「風災水災」ê報導、koh有「冒名詐欺」 ê社會事件。Mā有產業報導，親像「蠶葉會社」、「栽培棉花」kap「鑄造會社」。有醫療報導，像講「驅除鼠疫」、「預防腸病」。koh有各種新ê政策通知，像「舊曆換新曆」kap「郵便規則」。另外，mā有公共領域ê統計，親像「全島的街庄」、「公共洗浴場」、「立像的記錄」kap「廟宇統計」。亦有交通ê消息報導，像講「火車路的經營」、「火車落價」、「阿猴九曲堂通車」，報導ê消息ē-sái真多元。

文章ê類型算是紹介性質ê報導，通常lóng會tī文字簡介以後，koh附上數據ê統計，亦有用附上圖表ê方式，表示比較kap對照。Tsiah ê文章將台灣ê各種消息做真清楚koh具體ê統計，資料來源大部分是當時ê日本官廳。總是，透過教會報將tsit寡公共事務的消息、民生性質的介紹刊載出來，mā有幫助讀者將知識應用tī生活中ê功能。

另外，uì 1941年4月（673卷）到1941年10月（679卷）ê連載文章＜小宇宙＞，mā是教會報ê專欄。＜小宇宙＞ê內容主要亦以台灣為主，主題khah屬於基督信仰，除了刊載台灣ê生活消息以外，亦時常將生活結合信仰來報導。換話來講，是一種生活性ê信仰短篇專欄。下面舉2 ê例來看māi：

Hō-sing-síng，最近beh設tī人口局來造就人口ê強化。所以若30歲以下ê男子，25歲以下ê女子，若無錢thang結婚，beh借in結婚費，tsi̍t口對5百kho͘到1千kh為止。十年分la̍p，hit ê中間若有khioh囝仔，tsi̍t ê囝仔會thang著減四分之一ê in-tián，an-ni十年ê中間若有生4 ê 囝仔，就hit千kh m̄-bián還。這實在是獨身者ê福音。

Tī苑裡庄，有掘著tsi̍t條大條番薯，長五呎三吋，大2呎1：這kiám-tshái是世界一ê亦無的確，顯明造物主特別祝福咱台灣。Tī咱教會中kiám bē thang掘著信仰ê大條番薯mah？

以上這篇短文將台灣實際發生「掘著tsi̍t條大條番薯」ê新聞，來引起教會中mā-thang掘著「信仰ê大條番薯」ê思考，是將真實生活kap信仰結合ê例。

以教會ê觀點來講，因為宗教信仰是生活的（tik) ê，m̄是死硬的，生活tō是信仰ê實踐，信仰ê見證。所以教會報m̄-nā報導教會消息，亦有真tsē生活層面、知識層面ê文章。雖然tsiah-ê 文章mä隱含宣傳基督教義ê理念，m̄-koh宗教ê色彩khah無hiah重，除了教會ê會友之外，mā真適合一般非教徒ê讀者來閱讀、吸收。

除了專欄性ê報導之外，mā有其他單篇ê文章teh紹介台灣ê生活知識。親像1914年8月ê＜振替郵便＞（353卷），1928年1月ê＜性命保險＞（514卷）ê文章，lóng有將「保險」、「郵便」ê新知識，傳達hō͘讀者，實際應用tī生活ê功能。

＜性命保險＞一文，主要ê內容teh教人án-tsuáⁿ保險，koh說明保險費ê金額kap理賠ê情形。照作者所講，當時保險是中流以上ê人khah有加入，後來政府設立簡易保險，hō͘本島人亦ē-tàng加入。作者mā將每年la̍p luā tsē錢，死ê時tsūn ē-tàng領luā tsē錢ê對照數目，製作一張詳細ê圖表，khǹg tī文章後壁，成做讀者ê參考。除了將「保險」這ê新觀念紹介hō͘讀者以外，最後mā鼓勵讀者加入保險。

另外，＜振替郵便＞這篇文章，內容是紹介「振替郵便」tsit款新ê匯銀辦法，ē-sái取代去郵便局買匯單ê傳統方式。作者除了詳細紹介振替郵便ê使用辦法，mā kā讀者宣傳，為著hō͘ tak-kē方便，新樓冊房亦有設立振替郵便，所以鼓舞讀者買冊ê時tsūn，ē-sái將「郵便」寄來冊房。除了冊房，koh thang用tī其他用途：

人用tsit ê法度寄銀˜是kan-ta冊房ê錢thang寄--來；就不論sím-mi̍h錢，或是慈善會，á-是中會，á-是學堂學生ê所費lóng thang用tsit ê振替郵便寄--來；總是tī hit張單ni̍h著寫明是beh做sím-mi̍h路用。

透過文章ê紹介，hōi讀者知iáⁿ tsit種新款ê匯錢方式，不管以後是beh買冊、匯生活費hoi囝仔，或者是送禮、奉獻，lóng ē-sái用tsit款「振替郵便」來處理，是增加生活方便性siōng實際ê生活知識。

小結 綜合來講，教會報透過趣味性ê筆法、生活性ê譬喻，或者是圖片、表格kap「有奬徵答」、「問答設計」各種方式，將tsiah-ê知識做真簡單好bat、iû-koh詳細、深入ê紹介，這mā是將新知識uì引進到吸收、呈現koh在地化ê過程。教會報對新知識ê吸收kap傳播，m̄-nā突破地域ê限制，h³讀者ë-tàng藉著閱讀來擴大心胸，了解所m̄知ê tāi-tsì。Mā tī精神性ê層次頂面，滿足人追求新知ê本能，形成知識ê擴大。另外，tng當讀者透過白話字teh吸收tsiah ê自然科技、社會人文、世界新知，等等新知識ê時tsūn，m̄-nā增加個人ê知識kap見聞，mā tāu-tāu-á開展著台灣ê新視野。

Uì十九世紀末期開始，教會報tō透過白話字將世界性ê新知識，包括自然科技、社會人文、世界新知kap生活知識，等等豐富ê知識內容刊載tī教會報ni̍h，透過教會報對新知識ê呈現、吸收，m̄-nā證明白話字具備吸收現代知識ê特質，koh證明白話字tī清國、日本時代，扮演著tī民間傳播知識ê先驅性角色。T„清國時期，台灣人無接受新知識ê機會kap管道，kan-nā教會報將tsit寡知識透過白話字刊載出來。因為主要對象是一般ê信徒或者是普通ê tsò-sit-人，m̄是作官ê文人，所以白話字ê特質tú好ē-tàng符合一般信徒kap讀者對現代知識ê需求kap ǹg望，透過白話字對新知識ê吸收mā成做in建立基礎知識ê來源。到日本時代，雖然開始施行學校教育，總是，教會報中「百科全書式」ê知識分科，kap日本時代教育體制內教科書中「分科」ê觀念是käng款ê。換一句話講，教會報透過白話字所傳達ê知識觀念，kap學校教育ê方式mā是teh同步進行。另外一方面，tuè著無進入正式ê學校教育體制ê台灣人來講，教會報成做in吸收新知識的媒介，tī民間社會mā扮演著真重要ê功能。