《白話字文獻e5文明觀》

 | | | 轉寄

第五章《台灣府城教會報》中ê語文教育書寫(一)

作者 陳慕真 2008.08.31

「白話字」tī十九世紀由英國長老教會傳教士引進入台灣，長老教會透過翻譯聖經、編輯字典、印刷出版品，以及《台灣府城教會報》ê發行等文字事工頂面，積極推sak白話字。目的是beh tī當時漢字bat字率真kē，kan-nā少數人有機會接受漢字教育，致使大多數人民是文盲ê台灣社會中，hō͘信徒藉著認bat白話字ē-tàng家己來閱讀聖經，親近道理。《台灣府城教會報》m̄-nā推行白話字教育，koh透過白話字來紹介漢字kap外國語文，形成全方位ê語文教育。另外，除了教會報之外，uì十九世紀末期開始，由長老教會所設立ê教會小學、中學、女學、大學， 以及為著「晴瞑人」所設立ê盲人學校，tsiah ê新式ê教育體制ē-tàng講是台灣近代教育ê先驅，tī tsit寡學校ê課程設計內底，白話字ê文字教育mā是真重要ê部分。因為長老教會kap《台灣府城教會報》全面推sak白話字教育ê結果，tāu-tāu-á形成共同以閱讀白話字、書寫白話字，以白話字作為吸收外界資訊ê台灣白話字社群。教會報ê白話字教育mā發展成做白話字文學成熟ê重要基礎，白話字文學ê產生亦tī台灣文學史上扮演重要ê角色。本章以《台灣府城教會報》中ê語文教育書寫為分析對象，探討白話字ê傳入背景，以及白話字ê語文教育kap白話字文學ê展開，koh藉著田野訪談ê紀錄來探討台灣ê白話字社群，進一步分析《台灣府城教會報》ê語文教育書寫呈現ê文明觀點。

第一節 台語白話字ê傳入kap教育 一、台語白話字ê傳入背景 十九世紀ê 1865年，英國長老教會ê醫療傳教士馬雅各醫生（Dr.James Laidlaw Maxwell,1836-1921）來到台灣，成做基督長老教會tī台灣設教、生湠ê開始，這mā是十七世紀以後，羅馬字koh再出現tī台灣ê開始。十七世紀，羅馬字是荷蘭傳教士用來傳福音hō͘平埔族Siraya族，ē-tàng書寫平埔族語言ê文字系統，相對來講，十九世紀ê教會羅馬字是由英國傳教士引進到台灣，ē-tàng書寫台灣ê原住民語、客語kap台語ê書寫系統，亦號做「白話字」。有關白話字ê起源，ē-tàng追溯到1817年麥都思（Walter Henry Medhurst）tī馬來西亞ê麻六甲（Malacca）kap新加坡從事傳教活動ê時，因為接觸著講閩南語ê華人，為著beh協助當時大多數是文盲ê信徒bat字，所以將閩南語羅馬字拼音成做文字化，tī 1820年出刊一本「白話字小字彙」。 後來ti71837年，麥都思tī澳門koh出版「福建方言字典」（A Dictionary of the Hok-keen Dialect of the Tsinese Language)，這本字典主要參考馬禮遜所寫ê官話字典以及＜十五音＞、＜康熙字典＞編成， ē-tàng講是歐洲人研究福建語言ê開路先鋒，mā是siōng早用羅馬拼音表記閩南語ê字典。

白話字傳入台灣ê歷史ē-tàng推sak到英國長老教會tī中國廈門ê傳教經驗，西方ê傳教士uì 1842年開始進入中國傳教，為著hō͘信徒ē-tàng家己讀聖經來直接認bat基督教，進一步普及教義，起頭in先將聖經以漢字翻譯做當地ê方言，m̄-koh suah tú著真大ê困難。無法度普及ê主要原因是：（1）有ê方言有音無字，無法度用漢字來表達，翻譯真困難。（2）tō準講有字thang寫出來，m̄-koh當時人民bat漢字ê能力真kë，所以猶原無法度hō͘基督教普及到大多數ê人民。 傳教士發覺著若用羅馬拼音，人民只要kuí禮拜ê時間tō學ē-hiáu，所以uì 1850年開始正式推行廈門話教會羅馬字，koh號做「閩南白話字」或者「話音字」。 傳教士除了用閩南白話字來翻譯聖經以外，mā出版白話字ê閩南語辭典kap工具書，親像1852年打馬字（John van Nest Talmage）ê《Tng uē huan jī tsh-ha̍k》（唐話翻字初學）kap1894年出版ê《廈門音ê字典》，koh有1853年羅帝（Elihu Doty) ê《廈門話課本》kap杜嘉徳（Carstairs Doglas )1873年ê《廈英大辭典》等等，對閩南白話字ê推展帶來tsiâⁿ大ê影響。另外，tī廈門出版ê白話字刊物mā真豐富，除了宗教類ê聖經、聖詩，koh有詩歌、益智ê小說、天文、地理、動物、植物、筆算、代數，以及幫贊人讀漢文ê「字類入門」、「四書譯介」、「三字經譯介」等等，有tsiâⁿ百款ê白話字冊。 因為閩南白話字tī廈門ê推sak造成真好ê效果，所以廈門成做當時使用白話字ê中心，亦真緊tō傳播到各所在，uì廈門到閩南各地，uì福建傳到台灣，mā uì中國傳播到東南亞。 Tng當1865年英國長老教會來到台灣傳教ê時，因為台灣當地ê需要，以及傳教士tī廈門ê白話字經驗，所以將白話字帶入來台灣。

二、《台灣府城教會報》ê白話字教育 Tī台灣，長老教會自1870年代tō開始推行白話字，馬雅各醫生kap醫生娘tī 1870年開始tī「木柵」（tsit-má高雄縣內門鄉）教白話字，開設白話字班，koh開始進行翻譯台語白話字新約聖經ê khang-khuè，初期ê白話字教育亦有真好ê成果。總是，教會開始全面推行白話字運動，ài到巴克禮牧師創刊《台灣府城教會報》以後，tsiah透過正式ê印刷、發行來推sak白話字。《台灣府城教會報》mä成做教會推行白話字教育ê重要媒介。

Uì教會報創刊號第一張開始，巴克禮牧師tō提出推行白話字ê論述：（1）目的是beh hō͘信徒m̄-bián uá靠牧師，ē-hiáu家己讀聖經，認bat道理，看所印ê冊。（2）可惜漢字真oh，tsió-tsió人看ē-hiáu，所以有設白話字，hō͘眾人看khah快bat。（3）›g望眾人出力學白話字，m̄-thang看輕伊，講是囝仔所讀ê。（4）白話字kap孔子字lon2g有路用，m̄-koh白話字讀khah快khah明，所以著代先讀，tsiah讀孔子字。（5）鼓舞男女老幼，bat字ê m̄ bat字ê lóng著緊來學。 以上巴克禮tī第一張ê創刊詞，提出對白話字kap漢字ê看法，以及希望白話字普羅大眾化ê主張，mā成做後來教會報推行白話字教育ê主要論述。教會報第一張ê創刊號除了巴克禮牧師ê創刊詞直接鼓舞白話字ê學習之外，koh刊載廈門ê牧師舉辦ê徵文比賽＜白話字ê利益＞第一名葉漢章ê文章。後來tī第七張（1886年1月）koh suah刊第二名劉茂清ê文章。根據主編所講，刊載tsit二篇徵文比賽ê文章是為著「hō͘ ta̍k人欣慕讀白話字」。由此看見，徵文比賽ê舉辦、獎賞kap刊載m̄-nā有鼓勵大家手寫白話字ê目的，mā有鼓舞大家讀白話字、學白話字ê用意。

Tī徵文比賽得著第一名ê葉漢章，tī＜白話字ê利益＞一文中主要針對漢字kap白話字ê差異來做比較。伊ê論點主要ē-sái歸納做下面四點：（1）白話字比孔子字khah好學、好讀。白話字只用23個字母kap 8個聲調tō ē-tàng寫出所有ê意思，孔子字put-tsí tsē，樣式put-tsí oh。（2）孔子字oh寫，淺學ê人bē-hiáu寫khah深ê字，亦lóng bē-hiáu寫phue。白話字容易寫，學一個月或者kuí個月，不論ta-po͘人、婦仁人kap囝仔lóng ē-hiáu寫phue。（3）孔子字意思無明確，解釋mā bē一定，白話字ta̍k句分明bē錯誤。（4）孔子字有真tsē無字thang寫，有時著借用別字來代替，白話字ta̍k字lóng有字thang寫。 Uì頂面ê論述 thang知，葉漢章ê文章是以文字本身ê結構kap書寫效率、學習效果來分析兩款文字，khiā tī khah實用性、效率性ê角度teh提倡白話字。

劉茂清ê文章進一步以社會性ê觀點分析白話字所產生ê利益。所提出ê觀點包括：（1）白話字會幫贊教會興旺。（2）白話字會hō͘女人有智慧，「婦仁人ê才調無khah輸ta-po͘人，所以無學問，因為孔子字oh讀」。 （3）白話字會hō͘ ta̍k項做工ê人ē-hiáu讀聖經，kap知tsē tsē項e tāi-tsì。（4）白話字會hō͘人加添知識，mā khah快bat孔子字。（5）白話字會hō͘ sàn-hiong-人ê子弟有智慧，「sàn-hiong-人ê子弟才情無lóng khah 輸好額人ê子弟，可惜in細漢無機會讀冊，所以m̄-bat字」。 劉茂清提出ê是白話字ê普羅大眾性，所服務ê對象無分階級、性別，雖然是無社會資源、地位ê普羅百姓lóng thang透過白話字得著吸收知識，重新自我發展ê工具。1886年，劉茂清tō khiā tī弱勢者ê發言位置，分析女性、做工ê人、sàn-hiong人無機會接受（漢字）教育背後ê社會背景，以及文字背後ê社會意義，tsit款充滿著階級平等ê人權觀念，tī百外冬後ê現今看起來，猶原是真進步ê觀點。另外，劉茂清ê tsit篇文章t„台灣文學史上亦有真特別ê意義，呂興昌教授bat指出「這是文獻記載台灣人有史以來第一篇用白話字寫出ê完整作品，意義至為重大。」

葉漢章kap劉茂清ê文章lóng真具體指出白話字ê特色kap學習白話字ê利益。整體來講，這兩篇徵文比賽ê作品以及教會報推行白話字ê文章主要ē-sái分做「白話字ê文字特色」、「學白話字ê附加價值」kap「白話字教學法」tse三 ê方向。
（一）白話字ê文字特色 相對漢字（孔子字）來講，白話字會好學、好讀ê原因，根據蔣為文ê分析，因為白話字屬於音素（phoneme）文字，具備語言學頂面「語音hām符號一對一對應」kap「線性排列」ê設計方式，所以真簡單學、記音koh準確。 雖然白話字kan-nā利用23個字母kap 8個聲調來組成，m̄-koh因為簡單好學，所以學習效率比漢字加真kuân。親像1920年刊載tī教會報ê＜白話字土想＞一文，tō透過趣味性ê第一人稱筆法，來比較白話字kap漢字ê效率性：

我出世tī台灣已經50外年；人phah算老-lah，其實iáu-buē。漢文兄in有數萬個兄弟，m-值阮數十個。人學漢文一年久，m-值來tshöe我四五日。有人無讀漢文一年，á半月日：新舊約ē-hiáu讀，詩ē-hiáu吟，phue ē-hiáu寫；這無m̄是我牽成--ê。

作者李德章就兩種文字ê文字特色，學習時間kap學習效果來說明白話字比漢字khah好學。值得注意ê是，教會報雖然大力鼓舞白話字，m̄-koh並無排斥漢字。巴克禮tī教會報創刊號提起「白話字kap孔子字lóng有路用，m̄-koh白話字讀khah快khah明，所以著代先讀，tsiah讀孔子字」，強調ê是文字學習ê先後順序。劉茂清亦tī＜白話字ê利益＞lāi-té mā講著對白話字kap漢字ê態度：

...我將白話字kap孔子字相比來論，m̄是hiâm孔子字無路用，不過講白話字khah快bat，h³人khah緊進步；m̄-bián到久久tiaⁿ tiaⁿ hō͘字pa̍k-teh。Iû-koh合tī男女老幼，貧賤富貴ta̍k tíng ê人lóng讀ē起，人若準bat孔子字到真深，若koh加bat白話字，亦是加一項ê路用。

Uì tsia ē-tàng知iáⁿ教會報ê白話字論述採取ê是一種雙文字共同學習ê文字態度。根據調查，清國末期，漢字ê bat字率kan-nā百分之10 niâ， 社會上大多數是無機會接受漢字教育，m̄-bat漢字ê青瞑牛。白話字雖然是相對漢字ê困難所形成，總是，若ē-hiáu讀白話字，mā thang透過白話字來學習漢字。事實上，教會亦透過出版《三字經新撰白話註解》、《六百字編》、《廈門音新字典》等等用白話字解說漢文經典、漢字ê方式，實際達到白話字kap漢字互相對照學習ê效果。親像1925年4月ê＜六百字編：羅馬字註解＞著講出出版《六百字編》ê目的：

M̄是kan-tāⁿ用teh教hit號知識buē開ê囝仔，大部分是ài補助已經大漢失落漢文ê人。因為beh hō͘ bat白話字ê人khah利便thang研究，所以將tsit六百字印漢字，suà用羅馬字註明字音kap解說。

作者講出使用ê對象是「囝仔」，以及bat白話字m̄-koh「失落漢文ê人」，可見是為著幫贊白話字使用者學習漢文，作者tī文章結尾mā強調這本冊針對「bat羅馬字ê人beh學漢文，a-是bat漢文ê人beh學羅馬字，lon2g有sio幫贊。」呈現出鼓舞讀者學習白話字、漢字ê用心，mā說明白話字除了好學、好讀之外，確實mā是輔助學習漢文ê工具。
（二）學白話字ê附加價值 學白話字以後有真tsë幫贊，m̄-nā ē-hiáu讀聖經、聖詩，koh ē-tàng看教會報知iáⁿ各種豐富ê知識。另外，無限定tī宗教ê領域，白話字mā是認bat其他知識ê重要媒介。可比講ē-tàng讀「天文、地理、算學、歷代ê tāi-tsì、ta̍k國ê新聞」等等白話字ê冊。 若就普及教育ê立場來看，白話字更加是符合台灣社會現實ê文字選擇。親像tī 1911年ê＜教育ê好法＞tsit篇文章內底，作者強調普及教育ê重要性，認為實踐ê方式是讀冊kap看新聞報。M̄-koh新聞報若是用漢文，草地庄社ê人無讀漢字，bē-hiáu看，買來看ê人亦是真少。若是用日文，已經有kuí nā間新聞社teh印，總是若bē-hiáu日文mā bē-hiáu看。 若是beh hō͘眾百姓，tsa-p tsa-bó͘，大人囝仔，lóng ē-hiáu看新聞報，ē-hiáu內外ê消息，白話字是真好ê工具，因為白話字真快學，若bat白話字，無論beh講siáⁿ-mi̍h tāi-tsì lóng真利便。作者mā強調白話字ê使用對象無分教會內外，所以「白話字m̄是講有thàn道理ê人tsiah thang用，無thàn道理ê人來學亦是好，因為路用真開闊」。 學白話字ê路用mā表現tī書寫，因為ē-hiáu白話字tö是掌握書寫ê文字工具，所以學白話字以後，mā ā-tàng自由來紀錄kap書寫所有ê tāi-tsì，無論是「國家ê tāi-tsì，á是生理人beh報行情，或者是做小說、或是做論說，以及phue信來往等等」， lóng thang用白話字來紀錄。

學白話字除了ē-sái用來學習漢字、漢文以外，koh ē-sái透過白話字來學習外國語文。1933年11月開始，教會報刊載＜新台灣話ê陳列館＞專欄，作者是林茂生。Tī＜頭序＞lāi-té，有紹介tsit ê專欄ê產生是因為潘道榮主筆提起有看報ê人希望教會報ē-tàng設一個面來解說當時所teh通行ê新ê台灣話，兼註英語kap漢字，thang hō͘人khah明白hit句話ê源頭。林茂生認為這是真心適亦真重要ê事業，所以uì 1933年12月開始到1935年3月連續15期ê中間， 負責紹介新ê台灣話。Tsit ê專欄每期lóng紹介kuí nā ê新台灣話，先解釋意思，tsiah koh說明tsit ê語詞ê源頭，以及漢語、日語kap英語ê對照。所以一個語詞充滿著台語白話字、漢字、日文、英文四種文字ê紹介，ē-sái講是多文字ê具體呈現。下面舉kúi ê例來看māi：
Àn-nāi（案內）：意思是tshuā路。Tsit句話純然是tuì國語ê”annai”來--ê，kap英語ê”guide”相通。亦會做複合名詞：親像案內者＝案內人（＝annaija，annaijin）；＝a guide；案內所（＝annaisho＝the inquiry office） 文例：你有kiò人kā你案內á無？（＝Dare ka annaija wo tanomimashita ka？＝Did yo͘ ask some one to show yo͘ the way？）
Huan-hō͘（番號）：就是號頭ê意思；用數字來記載ê號頭。Tuì國語ê”bango”來，kap英語ê”number”（no.）相通。民國khah常kiò做”hō-bé”（號碼）。文例：你bat伊ê房間ê番號á無？（＝Anohito no heya no ”bango” wo go-zonji desuka?＝Do yu know the number of his room?＝I sī tuà tī tē-kuí hō͘ pang？5）
Bōng-uán-kiàⁿ（望遠鏡）：tsi̍t款有鏡ê器具，用做看肉眼所看bē tio̍h ê 物，屬千里鏡。Tuì國語ê boyenkyo來；kap英語ê telescope相通。民國猶原有teh通用；tsi̍t名叫做kui-thian-kiàⁿ（窺天鏡）。

林茂生認為台灣話ê變遷是受著日本帝國領台以來新文明ê影響，新ê文明造成新ê生活、思想kap話語。所以台灣話tī內容ê變化、單語ê增加產生真大ê影響。猶koh新ê台灣話大部分是對日語ê新字眼來ê，日本話tī古早受著漢字ê影響，tsiah ê新字眼原來是漢字，有ê語詞只要換讀音，m̄-bián換字kap意思，就thang真緊通行做台灣ê新話。 林茂生用語源研究法來察考tsiah ê新話，＜新台灣話ê陳列館＞總共收錄133個新台灣話，內容包含法律、政治、商業、文化等範圍， ē-sái講是透過白話字呈現多語言、多文字ê語文教育。Tsit ê專欄雖然是由林茂生執筆紹介，m̄-koh值得注意ê是教會報讀者ê主動性。新台灣話因為是受著日本帝國引進新文明所產生ê，tī新ê話tú beh通行tī台灣ê時，mā bat有守舊派ê人反對阻止，總是，後來猶原無法度阻擋大環境ê變化，新台灣話開始漸漸流通。根據＜頭序＞ê說明，咱ē-sái知iáⁿ，tī新台灣話tāu-tāu-á普遍流傳ê台灣社會上ê時，因為教會報ê讀者積極、主動要求jīn-bat新台灣話，所以tsiah有＜新台灣話ê陳列館＞專欄ê產生。專欄刊出以後，m̄-nā受著讀者熱烈ê歡迎，tī專欄刊出一年後，林茂生koh鼓勵讀者主動提出新語詞，thang刊載tī教會報kap大家分享、學習：

自設tsit ê”新台灣話”ê欄，已經將近一年。聽講有受列位ê歡迎，kì-tsiá put-tsí滿足。Ài請列位若有聽見新ê話，ài kì-tsiá解釋hit ê意思hō͘ lín聽，請lín puah-kang寫phue，寄親像下面ê住所，來到kì-tsiá本身，就beh將lín所問ê話解明，suà出tī tsit報ni̍h，請大家m̄-bián sè-jī。台南市開山町二丁目林茂生

Uì tsia一方面表現出林茂生kap讀者tī教會報ê學習互動，一方面mā感受著讀者求知ê主動性。透過教會報ê讀者積極學習、理解新台灣話，hō͘ tsiah ê外來語詞轉化作在地化ê使用，mā hō͘新語詞成做台灣人語文文化ê一部分。換話來講，因為台灣讀者ê主動性，tsiah thang吸收外來ê語文知識，落實成做台灣在地化ê語文肥底。

除了＜新台灣話ê陳列館＞以外，林茂生tī 1934年11月koh開設「新台灣話」欄ê「附錄」：＜英台俗語＞專欄，紹介英國kap台灣意思sio kâng ê俗語。林茂生認為「一句話tshián-tshián hiān-hiān tàu-kù tàu-kù來講破人情事理ê奧妙，這叫做俗語，不論tó一國，tó一所在，to有俗語teh流通。Siōng心適ê，就是英國俗語ê中間亦有tsē tsē kap台灣ê俗語相同--ê，這是teh證明這兩所在ê人情事理猶原有saⁿ-tâng ê所在」。 林茂生透過俗語ê比較來探討兩個國家ê文化類似ê所在，亦將伊所比較ê俗語呈現tī教會報n…h。＜英台俗語＞專欄uì 1934年11月到1935年1月連續刊載3期（第596卷到第598卷），總共收錄44個英語、台語俗語。Suah落來舉kuí ê例來看：
All is well that ends well：（這句俗語是對Shakespeare ê一個戲齣ê名來--ê。意思是講，suah尾若好，就萬事lóng好）。好頭不如好尾。
The pot calls the kettle black：（大意：ue-á beh笑tê-kó͘ )。龜笑鱉無尾。
Every dog has his day：（大意：不論siáⁿ-mi̍h狗to有伊ê日；意思是，khah歹運有時亦有會tú-tio̍h好運ê日）。有時星光，有時月光。
While there’s life there’s hope：（意思是，若有活命就有希望）。一枝草一點露。
To sell the bear’s skin before the bear has been cooght：（意思是，iáu buē lia̍h-tio̍h hîm，就代先約beh買人hîm ê皮）。Böe se° kiá°，sing hö miâ°（未生子，先號名）。
林茂生透過英語kap台語ê俗語對照，將台灣俗語國際化，mā hō͘台灣讀者熟sāi英國俗語，m̄-nā形成真趣味ê雙語對照，對台灣民間文學ê保存來講，mā有真大ê貢獻。教會報ê讀者只要ē-hiáu白話字，tō ē-tàng透過白話字來學英語，認bat英國俗語，增加台灣本土kap外國ê語文知識。
（三）白話字教學法 教會報對白話字ê推行除了鼓舞白話字ê學習利益以外，mā透過白話字來進行漢字、英語ê語文教育，tī教會報提供多元化ê語文知識。另外，教會報mā刊載白話字教學法，針對教白話字、學白話字ê方法來進行討論。當時tī教會ê主日學ni̍h，白話字ê教育是真重要ê部分，uì囝仔細漢tō教白話字，一方面培養囝仔ê信仰教育，一方面mā對囝仔透過白話字學習其他ê知識真有幫贊。因為án-ne，有主日學白話字教學經驗ê人tō將家己ê教學方法kap經驗分享hō͘教會報ê讀者參考。親像1916年10月ê＜學白話字＞，作者「宋牧師娘」認為tī主日學教白話字是beh hō͘學生應用tī讀聖經，所以制定好ê白話字教學法真重要。文章詳細寫出白話字教學ê每一個步驟、目的kap教法，以及教學現場ài注意ê tāi-tsì，具體呈現出白話字ê教學方法，是一篇完整ê白話字教案。另外，1925年6月ê＜教白話字ê方法＞mā是針對教學法ê討論，作者因為有教主日學白話字ê經驗，所以將本身所想出來ê教學方法紀錄落來，提供hō͘讀者參考。所使用ê教學法有四ê層面，分別是先讀字母，接續讀白話字讀本，加強學生ê認字kap呼音，最後tsiah koh讀聖詩30首詩，以及約翰福音傳、使徒行傳，若讀了tse kuí項tō算是白話字卒業，ē-tàng入聖經科。 基本上，教會主日學白話字ê教學分做三階段，順序是字母、聖詩、聖經，老師亦thang照程度調整學生ê學習階段。

另外，mā有針對白話字教學所設計ê語文課本、教材，透過教會報ê刊載，提供hō͘從事白話字教學kap學習白話字ê人。1885年12月ê＜分別八音＞是一篇特別用來練習標記白話字聲調ê文章。作者列出三篇短文，第一篇是聖經內容ê＜馬太5章1-10節＞，另外兩篇是取自《初學階梯》中ê＜小兒答＞kap＜辯倒孔子＞，描述孔子kap囝仔ê對話故事。三篇文章lóng無標聲調，作者希望讀者先看一遍了解意思以後，tsiah theh筆來標記，成做白話字聲調ê練習。為著增加白話字教學ê豐富，教材kap課本mā是真重要ê關鍵。1927年2月ê＜白話字讀本＞kap 1927年4月ê＜字母遊戲＞兩篇文章，lóng是teh紹介當時台南新樓冊房所出版ê白話字教材。《白話字讀本》是針對主日學學生設計ê課本，是照教育法kap囝仔心理所準備ê，內容照教學順序分做（1）字母：母音、子音、切音、鼻音、八音，（2）句tàu ê練習，（3）唱歌練習：雞仔歌、耶穌疼我、主ê祈禱文、十條戒、八條ê問答，（4）算術ê碼子kap點句ê方法。 這本冊注重tī字母、聖詩ê學習階段，亦有簡單ê經文練習，因為內容豐富，mā成做真tsē主日學運用tī白話字教學ê教材。另外，《字母遊戲》ê出版是為著hō͘學白話字ê囝仔感覺khah心適，khah愛讀，進一步引發學習ê動機。內容是運用硬紙版kap 八張圖片，h³人練習八音kap認字、tàu字。文章提起tsit款趣味ê學習方法親像遊戲（iû-hì），tī英國叫做”Word Making and Word Taking”， 教材m̄-nā真心適，對白話字ê學習mä真有幫贊。除了教材kap課本以外，教會報koh透過歌詩ê文學方式來提倡白話字ê學習。1933年6、7月ê＜學字歌＞是柯維思所創作。內容有運用白話字字母編成ê「字母歌」，mā有以囝仔歌形式呈現ê白話字練習：
A-tsó͘ tiām-tiām teh khuàⁿ tsheh, 阿祖tiām-tiām teh看冊 A-kong ku-ku teh bong hê， 阿公ku-ku teh摸蝦 A-má siông-siông teh tshe ké， 阿嬤常常teh炊粿 A-pa ji̍t-ji̍t teh pháu-bé. 阿爸日日teh跑馬

Tshun,hē,tshiu,tang,hun sù-kuì， 春、夏、秋、冬，分四季 Tang,sai,lâm,pak,tsòe sì-uī， 東、西、南、北，做四位， Nî，ge̍h，ji8t，sî，kì li̍k-kui, 年、月、日、時，記曆規 Jîn-bîn tōng-bu̍t bô siāng luī. 人民動物無siāng類。
另外，kâng-khuán是柯維思創作ê，刊載tī 1939年3月ê＜鼓舞人學字＞，mā是透過白話字歌詩ê形式來推展白話字：
Ko2a-kín bat jī o̍h jī-bó, 趕緊bat字學字母， Sing tha̍k a,i,o,e,, 先讀a,i,o,e,； Í-āu ka-kī koh kè hô, 以後家己koh過和， Tsi̍t pái ngō͘-jī tsin tú-hó. tsi̍t擺五字tú-hó。
I ū lâ-á lí ū ô, 伊有蜊仔lí有蚵， In ū e-á lín ū ô͘, In有鍋仔lín有壺， I tsèng hiuⁿ-ko͘ lín tsìng ō͘, 伊種香菇lín種芋， Guá ài tshī lô͘ kiam phah hó͘. 我愛養鱸兼打虎。
＜學字歌＞kap＜鼓舞人學字＞兩首歌lóng字句簡省、押運tàu句，每句lóng是七個字組成ê，是民間七字仔歌ê款式，唸起來心適輕鬆，kan-nā唱歌，真適合囝仔ê學習，mā hō͘囝仔tī趣味ê學習氣氛中間，達成白話字字母ê教育。

整體來講，教會報ê白話字教學書寫真豐富，m̄-nā有實際從事白話字教學ê主日學老師制定白話字教學法，或者提供教學ê經驗kap方法hō͘讀者參考，教會報ē-tàng講成做白話字教學法互相分享、交流ê管道。Tī教材、課本ê製作、設計方面，教會報mā提供充足ê資訊kap紹介，koh加上文學性ê詩歌來幫贊白話字字母ê練習，ē-tàng看出tī白話字教學頂面，盡力設計簡單、趣味koh有效率ê輔助教材ê用心，亦由此可見教會對白話字教育ê重視。

教會報對白話字ê推行、教學，除了台語白話字以外，值得注意ê是，1922年10月mā開始討論「客語白話字」。根據劉阿秀＜客話白話字＞一文ê說明，因為教會機構kap客家父老常常掛慮無客話ê白話字，所以tī 1912年有派鍾牧師去廣東省汕頭研究hit位所用ê白話字，m̄-koh因為in hit邊ê腔口kap台灣ê客話真tsē無kâng，致到無合用。後來tī 1922年8月，傳道局派作者劉阿秀kap鍾傳道做夥合作設計客話ê白話字，in用一個月ê時間來完成，koh將福建音ê真道問答、新約問答、舊約問答，翻譯做台灣四縣客話。所設計ê客話白話字有27個字母，分別是「A E I O U µ F H K L N P S T V Y NG SH CH KW NG TS CHH TSH KHW KH TH 」。聲調有六音，是「上平、下平、上聲、去聲、上入、下入」，若用客話讀音來實際舉例，tō親像「Fu(夫）、Fû（乎）、Fú（府）、Fù（富）、Fýk（服）、Fuk(福）」。 劉阿秀ê＜客話白話字＞tsit篇文章˜-nä紀錄著客語白話字tī台灣產生ê重要過程，mā說明透過白話字ē-tàng hō͘台灣本土母語ê客語成做文字書寫系統，進一步保留客家語言文化ê歷史意義。