《趁iau2日時》

 | | | 轉寄

如果烏暗無盡頭──Thài會無ài hō͘音樂燃燒生命？！

作者 林俊育 2008.07.13

Tī一陣有心人士ê推動下，經過一年guā ê籌備kap募款，財團法人台北市視障音樂文教基金會，終其尾tī一九九四年十一月二十五日登記成立。

大力推展「視障音樂」理念ê張育豪，mā當然被推舉為基金會ê執行長。伊一開始就huah出「如果烏暗無盡頭，thài會無ài hō͘音樂燃燒生命？！」ê口號，因為文化大學音樂系第一名畢業ê張育豪認為：學習音樂對視障朋友來講siōng無障礙，顛倒因目睭看bē-tio̍h，聽覺特別靈敏，有ê koh-khah有絕對ê音感。

台裔德籍ê視障音樂家韓義明就是一個真好ê例，二十七年前，伊是出生tī台灣無眼球ê棄嬰，經德國惠明盲人基金會派來台灣輔導台中惠明盲校ê韓牧師領養，並tī伊三歲ê時tsūn正式認養而帶tńg來德國教養，tī德國ê大環境下，伊學習小提琴、鋼琴、管風琴kap聲樂，如今成做傑出ê音樂家，音樂就是伊生命ê全部。

視障音樂基金會成立後，馬上邀請tsit位視障音樂siōng好ê模式回台，kap國內ê視障音樂家共同演出七場「關懷視障慈善音樂會」。我是基金會ê負責人，舊年四月親自到韓義明tī德國漢諾瓦ê厝拜訪，並做正式ê邀請。伊一屑á to無遲疑地答應，並且講beh tshuā伊ê女朋友同齊來。

一九九三年四月，韓牧師kap韓太太帶韓義明回台，我tī he時tsūn kap in認bat而成為好朋友。韓義明hit時聽了西羅亞盲人合唱團ê演唱，真受感動而對我講，伊tńg去了後bueh學聲樂唱歌，下次回台時bueh kap西羅亞同齊唱。伊tńg去德國了後就開始學聲樂，mā參加四重唱主唱男低音，tuì án-ne認bat唱女高音ê明眼人依芙蘭 ( FRANZISKA EBER )。今年年初，我收tio̍h in訂婚ê好消息，tsit種透過音樂而lóng無障礙地相攬真情，hō͘人讚歎無停，願神永遠祝福伊兩人。

國內參加演出ê團体有西羅亞合唱團、啄木鳥室內樂團、台中啟明學校Ê國樂團，個人有張育豪ê小號、林德昌ê獨唱、曾宜臻ê二胡、徐百香ê獨唱。個個lóng有優異ê表現，hō͘社會大眾了解in肉体ê目睭雖然看bē-tio̍h，心靈ê目睭卻是明亮ê，koh-khah透過音樂燃燒tio̍h生命ê火花，鼓舞一kuá心靈殘障ê社會人士，照亮烏暗ê角落。

演出ê地點是tī台北市社教館、台北市雙連教會、高雄市文化中心、台中市中興堂、東海大學、史懷哲之友會和羅東教會。場場lóng phah動bē少聽眾ê心，加上有kuá新聞媒体ê大篇幅報導，尤其是全民電視台tī「晚安，台灣」ê節目中，做四十五分鐘ê現場採訪，社會大眾對視障朋友一定有koh-khah深ê了解，進一步koh-khah接納in，tse mā是基金會舉辦「關懷視障慈善音樂會」ê主要目的之一。

最後一場tī羅東教會ê音樂會siōng動人，tse是應慕光盲人重建中心創辦人陳五福博士之特別邀請而追加安排ê，時間是tī韓義明離台ê前一工。三個禮拜落來ê北中南巡迴演出，韓義明已有小khuá倦態，伊ê未婚妻依芙蘭koh-khah因無適應冷氣而嚨喉失聲。搭配演出ê西羅亞合唱團，前夜ê按摩工作，hit工早起到三重市三角埔教會詩歌見證，下晡趕坐遊覽車到羅東，身心ê倦tah-tah thang想而知。

M̄-nā是演出人員thiám loh，連只負責連絡安排ê我mā有點á喘不過氣來。但是，tī烏暗中燃燒ê生命火花，tī最後一場顯得特別豔麗。四百guā位滿懷愛心ê聽眾，聚集tī ka-nā ē-tàng容納三百人ê羅東教會，台頂台下滿溢tio̍h生命ê熱情。演出者透過音樂表現對生命ê o-ló，phah動聽了感動ê觀眾並以熱烈ê掌聲來回應，koh-khah hō͘演出者掩不住生命火花ê笑容。我用攝影機錄下tse動人ê場面，透過伸縮鏡頭攝取tuì視障音樂家心靈綻開ê生命火花，感動kah不時潸潸目屎流落來。

音樂燃燒生命ê火花永遠亮麗無比，送韓義明kap依芙蘭去機場時，in hō͘我一個紅包，phah開一看是一張伊兩人簽名ê新台幣三萬元「有效支票」，in ài我tuì匯hō͘ in ê演出費中the̍h三萬元來，奉獻hō͘我最近成立ê「關懷視障研究發展中心」。Tsit種回饋ê愛心，我認為出自一朵音樂燃燒ê生命火花是真自然ê代誌。我心領伊兩人ê心意收下紅包袋，交待研發中心ê吳敏惠主任，將那意義重大ê「支票」鑲起來永遠保存。我將伊兩人ê演出費全數匯hō͘ in，請in teh-beh奉獻ê三萬元留做深造或是買新小提琴之用；韓義明ê母親bat kā我講，伊ê小提琴太老舊了。

我全程參與tsit-pái ê「關懷視障慈善音樂會」，視障音樂家tuì心靈深處燃燒ê生命火花，mā點to̍h我生命ê火花，hō͘我ē-tàng「忙」á不「盲」。感謝所有參加演出ê視障音樂家，koh-khah希望in ē-tàng繼續燃燒社會ê生命火花。
1995.6.15