《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二章

作者 巴克禮普世版小組 2014.03.09

Sìng-Sîn Kàng-lîm
1 Gō͘-sûn-tseh kàu, sìn-tô͘ lóng tsū-tsi̍p tī tsi̍t só͘-tsāi. 2 Hut-jiân-kan ū siaⁿ tuì thiⁿ-tíng lâi, tshin-tshiūⁿ teh thàu tuā-hong, tshiong-muá in teh tsē ê kui-king tshù. 3 Koh ū tshin-tshiūⁿ hun-khui ê hué-tsi̍h tuì in tshut-hiān, hioh tī ta̍k-lâng ê tíng-bīn. 4 In lóng siū Sìng-Sîn tshiong-muá, tsiàu Sìng-Sîn siúⁿ-sù in ê un-sù khui-tshuì kóng pa̍t tsióng ê gí-giân. 5 Hit sî ū kuá khiân-sîng ê Iû-thài-lâng tuì sè-kài ta̍k kok tńg-lâi, tuà tī Iâ-lō͘-sat-líng. 6 Kûn-tsiòng thiaⁿ-tio̍h tsit-ê siaⁿ tsiū lóng tsū-tsi̍p uá-lâi, in-uī ta̍k-lâng thiaⁿ-tio̍h sìn-tô͘ tsiàu in ka-kī pún-tē ê uē lâi tuì in kóng-uē suah gāng khí-lâi. 7 In tio̍h-kiaⁿ koh kî-kuài, kóng, "Lí khuàⁿ, tsiah-ê teh kóng-uē ê lâng kám m̄-sī lóng Ka-lī-lī-lâng? 8 Lán ná-ē lóng thiaⁿ-tio̍h in tsiàu lán ta̍k-lâng pún-tē ê gí-giân teh kóng-uē? 9 Lán tsiah-ê Phàⁿ-thê-a-lâng, Bí-thài-lâng, Í-lân-lâng, kah tiàm-tī Bí-só͘-pho-tāi-bí, Iû-thài kah Ka-phàⁿ-to-ka, Pún-to͘ kah A-se-a, 10 Hut-lū-ka kah Pông-hui-lī-a, Ai-ki̍p kīn-uá Kó͘-lī-nāi ê Lū-pí-a, tsiah-ê tē-hng ê lâng, í-ki̍p tuì Lô-má lâi ê tshut-guā-lâng, ū-ê sī Iû-thài-lâng, ū-ê sī kái-tsong ji̍p Iû-thài-kàu ê lâng, 11 Kik-lí-tí-lâng, A-lat-pik-lâng, lóng thiaⁿ in īng lán ê gí-giân teh kóng Siōng-Tsú só͘ tsò uí-tāi ê tāi-tsì." 12 Tāi-ke tio̍h-kiaⁿ koh kî-kuài mn̄g-lâi mn̄g-khì kóng, "Tse sī sím-mi̍h tāi-tsì?" 13 Mā ū-lâng thí-tshiò in kóng, "In sī lim sin tsiú teh tsuì."

Pí-tik ê Káng-tō
14 M̄-koh Pí-tik kah tsa̍p-it ê sù-tô͘ khiā khí-lâi, tuā-siaⁿ tuì in kóng, "Iû-thài-lâng kah só͘-ū tuà tī Iâ-lō͘-sat-líng ê lâng ah, lín tio̍h tsai tsit-ê tāi-tsì, mā tio̍h tsù-ì thiaⁿ guá ê uē. 15 Tsiah-ê lâng m̄-sī lín só͘ kóng ê tsiú-tsuì, in-uī tsit-má tsiah tsá-khí-sî káu tiám. 16 Kî-si̍t tse sī sian-ti Iok-ní só͘ kóng-.ê. 17 Siōng-Tsú kóng, Tī tsiong-bua̍t ê sî-ji̍t, Guá beh īng Guá ê Sìng-Sîn kàng-lo̍h khì hō͘ sè-kan-lâng. Lín ê hāu-seⁿ, lín ê tsa-bó͘-kiáⁿ ē kóng ī-giân, Lín ê siàu-liân-lâng ē khuàⁿ-tio̍h īⁿ-siōng, Lín ê lāu-lâng ē tit-tio̍h thok-bāng. 18 Koh tī hiah-ê ji̍t, Guá mā beh tsiong Guá ê Sìng-Sîn kàng lo̍h-khì hō͘ Guá ê lô͘-po̍k kah lí-pī, in mā ē kóng ī-giân. 19 Guá tī thiⁿ-tíng hián-tshut kî-sū, tī tē-tsiūⁿ Guá beh hián-sī sîn-jiah, ū hueh, hué kah ian-bū. 20 Tī Tsú tuā koh îng-iāu ê ji̍t kàng-lîm tsìn-tsîng, Ji̍t-thâu ē piàn-tsò àm, Gue̍h ē piàn-tsò ná hueh hiah-ni̍h âng. 21 Hit sî só͘-ū kiû-kiò Tsú ê miâ ê lâng lóng ē tit-kiù."( tsù: Ii 2:28-32) 22 " Í-sik-lia̍t-lâng ah, lín tio̍h thiaⁿ Guá ê uē: Tsiàu lín só͘ tsai, Siōng-Tsú thong-kuè Ná-sat-li̍k-lâng Iâ-so͘, tī lín tiong-kan hián-sī I ê kuân-lîng, kî-sū kah sîn-jiah, lâi tuì lín tsìng-bîng I sī Siōng-Tsú só͘ siat-li̍p-.ê. 23 Siōng-Tsú tsiàu I tiāⁿ-tio̍h ê tsí-ì kah ī-tīng ê kè-uē, kā I kau hō͘ lín. Lín tsioh-īng put-huat ê lâng ê tshiú kā I tìng si̍p-jī-kè, kā I hāi-sí. 24 M̄-koh Siōng-Tsú tháu-pàng I sí-bông ê thòng-khó͘, hō͘ I koh-ua̍h, in-uī sí-bông bē-tàng kā I khòng-tsè. 25 Kuan-hē Iâ-so͘ ê tāi-tsì, Tāi-pi̍t ū kóng: Guá khuàⁿ-kìⁿ Tsú siông-siông tī guá ê bīn-tsîng; I tiàm tī guá ê tsiàⁿ-pîng, hō͘ guá bē iô-tāng. 26 Só͘-í guá ê sim huaⁿ-hí, guá ê tsi̍h khuài-lo̍k; Koh guá ê jio̍k-thé mā ē tī ǹg-bāng tiong an-jiân kuè-ji̍t. 27 In-uī Lí bē kā guá ê lîng-hûn pàng-sak tī im-kan, mā bē hō͘ Lí Sîn-sìng ê lô͘-po̍k hiú-nuā. 28 Lí í-king tsí-sī guá ua̍h-miā ê lō͘. Hō͘ guá tī lí ê bīn-tsîng muá-sim khuài-lo̍k."( tsù: SPh 16:8-11) 29 " Hiaⁿ-tī tsí-muē ah, kuan-hē sian-tsó͘ Tāi-pi̍t ê tāi-tsì, guá hó-táⁿ tuì lín kóng, i í-king sí koh bâi-tsòng, i ê bōng kàu kin-á-ji̍t iáu tī lán tsia. 30 I kì-jiân sī sian-ti, koh tsai Siōng-Tsú bat kah i tsiù-tsuā ìng-ín, beh tī i ê kiáⁿ-sun tiong, siat-li̍p tsi̍t-ê lâng tsò ông, lâi tsē I ê pó-tsō. 31 Tāi-pi̍t ū sing khuàⁿ-tshut tsit-ê tāi-tsì, kuan-hē Ki-tok ê koh-ua̍h ū kóng: I bô siū pàng-sak tī im-kan, I ê jio̍k-thé mā bô hiú-nuā khì.( tsù: SPh 16:10) 32 Tsit-ê Iâ-so͘, Siōng-Tsú ū hō͘ I koh-ua̍h, guán tsiah-ê lâng lóng tsò I ê kiàn-tsìng-jîn. 33 I í-king siū ko-sing kàu Siōng-Tsú ê tsiàⁿ-pîng, koh tuì Thiⁿ-Pē niá-siū só͘ ìng-ín ê Sìng-Sîn. I tsit-má tsiong tsit-ê Sìng-Sîn piàⁿ lo̍h-lâi hō͘ guán, tsiū-sī lín tsit-má só͘ khuàⁿ-tio̍h, só͘ thiaⁿ-tio̍h-.ê. 34 Tāi-pi̍t m̄-bat tsiūⁿ-thiⁿ, m̄-koh i kóng: Siōng-Tsú tuì guá ê Tsú kóng: Lí tsē guá ê tuā-pîng, 35 Kàu Guá hō͘ Lí ê tuì-ti̍k tsò Lí ê kha-ta̍h.( tsù: SPh 110:1) 36 " Só͘-í Í-sik-lia̍t tsuân-ke lóng tio̍h khak-si̍t tsai, tsit-ê lín kā I tìng si̍p-jī-kè ê Iâ-so͘, Siōng-Tsú í-king siat-li̍p I tsò Tsú, tsò Ki-tok à." 37 Tsìng-lâng thiaⁿ-tio̍h tsiah-ê uē, sim-lāi tsin tshì-tsha̍k, tuì Pí-tik kah kî-tha ê sù-tô͘ kóng, "Hiaⁿ-tī tsí-muē ah, guán tio̍h án-tsuáⁿ tsò?" 38 Pí-tik kā in kóng, "Lín tio̍h hué-kái, ta̍k-lâng lóng tio̍h hōng Iâ-so͘ Ki-tok ê miâ siū sé-lé, hō͘ lín ê tsuē tit-tio̍h sià-bián. Lín tsiū ē-tàng niá-siū Siōng-Tsú siúⁿ-sù ê Sìng-Sîn. 39 In-uī tsit-ê ìng-ín sī beh hō͘ lín kah lín ê kiáⁿ-sun, í-ki̍p só͘-ū tī hn̄g-hn̄g ê lâng. Tsiū-sī lán ê Siōng-Tsú ho͘-tiàu lâi kui-hiòng I ê lâng." 40 Pí-tik koh līng-guā īng tsin-tsē uē tshut-la̍t kiàn-tsìng, lâi khó͘-khǹg in, kóng, "Lín tio̍h kiù ka-kī thuat-lī tsit-ê siâ-ok ê sè-tāi." 41 Tsiū án-ne, tsiap-la̍p in ê uē ê lâng lóng siū sé-lé. Hit ji̍t sìn-tô͘ tāi-iok ke-thiⁿ saⁿ-tshing lâng. 42 In tsuan-sim niá-siū sù-tô͘ ê kà-sī, tsham-ú sìn-tô͘ thuân-khè sing-ua̍h, niá-siū Sìng-tshan, kî-tó.

Sìn-tô͘ ê Thuân-khè Sing-ua̍h
43 Sù-tô͘ koh kiâⁿ tsin-tsē kî-sū sîn-jiah, ín-khí tsìng-lâng khí kìng-uì ê sim. 44 Sìn-tô͘ lóng tsū-tsi̍p tī tsi̍t só͘-tsāi, só͘ ū ê mi̍h lóng kong-ke īng. 45 Koh bē ka-sán kah ke-gia̍p, tsiàu ta̍k-lâng só͘ su-iàu-ê pun hō͘ in. 46 In ta̍k-ji̍t tī sìng-tiān-lāi tâng-sim ha̍p-ì tsū-huē, mā khì ke-ke hō͘-hō͘ kí-hîng Sìng-tshan peh-piáⁿ, īng huaⁿ-hí sîng-si̍t ê sim tsò-hué lim-tsia̍h, o-ló Siōng-Tsú. 47 Koh tit-tio̍h tsìng-lâng huaⁿ-hí tsiap-la̍p. Tsú tsiong tit-kiù ê lâng ji̍t-ji̍t ke-thiⁿ hō͘ in.