《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第九章

作者 巴克禮普世版小組 2011.05.29

1, Iâ-so͘ lo̍h tsûn kue3hai2, khì kàu I ê pún siâⁿ.
2, Tú-tn̄g ū lâng kng tsi̍t ê piàn-suī ê tó tī pho͘-á-ni̍h lâi tsiū-kūn I; Iâ-so͘ khuàⁿ-tio̍h in ê sìn, tsiū kā piàn-suī ê kóng, Kiáⁿ ah, tsò lí an-sim, lí ê tsuē sià à.
3, Ū king-ha̍k-kàu-su kuí-nā lâng sim-lāi kóng, Tsit-ê lâng tshiàm-kuân lām-sám kóng.
4, Iâ-so͘ tsai in ê sim-ì, tsiū kóng, Lín siáⁿ-sū sim-lāi khǹg pháiⁿ ì-sù ah?
5, Kóng, Lí ê tsuē sià, á-sī kóng, Khí-lâi kiâⁿ, tó-uī tsi̍t hāng khah khuài?
6, Tān-sī bueh hō͘ lín tsai, Jîn-tsú tī tē-ni̍h ū kuân thang sià tsuē, tsiū kā piàn-suī ê kóng, Khí-lâi, giâ lí ê pho͘-á, tńg-khì lí ê tshù.
7, I tsiū khí-lâi, tńg-khì i ê tshù.
8, Tsìng lâng khuàⁿ-tio̍h tsiū kiaⁿ; kui îng-kng Siōng-tsú, tsiū-sī īng tsit tsióng kuân hō͘ lâng ê.
9, Iâ-so͘ tuì hia king-kè, khuàⁿ-tio̍h tsi̍t lâng, miâ Má-thài, tsē tī hiòng-kuan; tsiū kā i kóng, Tè guá; i tsiū khí-lâi tuè I.
10, Iâ-so͘ tsē toh tī i ê tshù, ū tsē-tsē thiu-suè ê kap pháiⁿ lâng lâi, kap Iâ-so͘ tsham I ê bûn-tô͘ tâng tsē.
11, Huat-lī-sài-phài ê lâng khuàⁿ-tio̍h, kā I ê bûn-tô͘ kóng, Lín sian-siⁿ siáⁿ-sū kap thiu-suè ê í-ki̍p pháiⁿ lâng saⁿ-kap tsia̍h?
12, Iâ-so͘ thiaⁿ-tio̍h tsiū kóng, Ióng-kiāⁿ ê lâng bô khiàm-īng i-sing, tsí-ū phuà-pēⁿ ê tsiū tio̍h.
13, Tān-sī, Guá ài lîn-bín, m̄ ài tsè-sū, tsit kù sím-mi̍h ì-gī, lín tio̍h khì o̍h. In-uī guá lâi m̄-sī bueh tsio gī lâng, sī bueh tsio pháiⁿ lâng.
14, Hit sî Iok-hān ê bûn-tô͘ tsiū-kūn I kóng, Guán kap Huat-lī-sài-phài ê lâng ta̍uh-ta̍uh kìm-tsia̍h, tān-sī lí ê bûn-tô͘ bô kìm-tsia̍h, sī tsáiⁿ-iūⁿ?
15, Iâ-so͘ kā in kóng, Sin-kiáⁿ-sài kap hō-tshuā ê lâng saⁿ-kap tī-teh, hō-tshuā ê lâng kiám ē ai-siong mah? tsí-ū sî-ji̍t bueh kàu, sin-kiáⁿ-sài tuì in tiong-kan sí-khì, hit sî in tsiū bueh kìm-tsia̍h.
16, Bô lâng īng sin pò͘ pó͘ kū saⁿ; in-uī só͘ pó͘ ê hit tè, ē kiù-li̍h hit niá saⁿ, i ê phuà-khang koh khah tuā.
17, Lâng iā bô īng sin tsiú té tī kū phuê-lông; nā sī ū, tsiū lông li̍h, tsiú lāu, lông iā suà pháiⁿ; tsí-ū īng sin tsiú té tī sin phuê-lông, tsiū nn̄g hāng lóng pó-tsuân.
18, Kóng tsiah-ê ē ê sî, tú-tn̄g ū tsi̍t ê kuaⁿ lâi pài I kóng, Guá ê tsa-bó͘-kiáⁿ tú-á sí, tān-sī lí lâi īng tshiú bong i, i tsiū ē ua̍h.
19, Iâ-so͘ khí-lâi tuè i khì, I ê bûn-tô͘ iā khì.
20, Tú-tn̄g ū tsi̍t ê hū-jîn-lâng, hiat-lāu tsa̍p-jī nî, kiâⁿ uá I ê ka-tsiah-āu, bong I saⁿ-á-ku ê tshiu;
21, in-uī i sim-lāi phah-sǹg kóng, Guá kan-ta bong I ê saⁿ, tsiū ē hó.
22, Iâ-so͘ ua̍t-tńg-sin, khuàⁿ i tsiū kóng, Hū-jîn-lâng ah, tsò lí an-sim, lí ê sìn hō͘ lí hó à; tuì hit sî hū-jîn-lâng tsiū hó.
23, Iâ-so͘ kàu hit ê kuaⁿ ê tshù, khuàⁿ-tio̍h pûn ta̍t-á ê, iā ū tsìng lâng teh khàu;
24, tsiū kóng, Thè-khì, in-uī tsa-bó͘ gín-ná m̄-sī sí, sī teh khùn. In tsiū líng-tshiò I.
25, Í-king kuáⁿ tsìng lâng tshut, tsiū ji̍p-khì, khan i ê tshiú; tsa-bó͘ gín-ná tsiū khí-lâi.
26, Tsit-ê hong-siaⁿ piàn thuân tī hit ê tē-hng.
27, Iâ-so͘ tuì hia king-kè, ū nn̄g ê tshiⁿ-mî lâng tè I, kiò kóng, Tāi-pi̍t ê kiáⁿ-sun, lîn-bín guán.
28, Í-king ji̍p tshù, tshiⁿ-mî lâng tsiū-kūn I. Iâ-so͘ kā in kóng, Lín sìn guá ē tsò tsit-ê sū mah? Ìn kóng, Tsú ah, ū.
29, I tsiū bong in ê ba̍k-tsiu kóng, tsiàu lín ê sìn, kā lín tsò tsiâⁿ.
30, In ê ba̍k-tsiu tsiū khui. Iâ-so͘ giâm-giâm huan-hù in kóng, Kín-sīn bo̍h-tit hō͘ lâng tsai.
31, Tān-sī in tshut-khì, piàn thuân I ê miâ tī hit tē-hng.
32, In tshut-khì ê sî, tú-tn̄g ū lâng tshuā tsi̍t ê é-káu huān-tio̍h kuí ê lâi tsiū-kūn Iâ-so͘.
33, Kuí í-king kuáⁿ tshut, é-káu ê tsiū kóng uē; hiah-ê tsìng lâng lóng kî-kuài kóng, Í-sik-lia̍t tiong bē bat khuàⁿ-tio̍h án-ne.
34, Tān-sī Huat-lī-sài-phài ê lâng kóng, I uá-khò kuí-ông lâi kuáⁿ kuí.
35, Iâ-so͘ piàn kiâⁿ tsiah-ê siâⁿ tsiah-ê hiuⁿ-siā, tī in ê huē-tn̂g kà-sī lâng, thuân Thian-kok ê hok-im, i-hó ta̍k tsióng ê tsìng-thâu, ta̍k tsióng ê pēⁿ-thiàⁿ.
36, I khuàⁿ-tio̍h hiah-ê tsìng lâng, tsiū khó-lîn in; in-uī in khùn-khó͘ sì-suàⁿ, tshin-tshiūⁿ iûⁿ bô bo̍k-tsiá.
37, Tuì án-ne tsiū kā I ê bûn-tô͘ kóng,
38 Thang siu-sîng ê sī tsuē, tsò kang ê sī tsió; só͘-í lín tio̍h kiû hn̂g Tsú pik kang khì kā I siu-sîng.