《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第十九章

作者 巴克禮普世版小組 2014.07.06

Pó-lô Tī Í-hut-só͘
1 A-pho-lô tī Ko-lîm-to ê sî, Pó-lô king-kuè lāi-lio̍k ê tē-khu, lâi-kàu Í-hut-só͘, tī hia tú-tio̍h kuí-nā-ê bûn-tô͘. 2 Pó-lô mn̄g in, kóng, "Lín sìn Tsú ê sî kám ū niá-siū Sìng-Sîn?" In ìn-kóng, "Guán kàu-taⁿ lóng m̄-bat thiaⁿ-kuè ū Sìng-Sîn ê tāi-tsì." 3 Pó-lô koh mn̄g kóng, "Án-ne, lín niá-siū sím-mi̍h khuán ê sé-lé?" In tsiū kóng, "Iok-hān ê sé-lé." 4 Pó-lô kóng, "Iok-hān kiâⁿ hué-kái ê sé-lé. I kiò Í-sik-lia̍t-lâng tio̍h sìn Hit-uī tuè i āu-bīn lâi-.ê, tsiū-sī tio̍h sìn Iâ-so͘." 5 Hiah-ê lâng thiaⁿ-tio̍h, tsiū hōng Tsú Iâ-so͘ ê miâ niá-siū sé-lé. 6 Pó-lô kā in huāⁿ-tshiú, Sìng-Sîn tsiū lîm-kàu tī in sin-tsiūⁿ, in suî-sî kóng kî-biāu khiuⁿ-kháu, koh suan-káng Siōng-Tsú ê sìn-sit. 7 Tsóng-kiōng tsha-put-to ū tsa̍p-jī-ê lâng. 8 Pó-lô liân-suà saⁿ gue̍h-ji̍t kú, ji̍p-khì huē-tn̂g hó-táⁿ thuân-tō, kah lâng piān-lūn Siōng-Tsú Kok-tō͘ ê tāi-tsì lâi khó͘-khǹg lâng sìn Tsú. 9 M̄-koh ū tsi̍t-kuá lâng kò͘-tsip m̄ sìn, tī kûn-tsiòng ê bīn-tsîng siat-to̍k Tsú ê Tō-lō͘. Pó-lô tsiū tshuā bûn-tô͘ lī-khui in, ta̍k-ji̍t tī Tshui-lat-lô͘ ê káng-tn̂g kah lâng piān-lūn. 10 Án-ne kè-sio̍k nn̄g-nî kú, hō͘ só͘-ū tuà tī A-se-a-síng ê lâng, bô-lūn Iû-thài-lâng á-sī Hi-lia̍p-lâng, lóng ū thiaⁿ-tio̍h Tsú ê tō-lí.

Sū-ki-uá ê Kiáⁿ
11 Siōng-Tsú īng Pó-lô ê tshiú kiâⁿ hui-siông hi-hán ê sîn-jiah. 12 Sīm-tsì ū-lâng the̍h Pó-lô īng-kuè ê tshiú-kin-á á-sī uî-su-kûn, hē tī pēⁿ-lâng ê sin-tsiūⁿ, in ê pēⁿ tsiū hó-khì, siâ-sîn mā tuì in sin-tsiūⁿ tshut-khì. 13 Hit sî, ū kuí-nā-ê kiâⁿ kang-ô͘ teh kuáⁿ-kuí ê Iû-thài-lâng, mā siūⁿ-beh tsioh Tsú Iâ-so͘ ê miâ, tuì hiah-ê hō͘ siâ-sîn hū-sin ê lâng, kóng, "Guá hōng Pó-lô só͘ thuân Iâ-so͘ ê miâ, bīng-līng lí tuì hit lâng ê sing-khu tshut-khì!" 14 Iû-thài ê tsè-si-tiúⁿ Sū-ki-uá ê tshit-ê kiáⁿ, mā teh tsò tsit khuán tāi-tsì. 15 M̄-koh hit-ê siâ-sîn ìn kóng, "Iâ-so͘ guá bat, Pó-lô guá m̄-bat. Lín leh, lín sī sím-mi̍h lâng?" 16 Hit-ê hō͘ siâ-sîn hū-sin ê lâng tsiū uá-khì kong-kik hiah-ê kiâⁿ kang-ô͘ ê lâng, kā in tsè-ho̍k, hō͘ in tio̍h-siong, thǹg-pak-theh tuì hit-king tshù tô-tsáu. 17 Tuà tī Í-hut-só͘ ê Iû-thài-lâng kah Hi-lia̍p-lâng thiaⁿ-tio̍h tsit-hāng tāi-tsì lóng tio̍h-kiaⁿ. Tsú Iâ-so͘ ê miâ tsū-án-ne tuā-tuā siū tsun-tiōng. 18 Ū tsin-tsē í-king sìn ê lâng tshut-lâi kong-khai sîng-jīn, koh kóng-khí in kuè-khì só͘ tsò ê tāi-tsì. 19 Mā ū tsin-tsē kiâⁿ siâ-su̍t ê lâng the̍h in ê tsheh lâi khǹg tsò-hué, tī kûn-tsiòng ê bīn-tsîng pàng-hué sio. In kè-sǹg hiah-ê tsheh ê kè-ta̍t, tsha-put-to ū gō͘-bān-ê gîn-pè. 20 Tshin-tshiūⁿ án-ne, Tsú ê tō-lí it-ti̍t thuân-khui, tuā-tuā hing-ōng khí-lâi.

Tī Í-hut-só͘ ê Pō-tōng
21 Tsiah-ê tāi-tsì liáu-āu, Pó-lô siū Sìng-Sîn ê tsí-sī, kuat-tīng beh king-kuè Má-kî-tùn kah A-kai-a, khì Iâ-lō͘-sat-líng. I kóng, "Kàu hia liáu-āu, guá mā tio̍h khì khuàⁿ Lô-má." 22 I tsiū tshe nn̄g-ê tsō͘-tshiú, Thê-mô͘-thài kah Í-lah-to͘ khì Má-kî-tùn. I ka-kī tsiām-sî lâu tuà A-se-a-síng. 23 Hit sî, uī-tio̍h Tsú ê Tō, tī Í-hut-só͘ ū ín-khí giâm-tiōng ê jiáu-luān. 24 Ū tsi̍t-ê miâ-kiò Tí-bí-tiu ê phah-gîn sai-hū, i īng gîn tsò A-tí-bí lí-sîn-biō ê bô͘-hîng. I hō͘ hiah-ê sai-hū thàn bē-tsió tsîⁿ. 25 Tí-bí-tiu kā hiah-ê sai-hū kah só͘-ū ê tông-gia̍p tsū-tsi̍p uá-lâi, kā in kóng, "Kok-uī, lín tsai lán sī uá-khò tsit-ê tshiú-gē teh thàn-tsîⁿ. 26 Taⁿ tsit-ê Pó-lô, m̄-nā tī Í-hut-só͘, mā tī tsha-put-to tsuân A-se-a-síng, īng i ê káng-tō lâi bê-hi̍k tsin-tsē lâng, kóng īng lâng ê tshiú só͘ tsò ê lóng m̄-sī sîn-bîng. Tse sī lín só͘ khuàⁿ-tio̍h, só͘ thiaⁿ-tio̍h-.ê. 27 Án-ne lo̍h-khì, m̄-nā lán tsit-tsióng sū-gia̍p ē phah-pháiⁿ miâ-siaⁿ, hō͘ lâng guî-hiám hō͘ lâng khuàⁿ-khin, liân tuā lí-sîn A-tí-bí ê biō mā ē hō͘ lâng khuàⁿ-khin. Tsuân A-se-a-síng kah thiⁿ-ē só͘ pài ê A-tí-bí lí-sîn ē sit-khì i ê tsun-giâm!" 28 Kûn-tsiòng tsi̍t-ē thiaⁿ-tio̍h tsiah-ê uē tsiū hui-siông siū-khì, tuā-siaⁿ huah: "Uí-tāi ah! Í-hut-só͘-lâng ê A-tí-bí!" 29 Tsuân siâⁿ khí jiáu-luān. Tsìng-lâng lia̍h-tio̍h Pó-lô ê tâng-phuāⁿ, Má-kî-tùn-lâng Kai-iû kah A-lí-ta̍t-kó͘, kui-tīn tsò-tsi̍t-ē kheh ji̍p-khì hì-hn̂g. 30 Pó-lô siūⁿ-beh ji̍p-khì kûn-tsiòng ê lāi-bīn, m̄-koh bûn-tô͘ kā i tsó͘-tòng. 31 A-se-a-síng kuí-nā-ê kuaⁿ-tiúⁿ, sī Pó-lô ê pîng-iú, mā tshe lâng lâi khǹg Pó-lô m̄-thang mō͘-hiám ji̍p-khì hì-hn̂g. 32 Hit sî, kui-ê huē-tiûⁿ luān-tshau-tshau, tsi̍t-ê lâng huah tsi̍t khuán, tuā-pō͘-hūn ê lâng m̄-tsai in sī án-tsuáⁿ teh tsū-tsi̍p. 33 Kûn-tsiòng tiong-kan ū-lâng kā jiáu-luān ê tsik-jīm kui hō͘ A-li̍k-san-tāi, in-uī Iû-thài-lâng kā i sak-khì tsìn-tsîng. A-li̍k-san-tāi pí tshiú-sè kiò in an-tsīng, siūⁿ-beh tuì in piān-kái. 34 Tsìng-lâng tsi̍t-ē jīn-tshut i sī Iû-thài-lâng, tsiū tsê-siaⁿ huah: "Uí-tāi ah! Í-hut-só͘-lâng ê A-tí-bí!" Án-ne it-ti̍t huah, tsha-put-to huah nn̄g tiám-tsing kú. 35 Siâⁿ ê su-kì-kuaⁿ hō͘ kûn-tsiòng an-tsīng liáu-āu, tsiū kóng, "Í-hut-só͘-lâng ah, siáⁿ-lâng m̄-tsai Í-hut-só͘-lâng ê siâⁿ sī tuā A-tí-bí ê biō kah tuì thiⁿ-tíng lak lo̍h-lâi hit-tè sìng-tsio̍h ê siú-hō͘-tsiá? 36 Kì-jiân bô-lâng ē-tàng hó͘ⁿ-jīn tsit-hāng tāi-tsì, lín tio̍h an-tsīng, m̄-thang tshóng-pōng. 37 Hô-hòng tsiah-ê lâng bô thau-the̍h biō-lāi ê mi̍h, mā bô huí-pòng lán ê lí-sîn, lín kìng-jiân thua in lâi tsia. 38 Tí-bí-tiu kah hiah-ê uá i ê sai-hū nā beh khòng-kò, ū khui-tîng ê ji̍t-kî, mā ū tsóng-tok, tāi-ke thang tuà hia sio-kò. 39 Lín nā iáu-ū pa̍t-hāng tāi-tsì, thang tī tīng-kî ê huē-gī lâi kái-kuat. 40 Kin-á-ji̍t só͘ huat-sing ê jiáu-luān, khióng-kiaⁿ bē bián-tit hō͘ lâng tsa-mn̄g, koh kóng lán mā bô lí-iû thang piān-kái." 41 Kóng suah, i tsiū suan-pò͘ suàⁿ-huē.