《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十章

作者 巴克禮普世版小組 2011.06.05

1, Iâ-so͘ tsiū kiò I tsa̍p-jī ê bûn-tô͘ lâi, hō͘ in ū tsè-ap siâ-sîn ê kuân, lâi kuáⁿ-tio̍k in, suà i-hó ta̍k tsióng ê tsìng-thâu, ta̍k tsióng ê pēⁿ-thiàⁿ.
2, Tsa̍p-jī sù-tô͘ ê miâ tsiū-sī tsiah-ê: thâu-tsi̍t-ê Se-bûn( kiò tsò Pí-tik), kap i ê hiaⁿ-tī An-tik-lia̍t; Se-pí-thài ê kiáⁿ Ngá-kok, kap i ê hiaⁿ-tī Iok-hān;
3, Hui-li̍k, kap Pa-to-lô-mái; To-má, kap thiu-suè ê Má-thài; A-li̍k-hui ê kiáⁿ Ngá-kok, kap Ta̍t-thài;
4, Ka-ná-nî ê Se-bûn, kap Ka-lio̍k lâng Iû-tāi, tsiū-sī bē Iâ-so͘ ê.
5, Iâ-so͘ tshe tsit tsa̍p-jī lâng, suà huan-hù in kóng, Guā-pang ê lō͘ mài kiâⁿ, Sat-má-lī-a lâng ê siâⁿ mài ji̍p;
6, khah hó tio̍h khì tsiū-kūn Í-sik-lia̍t ke sit-lo̍h ê iûⁿ.
7, Kiâⁿ ê sî, tio̍h thuân kóng, Thian-kok kūn à.
8, I-hó ū pēⁿ ê; hō͘ sí ê koh-ua̍h; hō͘ thái-ko ê tshing-khì; kuáⁿ kuí; lín pe̍h-pe̍h tit-tio̍h, tio̍h pe̍h-pe̍h hō͘ lâng.
9, Lín ê io-tó͘ lāi, lóng m̄-thang ū kim, gûn, tâng;
10, lō͘-ni̍h iā bo̍h-tit ū hîng-lí-tē, bo̍h-tit nn̄g niá saⁿ, bo̍h-tit uê, bo̍h-tit kuáiⁿ-á; in-uī tsò-kang lâng kham-tit tit-tio̍h i ê lim-tsia̍h.
11, Lín só͘ ji̍p ê, bô lūn sím-mi̍h siâⁿ, sím-mi̍h hiuⁿ-lí, tio̍h thàm-thiaⁿ kî-tiong siáⁿ-lâng ē kham-tit, tsiū tiàm tī hia, kàu lī-khui ê sî.
12, Ji̍p hit ê tshù, tio̍h kā i tshíng-an.
13, Hit ê tshù nā ē kham-tit, tsiū hō͘ lín ê pîng-an kàu tī i; nā bē kham-tit, tsiū hō͘ lín ê pîng-an kui tī lín.
14, Kìⁿ-nā m̄ tsiap-la̍p lín, m̄ thiaⁿ lín ê ē ê, tshut hit ê tshù, hit ê siâⁿ ê sî, tio̍h puāⁿ-khì lín kha-ni̍h ê thô͘-hún.
15, Guá si̍t-tsāi kā lín kóng, Tng sím-phuàⁿ ê ji̍t, Só͘-to-má kap Gô͘-mô͘-la̍h ê tē-hng pí hit ê siâⁿ iáu khah khuài tam-tng.
16, Taⁿ guá tshe lín tshin-tshiūⁿ iûⁿ tī tshâi-lông ê tiong-kan; só͘-í lín tio̍h tì-sik tshin-tshiūⁿ tsuâ, sûn-liông tshin-tshiūⁿ hún-tsiáu.
17, Tān-sī tio̍h tî-hông lâng; in-uī in bueh tsiong lín kau hō͘ kong-huē, iā bueh tī lín ê huē-tn̂g piⁿ-phah lín;
18, koh lín iā bueh uī-tio̍h guá ê iân-kò͘, siū thua kàu tsóng-tok kap kun-ông ê bīn-tsîng, lâi tsò kiàn-tsìng tī in kap guā-pang lâng.
19, Tān-sī lín siū sàng-kau ê sî, bo̍h-tit khuà-lū bueh tsáiⁿ-iūⁿ kóng, á-sī kóng sím-mi̍h uē; in-uī só͘ tio̍h kóng ê, bueh tī hit sî siúⁿ-sù lín.
20, In-uī m̄-sī lín ka-kī kóng, sī lín ê Pē ê Sîn tiàm-tī lín teh kóng.
21, Hiaⁿ-tī bueh tsiong hiaⁿ-tī sàng-kau khì sí, pē khuán-thāi kiáⁿ iā án-ne; kiáⁿ-jî bueh khí-lâi kong-kik pē-bú, hō͘ in sí.
22, Ia̍h lín in-uī guá ê miâ bueh hō͘ tsìng lâng uàn-hūn, tsí-ū thun-lún kàu lō͘-bé ê, i bueh tit-tio̍h kiù.
23, Tī tsit-ê siâⁿ pik-hāi lín, tio̍h tsáu kàu hit siâⁿ; guá si̍t-tsāi kā lín kóng, Í-sik-lia̍t tsiah-ê siâⁿ, lín kiâⁿ bē thàng, Jîn-tsú tsiū kàu.
24, Bûn-tô͘ bē puâⁿ-kue3sian-siⁿ, lô͘-po̍k bē puâⁿ-kue3tsu2-lâng.
25, Bûn-tô͘ tshin-tshiūⁿ sian-siⁿ, lô͘-po̍k tshin-tshiūⁿ tsú-lâng, tsiū kàu-gia̍h. Lâng kì-jiân kiò ke-tsú tsò Pia̍t-se-pok, hô-hòng kiò i ke-lāi ê lâng.
26, Só͘-í m̄-bián kiaⁿ in; in-uī bô ū khàm-ba̍t āu-lâi bô lō͘-tshut ê sū; iā bô ū ún-ba̍t āu-lâi bô hō͘ lâng tsai ê.
27, Guá tī àm-tiong kā lín kóng ê, lín tio̍h tī kng-bîng ê só͘-tsāi kóng-tshut; àⁿ tī hīⁿ-khang kā lín kóng ê, tio̍h tī tshù-tíng thuân i.
28, Hiah-ê hāi-sí sin-khu, bē hāi-sí lîng-hûn ê, m̄-bián kiaⁿ in; tsí-ū hit-ê ē bia̍t lîng-hûn kap sin-khu tī tē-gi̍k ê, khah tio̍h kiaⁿ.
29, Nn̄g tsiah tshik-tsiáu-á kiám m̄-sī bē tsi̍t hun gûn mah? nā m̄-sī lín ê Pē ū tsún, tsi̍t tsiah iā bē ka-la̍uh tē;
30, lín ê thâu-mn̂g tsiū iā lóng kè-sǹg.
31, Só͘-í lín m̄-bián kiaⁿ; lín pí tsē-tsē tshik-tsiáu-á khah kuì-khì.
32, Só͘-í kìⁿ-nā tī lâng ê bīn-tsîng jīn guá ê, guá iā tī guá tī thiⁿ-tíng ê Pē ê bīn-tsîng bueh jīn i.
33, Kìⁿ-nā tī lâng ê bīn-tsîng m̄ jīn guá ê, guá iā tī guá tī thiⁿ-tíng ê Pē ê bīn-tsîng bueh m̄ jīn i.
34, Bo̍h-tit phah-sǹg guá lâi sī bueh hō͘ tē-tsiūⁿ hô-pîng; guá lâi m̄-sī bueh hō͘ i hô-pîng, tsiū-sī hiat-lo̍h to-kiàm.
35, In-uī guá lâi, sī hō͘ kiáⁿ kap i ê lāu-pē tsua̍t-tsîng, tsa-bó͘-kiáⁿ kap i ê lāu-bú, sim-pū kap i ê ta-ke, iā bueh án-ne.
36, Koh lâng ê tuì-ti̍k tsiū-sī i ka-kī ke-lāi ê lâng.
37, Thiàⁿ pē-bú khah kè-thâu tī thiàⁿ guá ê, bē kham-tit tī guá; thiàⁿ kiáⁿ tsa-bó͘-kiáⁿ khah kè-thâu tī thiàⁿ guá ê, bē kham-tit tī guá;
38, m̄ pē ka-kī ê si̍p-jī-kue3lai5 tuè tī guá ê āu-bīn ê, iā bē kham-tit tī guá.
39, Tit-tio̍h i ê sìⁿ-miā ê lâng, bueh sit-lo̍h i; uī-tio̍h guá sit-lo̍h i ê sìⁿ-miā ê lâng, bueh tit-tio̍h i.
40, Tsiap-la̍p lín ê, tsiū-sī tsiap-la̍p guá; tsiap-la̍p guá ê, tsiū-sī tsiap-la̍p tshe guá ê.
41, Uī-tio̍h sian-ti ê miâ lâi tsiap-la̍p sian-ti ê, bueh tit-tio̍h sian-ti ê siúⁿ; uī-tio̍h gī lâng ê miâ lâi tsiap-la̍p gī lâng ê, bueh tit-tio̍h gī lâng ê siúⁿ.
42, Kìⁿ-nā uī-tio̍h bûn-tô͘ ê miâ, kan-ta īng tsi̍t pue líng-tsuí hō͘ tsiah-ê suè-kiáⁿ ê tsi̍t ê lim ê, guá si̍t-tsāi kā lín kóng, i tsua̍t-tuì bē sit-lo̍h i ê siúⁿ.