《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十五章

作者 巴克禮普世版小組 2014.08.17

Pó-lô Tuì Lô-má Hông-tè Siōng-sò͘
1 Hui-su-to͘ tsiūⁿ-jīm saⁿ ji̍t, tsiū tuì Kai-sat-lī-a tsiūⁿ-khì Iâ-lō͘-sat-líng. 2 Tsè-si-tiúⁿ kah Iû-thài ê thâu-lâng, tuì i khòng-kò Pó-lô. 3 In tshíng-kiû tsiong Pó-lô sàng lâi Iâ-lō͘-sat-líng. In kè-bô͘ beh tī lō͘-tiong bâi-ho̍k beh kā i thâi-sí. 4 M̄-koh Hui-su-to͘ ìn kóng, "Pó-lô kuaiⁿ tī Kai-sat-lī-a, guá liâm-piⁿ mā beh tńg-khì hia. 5 Lín tiong-kan tsò-thâu ê lâng thang kah guá tsò-hué lo̍h-khì. Hit-ê lâng nā ū sím-mi̍h m̄-tio̍h, lín thang tī hia kā i kò." 6 Hui-su-to͘ tuà hia tsiâⁿ tsa̍p-ji̍t, tsiū tńg-khì Kai-sat-lī-a. Keh-tńg-ji̍t khui-tîng, i bīng-līng lâng khì tuà Pó-lô lâi. 7 Pó-lô tsi̍t-ē kàu-uī, tuì Iâ-lō͘-sat-líng lo̍h-lâi ê Iû-thài-lâng uî uá-lâi khiā tī i ê sì-tsiu-uî, īng tsin-tsē giâm-tiōng ê tsuē-miâ kā i kò, m̄-koh lóng the̍h bē tshut tsìng-kì. 8 Pó-lô uī ka-kī piān-kái kóng, "Guá tuì Iû-thài-lâng ê lu̍t-huat kah sìng-tiān, á-sī Lô-má hông-tè lóng m̄-bat huān-tio̍h sím-mi̍h tsuē." 9 M̄-koh Hui-su-to͘ uī-tio̍h beh hō͘ Iû-thài-lâng huaⁿ-hí, ìn Pó-lô kóng, "Lí guān-ì tsiūⁿ Iâ-lō͘-sat-líng, tī hia uī-tio̍h tsiah-ê kò-sò͘ tsiap-siū guá ê sím-phuàⁿ bô?" 10 Pó-lô kóng, "Guá tsit-má khiā tī Lô-má hông-tè ê huat-tîng, tong-jiân tio̍h tī tsia siū sím-phuàⁿ. Lí bîng-bîng tsai-iáⁿ guá tuì Iû-thài-lâng pīng-bô tsò sím-mi̍h m̄-tio̍h ê tāi-tsì. 11 Guá nā ū tsò m̄-tio̍h, á-sī huān-tio̍h kai-sí ê tsuē, guá tsua̍t-tuì bē tô-phiah, m̄-koh in tuì guá ê khòng-kò lóng bô tsi̍t-hāng sī sū-si̍t, bô-lâng ē-tàng tsiong guá kau hō͘ in. Guá beh tuì Lô-má hông-tè siōng-sò͘." 12 Hui-su-to͘ kah gī-huē tsò-hué tsham-siông liáu-āu, tsiū ìn kóng, "Lí kì-jiân í-king tuì Lô-má hông-tè siōng-sò͘, tsiū tio̍h khì hông-tè hia."

Hui-su-to͘ Tuì A-ki-phàⁿ-ông Pò-kò Pó-lô ê Tāi-tsì
13 Kuè kuí-nā ji̍t āu, A-ki-phàⁿ-ông kah Pik-nî-ki lâi-kàu Kai-sat-lī-a, kā Hui-su-to͘ tshíng-an. 14 In tī hia tuà kuí-nā ji̍t liáu-āu, Hui-su-to͘ tsiong Pó-lô ê tāi-tsì tuì A-ki-phàⁿ-ông pò-kò, kóng, "Tī tsia ū tsi̍t-ê Hui-li̍k-su lâu tī kaⁿ-ni̍h ê lâng. 15 Guá khì Iâ-lō͘-sat-líng ê sî, hiah-ê tsè-si-tiúⁿ kah Iû-thài ê tiúⁿ-ló ū kā i khòng-kò, iau-kiû guá kā i tīng-tsuē. 16 Guá kā in kóng, "Tsiàu Lô-má ê kuàn-lē, pī-kò kah guân-kò bô tuì-tsí í-tsîng, iáu-buē ū ki-huē uī ka-kī piān-hō͘, bē-tàng kā i tīng-tsuē. 17 Só͘-í in lóng tsū-tsi̍p kàu-uī, guá suî-sî tī keh-tńg-ji̍t khui-tîng, bīng-līng tuà hit-ê lâng lâi. 18 Guân-kò lóng khiā khí-lâi khòng-kò, m̄-koh só͘ kò ê m̄-sī guá só͘ siūⁿ ê hiah pháiⁿ. 19 Guân-kò kah i tsing-lūn tsí-put-kò sī in ka-kī ê tsong-kàu būn-tê, í-ki̍p tsi̍t-ê kiò-tsò Iâ-so͘ ê lâng ê tāi-tsì, I í-king sí, m̄-koh Pó-lô kóng i iáu ua̍h-teh. 20 Tsiah-ê tāi-tsì guá m̄-tsiah tio̍h án-tsuáⁿ tsa-mn̄g, só͘-í mn̄g Pó-lô kám guān-ì khì Iâ-lō͘-sat-líng, tī hia siū sím-mn̄g? 21 M̄-koh Pó-lô í-king hiòng hông-tè siōng-sò͘, ài guá kā i lâu tī tsia thìng-hāu hông-tè tshâi-kuat, só͘-í guá bīng-līng kā i khàu-liû kàu kau hō͘ hông-tè." 22 A-ki-phàⁿ kā Hui-su-to͘ kóng, "Guá ka-kī mā ài thiaⁿ tsit-ê lâng kóng-uē." Hui-su-to͘ kóng, "Bîn-á-ji̍t lí ē-tàng thiaⁿ i kóng." 23 Keh-tńg-ji̍t, A-ki-phàⁿ kah Pik-nî-ki ui-hong-lím-lím, tài-niá iâⁿ-tiúⁿ kah siâⁿ-lāi tsun-kuì ê lâng, ji̍p-lâi kong-huē-tn̂g. Hui-su-to͘ hā-līng, Pó-lô tsiū hō͘ lâng tuà tshut-lâi. 24 Hui-su-to͘ kóng, "A-ki-phàⁿ-ông kah tsāi-tsō ê kok-uī, lín khuàⁿ tsit-ê lâng, i tsiū-sī tī Iâ-lō͘-sat-líng kah tī tsia só͘-ū ê Iû-thài-lâng tuì guá tshíng-kiû, tuā-siaⁿ huah: tio̍h hō͘ i sí. 25 M̄-koh guá tshâ bô i ū huān-tio̍h sím-mi̍h kai-sí ê tsuē. I kì-jiân í-king tuì hông-tè siōng-sò͘, guá tshâi-kuat kā i sàng khì. 26 M̄-koh kuan-hē tsit-ê lâng guá bô khak-si̍t ê àn-tsîng thang tsàu hông-tè, só͘-í tuà i tshut-lâi tī lín ê bīn-tsîng, koh-khah iàu-kín tī A-ki-phàⁿ-ông lí ê bīn-tsîng, tī tshâ-bîng liáu-āu tsiah ū àn-tsîng thang tsàu. 27 In-uī tsiàu guá khuàⁿ, ah-sàng huān-lâng, nā bô tsí-bîng i ê àn-tsîng sī bô ha̍p-lí."