《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十六章

作者 巴克禮普世版小組 2014.08.24

Pó-lô Uī Ka-kī Piān-hō͘ A-ki-phàⁿ tuì Pó-lô kóng, "Tsún lí ka-kī piān-hō͘." Pó-lô tsiū tshun-tshiú piān-hō͘ kóng: 2 "A-ki-phàⁿ-ông, kin-á-ji̍t guá ē-tàng tī lí ê bīn-tsîng uī-tio̍h hō͘ Iû-thài-lâng khòng-kò ê tāi-tsì lâi piān-hō͘, hui-siông îng-hīng. 3 Ka-tsài in-uī lí tuì Iû-thài-lâng ê kui-lē kah in teh tsing-lūn ê būn-tê tsin liáu-kái, só͘-í kiû lí nāi-sim thiaⁿ guá kóng." 4 "Guá tsū siàu-liân kàu taⁿ, khí-thâu tī guá ê pún-kok, āu-lâi tī Iâ-lō͘-sat-líng, tsò-lâng án-tsuáⁿ, só͘-ū ê Iû-thài-lâng lóng tsai. 5 In í-king bat guá tsin kú, nā khíng ē-tàng uī guá tsò-tsìng, guá tsò tsi̍t-ê Huat-lī-sài-lâng, ū tsiàu guán tsong-kàu siōng giâm-keh kàu-phài ê iau-kiû teh sing-ua̍h. 6 Tsit-mà guá khiā tī tsia lâi siū sím-phuàⁿ, tsiū-sī in-uī ǹg-bāng Siōng-Tsú tuì guán tsó͘-sian ê ìng-ín ē si̍t-hiān. 7 Guán tsa̍p-jī tsi-tso̍k ê tông-pau mê-ji̍t jia̍t-sim kìng-pài, mā sī ǹg-bāng ta̍t-sîng tsit-ê ǹg-bāng. Ông ah, guá uī-tio̍h tsit-ê ǹg-bāng, tsiah hō͘ Iû-thài-lâng khòng-kò. 8 Siōng-Tsú hō͘ sí-lâng koh-ua̍h tsit-hāng tāi-tsì, lín Iû-thài-lâng ná-ē bē-tàng siong-sìn?" 9 "Í-tsîng guá pún-sin mā siūⁿ-kóng tio̍h īng ta̍k-khuán ê hong-huat lâi kong-kik Ná-sat-li̍k Iâ-so͘ ê miâ. 10 Guá tī Iâ-lō͘-sat-líng khak-si̍t ū án-ne tsò, m̄-nā ū tsè-si-tiúⁿ ê siū-kuân, lia̍h tsin-tsē sìn-tô͘ lâi kuaiⁿ-kaⁿ, koh tī in siū sí-hîng ê sî mā piáu-sī tsàn-tông. 11 Guá sî-siông tī ta̍k-ê huē-tn̂g kā in hîng-hua̍t, kiông-pik in kóng siat-to̍k ê uē, īng pō-li̍k tuì-thāi in. Sīm-tsí kàu guā-kok ê siâⁿ-tshī mā kā in pik-hāi."

Pó-lô Hué-kái ê King-kuè (St 9:1-19;22:6-16)
12 Hit sî, guá khì Tāi-má-sik ê sî, ū tuà tsè-si-tiúⁿ ê siū-kuân kah bīng-līng. 13 Ông ah, thàu tiong-tàu ê sî, guá tī lō͘-tiong khuàⁿ-tio̍h pí ji̍t-thâu khah kiông ê kng tuì thiⁿ-tíng tsiò lo̍h-lâi tī guá kah tâng-phuāⁿ ê sì-tsiu-uî. 14 Guán lóng pua̍h lo̍h-khì thô͘-kha, guá thiaⁿ-tio̍h ū siaⁿ īng Hi-pik-lâi-uē tuì guá kóng, 'Sò-lô, Sò-lô, lí ná-ē pik-hāi guá? lí án-ne tsò tshin-tshiūⁿ gû īng kha teh that ū tshì ê kùn-á, sī ka-kī teh thó phuê-thiàⁿ.' 15 Guá mn̄g kóng, 'Tsú ah, Lí sī siáⁿ-lâng?' Tsú kóng, 'Guá tsiū-sī lí só͘ pik-hāi ê Iâ-so͘. 16 M̄-koh lí tio̍h khiā khí-lâi, in-uī guá thiâu-tî tuì lí hián-hiān, sī beh siat-li̍p lí tsò tāi-tsì, tī lí só͘ khuàⁿ-tio̍h guá kah guá só͘ beh hián-hiān hō͘ lí khuàⁿ ê tāi-tsì lâi tsò kiàn-tsìng. 17 Guá beh Iû-thài-lâng kah Guā-pang-lâng tiong-kan kā lí kiù tshut-lâi. Taⁿ Guá beh tshe-phài lí khì Guā-pang-lâng hia, 18 khui in ê ba̍k-tsiu, hō͘ in lī-khui o͘-àm uat-tńg lâi kui-hiòng kng-bîng, lī-khui Sat-tàn ê kuân-sè lâi kui-hiòng Siōng-Tsú, tuì sìn Guá lâi tit-tio̍h sià-tsuē, koh sîng-siū tsò Siōng-Tsú suán-bîn ê tē-uī.'"

Pó-lô Suat-bîng I ê Kang-tsok
19 Só͘-í, A-ki-phàⁿ-ông, guá bô uî-puē tuì thiⁿ lâi ê īⁿ-siōng. 20 Guá sing tī Tāi-má-sik kah Iâ-lō͘-sat-líng, āu-lâi tī Iû-thài tsuân-tē, mā tuì Guā-pang-lâng thuân-tō, khǹg lâng tio̍h hué-kái lâi kui-hiòng Siōng-Tsú, koh tio̍h īng hîng-uî tsìng-bîng in tsin-tsiàⁿ ū hué-kái. 21 In-uī án-ne, Iû-thài-lâng tī sìng-tiān kā guá lia̍h koh siūⁿ-beh kā guá thâi. 22 M̄-koh kàu kin-á-ji̍t guá ū tit-tio̍h Siōng-Tsú ê pó-hō͘, ē-tàng khiā tī tsia, tuì tsun-kuì kah pi-bî ê lâng tsò kiàn-tsìng. Guá só͘ kóng ê kah sian-ti í-ki̍p Mô͘-se só͘ kóng ê uân-tsuân kāng-khuán, lóng sī kuan-hē tsiong-lâi beh huat-sing ê tāi-tsì, 23 tsiū-sī Ki-tok án-tsuáⁿ tio̍h siū-khó͘, tsiâⁿ-tsò thâu-tsi̍t-ê tuì sí-lâng-tiong koh-ua̍h ê tāi-tsì, thang tsiong tsín-kiù ê kng-bîng thuân hō͘ Iû-thài-lâng kah Guā-pang-lâng." 24 Pó-lô án-ne piān-kái ê sî, Hui-su-to͘ tuā-siaⁿ huah: "Pó-lô, lí teh khí-kông!? lí ha̍k-būn siuⁿ-kuân suah hō͘ lí khí-kông!" 25 Pó-lô kóng, "Hui-su-to͘ tāi-jîn, guá m̄-sī teh khí-kông, guá só͘ kóng ê uē tsin-si̍t koh tsìng-siông, in-uī ông lí tsai tsiah-ê tāi-tsì, guá tsiah hó-táⁿ tuì lí kóng. 26 Guá siong-sìn ông tuì tsit-hāng tāi-tsì tsin tshing-tshó, in-uī lâng-lâng lóng tsai tsit-hāng tāi-tsì. 27 A-ki-phàⁿ-ông, lí kám ū siong-sìn sian-ti? guá tsai lí ū sìn." 28 A-ki-phàⁿ tuì Pó-lô kóng, "Lí siūⁿ-kóng īng tsit kuí-kù uē tsiū beh sueh-ho̍k guá tsò Ki-tok-tô͘ ò͘!" 29 Pó-lô kóng, "bô-lūn kuí-kù-á á-sī tsin-tsē uē, guá khún-kiû Siōng-Tsú, m̄-nā hō͘ lí, mā hō͘ kin-á-ji̍t só͘-ū thiaⁿ guá kóng ê lâng, lóng kah guá kāng-khuán, m̄-koh bô tshiūⁿ guá án-ne hō͘ lâng īng thih-liān-á liān-teh." 30 Ông, tsóng-tok kah Pik-nî-ki í-ki̍p tī hia teh tsē ê lâng lóng khiā khí-lâi. 31 In thè tshut-khì liáu-āu tsò-hué tâm-lūn kóng, "Tsit-ê lâng pīng bô huān-tio̍h kai-sí á-sī tio̍h kuaiⁿ-kaⁿ ê tsuē." 32 A-ki-phàⁿ kā Hui-su-to͘ kóng, "Tsit-ê lâng nā bô tuì Lô-má hông-tè siōng-sò͘, tsá to̍h thang pàng i khì."