《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十七章

作者 巴克禮普世版小組 2014.08.31

Pó-lô Tsē-tsûn Khì Lô-má
1 Tsi̍t-ē kuat-tīng guán tio̍h tsē tsûn khì Ì-tāi-lī, tsiū tsiong Pó-lô kah līng-guā kuí-nā-ê huān-lâng, kau hō͘ hông-ka-kun Se-pa-sū-tok-iâⁿ miâ-kiò Iû-liû ê liân-tiúⁿ. 2 Guán tsē tsi̍t-tsiah tuì A-tāi-bí-tiân lâi ê tsûn, tsit-tsiah tsûn tú beh iân A-se-a-síng hái-kîⁿ kuí-nā ê káng-kháu. Ū tsi̍t-ê tuì Má-kî-tùn lâi ê Thiap-sat-lô-nî-ka-lâng A-lí-ta̍t-kó͘ kah guán tsò-hué khì. 3 Keh-tńg-ji̍t lâi-kàu Se-tùn. Iû-liû tsin tshin-tshiat khuán-thāi Pó-lô, tsún i lâi kìⁿ tsiah-ê pîng-iú, siū in ê tsiau-thāi. 4 Guán tuì hia koh khui tsûn, in-uī tuì-thâu-hong ê iân-kò͘, tsiū sūn Ku-pí-lō͘-tó siám-hong hit-pîng king-kuè. 5 Guán king-kuè Ki-lī-ka kah Pông-hui-lī-a ê guā-hái, lâi-kàu Lū-ka ê Muí-lah. 6 Tī hia liân-tiúⁿ tú-tio̍h tsi̍t-tsiah tuì A-li̍k-san-tāi lâi ê tsûn, beh khui khì Ì-tāi-lī, tsiū kiò guán tsē hit-tsiah tsûn. 7 Tsûn kiâⁿ tsin bān, king-kuè tsin-tsē ji̍t tsiah lâi-kàu Kik-nî-thó͘ ê guā-hái, in-uī siū hong tsó͘-tòng, guán tsiū sūn Kik-lí-tí-tó siám-hong hit pîng, kiâⁿ tuì Sat-mô͘-nî kuè-khì. 8 Guán ê tsûn iân hái-huāⁿ kiâⁿ, bián-kióng lâi-kàu lī Lah-se-a bô juā-hn̄g tsi̍t-ê miâ-kiò "an-tsuân-káng" ê siâⁿ. 9 Guán í-king tshiân tsin-tsē ji̍t, koh in-uī kìm-tsia̍h ê kî í-king kuè, kiâⁿ-tsûn tsin guî-hiám, Pó-lô khǹg tāi-ke, 10 kóng, "Kok-uī, guá khuàⁿ tsit-pái kiâⁿ-tsûn, m̄-nā huè-bu̍t kah tsûn, liân lán ê sèⁿ-miā to ē tú-tio̍h guî-hiám kah tuā sún-sit." 11 M̄-koh liân-tiúⁿ siong-sìn tsûn-tiúⁿ kah tsûn-tsú ê uē, bô beh thiaⁿ Pó-lô kóng ê uē. 12 Koh tī tsit-ê káng-kháu kuè tang-thiⁿ bô sik-ha̍p. Tuā-pō͘-hūn ê lâng tsàn-sîng khui tsûn lī-khui tsia, ǹg-bāng ē-tàng kuáⁿ-kàu Hui-nî-ki khì kuè tang-thiⁿ. Hui-nî-ki sī Kik-lí-tí-tó ê tsi̍t-ê káng-kháu, tsi̍t bīn ǹg tang-lâm, tsi̍t bīn ǹg tang-pak.

Tú-tio̍h Tuā Hong-íng
13 Hit sî, lâm hong bî-bî-á tshue-lâi, tāi-ke siūⁿ-kóng ē-tàng sūn-lī kàu bo̍k-tik-tē khí tiàⁿ, tsīn-liōng iân Kik-lí-tí-tó hái-kîⁿ kiâⁿ. 14 M̄-koh kuè bô juā-kú, tsi̍t-tsūn kiò-tsò "Iú-lah-ku-lûn" ê tang-pak kiông-kông tuì tó-sū tíng-bīn sàu lo̍h-lâi. 15 Tsûn tsi̍t-ē hō͘ hong sàu, tsih-tsài bē-tiâu, tsiū tshut-tsāi i phiau-liû. 16 Tsûn sái lâi-kàu tsi̍t-ê kiò-tsò Ko-tāi ê sió tó, guán bián-kióng ē-tàng siu sam-pán khí-lâi. 17 Sam-pán siu-khí-lâi tsûn-tíng liáu-āu, tsiū īng hong-huat khún-pa̍k tī tsûn-té, in-uī khióng-kiaⁿ ē tī Sài-ní-tí ê sua-tsiu khò-tshián, tsiū kā phâng kàng-lo̍h, tshut-tsāi tsûn khì phiau-liû. 18 Guán hō͘ hong-íng sàu kah tsin lī-hāi, keh-tńg-ji̍t tāi-ke tsiū khai-sí kā huè-bu̍t hiat lo̍h-hái. 19 Tē-saⁿ ji̍t, in koh tshin-tshiú kā tsûn-ni̍h ê khì-kū tàn lo̍h-hái. 20 Guán í-king kuí-nā-ji̍t kú bô khuàⁿ-tio̍h tsheⁿ kah ji̍t-thâu tshut-hiān, hong-íng kè-sio̍k phah kah tsin lī-hāi, guán tit-kiù ê ǹg-bāng lóng siau-sit khì à. 21 Tsìng-lâng tsin-kú bô tsia̍h, Pó-lô khiā tī in tiong-kan, kóng, "Kok-uī, lín tsîng nā thiaⁿ guá ê uē, bô khui-tsûn lī-khui Kik-lí-tí-tó, tsiū bē tú-tio̍h tsit-tsióng ê siong-hāi kah sún-sit. 22 Taⁿ guá khǹg lín the̍h-tshut ióng-khì, in-uī lín tiong-kan bô kah tsi̍t-ê lâng ē sòng-sit sèⁿ-miā, kan-taⁿ ē sit-lo̍h tsit-tsiah tsûn niā-niā. 23 In-uī guá só͘ sio̍k kah só͘ kìng-pài ê Siōng-Tsú, I ê thiⁿ-sài tsa-mê khiā tī guá sin-piⁿ, 24 tuì guá kóng, 'Pó-lô, m̄ bián kiaⁿ! lí it-tīng tio̍h khì khiā tuà Lô-má hông-tè ê bīn-tsîng. Siōng-Tsú í-king tsiong tsûn-lāi só͘-ū ê lâng kau-thok lí à.' 25 Só͘-í lán tio̍h ióng-kám, in-uī guá siong-sìn tāi-tsì ē tsiàu Siōng-Tsú kā guá kóng ê lâi si̍t-hiān. 26 M̄-koh lán it-tīng ē tī tsi̍t-ê hái-tó khò-tshián." 27 Kàu tē-tsa̍p-sì ji̍t ê àm-sî, guán phiau-liû tī A-tí-a-hái. Tsha-put-to tī puàⁿ-mê, tsuí-siú lia̍h-tsò teh-beh uá-kīn lio̍k-tē. 28 tsiū tàn thàm tsuí-tshim ê iân-tuī lo̍h-hái, thàm-tshut ū 40 kong-tshioh tshim, koh khì lio̍h-á tsìn-tsîng ê só͘-tsāi thàm, ū 30 kong-tshioh tshim. 29 Khióng-kiaⁿ lè-tio̍h tuā-tsio̍h, tsiū tī tsûn-bué pha sì-ê tiàⁿ, pik-tshiat ǹg-bāng kín thiⁿ kng. 30 Tsuí-siú siūⁿ beh lī-khui tsûn tô-tsáu, tsiū pàng sam-pán lo̍h-hái, ké-tsò beh tuì tsûn-thâu pha tiàⁿ. 31 Pó-lô tuì liân-tiúⁿ kah ping-á kóng, "Tsiah-ê lâng nā bô lâu tī tsûn-tíng, lín tsiū bô kiù." 32 Ping-á tsiū tsām-tn̄g sam-pán ê tuā-soh, tshut-tsāi i lâu khì. 33 Kàu thiⁿ beh kng ê sî, Pó-lô khǹg tāi-ke tio̍h tsia̍h, kóng, "Lín í-king tsa̍p-sì ji̍t kú lóng bô tsia̍h, 34 só͘-í guá khǹg lín tio̍h tsia̍h, tse sī kuan-hē lín ê tit-kiù, in-uī lín bô kah tsi̍t-ê lâng ē sit-lo̍h tsi̍t-ki thâu-mn̂g." 35 Pó-lô kóng suah, the̍h piáⁿ, tī tsìng-lâng ê bīn-tsîng kám-siā Siōng-Tsú liáu-āu, kā piáⁿ peh-khui lâi tsia̍h. 36 Tāi-ke sim tsiū tiāⁿ lo̍h-lâi, lóng the̍h mi̍h-kiāⁿ lâi tsia̍h. 37 Kah guán kāng-tsûn tsóng-kiōng ū nn̄g-pah tshit-tsa̍p-la̍k lâng. 38 Tāi-ke tsia̍h pá, kā be̍h-á hiat lo̍h-hái, thang hō͘ tsûn khah khin.

Tsûn Khò-tshián
39 Kàu thiⁿ kng, tsuí-siú m̄-bat hit-ê só͘-tsāi, m̄-koh ū khuàⁿ-tio̍h tsi̍t-ê hái-uan ū sua-than, tsiū tsò-hué siūⁿ-khuàⁿ ē-tàng kā tsûn sái-tsiūⁿ tíng-bīn á-bē. 40 In kā tiàⁿ-soh tsám-tn̄g, pàng lo̍h-khì hái-ni̍h, mā tháu-khui tiàu tsûn-tuā ê soh, kā tsûn-thâu ê phâng tiàu khí-lâi hō͘ i tsia̍h hong, kā tsûn sái tsiūⁿ sua-than. 41 M̄-koh tsûn lè-tio̍h sua-than tsiū khò tshián, tsûn-thâu kā-tiâu-teh bē tín-tāng, tsûn-bué hō͘ tuā-íng phah phuà. 42 Ping-á kiaⁿ huān-lâng siû-tsuí tô-tsáu, siūⁿ-beh kā in lóng thâi-sí. 43 M̄-koh liân-tiúⁿ ài-beh kiù Pó-lô, tsiū kā in tsó͘-tòng, bīng-līng ē siû-tsuí ê lâng sing thiàu lo̍h-tsuí tsiūⁿ-huāⁿ. 44 Kî-tha ê lâng tsiah lī-iōng tsûn-pang á-sī tsûn-tíng ē phû ê mi̍h tsiūⁿ-huāⁿ. Án-ne, guán tsuân-pō͘ lóng an-tsuân tsiūⁿ-huāⁿ.