《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十八章

作者 巴克禮普世版小組 2014.09.07

Tī Bí-lī-tāi
1 Guán tsiūⁿ-huāⁿ liáu-āu tsiah tsai-iáⁿ hit-ê tó-sū miâ-kiò Bí-lī-tāi(Tsù:hiān-kim kiò-tsò Má-ní-tha). 2 Tong-tē ê guân-tsū-bîn tsin tshin-tshiat khuán-thāi guán, in-uī lo̍h-hō͘ koh kuâⁿ, in tsiū khí-hué kā guán tsiap-thāi. 3 Pó-lô khioh tsi̍t-pé tshâ hiat lo̍h-khì hué-ni̍h, in-uī hué jia̍t, ū to̍k-tsuâ tsông tshut-lâi, tîⁿ-tiâu tī i ê tshiú. 4 Guân-tsū-bîn khuàⁿ-tio̍h hit-bué to̍k-tsuâ tiâu tī i ê tshiú, tsiū tsò-hué kóng, "Tsit-ê lâng it-tīng sī hiong-siú, sui-jiân tuì hái-ni̍h khioh-tio̍h miā, thian-lí bē iông-ín i ua̍h." 5 Pó-lô kā to̍k-tsuâ hiù lo̍h-khì hué-ni̍h, i lóng bô siū siong. 6 Guân-tsū-bîn lóng teh thìng-hāu i ê tshiú tsíng khí-lâi, á-sī hut-jiân-kan tò lo̍h-khì sí. In thìng-hāu tsin-kú, khuàⁿ-tio̍h i lóng bô tāi-tsì, tsiū tian-tò siūⁿ-kóng i sī sîn-bîng. 7 Hái-tó ê thâu-lâng Pō͘-pik-liû, lī hia bô juā-hn̄g ê só͘-tsāi ū tsi̍t-tè tshân-hn̂g. I huan-gîng guán khì tuà hia saⁿ-ji̍t kú, tsin hó-lé kā guán khuán-thāi. 8 Hit sî, Pō͘-pik-liû ê lāu-pē huān-tio̍h jia̍t-pēⁿ kah tshiah-lī, tó-tī bîn-tshn̂g. Pó-lô ji̍p-khì kā i huāⁿ-tshiú kî-tó, tsiū i-hó i ê pēⁿ. 9 In-uī án-ne, tó-sū tiong phuà-pēⁿ ê lâng mā lâi hō͘ i i-hó. 10 In sàng guán tsin-tsē lé-mi̍h. Guán beh khui tsûn ê sî, tsiong guán su-iàu ê mi̍h sàng kàu tsûn-ni̍h hō͘ guán.

Tuì Bí-lī-tāi Khì Lô-má
11 Saⁿ kò-gue̍h āu, guán tah A-li̍k-san-tāi ê tsûn tshut-huat, hit-tsiah tsûn hō-tsò "Tiū-su ê Siang-seⁿ-á-kiáⁿ", sī tī tsit-ê tó-sū kuè tang-thiⁿ. 12 Guán tī Sū-lah-kó͘ tsiūⁿ-huāⁿ, tuà hia thîng-liû saⁿ ji̍t. 13 Tuì hia se̍h-kàu Lī-kî-ong. Keh-tńg-ji̍t ū thàu lâm-hong, tē-jī ji̍t tsiū kàu Pō͘-tiu-lī;. 14 Tī hia guán tú-tio̍h tsi̍t-kuá sìn-tô͘, in tshiáⁿ guán kah in tsò-hué tuà tshit ji̍t. Āu-lâi guán tsiū kàu Lô-má. 15 Lô-má ê sìn-tô͘ thiaⁿ-tio̍h guán ê siau-sit, tsiū tuì hia lâi-kàu A-pí-o͘ tshī kah Sam-kuán ê só͘-tsāi kā guán gîng-tsiap. Pó-lô khuàⁿ-tio̍h in tsiū kám-siā Siōng-Tsú, koh-khah tsòng-táⁿ khí-lâi.

Pó-lô Tī Lô-má
16 Guán kàu Lô-má liáu-āu, tsún Pó-lô kah khàn-siú i ê ping-á līng-guā tuà. 17 Saⁿ ji̍t āu, Pó-lô tshiáⁿ Iû-thài-lâng ê thâu-lâng lâi siong-huē. In tsū-tsi̍p liáu-āu, Pó-lô tsiū tuì in kóng, "Hiaⁿ-tī tsí-muē ah, guá sui-jiân m̄-bat huān-tio̍h tuì-put-khí lán ê tông-pau á-sī tsó͘-sian ê kui-lē, m̄-koh tuì Iâ-lō͘-sat-líng siū lia̍h hō͘ lâng sàng-kau Lô-má tong-kio̍k. 18 In í-king kā guá sím-phuàⁿ, khuàⁿ guá bô huān-tio̍h kai-sí ê tsuē, tsiū siūⁿ-beh pàng guá. 19 M̄-koh Iû-thài-lâng huán-tuì, guá put-tik-í tsiah tuì Lô-má hông-tè siōng-sò͘. Kî-si̍t guá bô ì-sù beh khòng-kò ka-kī ê tông-pau. 20 In-uī án-ne guá tsiah tshiáⁿ lín lâi kìⁿ-bīn, tsò-hué thó-lūn. Guá sī uī-tio̍h Í-sik-lia̍t só͘ ǹg-bāng Hit-uī tsiah siū tsit-ê thih-liān-á khún-pa̍k." 21 In tuì Pó-lô kóng, "Guán m̄-bat tuì Iû-thài tsiap-tio̍h phue kóng kàu lí ê tāi-tsì, mā bô sím-mi̍h hiaⁿ-tī kàu tsia thong-pò, á-sī kóng lí ê pháiⁿ-uē. 22 M̄-koh guán ài thiaⁿ lí ê ì-kiàn, in-uī guán tsai lín tsit phài ê lâng ta̍k só͘-tsāi hō͘ lâng huán-tuì." 23 In kah Pó-lô iok-tīng ji̍t-kî, ū tsin-tsē lâng lâi-kàu i tuà ê tshù. Tuì tsá kàu àm, Pó-lô uī-tio̍h Siōng-Tsú ê Kok-tō͘ tsò kiàn-tsìng, ín-iōng Mô͘-se ê lu̍t-huat kah sian-ti ê tsheh, khuàn-bián in lâi sìn Iâ-so͘. 24 I só͘ kóng ê uē, ū-lâng sìn, ū-lâng m̄-sìn. 25 Nn̄g pîng tiong-kan ì-kiàn bē ha̍p tsiū sì-suàⁿ. Pó-lô sing kóng tsi̍t-kù uē, kóng, "Sìng-Sîn thok sian-ti Í-sài-a ê tshuì, kā lín ê tsó͘-sian só͘ kóng ê uē tsin tio̍h! 26 I kóng, 'Khì kā tsit-ê tsú-bîn kóng, Lín thiaⁿ koh thiaⁿ, mā lóng bē bîng-pi̍k; Lín khuàⁿ koh khuàⁿ, mā lóng bē khuàⁿ-kìⁿ. 27 In-uī tsit-ê tsú-bîn sim tūn, Hī-khang tāng, Ba̍k-tsiu pàng kheh-kheh; In nā īng ba̍k-tsiu khuàⁿ-tio̍h, Īng hīⁿ-khang thiaⁿ-tio̍h, Īng sim bîng-pi̍k, Tsiū ē huê-sim tsuán-ì, Guá tsiū kā in i-hó."( tsù: ISA 6:9-10) 28 Só͘-í lín tio̍h tsai, Siōng-Tsú tsit ê tsín-kiù ê sìn-sit í-king thuân hō͘ Guā-pang-lâng. In ē thiaⁿ koh ē tsiap-siū. 29 (Ū ê pán-pún ū 29 tsat: Pó-lô kóng tsiah-ê uē liáu-āu, hiah-ê Iû-thài-lâng gī-lūn hun-hun, tsiū lī-khui hia.) 30 Pó-lô tuà ka-kī suè ê tshù nn̄g-nî kú. Lâi hóng-būn ê lâng, i lóng kā in tsiap-thāi. 31 I hó-táⁿ suan-iông Siōng-Tsú ê Kok-tō͘, koh tsiong Tsú Iâ-so͘ Ki-tok ê hok-im kà-sī lâng, lóng bô siū lâng tsó͘-tòng.