《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第一章

作者 巴克禮普世版小組 2014.09.14

Tshíng-an
1 Guá sī Iâ-so͘ Ki-tok ê kang-lâng Pó-lô, Siōng-Tsú suán-tiàu guá tsò sù-tô͘, tshe-phài guá lâi thuân I ê hok-im. 2 Tsit-ê hok-im sī Siōng-Tsú tsiok-kú í-tsîng to̍h thong-kuè I ê tsìng sian-ti, kì-tsài tī Sìng-king ê ìng-ín. 3 Tse sī kuan-hē I ê Kiáⁿ, lán ê Tsú Iâ-so͘ Ki-tok ê tāi-tsì. Tuì jîn-sìng lâi kóng, I sī Tāi-pi̍t ê kiáⁿ-sun. 4 Tsiàu sìng-kiat ê Sìng-Sîn lâi kóng, Siōng-Tsú hō͘ I tuì sí-lâng-tiong koh-ua̍h, īng tsit-ê tuā kuân-lîng lâi hián-bîng I sī Siōng-Tsú ê Kiáⁿ. I tsiū-sī lán ê Tsú Iâ-so͘ Ki-tok. 5 Guán niá-siū I ê un-sù tsiâⁿ-tsò sù-tô͘, uī-tio̍h Ki-tok ê miâ, beh ín-tshuā bān-bîn lâi sìn koh sūn-ho̍k tsit-ê hok-im. 6 Mā pau-hâm lín tsiah-ê siū Siōng-Tsú ê suán-tiàu, lâi kui-sio̍k Iâ-so͘ Ki-tok ê lâng. 7 Guá siá tsit-tiuⁿ phue hō͘ só͘-ū tuà tī Lô-má, Siōng-Tsú só͘ thiàⁿ, siū kíng-tiàu tsò I ê sìn-tô͘ ê lâng. Guān lán ê Thiⁿ-Pē Siōng-Tsú kah Tsú Iâ-so͘ Ki-tok, sù lìn un-tián kah pîng-an!

Kám-siā ê Kî-tó
8 Tāi-sing, guá thong-kuè Iâ-so͘ Ki-tok, uī-tio̍h lín tāi-ke kám-siā guá ê Siōng-Tsú, in-uī lín ê sìn-gióng í-king thuân kàu tsuân sè-kài. 9 Guá tsuân-sim tsuân-ì teh sū-hōng Siōng-Tsú, suan-iông kuan-hē I ê Kiáⁿ ê hok-im. Siōng-Tsú ē thè guá tsò-tsìng, guá siông-siông tī kî-tó tiong siàu-liām lín, 10 put-sî tī kî-tó-tiong, khún-kiû Siōng-Tsú tsiàu I ê hó tsí-ì, hō͘ guá ū ki-huē sūn-lī khì-kàu lín hia. 11 Guá tsin ài khì kìⁿ lín, thang tsiong lîng-sìng ê un-sù pun hō͘ lin, hō͘ lín koh-khah kian-kiông. 12 Tsiū-sī kóng guá kàu lín tiong-kan ê sî-tsūn, thong-kuè lí-guá sìn-gióng ê hun-hióng, lán ē-tàng hō͘-siong tit-tio̍h kó͘-lē. 13 Kok-uī hiaⁿ-tī tsí-muē, guá tsin ài lín tsai, guá kuí-nā pái kè-uē beh-khì hóng-būn lin, thang tshin-tshiūⁿ tī kî-thaⁿ Guā-pang-lâng ê tiong-kan kāng-khuán, mā tī lín tiong-kan siu-sîng tsi̍t-kuá kué-tsí, m̄-koh kàu taⁿ iáu ū tsó͘-tòng. 14 Bô-lūn sím-mi̍h khuán lâng, ū khai-huà-.ê, á-sī bī-khai-huà-.ê; ū tì-huī-.ê, á-sī bô tì-huī-.ê, guá lóng tuì in ū tsik-jīm. 15 Só͘-í guá pik-tshiat ǹg-bāng, ē-tàng kā hok-im thuân hō͘ lín tī Lô-má ê lâng.

Hok-im Sī Siōng-Tsú ê Tuā Lîng-li̍k
16 Guá bô khuàⁿ hok-im tsò kiàn-siàu, in-uī tsit-ê hok-im sī Siōng-Tsú ê tuā lîng-li̍k, beh tsín-kiù só͘-ū sìn ê lâng, tāi-sing sī Iû-thài-lâng, jiân-āu tsiah Hi-lia̍p-lâng. 17 In-uī tsit-ê hok-im ū khé-sī Siōng-Tsú ê gī, tsit-ê gī tuì thâu kàu bué lóng sī thong-kuè sìn lâi tit-tio̍h. Tsiàu Sìng-king só͘ kì-tsài, “Gī ê lâng ē tuì sìn lâi ua̍h.”( tsù: HPK 2:4)

Jîn-luī ê Tsuē
18 Siōng-Tsú tuì thiⁿ-tíng, hiòng hiah-ê put-khiân put-gī ê lâng hián-tshut I ê siū-khì, in-uī in ê put-khiân put-gī tsó͘-tòng lâng lâi bat tsin-lí. 19 Kì-jiân Siōng-Tsú ū tuì in khé-sī, in tuì I ê jīn-bat ing-kai tsin tshing-tshó tsiah tio̍h. 20 Tsū tshòng-sè í-lâi, lâng khuàⁿ bē-tio̍h Hit-ê Siōng-Tsú ê pún-sìng, tsiū-sī I íng-uán ê tuā lîng-li̍k kah sîn-sìng, lâng nā khuàⁿ-tio̍h I só͘ tshòng-tsō ê mi̍h tsiū ē-tàng tsai-iáⁿ, só͘-í lâng lóng bô piān-kái ê î-tē. 21 In sui-jiân bat Siōng-Tsú khiok bô tsun-tiōng I, mā bô kā I kám-siā. In ê sim-su huán-tńg hām-lo̍h tī bô si̍t-tsāi ê thui-lí, bē bîng-pi̍k ê sim-su tshiong-muá o͘-àm. 22 In lia̍h ka-kī tsò tshong-bîng, kî-si̍t sī gû-gōng. 23 In bô tsiong îng-kng kui hō͘ íng-uán-ua̍h ê Siōng-Tsú, tian-tó khì pài ē sí-bia̍t ê lâng, pue-tsiáu, khîm-siù, á-sī thâng-luī ê hîng-thé só͘ tsò ê ngó͘-siōng. 24 Só͘-í Siōng-Tsú tshut-tsāi in tsiàu ka-kī ê su-io̍k, khì tsò bô tshing-khì ê tāi-tsì, hō͘ in ê jio̍k-thé hō͘-siōng lâi tsò kiàn-siàu ê tāi-tsì. 25 In īng pe̍h-tsha̍t-uē tāi-thè Siōng-Tsú ê tsin-lí, in ho̍k-sāi siū-tsō-bu̍t, bô kìng-pài Hit-uī tsō-bu̍t ê Tsú, I tsiah sī ing-kai íng-uán siū o-ló-.ê. Amen. 26 In-uī án-ne, Siōng-Tsú tshut-tsāi in hòng-tshiòng tsîng-io̍k khì tsò it-puaⁿ-lâng kám-kak kiàn-siàu ê tāi-tsì, tsa-bó͘-lâng kah tsa-bó͘-lâng, īng huán-tsū-jiân ê sìng-kuan-hē, lâi tāi-thè kah tsa-po͘-lâng ê tsū-jiân sìng-kuan-hē. 27 Tsa-po͘-lâng mā kāng-khuán pàng-sak kah tsa-bó͘-lâng tsū-jiân ê sìng-kuan-hē, tsa-po͘-lâng kah tsa-po͘-lâng pí-tshú io̍k-hué-hûn-sin, tsò kiàn-siàu ê tāi-tsì. Kiat-kó tio̍h siū tsit-khuán piàn-thài ê hîng-uî só͘ ing-kai tú-tio̍h ê pò-ìng. 28 In kì-jiân bô beh tsin-tsiàⁿ jīn-bat Siōng-Tsú, Siōng-Tsú tsiū tshut-tsāi in īng pāi-huāi ê sim-su, khì-tsò bô ing-kai tsò ê tāi-tsì. 29 In tshiong-muá ta̍k-khuán ê put-gī, siâ-ok, tham-sim, ok-to̍k, uàn-tò͘, hiong-sat, tàu-tsing, kan-tsà, im-bô͘, kóng lâng ê kha-tsiah-āu-uē, 30 huí-pòng lâng, uàn-hūn Siōng-Tsú, bú-jio̍k lâng, kiau-ngō͘, khua-kháu, tsè-tsō sī-hui, ngó͘-gi̍k pē-bú, 31 bô liông-sim, bô siú-iok, bô-tsîng, bô liân-bín. 32 In sui-jiân tsai, tsiàu Siōng-Tsú ê kài-bīng, tsò tsiah-ê tāi-tsì ê lâng ing-kai sí. In m̄-nā ka-kī tsò, sīm-tsì mā tsàn-sîng pa̍t-lâng án-ne tsò.