《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十一章

作者 巴克禮普世版小組 2011.06.12

1, Iâ-so͘ huan-hù I tsa̍p-jī ê bûn-tô͘ bîng-pi̍k, tsiū lī-khui hia, bueh tī in hiah-ê siâⁿ kà-sī lâng kap thuân-tō.
2, Iok-hān tī kaⁿ-ni̍h thiaⁿ-tio̍h Ki-tok só͘ kiâⁿ ê sū; tsiū tshe bûn-tô͘ mn̄g I kóng,
3, Só͘ bueh lâi ê, sī lí mah? á-sī guán tio̍h ǹg-bāng pa̍t lâng ah?
4, Iâ-so͘ ìn kóng, Lín tio̍h khì, tsiong lín só͘ thiaⁿ-tio̍h só͘ khuàⁿ-tio̍h ê, kā Iok-hān kóng;
5, tsiū-sī tshiⁿ-mî ê khuàⁿ-tio̍h, pái-kha ê kiâⁿ, thái-ko ê tshing-khì, tshàu-hī-lâng ê thiaⁿ-tio̍h, sí ê lâng koh-ua̍h, sàn-tshiah lâng tit-tio̍h thiaⁿ hok-im.
6, Kìⁿ-nā bô tī guá lâi kha that-tio̍h ê, ū hok-khì.
7, In khì ê sî, Iâ-so͘ tsiah thê-khí Iok-hān, kā tsìng lâng kóng, Lín tsîng tshut-khì khòng-iá, bueh khuàⁿ sím-mi̍h? Sī lô͘-tik hō͘ hong tshe tín-tāng mah?
8, Lín tshut-khì ài khuàⁿ sím-mi̍h? Sī lâng tshīng iù-nńg ê i-tsiûⁿ mah? Lí khuàⁿ, tshīng iù-nńg ê sī tī ông-kiong.
9, Tān-sī án-ne lín tshut-khì bueh siáⁿ-sū? Sī bueh khuàⁿ sian-ti mah? Sī à. Guá kā lín kóng, i sī iáu khah iâⁿ-kue3sian-ti.
10, Tsit-ê lâng tsiū-sī king-ni̍h só͘ tsí ê, kóng, Guá tshe guá ê sù-tsiá tī lí ê bīn-tsîng; I bueh tī lí ê thâu-tsîng tsún-pī lí ê lō͘.
11, Guá si̍t-tsāi kā lín kóng, Hū-jîn-lâng só͘ seⁿ ê, tsiông-tiong bē ū hing-khí khah tuā tī si-sé-tsiá Iok-hān; tān-sī tī Thian-kok ê bî-suè ê, iáu khah tuā i.
12, Tuì kiâⁿ sé-lé Iok-hān ê sî-ji̍t kàu taⁿ, Thian-kok hō͘ lâng kiông-kiông tshú, kiông ê lâng īng la̍t tshú i.
13, In-uī tsìng sian-ti kap lu̍t-huat ū ū-giân kàu Iok-hān ê sî.
14, Lín nā kam-guān sîng-siū, tsit-ê lâng tsiū-sī teh-bueh lâi ê Í-lī-a.
15, Ū hīⁿ-khang thang thiaⁿ ê, tio̍h thiaⁿ.
16, Tsit sè-tāi guá bueh īng sím-mi̍h lâi pí-phīng i? Sī tshin-tshiūⁿ gín-ná tsē tī kue-tshī-ni̍h, lâi kiò in ê tâng-phuāⁿ kóng,
17, Guán tuì lín pûn ta̍t-á, lín bô thiàu-bú; guán bat pi-ai, lín bô tuî hing.
18, In-uī Iok-hān lâi, bô tsia̍h bô lim; lâng tsiū kóng, I huān-tio̍h kuí.
19, Jîn-tsú lâi iā tsia̍h iā lim; lâng tsiū kóng, I sī tham-tsia̍h hò͘ⁿ-tsiú ê lâng, thiu-suè kap pháiⁿ lâng ê pîng-iú. Tān-sī Tì-huī tuì i ê só͘ kiâⁿ hián-bîng i sī tio̍h.
20, Iâ-so͘ bat tī hiah-ê siâⁿ kiâⁿ tsē-tsē kuân-lîng, in-uī in lóng bô hué-kái, hit sî tsiah tsik-pī in kóng,
21, Ko-lia̍p-sìn ah, lí ū tsai-ē! Pik-sài-tāi ah, lí ū tsai-ē! in-uī tī lín tiong-kan só͘ kiâⁿ tsiah-ê kuân-lîng, nā ū kiâⁿ tī Tshui-lô kap Se-tùn, in tsiū tsá-tsá tshīng muâ saⁿ sám hué-hu lâi hué-kái.
22, Tān-sī guá kā lín kóng, tng sím-phuàⁿ ê ji̍t, Tshui-lô kap Se-tùn pí lín iáu khah khuài tam-tng.
23, Ka-pik-lông ah, lí kiám ē tit-tio̍h kú-khí kàu thiⁿ mah? lí bueh tuī-lo̍h im-hú; in-uī tī lí ê tiong-kan só͘ kiâⁿ tsiah-ê kuân-lîng, nā ū kiâⁿ tī Só͘-to-má, tsiū kàu kin-á-ji̍t i iáu tī-teh.
24, Tān-sī guá kā lín kóng, tng sím-phuàⁿ ê ji̍t, Só͘-to-má ê tē-hng pí lí khah khuài tam-tng.
25, Hit tong-sî Iâ-so͘ ìn kóng, Pē ah, thiⁿ-tē ê Tsú, guá o-ló lí, in-uī lí tsiong tsiah-ê sū, tuì tì-huī tshang-miâ ê ū ún-ba̍t i, tuì suè-kiáⁿ ū hián-bîng i;
26, Pē ah, sī à; in-uī lí khuàⁿ án-ne tsò huaⁿ-hí.
27, Bān-hāng-ū tuì guá ê Pē kau-hù guá, Pē í-guā bô tsi̍t-ê bat Kiáⁿ; Kiáⁿ kap Kiáⁿ só͘ ài bueh tsí-sī ê í-guā, bô tsi̍t-ê bat Pē.
28, Lín kìⁿ-nā lô-khó͘ taⁿ tāng-tàⁿ ê, tio̍h tsiū-kūn guá; guá bueh hō͘ lín an-hioh.
29, Guá sim-lāi un-jiû khiam-sùn; lín pē guá ê taⁿ, lâi tuì guá o̍h, lín ê sim-sîn tsiū ē tit-tio̍h an-hioh. 30 In-uī guá ê taⁿ sī khuài, guá ê tàⁿ sī khin.