《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第八章

作者 巴克禮普世版小組 2014.11.02

Sūn-ho̍k Sìng-Sîn ê Sing-ua̍h
1 Nā-sī án-ne, hiah-ê kah Ki-tok Iâ-so͘ kiat-liân ê lâng tsiū bē siū tīng-tsuē. 2 In-uī thong-kuè Ki-tok Iâ-so͘ sù ua̍h-miā ê Sìng-Sîn ê huat-tsik, í-king tháu-pàng guá thuat-lī tsuē kah sí ê huat-tsik. 3 In-uī jîn-sìng ê luán-jio̍k, lu̍t-huat tsò bē-kàu ê, Siōng-Tsú ū tsò-tsiâⁿ. Siōng-Tsú uī-tio̍h beh kiù jîn-luī thuat-lī tsuē kah sí ê huat-tsik, I hō͘ ka-kī ê Kiáⁿ tshái-tshú kah lán kāng-khuán ū tsuē ê pún-sìng,īng I ê jio̍k-thé lâi sím-phuàⁿ jîn-luī jio̍k-thé ê tsuē, kā tsuē tû-khì. 4 Siōng-Tsú án-ne tsò sī beh hō͘ lu̍t-huat ê iau-kiû ē-tàng si̍t-hiān tī lán tsiah-ê bô-koh tsiàu jio̍k-thé, sī tsiàu Sìng-Sîn ê ín-tshuā teh sing-ua̍h ê lâng. 5 In-uī sūn-ho̍k jio̍k-thé pún-sìng ê lâng, ì-hiòng jio̍k-thé ê tāi-tsì, sūn-ho̍k Sìng-Sîn ê lâng, ì-hiòng Sìng-Sîn ê tāi-tsì. 6 Ì-hiòng jio̍k-thé ê kiat-kó sī sí, ì-hiòng Sìng-Sîn ê kiat-kó sī ua̍h-miā kah pîng-an. 7 Án-ne ì-hiòng jio̍k-thé sī kah Siōng-Tsú tuì-ti̍k, in-uī bô sūn-ho̍k Siōng-Tsú ê lu̍t-huat, kî-si̍t mā bô huat-tō͘ sūn-ho̍k. 8 Sūn-ho̍k jio̍k-thé pún-sìng ê lâng bē-tàng hō͘ Siōng-Tsú huaⁿ-hí. 9 Kì-jiân Siōng-Tsú ê Sìng-Sîn ū tiàm-tī lín lāi-bīn, lín tsiū m̄-sī sio̍k jio̍k-thé pún-sìng, sī sio̍k Sìng-Sîn. Lâng nā bô Ki-tok ê Sìng-Sîn tsiū bô sio̍k tī Ki-tok. 10 Ki-tok nā tiàm-tī lín lāi-bīn, sui-jiân lín ê sing-khu in-uī tsuē sí, Sìng-Sîn hō͘ lín iáu-koh ua̍h-teh, in-uī lín í-king kah Siōng-Tsú ū sì-tsiàⁿ ê kuan-hē. 11 Hō͘ Iâ-so͘ tuì sí-lâng tiong koh-ua̍h Hit-uī ê Sìng-Sîn tiàm-tī lín lāi-bīn, tsiū-sī hō͘ Ki-tok Iâ-so͘ tuì sí-lâng tiong koh-ua̍h Hit-uī ē thong-kuè tiàm-tī lín lāi-bīn ê Sìng-Sîn ē hō͘ lín tsù-tiāⁿ ē sí ê sing-khu tit-tio̍h ua̍h-miā. 12 Án-ne khuàⁿ khí-lâi, kok-uī hiaⁿ-tī ah, lán ū khiàm-tsè, m̄-koh m̄-sī khiàm jio̍k-thé pún-sìng ê tsè, só͘-í lán sing-ua̍h tiong m̄-thang sūn-ho̍k jio̍k-thé pún-sìng. 13 Lín nā sūn-ho̍k jio̍k-thé ê tsuē-sìng, lín it-tīng ē sí; lín nā khò Sìng-Sîn tû-khì tsuē-sìng ê só͘-tsò, tsiū ē ua̍h teh. 14 Só͘-ū hō͘ Siōng-Tsú ê Sìng-Sîn ín-tshuā ê lâng, lóng sī Siōng-Tsú ê kiáⁿ-jî. 15 In-uī lín tuì Siōng-Tsú niá-siū ê Sìng-Sîn, m̄-sī beh hō͘ lín koh tńg-khì tsò lô͘-lē, iáu sing-ua̍h tī kiaⁿ-hiâⁿ tiong; lín niá-siū ê Sìng-Sîn, sī beh hō͘ lín tsiâⁿ-tsò Siōng-Tsú ê kiáⁿ-jî, tsiū án-ne, lán thang tuā-siaⁿ huah: "A-pa, Thiⁿ-Pē ah！" 16 Sìng-Sîn ka-kī kah lán ê lîng tsò-hué kiàn-tsìng lán sī Siōng-Tsú ê kiáⁿ-jî. 17 Kì-jiân tsò kiáⁿ-jî, lán tsiū-sī I ê hō͘-sû. Lán sī Siōng-Tsú ê hō͘-sû, koh kah Ki-tok tâng tsò hō͘-sû. Lán nā kah Iâ-so͘ tâng siū-khó͘, lán mā ē kah I tsò-hué niá-siū îng-kng.

Tsiong-lâi ê Îng-kng
18 Guá siūⁿ lán tsit-sî ê kan-khó͘ kah teh-beh tuì lán hián-bîng ê îng-kng bē pí-tit. 19 Siū-tsō-bu̍t lóng pik-tshiat teh thìng-hāu Siōng-Tsú tsìng kiáⁿ-jî ê hián-hiān. 20 In-uī siū-tsō-bu̍t bē-tàng ta̍t-kàu siū-tsō ê bo̍k-tik, m̄-sī tshut-tī in ê pún-ì, sī Siōng-Tsú ê tsí-ì, m̄-koh siū-tsō-bu̍t iáu-teh ǹg-bāng, 21 tsiū-sī ū tsi̍t ji̍t in pún-sin mā beh siū tháu-pàng lâi thuat-lī ē pāi-huāi ê khu-sok, thang kah Siōng-Tsú ê kiáⁿ-jî hióng-siū îng-kng ê tsū-iû. 22 Lán tsai, só͘-ū siū-tsō-bu̍t tsit-má iáu-teh thó͘-khuì ai-kiò, ná tshin-tshiūⁿ teh king-giām sing-sán ê thòng-khó͘. 23 M̄-nā siū-tsō-bu̍t án-ne, liân lán tsiah-ê tit-tio̍h Sìng-Sîn ê thâu-tsuí kué-tsí ê lâng mā teh thó͘-khuì, teh thìng-hāu Siōng-Tsú tsiap-la̍p lán tsò I ê kiáⁿ-jî, hō͘ lán kui-ê lâng tit-tio̍h sio̍k-huê. 24 In-uī lán tit-kiù sī tuì tsit-khuán ê ǹg-bāng. Ǹg-bāng nā khuàⁿ-ē-tio̍h tsiū m̄-sī ǹg-bāng. Khuàⁿ-ē-tio̍h ê ǹg-bāng, ná tio̍h koh khì ǹg-bāng? 25 Lán nā ǹg-bāng hit-ê khuàⁿ-bē-tio̍h-.ê, tsiū ē jím-nāi thìng-hāu. 26 Sìng-Sîn mā tshin-tshiūⁿ án-ne, tī lán nńg-tsiáⁿ ê sî kā lán hû-tshî, in-uī lán m̄-tsai ing-kai tio̍h án-tsuáⁿ kî-tó tsiah tio̍h, m̄-koh Sìng-Sîn ka-kī īng lâng īng uē bē-tàng piáu-ta̍t ê thó͘-khuì teh thè lán kî-kiû. 27 Kàm-tshat lâng ê sim ê Siōng-Tsú tsai Sìng-Sîn ê ì-sù, in-uī Sìng-Sîn sī tsiàu Siōng-Tsú ê ì-sù lâi thè sìn-tô͘ kî-kiû. 28 Lán tsai, Siōng-Tsú hō͘ hiah-ê thiàⁿ I ê lâng, tsiū-sī tsiàu I ka-kī ê tsí-ì suán-tiàu ê, kah I tâng-kang, hō͘ bān-sū tuì in lóng ū lī-ik. 29 In-uī Siōng-Tsú tāi-sing kíng-suán ê lâng, mā tāi-sing tiāⁿ-tio̍h hō͘ in kah I ê Kiáⁿ ê hîng-siōng sio-kāng, thang hō͘ I ê Kiáⁿ tī tsē-tsē hiaⁿ-tī tiong tsò Tuā-Kiáⁿ. 30 Hiah-ê ī-sian tiāⁿ-tio̍h ê lâng, Siōng-Tsú mā kā in kíng-tiàu. Í-king kíng-tiàu ê, I mā kā in suan-phuàⁿ tsò gī-lâng, thang hō͘ I ê Kiáⁿ tī tsin-tsē hiaⁿ-tī ê tiong-kan tsò Tuā-Kiáⁿ.

Siōng-Tsú ê Thiàⁿ
31 Taⁿ kóng kàu tsia lán beh koh kóng sím-mi̍h? Siōng-Tsú nā uī lán, siáⁿ-lâng ē kah lán tsò tuì-ti̍k? 32 Siōng-Tsú kì-jiân bô sioh ka-kī ê Kiáⁿ, uī-tio̍h lán tsìng-lâng hi-sing, kám bē suà tsiong bān-bu̍t pe̍h-pe̍h sù hō͘ lán? 33 Siáⁿ-lâng ē-tàng khòng-kò Siōng-Tsú ê suán-bîn? Suan-phuàⁿ in tsò gī-lâng ê sī Siōng-Tsú. 34 Nā án-ne, siáⁿ-lâng ē-tàng kā in tīng-tsuē? M̄-sī Ki-tok Iâ-so͘, I í-king sí à. Siōng-Tsú koh hō͘ I tuì sí-lâng tiong koh ua̍h khí-lâi, tsē tī Siōng-Tsú ê tsiàⁿ-pîng, mā thè lán kî-kiû. 35 Siáⁿ-lâng ē-tàng tshiat-tn̄g Ki-tok tuì lán ê thiàⁿ? Kám sī huān-lān, sī khùn-khó͘, sī pik-hāi, sī iau-gō, sī thǹg-pak-theh, sī guî-hiám, á-sī hō͘ lāi-to thâi-sí? 36 Tsiàu Sìng-king só͘ kì-tsài, kóng, "Uī-tio̍h lí ê iân-kò͘, guán kui-ji̍t bīn-tuì sí-bông ê ui-hia̍p. Guán hō͘ lâng khuàⁿ-tsò teh-beh hō͘ lâng thâi ê iûⁿ."( tsù: SPh 44:22) 37 Lóng m̄-sī, tī tsiah-ê só͘-ū ê tāi-tsì, lán tuì thiàⁿ lán ê Siōng-Tsú tik-sìng kah ū tshun. 38 In-uī guá khak-sìn bô-lūn sī sí, sī ua̍h, sī thiⁿ-sài, sī tsiáng-kuân-tsiá, sī hiān-kim ê, sī tsiong-lâi-.ê, ū kuân-lîng ê, 39 sī thiⁿ-tíng, sī tē-tsiūⁿ, á-sī jīm-hô siū-tsō-bu̍t, lóng bē-tàng tshiat-tn̄g Siōng-Tsú thong-kuè Tsú Ki-tok Iâ-so͘ tuì lán ê thiàⁿ!