《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第九章

作者 巴克禮普世版小組 2014.11.09

Siōng-Tsú ê Suán-bîn
1 Guá tsò tsi̍t-ê sio̍k Ki-tok ê lâng kóng-uē si̍t-tsāi bô pe̍h-tsha̍t, guá ê liông-sim siū Sìng-Sîn kám-tōng kā guá tsò kiàn-tsìng. 2 Guá hui-siông pi-siong, sim-lāi thòng-khó͘ bô suah. 3 Guá kuan-sim guá ê tông-pau, guá ê kut-jio̍k tsì-tshin. Nā sī uī-tio̍h in tio̍h siū Siōng-Tsú tsiù-tsó͘ pàng-sak, tio̍h kah Ki-tok keh-lī mā kam-guān. 4 In sī Í-sik-lia̍t bîn-tso̍k. Siōng-Tsú kíng-suán in tsò kiáⁿ-jî, sù in îng-kng, kah in li̍p-iok, koh hō͘ in lu̍t-huat, tsông-pài ê lé-gî kah ìng-ín. 5 In sī kok tso̍k-tiúⁿ ê kiáⁿ-sun, tsiàu hiat-thóng lâi kóng, Ki-tok mā kah in kāng-tso̍k. Guān tshiau-ua̍t bān-bu̍t ê Siōng-Tsú tit-tio̍h o-ló kàu bān sè-tāi. A-men. 6 Án-ne m̄-sī kóng Siōng-Tsú ê ìng-ín bô si̍t-hiān, in-uī m̄-sī só͘-ū ê Í-sik-lia̍t-lâng lóng sī Siōng-Tsú ê suán-bîn. 7 A-pik-la̍h-hán ê kiáⁿ-sun mā bô lóng sī ìng-ín ê kiáⁿ-jî. Siōng-Tsú bat tuì A-pik-la̍h-hán kóng, “Tuì Í-sat seⁿ-.ê tsiah ē-tàng kiò-tsò lí ê kiáⁿ-sun.”( tsù: CSK 21:12) 8 Án-ne sī kóng, m̄-sī jio̍k-thé seⁿ ê kiáⁿ tsiū sǹg-tsò Siōng-Tsú ê kiáⁿ-jî. Tsí-ū tuì Siōng-Tsú ê ìng-ín seⁿ ê tsiah sǹg-tsò Siōng-Tsú ê kiáⁿ-sun. 9 In-uī ìng-ín ê uē sī án-ne kóng, "Mê-nî tsit-ê sî, Guá ē koh lâi, Sat-la̍h beh seⁿ tsi̍t-ê tsa-po͘-kiáⁿ.”( tsù: CSK 18:10, 14) 10 M̄-nā án-ne, Lī-pik-ka seⁿ ê nn̄g-ê kiáⁿ mā sī tuì kāng tsi̍t-ê lâng, tsiū-sī lán ê tsó͘-sian Í-sat lâi huâi-īn. 11 Siōng-Tsú uī-tio̍h beh piáu-bîng I kíng-suán lâng, sī tsiàu I pún-sin tiāⁿ-tio̍h ê bo̍k-tik, m̄-sī kin-kì lâng ê hîng-uî, tsiū tī tsi̍t-tuì siang-seⁿ-á-kiáⁿ iáu-buē tshut-sì, iáu-buē tsò hó-pháiⁿ-sū í-tsîng, 12 tsiū kā Lī-pik-ka kóng, "Tuā-hàn-ê ē ho̍k-sāi sè-hàn-ê."( tsù: CSK 25:23) 13 Tsiàu Sìng-king kì-tsài: Guá kah-ì Ngá-kok, bô kah-ì Í-sò.( tsù: MLK 1:2-3) 14 Án-ne lán beh án-tsuáⁿ kóng? Siōng-Tsú bô kong-tō sī-bô? Tsua̍t-tuì m̄-sī. 15 In-uī I bat tuì Mô͘-se kóng, ”Guá beh liân-bín guá ài liân-bín ê lâng, guá beh thé-thiap guá ài thé-thiap ê lâng.”( tsù: CAK 33:19) 16 Khó-kiàn Siōng-Tsú ê kíng-suán sī kin-kì I ê liân-bín, m̄-sī kin-kì lâng ê ì-guān á-sī ló͘-li̍k. 17 Sìng-king kì-tsài Siōng-Tsú ū tuì Huat-ló kóng, “Guá siat-li̍p lí ê bo̍k-tik sī beh īng lí lâi hián-bîng guá ê kuân-lîng, hō͘ Guá ê miâ thuân kàu tsuân sè-kài.”( tsù: CAK 9:16) 18 Só͘-í Siōng-Tsú beh liân-bín sím-mi̍h lâng tsiū liân-bín sím-mi̍h lâng, beh hō͘ sím-mi̍h lâng sim-ngē tsiū hō͘ sím-mi̍h lâng sim-ngē.

Siōng-Tsú ê Siū-khì kah Liân-bín
19 Án-ne lí ē mn̄g guá kóng, "Tsuáⁿ-iūⁿ Siōng-Tsú iáu-teh tsik-pī lâng? siáⁿ-lâng káⁿ huán-khòng I ê tsí-ì?" 20 Lí tsit-ê lâng sǹg sím-mi̍h, lí káⁿ kah Siōng-Tsú tú-tshuì? Siū-tsō-bu̍t kám ē tuì tshòng-tsō-tsiá kóng,“Lí ná-ē kā guá tsō kah án-ne?”( tsù: ISA 29:16; 45:9) 21 Pêⁿ-pêⁿ tsi̍t-tè liâm-thô͘, kám-m̄ sī tshut-tsāi sio-huî sai-hū beh kā-i lia̍p-tsò kuì-khì ê khì-kū, á-sī tsi̍t-tè tsho͘-sio̍k ê khì-kū? 22 Siōng-Tsú só͘-tsò mā tshin-tshiūⁿ án-ne, I sui-jiân ē-tàng suî-sî tsiàu I ê ì-sù hián-bîng I ê siū-khì, koh hō͘ lâng tsai I ê kuân-lîng, iáu-koh tuā-tuā khuan-iông jím-nāi hiah-ê jiá I siū-khì ê lâng, tsiū-sī hiah-ê ing-kai bia̍t-bông ê lâng. 23 Tse sī uī-tio̍h beh hō͘ lâng bîng-pi̍k, Siōng-Tsú beh siúⁿ-sù hong-sīng ê îng-iāu, hō͘ hiah-ê tit-tio̍h liân-bín ê tuì-siōng, tsiū-sī Siōng-Tsú só͘ ī-pī, beh lâi niá-siū I ê îng-kng hiah-ê lâng. 24 Lán lóng sī I ho͘-tiàu ê lâng, m̄-nā tuì Iû-thài-lâng, mā tuì Guā-pang-lâng ho͘-tiàu. 25 Tsiàu I tī Hô-se-a-su só͘ kóng,“Hiah-ê m̄-sī Guá ê tsú-bîn, Guá beh tshing in tsò ‘Guá ê tsú-bîn'; Hiah-ê m̄-sī Guá só͘ ài ê, Guá beh tshing in tsò‘Guá só͘ ài ê'.( tsù: HSA 2:23) 26 Tī khah-tsá bat kā in kóng 'Lín m̄-sī Guá ê tsú-bîn' ê só͘-tsāi, kāng-khuán tī hia in beh kiò-tsò 'íng-ua̍h Siōng-Tsú ê kiáⁿ.'”( tsù: HSA 1:10) 27 Kuan-hē Í-sik-lia̍t-lâng, Í-sài-a bat suan-pò͘ kóng,“Í-sik-lia̍t ê kiáⁿ-sun, sui-jiân sò͘-ba̍k tshin-tshiūⁿ hái-sua hiah-ni̍h tsē, beh tit-tio̍h kiù-.ê, sī só͘ tshun ê tsió-sò͘ niā-niā. 28 In-uī Tsú tī tē-tsiūⁿ beh tsin-kín koh thiat-té lâi tsip-hîng sím-phuàⁿ.”( tsù: ISA 10:22-23 LXX) 29 Tú tshin-tshiūⁿ Í-sài-a bat kóng,“Nā m̄-sī bān-kun ê Tsú kā lán lâu tsi̍t-kuá kiáⁿ-sun tsò tsíng, lán tsá to̍h tshin-tshiūⁿ Só͘-to-má kah Gô-mô͘-la̍h siū huí-bia̍t ā.”( tsù: ISA 1:9)

Í-sik-lia̍t-lâng Kah Hok-im
30 Án-ne lán beh án-tsuáⁿ kóng? Guā-pang-lâng bô tui-kiû kah Siōng-Tsú ê hô-ha̍p kuan-hē, tian-tò thong-kuè sìn lâi tit-tio̍h kah Siōng-Tsú ê hô-ha̍p kuan-hē. 31 M̄-koh Í-sik-lia̍t-lâng phah-piàⁿ tui-kiû tuì lu̍t-huat lâi kah Siōng-Tsú ū hô-ha̍p ê kuan-he, kiat-kó mā bô tit-tio̍h. 32 Ná-ē án-ne? In-uī in bô tuì sìn, sī tuì khò in ê hîng-uî. Kiat-kio̍k sī in khì that-tio̍h hit-tè hō͘ lâng pua̍h-tó ê tsio̍h-thâu. 33 Sìng-king ū án-ne kì-tsài,“Lí khuàⁿ, Guá tsiong ē hō͘ lâng that-tio̍h ê tsio̍h, ē hō͘ lâng pua̍h-tó ê tuā-tsio̍h, khǹg tī Sik-an, m̄-koh sìn-khò I ê lâng bē tú-tioh sit-bāng.”( tsù: ISA 28:16; 8:14)