《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十章

作者 巴克禮普世版小組 2014.11.16

1 Hiaⁿ-tī tsí-muē ah, guá ê sim pik-tshiat teh ǹg-bāng, koh put-sî tuì Siōng-Tsú teh kî-kiû ê, tsiū-sī guá ê tông-pau Í-sik-lia̍t-lâng ê tit-kiù. 2 Guá ē-tàng pó-tsìng, in tuì Siōng-Tsú khak-si̍t sī tsin jia̍t-sim, m̄-koh in ê jia̍t-sim m̄-sī kin-kì tsìng-khak ê liáu-kái. 3 In-uī in bô bîng-pi̍k Siōng-Tsú ê gī, ài tsiàu ka-kī ê ì-sù khì kiàn-li̍p kah Siōng-Tsú ê hô-ha̍p kuan-hē, suah bô sūn-tsiàu Siōng-Tsú hō͘ lâng tsiâⁿ-tsò gī-lâng ê hong-huat. 4 Kî-si̍t Ki-tok pún-sin tsiū-sī lu̍t-huat ê bo̍k-piau, in-uī I hō͘ só͘-ū sìn ê lâng ē-tàng kah Siōng-Tsú ū hô-ha̍p ê kuan-hē.

Tsuân Jîn-luī ê Tsín-kiù
5 Kuan-hē tuì lu̍t-huat tit-tio̍h ê gī, Mô͘-se ū án-ne siá kóng, "Tsun-siú lu̍t-huat ê lâng khò lu̍t-huat lâi ua̍h."( tsù: LBK 18:5) 6 M̄-koh kuan-hē "in-sìn-tshing-gī", Sìng-king ū án-ne kóng,“Lí m̄-thang sim-lāi siūⁿ-kóng, 'Siáⁿ-lâng beh peh tsiūⁿ-thiⁿ?’( tsù: SBK 9:4; 30:12)(Ì-sù tsiū-sī, beh-khì tshuā Ki-tok lo̍h-lâi). 7 Mā m̄-thang siūⁿ-kóng, ’Siáⁿ-lâng ē lo̍h-khì im-hú?’( tsù: SBK 30:13) (Ì-sù tsiū-sī, ē khì tshuā Ki-tok tuì sí-lâng tiong khí-lâi). 8 Tsiah-ê uē tàu-té sī sím-mi̍h ì-sù? Ì-sù tsiū-sī“Siōng-Tsú ê uē tī lí ê sin-piⁿ, tī lí ê tshuì-ni̍h, tī lí ê sim-lāi.” Tse tsiū-sī guán só͘ thuân sìn ê tō-lí. 9 Lí nā īng tshuì kò-pi̍k Iâ-so͘ sī Tsú, sim-lāi mā siong-sìn Siōng-Tsú hō͘ I tuì sí-lâng tiong koh-ua̍h, tsiū ē tit-tio̍h tsín-kiù. 10 In-uī lâng nā sim sìn tsiū tit-tio̍h tshing-gī, koh īng tshuì kong-khai piáu-bîng, tsiū ē tit-tio̍h tsín-kiù. 11 Sìng-king ū án-ne kóng,“Sìn I ê lâng lóng bē tú-tio̍h sit-bōng."( tsù: ISA 28:16) 12 Iû-thài-lâng kah Guā-pang-lâng lóng bô tsha-pia̍t, in-uī ū kāng tsi̍t-ê Tsú sī bān-bîn ê Siōng-Tsú. I ē tuā-tuā sù-hok hō͘ só͘-ū kiû-kiò I ê lâng. 13 In-uī Sìng-king ū kì-tsài kóng, "Só͘-ū kiû-kiò Tsú ê miâ ê lâng lóng ē tit-tio̍h tsín-kiù.”( tsù: Ii 2:32) 14 M̄-koh in nā iáu-buē sìn, ná-ē kiû-kiò I? Nā bô thiaⁿ-tio̍h, ná-ē sìn I? Nā bô-lâng thuân, in ná-ē thiaⁿ-tio̍h? 15 Nā bô siū tshe-phài, in ná-ē khì thuân? Tsiàu Sìng-king kì-tsài:“Thuân-pò hok-im ê lâng, in ê kha-jiah sī juā-ni̍h-á suí!”( tsù: ISA 52:7; NHS 1:15) 16 M̄-koh m̄-sī só͘-ū ê lâng lóng sūn-ho̍k tsit-ê hok-im, Í-sài-a kóng,“Tsú ah, sím-mi̍h lâng ū siong-sìn guán só͘ thuân ê sìn-sit ah?”( tsù: ISA 53:1) 17 Án-ne, sìn sī tuì thiaⁿ sìn-sit khai-sí, thiaⁿ sī tsí thiaⁿ Ki-tok ê uē. 18 M̄-koh guá beh mn̄g, in kám tsin-tsiàⁿ lóng m̄-bat thiaⁿ-tio̍h? Tong-jiân bat, in-uī Sìng-king án-ne kì-tsài:“In ê siaⁿ-im thuân kàu tsuân sè-kài, in ê uē thuân kàu thiⁿ-piⁿ hái-kak.( tsù: SPh 19:4) 19 Guá beh koh mn̄g, Í-sik-lia̍t-lâng kám tsin-tsiàⁿ m̄-tsai? Mô͘-se tsá-tsîng to̍h ū kóng-kuè, "Guá beh īng m̄-sī Guá ê tsú-bîn ê lâng, lâi kik-khí lín ê tsi̍t-tò͘, īng m̄-bat Guá ê Guā-pang-lâng, lâi kik-khí lín ê siū-khì.”( tsù: SBK 32:21) 20 Āu-lâi Í-sài-a mā hó-táⁿ thè Siōng-Tsú kóng,“Bô tshuē Guá-.ê, Guá hō͘ in tshuē-tio̍h; bô tui-kiû Guá-.ê, Guá tuì in hián-hiān.”( tsù) ISA 65:1 21 M̄-koh kóng-kàu Í-sik-lia̍t-lâng, Í-sài-a kóng,“Guá kui-ji̍t tshun-tshiú teh thìng-hāu m̄ sūn-ho̍k koh puē-gi̍k ê tsú-bîn.”( tsù: ISA 65:2)