《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十一章

作者 巴克禮普世版小組 2014.11.23

1 Siōng-Tsú Liân-bín Í-sik-lia̍t Bîn-tso̍k Án-ne guá beh mn̄g lín, Siōng-Tsú kám ū khì-sak I ê tsú-bîn? Tsua̍t-tuì bô, in-uī guá mā sī Í-sik-lia̍t-lâng, sī A-pik-la̍h-hán ê kiáⁿ-sun, sio̍k Piān-ngá-bín tsi-tso̍k. 2 Siōng-Tsú m̄-bat pàng-sak I tsá to̍h kíng-suán ê tsú-bîn. Lín kám m̄-tsai Sìng-king ū kì-tsài kuan-hē Í-lī-a tuì Siōng-Tsú khòng-kò Í-sik-lia̍t-lâng ê tāi-tsì? 3 I kóng,“Tsú ah, in thâi-sí Lí ê sian-ti, thiah-huí Lí ê tsè-tuâⁿ, tsí-ū tshun guá tī-teh, in mā teh siàu-siūⁿ guá ê sèⁿ-miā.”( tsù: LOS 19:10, 14) 4 M̄-koh Siōng-Tsú án-tsuáⁿ ìn-tap? I án-ne kóng,“Guá ū uī-tio̍h ka-kī lâu tshit-tshing-ê m̄-bat kuī-pài Pa-li̍k ê lâng."( tsù: LOS 19:18) 5 Tsit-má mā-sī án-ne, Siōng-Tsú ū lâu īng un-tián kíng-suán ê tsi̍t-kuá lâng. 6 Kì-jiân sī Siōng-Tsú ê un-tián, tsiū m̄-sī tsiàu lâng ê hîng-uî. Un-tián nā-sī tsiàu lâng ê hîng-uî, hit-ê un-tián tsiū m̄-sī un-tián. 7 Án-ne kiat-kio̍k án-tsuáⁿ? Í-sik-lia̍t-lâng bô tit-tio̍h in teh tui-kiû ê, tsí-ū Siōng-Tsú kíng-suán ê tsi̍t-kuá lâng ū tit-tio̍h, kî-tha ê lâng sim ngē m̄-thiaⁿ. 8 Tsiàu Sìng-king só͘ kì-tsài:“ Siōng-Tsú hō͘ in ê sim-lîng bâ-pì, ba̍k-tsiu khuàⁿ bē kìⁿ, hīⁿ-khang thiaⁿ bē tio̍h, ti̍t-kàu kin-á-ji̍t.”( tsù: SBK 29:4; ISA 29:10) 9 Tāi-pi̍t kóng,“Tio̍h hō͘ in ê iàn-huē piàn-tsiâⁿ in ê hām-kheⁿ, lô-bāng, hō͘ in pua̍h-tó lâi tsò in ê pò-ìng. 10 Tio̍h hō͘ in ê ba̍k-tsiu hue, bē-tàng khuàⁿ-kìⁿ. Tio̍h hō͘ in ê kha-tsiah-phiaⁿ íng-uán khiau-ku.”( tsù: SPh 69:22-23) 11 Án-ne guá beh mn̄g, ”Í-sik-lia̍t lâng pua̍h-tó, kám lóng peh bē khí-lâi?” Tsua̍t-tuì ē!, in-uī in ê huān-tsuē, tsín-kiù suah lîm-kàu Guā-pang-lâng, tian-tò ē kik-khí in ê tsi̍t-tò͘. 12 Kì-jiân Í-sik-lia̍t-lâng ê huān-tsuē ē hō͘ sè-kan-lâng tit-tio̍h hong-sīng ê tsiok-hok, in ê sit-lo̍h ē hō͘ Guā-pang-lâng tit-tio̍h hù-tsiok. nā-sī só͘-ū ê Í-sik-lia̍t lâng lóng kui-hiòng Siōng-Tsú, hit-ê tsiok-hok kám m̄-sī koh-khah tuā!

Siōng-Tsú Tsín-kiù Guā-pang-lâng
13 Guá sī tuì lín Guā-pang-lâng kóng, in-uī guá sī Guā-pang-lâng ê sù-tô͘, tuì guá ê suan-kàu tsit-hūn kám-kak tsin kong-îng. 14 Khuàⁿ án-ne ē kik-khí guá ê tông-pau ê tsi̍t-tò͘, thang kiù in tiong-kan ê tsi̍t-kuá lâng. 15 Í-sik-lia̍t-lâng siū khì-sak nā ē hō͘ sè-kan-lâng kah Siōng-Tsú hô-hó, in koh siū tsiap-la̍p, kám m̄-sī tshin-tshiūⁿ tuì sí koh-ua̍h? 16 Thâu-tsi̍t-tè mī-hún-tshè nā sìng-pia̍t hiàn hō͘ Siōng-Tsú, kui-sn̂g mā lóng ē sìng-kiat. Tshiū-kin nā sìng-pia̍t hiàn hō͘ Siōng-Tsú, liân tshiū-ki mā ē sìng-kiat. 17 Lín sui-jiân sī iá-sing ê kan-ná-tshiū ê tshiū-ki, nā tsiap-ki tī siū tsai-puê ê kan-ná-tshiū, lâi tāi-thè tsi̍t-kuá at-tn̄g ê, tsiū tuì kāng hit-tsâng tshiū-kin hun-hióng hong-hù ê îng-ióng-hun. 18 Só͘-í lín m̄-thang tuì hiah-ê at-tn̄g ê tshiū-ki khua-kháu, siūⁿ kóng lín pí in khah-hó. Lín nā beh khua-kháu, tio̍h ē kì-tit, sī lín uá-khò tshiū-kin teh ua̍h, m̄-sī tshiū-kin uá-khò lín teh ua̍h. 19 Lí kiám-tshái ē kóng,“Tshiū-ki tsián khí-lâi sī uī-tio̍h beh hō͘ guá ē-tàng tsiap lo̍h-khì.” 20 Bô-m̄-tio̍h, in-uī in m̄-sìn tsiah hō͘ lâng tsián khí-lâi, lín sī in-uī ū sìn tsiah khiā ē-tiâu, m̄-koh lín m̄-thang kiau-ngō͘, tian-tò tio̍h kiaⁿ-hiâⁿ. 21 In-uī Siōng-Tsú nā bô kā tsū-jiân seⁿ tshut-lâi ê tshiū-ki lâu lo̍h-lâi, khó-lîng mā bô it-tīng ē kā lín lâu lo̍h-lâi. 22 Án-ne lán tio̍h tsai Siōng-Tsú sī tsû-ài koh giâm-keh, tuì tuī-lo̍h ê lâng tsin giâm-keh, m̄-koh lín nā kè-sio̍k uá-khò I ê tsû-ài, I tsiū ē tuì lín tsû-ài. Nā bô, I mā ē kā lín tsián khí-lâi. 23 Hiah-ê siū tsián ê Í-sik-lia̍t-lâng nā bô-koh kò͘-tsip m̄-sìn, mā ē koh tsiap tò-tńg-khì guân-lâi hit-tsâng tshiū, in-uī Siōng-Tsú ū kuân-lîng kā in tsiap tò-tńg-khì. 24 Lín tsiah-ê tuì iá-sing kan-ná-tshiū tsián khí-lâi ê tshiū-ki, to ē-tàng tsiap tī bô kāng pún-sìng siū tsai-puê ê kan-ná tshiū, hô-hòng sī hiah-ê guân-lâi ê tshiū-ki kám bē koh-khah hó tsiap tò-tńg-khì?

Siōng-Tsú Liân-bín Tsuân Jîn-luī
25 Hiaⁿ-tī tsí-muē ah, guá ài lín tsai tsit-ê ò-biāu, bián-tit lín ka-kī lia̍h-tsò tì-huī. Tsi̍t-pō͘-hūn ê Í-sik-lia̍t-lâng tsiām-sî ngē-sim, thìng-hāu kàu Guā-pang-lâng tsuân-pō͘ kui Tsú uî-tsí. 26 Án-ne só͘-ū ê Í-sik-lia̍t-lâng lóng ē tit-kiù. Tsiàu Sìng-king kì-tsài, "Tsín-kiù-tsiá ē tuì Sûn-siâⁿ tshut-lâi, kā Ngá-kok ê put-gī tû-khì. 27 Hit-sî Guá ē sià-bián in ê tsuē, tse sī Guá kah in só͘ li̍p ê iok.”( tsù: ISA 59:20-21; 27:9; ILB 31:33-34) 28 Tuì hok-im ê kuan-tiám lâi khuàⁿ, in-uī lín ū tsiap-siū in khiok kū-tsua̍t, in suah piàn-tsò Siōng-Tsú ê tuì-ti̍k, m̄-koh tuì siū kíng-suán ê kuan-tiám lâi khuàⁿ, in-uī Siōng-Tsú tài-liām tuì in ê tsó͘-sian ê ìng-ín, in tsiâⁿ-tsò Siōng-Tsú só͘ thiàⁿ ê lâng. 29 In-uī Siōng-Tsú ê un-sù kah kíng-suán bē kái-piàn. 30 Lín Guā-pang-lâng kuè-khì bô sūn-ho̍k Siōng-Tsú, m̄-koh tsit-má khiok in-uī Í-sik-lia̍t-lâng bô sūn-ho̍k, lín tsiah tit-tio̍h liân-bín. 31 Tshin-tshiūⁿ án-ne, in-uī lín ū tit-tio̍h liân-bín, in tsit-má bô sūn-ho̍k Siōng-Tsú sī hō͘ in mā tit-tio̍h liân-bín. 32 Siōng-Tsú pàng só͘-ū ê lâng lóng tī bô sūn-ho̍k ê tsōng-thāi, sī uī-tio̍h beh liân-bín só͘-ū ê lâng. 33 Kui Îng-kng Hō͘ Siōng-Tsú Siōng-Tsú ê tì-huī hui-siông tshim-tîm, tì-sik hui-siông hong-hù! I ê phuàⁿ-tuàn oh-tit tshui-tshik, I ê tō-lō͘ oh-tit tshuē-tio̍h! 34 Siáⁿ-lâng tsai Tsú ê sim-ì? Siáⁿ-lâng ē-tàng thè I tshut tsú-ì?( tsù: ISA 43:13) 35 Siáⁿ-lâng bat sàng lé-mi̍h hō͘ Siōng-Tsú lâi tit-tio̍h pò-tap?( tsù: IPK 41:11) 36 In-uī bān-bu̍t lóng sī tuì I hia lâi, uá-khò I, uī-tio̍h I lâi ua̍h. Guān I tit-tio̍h îng-kng ti̍t-kàu íng-uán. Amen.